Te Mau Hau o te Ao Nei e te Basileia o te Atua

Te Peresideni Brigham Young—oia tei haamau i te mau oire, tei riro ei faatere hau e ei tavana rahi matamua no te tuhaa fenua Utah—ua faatura ïa oia i to’na hau fenua, e ua tavini atoa oia i reira. I te matahiti 1846, te faaineine ra te Feia Mo‘a i te tere mai te tuhaa fenua Iowa i te Faa no Salt Lake, e farii a‘era ratou i te hoê aniraa no ŏ mai i te hau fenua Marite no te tauturu i roto i te tama‘i i te fenua Mehico. Aita roa te hau fenua i turu na i te Feia Mo‘a i roto i ta ratou mau tamataraa i Missouri e i Illinois, noa’tu â râ, ua faatere te Peresideni Young i te faanahonahoraa i te Nuu Faehau Momoni ei tautururaa i te tama‘i e ua fafau oia i te mau taata i amui mai e, mai te mea e e haapa‘o maitai noa ratou, e ore ratou e titauhia i te aro. Ua faatupu-mau-hia taua fafauraa ra. Ua riro atoa te faanahonahoraa i te Nuu Faehau Momoni ei rave‘a i roaa mai ai te moni o tei tauturu i te Feia Mo‘a i to ratou tere i te tooâ o te râ. Ua faarue na taata e pae hanere i te mau Puhaparaa no Iseraela e haamata atura i te tere na raro e 2,000 maile te atea e tae atura i te tuhaa fenua ra i California e i te pae Moana Patitifa. Teie ta te Peresideni Young i parau no te mau taata tei amui mai i taua nuu faehau ra, “Aita vau e haamana‘o i taua pŭpŭ iti ma te ore e feruri atoa e, ‘Ia haamaitai te Atua ia ratou e a muri e a muri noa’tu.’ Te reira ïa ta tatou i rave ei faaiteraa i te Hau e, e feia haapa‘o maitai tatou” (DBY, 476). Ua faaitoito tamau noa te Peresideni Young i te Feia Mo‘a ia turu noa i to ratou hau fenua, ia haapa‘o i ta’na mau ture, e ia maiti i te feia viivii ore e te parau tia ei faatere hau.

Te Mau Haapiiraa a Brigham Young

Ia tia i te mau hau fenua i te vai-maite-raa, ia faatumuhia te reira i nia i te mau ture a te Atua e tia ai.

Ia ofati te hoê nunaa i te mau ture maitatai e ia haavi i te tahi pae o te hui raatira e aore ra i te tahi atu nunaa, e î roa a‘era te au‘a o ta’na ohipa ino, na roto i te mau ohipa a to’na iho rima, e iriti ê ïa te Atua i te mau faatere hau to ratou mana, e mo‘e-roa-hia ihora ratou; e rave â oia i te tahi feia ê, e feia veve, e feia ririhia, e feia tuhihia e te tâhitohitohia e te mau nunaa mana o te ao nei, e na’na e tuu i roto ia ratou i te mana e te paari; e tupu â hoi ratou e manuïa atoa, e ia riro ratou ei nunaa rahi i nia i te fenua nei (DBY, 357).

Te mau nunaa rahi e te puai, na’na ïa e faateitei i te tupua‘i o to ratou hanahana, ei faatupuraa i ta’na mau opuaraa iteâ-ore-hia, e ia au i to’na hinaaro, e mou atu ratou e mo‘e roa a‘era hoi i tahito ê ra. Taua mau tauiraa rahi ra, ei omuaraa ïa, ei faaineineraa hoi no te faatiaraa i to’na Basileia a muri a‘e, o te tia e a muri noa’tu a tupu noa ai i te hanahana e te mana e ia tia mai te hau mau papu i rotopu i te mau haapa‘oraa e i rotopu i te mau nunaa o te riro ei oaoaraa i te aau o te feia veve i Tei Mo‘a i Iseraela Nei, i te mea e e upootia to’na Basileia i te mau vahi atoa (DBY, 357).

Te hau a te Atua ra, o te hoê ïa hau e haamanahia ai e e faaterehia ai hoi te mau ture ia au i te parau tia, e te mana o te mau faaterehau i reira, no ŏ mai ïa i te Mana Hope (DBY, 354).

Ahiri e ua haamauhia te Basileia o te Atua, e aore ra te hau a te Atua i nia i te fenua nei, e rave rahi ïa te peu e itehia nei i teie mahana o te faaoreroa-hia (DBY, 354).

Eita ïa te hoê oire e faatiahia ia aro i te tahi ra ei faaheporaa ia ratou ia haapa‘o i ta ratou ture; eita ïa te hoê haapa‘oraa e vaiihohia ia hamani ino i te tahi ra no te huru ê o to ratou tiaturiraa e to ratou haamoriraa. E parurumaite-hia te taata atoa i te pae haapa‘oraa faaroo e te pae sotiare, eita roa hoi te hoê fenua, te hoê hau fenua, te hoê oire, e te hoê taata e tia ia faaore i te tiaraa o te tahi ra; eita te hoê amuiraa Cheresitiano e tia mai e hamani ino i te tahi ra (DBY, 354).

Te taata atoa o te ite mata i te Basileia o te Atua i te haamau-roa-raa-hia i nia i te fenua nei, e ite ïa oia i te hoê hau o te paruru i te taata tataitahi i to’na mau tiaraa. Ahiri te faatere arii ra taua hau ra i teie nei … . e ite ïa outou i te feia Katolika Roma, te feia Katolika Heleni, te feia Episopariana, te feia Perebiteriana, te feia Metodi, te feia Bapetizo, te feia o te Taatiraa o te Mau Hoa, te feia Seka, te feia Hinidi, te feia Mahometa, e te mau huru feia faaroo atoa i te paruru-maite-raa-hia i to ratou mau tiaraa tivila e to ratou mau haamoriraa noa’tu â te huru, noa’tu â te vahi e noa’tu â te mea ta ratou i hinaaro, ma te ore e haavi te tahi i te tahi. E hinaaro anei te taata parau tia i te tahi huru tiamâraa hau atu â? (DBY, 355).

Nahea te hoê hau fenua i maiti-tiamâ-hia e vai noaai? Hoê ana‘e iho rave‘a e tia ai i te reira ia vai noa. E nehenehe i te reira ia vai noa; e mea nahea râ? E nehenehe ia vai maite, mai ta te hau o te ra‘i i te vai-maite-raa, maori râ i nia i te păpă mure ore no te parau mau e te viivii ore; o te reira ana‘e ïa te niu e maite noa ai te tahi noa’tu hau (DBY, 355).

E mea tia i te faatere hau ia mau i te paari e te parau tia.

E mea au na’u te hau fenua maitai, e mea au hoi na’u ia faaterehia ïa ma te paari e te parau tia. Te hau o te ra‘i ra, ahiri e ua faatere-ino-hia te reira, ua riro ïa ei hau ino roa a‘e i roto i te mau hau atoa i nia i te fenua nei. Rahi noa’tu â te maitai o te hoê hau, ia ore te reira ia faaterehia e te feia parau tia, e riro ïa ei hau ino (DNW, 3 June 1863, 2).

Aore roa e taata e au ia faatere, e au ia arata‘i, maori râ ua … . auraro oia i te ture, e ua faaite oia ia’na ei taata au na roto i te faatiaraa i te ture tei nia a‘e ia’na, ia riro oia ei fatu no taua ture ra (DBY, 357).

[No te hau fenua maitai, e titauhia ïa te hoê faaterehau] o te tia ia parau i te parau e maramarama ai te hui raatira, ia au i to ratou ite, i te mau haamaramaramaraa atoa no te faatere-parau-tia-raa i te Hau fenua. E mea tia ia ite oia e, eaha te mau faatureraa tano no te nunaa. E mea tia atoa ia ite oia i te faatere-maitai-raa i te mana no te maiti i te mau tia, e mai te mea e e faatiahia ïa e te păpă ture, ia maiti noa oia i te taata maitai e te aravihi ei tia. E faaoti i te mau hinaaro parau tia e tei au i te ture mai tei faaitehia e te taata tei maiti ia’na, e mea tia atoa râ ia ite oia nahea ia haamaramarama ia ratou e ia faatano i to ratou feruriraa. Te mau tia maitatai atoa i roto i te hau fenua i maitihia e te hui raatira, e faaitoito noa ïa ratou no te paruru i te mau tiaraa o te taata atoa, taa ê noa’tu â ta ratou pŭpŭ politita (DBY, 363).

E mea tia i te nunaa ia faatano i to ratou mana‘o, i to ratou mana e i to ratou faaroo no te maiti i te taata maitai roa’tu ei Peresideni no ratou, e taata aita atu ta’na maa maori râ o te umara putete e te miti popaa—te hoê taata o te ore e onoono ia hau atu oia i te nunaa tei maiti ia’na, ia oaoa noa râ oia ia ora mai ta ratou e ora ra, ia oomo i te ahu mai ta ratou e oomo ra, e ia hoê oia e ratou i roto i te mau mea maitatai atoa (DBY, 363).

Te taata ta tatou i hinaaro ei faatere i te nunaa e taata ïa ua hau atu to’na onoonoraa i te maitai o te nunaa i to’na onoonoraa i te auro e te ario e te roo maitai e te arue o te taata (DBY, 364).

E hopoi‘a na te mau melo o te Ekalesia ia riro ei huiraatira paari.

Te faatere-maitai-raa te taata ia’na iho, o te niu ïa o te mau hau mau e te maitai atoa i nia anei i te ra‘i e i nia anei i te fenua nei … .Te hau i roto i te rima o te feia ino, ia hope ïa e tia ai ma te ati rahi o te taata, i roto râ i te rima o te feia parau tia, e hau mure ore ïa, e te mana no te reira, e tae atu ïa i te ra‘i (DBY, 355).

Ia ora tatou i ta tatou haapa‘oraa, ia faatura i to tatou Atua e i to’na Autahu‘araa, ei reira tatou e farii ai i te hau maitatai e te ture maitatai atoa i nia i te fenua nei… . I roto i te mau nunaa, te mau basileia e te mau hau o te ao nei, e itehia ai te mau ture, te mau faatureraa e te mau faatereraa o tei au i te maitai no te taata tahuti nei (DBY, 358).

E feia politita anei tatou? Oia, e feia politita mau â tatou. Eaha râ ta outou pŭpŭ politita e aore ra te pupŭ politita ta outou e maiti? E faaite atu vau ia outou o vai ta tatou e maiti: e maiti tatou i te taata o te turu i te mau parau tumu no te tiamâraa tivila e te tiamâraa haapa‘oraa faaroo, te taata tei ia’na te aau maitai e te ite maitai hoi ia riro ei tia; e aita roa hoi tatou e haapa‘o a‘e e pŭpŭ whiti anei, e pŭpŭ demoterati anei, … e pŭpŭ repubilica anei, … e te aha atu. O tera ïa ta tatou politita (DBY, 358).

E mea tia ia tatou, mai te huiraatira maitai atoa, ia titau i te tuu i te mau parahiraa mana te mau taata o tei ite i te mau titauraa e te mau hopoi‘a ta ratou i auraro no te hoê nunaa puai; o tei ite e o tei maramarama i te tiaturiraa faufaa i tuuhia i nia i to ratou tăpono na roto i te reo o te mau taata tei maiti ia ratou no te faatere i te mau ture (DBY, 362).

O vai ta tatou i hinaaro ei faatere hau? Ua hinaaro tatou i te taata maitai a‘e e itehia ia tatou ei tavana rahi, ei peresideni e ei tia, e no te mau toro‘a ê atu atoa tei apitihia e te tiaturiraa e te hopoi‘a; e ua roaa ana‘e ia tatou taua huru taata ra, e pure tatou no ratou ma te tuu atu i to tatou tiaturi e to tatou mana atoa no te rave i te hinaaro o te Atua e no te faaherehere ia ratou e i te nunaa i roto i te parau mau e te parau tia (DBY, 358).

Te Mau Mana‘o no te Haapiiraa

Ia tia i te mau hau fenua i te vai-maite-raa, ia faatumuhia te reira i nia i te mau ture a te Atua e tia ai.

No te aha e mea titau-roa-hia ia faatumuhia te mau hau fenua i nia i te mau ture a te Atua no te haamanuïa i te reira? (No te mau hi‘oraa, a feruri i te tiaraa mai e te toparaa atu o te mau basileia o te Ati Nephi e te Ati Lamana i tera tau e tera tau i roto i te Buka a Moromona.)
Ia au i te parau a te Peresideni Young, eaha te tumu no te mau hau fenua? (A hi‘o atoa PH&PF 134:1.)
Nahea te mau nunaa e taa ê ai ahiri e ua haamauhia te hau a te Atua i inia i te fenua nei? Ia au i te feruriraa o te Peresideni Young, eaha te tiamâraa hau ê i te faufaa ta te hoê hau a te Atua e horo‘a mai? (A hi‘o atoa PH&PF 134:4, 7, 9.)

E mea tia i te faatere hau ia mau i te paari e te parau tia.

Eaha te mau huru maitai e au ai i te hoê faatere hau? Mai te mea e e mea maramarama, e te ite e te itoito te mau faatere hau, no te aha e mea tia ia apiti-atoa-hia te reira e te parau tia e te viivii ore?
No te aha e mea tia i te hoê taata ia ite nahea ia auraro i te ture hou oia e au ai ia faatere i te hau? No te aha e mea faufaa ia faaite i te faatere hau e, ua haapa‘o ratou i te mau ture?

E hopoi‘a na te mau melo o te Ekalesia ia riro ei huiraatira paari.

No te aha “te faatere-maitai-raa te taata ia’na iho” i riro ai ei mea faufaa rahi roa no te haamanuïa i te hau fenua? Nahea te huru o te parau-tiaraa o te huiraatira e au ai i te manuïaraa o te hau fenua?
No te aha e mea faufaa ia maiti outou ia horo‘a-ana‘e-hia taua mana ra ia outou? Nahea outou ia faaoti e, o vai ta outou e maiti?
Nahea outou ia amo maitai i ta outou hopoi‘a ei huiraatira paari? (A hi‘o atoa PH&PF 134:5–6.)