Te Fariiraa i te Tara‘ehara o Iesu Mesia

Ua papa‘i te Peresideni Brigham Young i te mau parau i muri nei no te Tara‘ehara i te hoê o ta’na mau tamaiti: “E roaa ia tatou te maitai hope o te tara‘ehara faito ore i faaotihia e to tatou Fatu e to tatou Faaora—e roaa ia tatou—e hope roa a‘e, teie râ tei nia ïa i ta tatou parau tia i te haapa‘oraa i ta tatou mau fafauraa e ta tatou mau titauraa no te faatura i te mau faaueraa no te ra‘i mai tei horo‘ahia mai ia tatou” (LBY, 259). Ua haapii te Peresideni Young e, ua niuhia te mau tiatuiraa atoa no te ora i nia i te Tara‘ehara o te Faaora o Iesu Mesia.

Te Mau Haapiiraa a Brigham Young

Ua pûpû Iesu Mesia i te hoê tara‘ehara faito ore i te taata nei.

Te tiaturi nei te Feia Mo‘a i te Mau Mahana Hopea Nei i te tara‘ehara o te Faaora, e ua hinaaro vau ia faahope roa te mau Peresibutero o Iseraela i to ratou maramarama i te mau parau haapiiraa no te faaoraraa i te mau tamarii a Adamu, ia ite ratou e mea nahea ia aparau e ia vauvau i te reira (DNSW, 18 Aug. 1874, 2).

Ua tae mai Iesu no te haamau i to’na basileia o te pae varua, oia hoi no te faatumu i te hoê păpă ture o te faateitei i te varua o te taata e tae roa’tu i te faito Atua e tae roa’tu hoi i mua i te aro o te Atua, ia roaa ia ratou te hoê tia-faahou-raa hanahana e te tiaraa faaterehau i nia i te fenua nei ia tae i te ahana e riro ai te mau basileia o teie ao ei basileia no to tatou Atua e no ta’na ra Mesia. Ua tae mai oia no te faaite atoa ia’na ei Faaora o te ao nei, no te haamanii i to’na toto i nia i te fata o te tara‘ehara, e no te iriti i te e‘a ora i te feia faaroo atoa (DNW, 13 Aug. 1862, 1).

Ua faaite Iosepha [Semita] ia tatou e, o Iesu te Mesia—te Arai i ropu i te Atua e te taata—e te Faaora o te ao nei. Ua faaite oia ia tatou e, aore roa’tu â e i‘oa i nia i te mau ra‘i e i raro i te mau ra‘i, aore roa hoi e tia ei i‘oa ê atu â e ora ai te taata i mua i te aro o te Metua, maori râ na roto i te i‘oa e te ohipa a Iesu Mesia, e te tara‘ehara ta’na i faaoti i nia i te Aivi i Keranio. Ua faaite atoa mai Iosepha ia tatou e, te titau nei te Faaora ia haapa‘o-maitehia ta’na mau faaueraa, to’na mau oro‘a e ta’na atoa mau ture o tei au i to’na ra basileia, e ia na reira tatou i te rave, e roaa ia tatou te mau haamaitiaraa atoa i fafauhia i roto i ta’na ra Evanelia (DNW, 22 Oct. 1862, 1).

Ahiri aore te tara‘ehara o te Faaora, i reira iho ua mou roa ïa te mau tiaturiraa no te ora e mauhia nei e te ao Cherisetiano, ua iriti-ê-hia atu ïa te tumu no to ratou faaroo, e aore roa ïa e niu e tia mai ai ratou. Ia ore te reira, te mau heheuraa atoa ta te Atua i horo‘a na i te nunaa Ati Iuda, i te mau Etene, e ia tatou nei, ua faufaa ore ïa, e ua ere ta‘ue noa ïa tatou i te tiaturiraa atoa (DBY, 27).

Na roto i te horo‘araa o te Tara‘ehara, o ta te Mesia ana‘e e nehenehe ia horo‘a, e tia i te mau tamarii a te Atua ia farii i te hoê basileia hanahana.

Te tiaturi nei te Feia Mo◊a i te Mau Mahana Hopea Nei i te Evanelia a te Tamaiti a te Atua, no te mea hoi e, e parau mau te reira. Te tiaturi nei ratou i te bapetizoraa no te haamatara i te hara, no te taata iho e ei mono, te tiaturi nei ratou e o Iesu te Faaora o te ao nei, te tiaturi nei ratou e, te taata atoa te farii i te hoê noa a◊e hanahana, i roto i te tahi noa÷tu basileia, ua na reira ïa oia no te mea e, ua hoo mai Iesu i te reira na roto i to÷na ra tara◊ehar DBY, 30).

Ua faataahia Iesu, mai te matamua mai â, no te pohe ei faaora ia tatou, e ua farii oia i te pohe mauiui u‘ana i nia i te satauro (DBY, 27).

E nehenehe ta’u ia parau ia outou no Iesu e te tara‘ehara (e mea na reira hoi i te papa‘ihia, e te tiaturi papu nei au i te reira) e, ua pohe te Mesia no te taata atoa. Ua aufau oia i te taatoaraa o te tarahu, noa’tu â ua farii outou i te horo‘a e aore ra aita. Ia tamau noa râ tatou i te hara, i te haavare, i te eiâ, i te pari haavare ia vetahi ê, e mea tia roa ïa ia tatou ia tatarahapa e ia faarue roa i taua hara ra no te farii i te taatoaraa o te haamaitairaa o te toto o te Mesia. Ia ore ia na reira, aita ïa to te reira e mana; e titauhia te tatarahapa ia haamaitaihia tatou e te tara‘ehara. Te taata atoa ra e rave nei i te hape, ia faaea ratou i te rave i te hape; ia faaea ratou i te ofati i te ture, noa’tu â te huru; ia ora râ i te mahana tataitahi o to outou oraraa mai te au i te mau heheuraa tei horo‘hia, e ia tia hoi to outou hi‘oraa ia peehia. Ia haamana‘o tatou e, ei raro a‘e noa tatou i te mana o ta tatou nei haapa‘oraa.

E afa‘i mai Iesu, na roto i to’na iho faaoraraa, te mau tamaiti e te mau tamahine atoa a Adamu, maori râ o te mau tamaiti o te pohe mure ore, o te hurihia i hade… . E parau mau ïa, te taata atoa o te ore e faarue roa i te aroha o te Atua na roto i te raveraa i te hara, a riro atu ai ei melahi a te Diabolo, e afa‘ihia mai ïa no te farii i te hoê basileia hanahana (DBY, 382).

O Iesu te matahiapo mai te pohe maira, ia maramarama mai outou i te reira. Aita i roaa ia Enoha, aita i roaa ia Eliaha, aita i roaa ia Mose, e te tahi noa’tu â taata o tei ora i nia i te fenua nei, noa’tu â te parau tia o to’na oraraa, aita atoa i roaa ia’na te tia-faahou-raa maori râ i muri a‘e i te piiraa a te melahi i te tino o Iesu Mesia mai roto mai i te menema ra. O oia te matahiapo o te feia i pohe. O oia te Fatu no te tia-faahou-raa—oia te taata matamua tei tia mai i nia i te fenua nei mai te pohe maira ia’na i farii i te hanahana o te tia-faahou-raa (DBY, 374).

E ere i te semeio ia’na. Tei ia’na hoi te mana no te ora e no te pohe; e tia ia’na ia horo‘a i to’na ora, e e tia hoi ia’na ia rave faahou mai i te reira. O ta’na parau te reira, e e mea tia ia tatou ia tiaturi i te reira mai te mea e e tiaturi tatou i te aamu o te Faaora e te mau parau a te mau Aposetolo i papa‘ihia i roto i te Faufaa Apî. Tei roto ia Iesu i taua mana ra, e no’na hoi ïa; na te Metua te reira i horo‘a ia’na; e tutuuraa ïa no’na, e e tia ia’na ia horo‘a i to’na ora, e e tia hoi ia’na ia rave faahou mai i te reira (DBY, 340–41).

Na roto i te Tara‘ehara o te Mesia e tia ai te faaoreraa hara no te feia o te faaroo, o te tatarahapa, e o te haapa‘o i te parau a te Atua.

Ua tuuhia te pouri e te hara ia tomo mai i roto i te ao nei. Ua amu te taata i te maa i rahuihia ia au i te opuaraa i faanahonahohia mai te tau mure ore maira, ia nehenehe i te taata ia ite i te mau parau tumu e te mau mana o te pouri, ia ite ratou i te avaava e te monamona, te maitai e te ino, e ia nehenehe ia ite i te maramarama e te pouri, ia nehenehe hoi ia ratou ia farii tamau noa i te maramarama (DBY, 61).

E faaora te Evanelia i te taatoaraa o te mau tamarii a Adamu, e riro te toto o Iesu ei tara‘ehara no ta tatou mau hara, mai te mea e e farii tatou i te mau titauraa ta’na i tuu mai; e mea titauhia râ ia farii tatou i taua mau titauraa ra, ia ore râ, eita ïa te reira e faufaa na tatou (DBY, 7–8).

Ia riro ei Feia Mo‘a, e titauhia ia haavi i te mau mana‘o hape atoa i roto ia ratou tataitahi, e ia faaore-roa-hia te mau hinaaro iino atoa, e ia auraro te mau mana‘o atoa o to ratou aau i te hinaaro o te Mesia (DBY, 91).

E titauhia te tara‘ehara o te Mesia, te aroha o te Metua, te hamani maitai o te mau melahi e te aroha o te Fatu o Iesu Mesia ia parahi tamau mai ia tatou nei, e ei reira, e faaitoito hua tatou, no te faarue i teie hara i roto ia tatou, ia nehenehe ia tatou ia ora atu i teie nei ao a tomo atu ai i te basileia teretiera (DBY, 60).

Te Mau Mana‘o no te Haapiiraa

Ua pûpû Iesu Mesia i te hoê tara‘ehara faito ore i te taata nei.

No te aha Iesu i tae mai ai i nia i te fenua nei e haamau i To’na “basileia o te pae varua”? Eaha atu â te mau tumu Oia i tae mai ai i nia i te fenua nei? E mea nahea Iesu i te “iriti i te e‘a ora i te feia faaroo atoa”? E mea nahea tatou ia haapii i to tatou utuafare no te “faateitei i [to ratou] varua… e tae roa’tu i te faito Atua e tae roa’tu hoi i mua i te aro o te Atua”?
E mea nahea tatou “e ora ai … i mua i te aro o te Metua” e e “roaa [ai] ia tatou te mau haamaitairaa atoa i fafauhia i roto i ta’na ra Evanelia”?
Ia au i te parau a te Peresideni Young, nahea atura te ao Cherisetiano ahiri aore te Tara‘ehara o Iesu Mesia? (A hi‘o atoa 2 Nephi 9:6–9.)
A hi‘o i te mau papa‘iraa mo‘a i muri nei no te haapii i te tahi atu â tuhaa o te Tara‘ehara: Mosia 13:28, 32–35; Alama 7:11–12; 34:9–12; Moroni 8:8–12; PH&PF 88:6.

Na roto i te horo‘araa o te Tara‘ehara, o ta te Mesia ana‘e e nehenehe ia horo‘a, e tia i te mau tamarii a te Atua ia farii i te hoê basileia hanahana.

Ua faataahia Iesu i roto i te oraraa hou te oraraa tahuti nei “no te pohe ei faaora ia tatou.” Ua faaora mai Oia ia tatou i te taa-ê-raa i te pae tino e te taa-ê-raa o te pae varua i te Atua. Ua parauhia te reira te Tara‘ehara. Ua faaite mai te Peresideni Young e, na te Tara‘ehara o te Mesia “ua aufau oia i te taatoaraa o te tarahu, noa’tu â ua farii outou i te horo‘a e aore ra aita.” (A hi‘o atoa Helamana 14:15–18.) E mea nahea tatou ia farii faahope roa i te haamaitairaa o te Tara‘ehara?
Ua haapii te Peresideni Young e, te taata atoa te farii i te hoê noa a‘e hanahana, i roto i te tahi noa’tu basileia, ua na reira ïa oia no te mea e, ua hoo mai Iesu i te reira na roto i To’na ra Tara‘ehara. E mea nahea Oia i te aufau i ta Adamu tarahu? E mea nahea Oia i te aufau i ta tatou tarahu? (A hi‘o atoa 2 Nephi 2:8–10.)
E mea nahea i tia ai ia Iesu ia riro ei “Fatu no te tia-faahou-raa”?

Na roto i te Tara‘ehara o te Mesia e tia ai te faaoreraa hara no te feia o te faaroo, o te tatarahapa, e o te haapa‘o i te parau a te Atua.

No te aha i tuuhia ai “te pouri e te hara ia tomo mai i roto i te ao nei”? Eaha te mau utu‘a no te hi‘araa o Adamu? (A hi‘o atoa 2 Nephi 2:22–25.)
Na te Tara‘ehara e horo‘a i te faaoraraa i ta tatou mau hara na roto i te mau titauraa “i tuu[hia] mai” e to tatou Ora. Eaha te reira mau titauraa? (A hi‘o atoa 2 Nephi 2:26; PH&PF 18:44.)
Eaha te tautururaa no te ra‘i mai te roaa ia tatou ia nehenehe ia tatou “ia ora atu i teie nei ao a tomo atu ai i te basileia teretiera”?

Jesus in Gethsemane — Ua haapii te Peresideni Brigham Young e, “te taata atoa te farii i te hoê noa a‘e hanahana, i roto i te tahi noa’tu basileia, ua na reira ïa oia no te mea e, ua hoo mai Iesu i te reira na roto i to’na ra tara‘ehara (DBY, 30).