li Jesus chunchu rik’ineb’ li kok’al

Jo’ aj k’utunel re lix evangelio li Jesukristo, naqatenq’aheb’ li komon chixtawb’al ru ut chixkanab’ankil xch’ooleb’ sa’ lix k’utum, lix wankil, ut lix rahom.

Xtenq’ankileb’ li komon chi chalk rik’in li Kristo

Maak’a’ jwal aajel wi’chik ru chiru naq nakatenq’aheb’ li komon chixnawb’al ru li qaChoxahil Yuwa’ ut li Jesukristo ut chixk’eeb’al reetal lix rahomeb’ (chi’ilmanq Jwan 17:3). K’oxlaheb’ li na’leb’ xe’tenq’an aawe chixnawb’al ru ut chixraab’al li qaChoxahil Yuwa’ ut li Jesukristo. K’a’ru ak xab’aanu re tzolok chirix lix chaab’ilaleb’, lix wankileb’, ut lix rahomeb’? Chan ru naq naxk’am chaq xsahil aach’ool laa rahom chirix li qaChoxahil Yuwa’ ut li Jesukristo? K’oxla li taaruuq xb’aanunkil laa rahom ut laa wankil choq’ reheb’ li ani nakatzoleb’. (Chi’ilmanq Alma 26:16; Moises 5:11.)

Li tz’aqal naqasik’ sa’ li yu’am a’in, a’an wulak jo’ li qaChoxahil Yuwa’ ut sutq’iik rik’in a’an. Naqatz’aqob’resi a’an naq nokochal rik’in li Jesukristo (chi’ilmanq Jwan 14:6). Jo’ kan naq, jo’ kixk’ut li profeet aj Nefi, “noko’aatinak chirix li Kristo, nasaho’ sa’ qach’ool rik’in li Kristo” (2 Nefi 25:26).

Chixjunileb’ li ralal xk’ajol li Dios neke’raj ru li saqen ut li yaal nachal rik’in li Kolonel ut neke’ru chixsik’b’al xpaab’ankil a’an. Li wank choq’ aj k’utunel re lix evangelio li Jesukristo naraj naxye xtenq’ankileb’ li komon chixtawb’al ru ut chixkanab’ankil xch’ooleb’ sa’ lix k’utum, lix wankil re kolok-ix, ut lix rahom li tz’aqal re ru. K’oxla chan ru naq eb’ li na’leb’ a’in naru nakate’xtenq’a chireek’asinkil xch’ooleb’ li komon re te’xnaw ru chi us ut te’xtaaqe li Jesukristo.

Xtenq’ankileb’ li komon chixk’eeb’al reetal lix rahom, lix wankil, ut li ruxtaan li Qaawa’ sa’ lix yu’ameb’

Jwal us xnawb’al ru lix rahom, lix wankil, ut li ruxtaan li Kolonel, a’b’an aajel ajwi’ ru reek’ankil a’an. Rilb’al sa’ li loq’laj hu chan ru naq kirosob’tesiheb’ ut kixk’irtesiheb’ li kristiaan nokoxtenq’a chixk’anjelankil li qapaab’aal re naq a’an taaruuq chiqosob’tesinkil ut chiqak’irtesinkil. Qayehaq, li tzolok chirix li na’leb’ kixk’ul laj Daniel moko tz’aqal ta re ru wi ink’a’ nokoreek’asi chixkanab’ankil qach’ool rik’in li Qaawa’ naq naqanumsi xchamal ru yalb’a-ix re li kaqkojl.

Naq nakatenq’aheb’ li komon chixk’eeb’al reetal “lix q’unil uxtaan li Qaawa’” (1 Nefi 1:20), rik’ineb’ li na’leb’ xe’xk’ul sa’ xyu’am ut li xe’ril sa’ li loq’laj hu, a’an te’reek’a ut te’xnaw naq li Qaawa’ wan rik’ineb’ ut taaxaqliiq chixk’atqeb’ (chi’ilmanq Tzol’leb’ ut Sumwank 68:6). A’aneb’ te’ril ut te’reek’a’ lix tz’aqal rahom ut ruxtaan li Qaawa’ sa’ li neke’raj ru ut b’ar wankeb’ wi’.

li aatin jultikanb’il chiru li tzuul xb’aan li Jesus

Eb’ laj k’utunel naru neke’xtenq’a laj tzolonel chireek’ankil lix rahom, lix wankil, ut li ruxtaan li Kolonel.

Xtenq’ankileb’ li komon chixkawob’resinkil lix wanjikeb’ rik’in li qaChoxahil Yuwa’ ut li Jesukristo

Li rajom li k’utuk ut li tzolok chirix li Jesukristo a’an xtenq’ankileb’ li junjunq chi kristiaan chi nach’ok rik’in a’an ut rik’in li qaChoxahil Yuwa’. Tenq’aheb’ li komon re naq maajun wa te’xsach li rilob’aaleb’ rik’in li ajom a’an. Waklesiheb’ xch’ool re te’xkawob’resi xwanjikeb’ rik’in li qaChoxahil Yuwa’ ut li Jesukristo sa’ xtzolb’al li loq’laj hu, xjalb’al lix k’a’uxleb’ chi kok’ aj xsa’, aatinak rik’in li Yuwa’b’ej sa’ tij, ut xch’olob’ankil li yaal chirix li Yuwa’b’ej ut li Alalb’ej. K’ut chiruheb’ li komon rik’in aatin ut eetalil chan ru naq xb’aanunkil ut xpaab’ankil li sumwank nokoxjunaji rik’ineb’ a’an. Tenq’aheb’ chixnawb’al naq jwal loq’eb’ ut raab’ileb’ xb’aaneb’ a’an. Kawob’resi lix paab’aaleb’ naq li Jesukristo, sa’ xk’ab’a’ lix saq ruhil yu’am re xtojb’al rix li maak chi tz’aqal re ru, a’an li junaj chi b’e re sutq’iik rik’in li qaChoxahil Yuwa’. K’e xhoonaleb’ li komon re naq te’xk’ul xnawom xch’ooleb’ rik’in li Santil Musiq’ej, “li nach’olob’ank xyaalal li Yuwa’b’ej ut li K’ajolb’ej” (Moises 5:9).

Xtenq’ankileb’ li komon chixyalb’aleb’ xq’e chi wank jo’ li Jesukristo

Li jwal na’ajman, a’an naq li tzolok chirix li Jesukristo nokoreek’asi chi wulak jo’ a’an. A’b’an a’an ka’ajwi’ nak’ulman naq nokok’anjelak rik’in paab’aal, chirix ut chi sa’ li tzoleb’aal, naq naqasik’ rik’in qajom xtaaqenkil li kixb’aanu ut xk’ulb’al li rusilal. B’oqeb’ li komon chixsik’b’al xtenq’ li Santil Musiq’ej re naq te’xk’e reetal chan ru naq te’ruuq chi wulak jo’ li Kolonel. K’uteb’ xb’e ut tenq’aheb’ li komon naq neke’xyal xq’e chi wulak jo’ a’an chiru chixjunileb’ lix yu’am.

Laj Jakob kixk’ut naq “chixjunil li k’a’aq re ru k’eeb’il xb’aan li Dios chalen chaq sa’ xtiklajik li ruchich’och’ reheb’ li winq” naru nokoxtenq’a chi tzolok chirix li Jesukristo (2 Nefi 11:4). Li k’a’ru nakak’ut naru a’anaq junaq reheb’ li k’a’aq re ru a’in. Chak’ehaq xna’aj li Jesukristo sa’ li junjunq chi na’leb’ ut tzol’leb’. Naq eb’ li tzolonel ut laa’at “nekex’aatinak chirix li Kristo, … nasaho’ sa’ eech’ool rik’in li Kristo, … nekexjultikan chirix li Kristo” (2 Nefi 25:26) li Santil Musiq’ej naru naraw eenawom chirix li Kolonel sa’ lix chamal lee k’a’uxl ut lee ch’ool. Naq nakatenq’aheb’ li komon chixnawb’al ru li qaChoxahil Yuwa’ ut li Jesukristo xjuneseb’ rib’, jwal wi’chik te’xsik’ xtenq’, royb’enihom, ut xk’irtesinkil rik’ineb’ a’an sa’ chixjunil lix yu’ameb’.