Pene 7
Te heheuraa tamau na roto i te mau peropheta ora
« Te arata‘ihia nei tatou e te hoê peropheta ora na te Atua—hoê taata o te farii nei i te heheuraa no ô mai i te Fatu ra ».
No roto mai i te oraraa o Howard W. Hunter
I muri mai i to’na patururaahia ei Peresideni no te Ekalesia i te amuiraa rahi no atopa 1994, ua faaite Howard W. Hunter i to’na mana‘o no ni‘a i ta’na mau hopoi‘a mo‘a :
« E au mau taea‘e e au mau tuahine here, mauruuru no to outou patururaa mai. Tei mua vau ia outou ma te haehaa e te auraro, e ma te oto no te faaru‘eraa mai aita i maoro a‘enei to tatou peropheta here, o te peresideni Ezra Taft Benson. Ua fifi rii to’u aau i te faaru‘eraa to’u hoa iti, e a taa noa’tu te reira, i te fâraa mai teie mau hopoi‘a apî i mua ia’u.
« E roimata iti rahi ta’u i manii e ua imi au i to’u Metua i te Ao ra na roto i te pure tuutuu ore, ia aifaito vau i teie piiraa rahi e te mo‘a : Ua pure au ia vai ti‘amâ noa vau no te amoraa i teie ti‘araa, tei amohia e ahuru ma toru taata i roto i teie tau tuuraa. Peneia‘e o ratou ana‘e, ratou e hi‘o mai nei mai te tahi atu pae o te paruru, o te nehenehe e maramarama roa i te teimaha o teie hopoi‘a e na reira atoa te turu‘iraa rahi e vai ra i ni‘a i te Fatu a farii ai au i teie piiraa mo‘a ».
Ua faataa mai te peresideni Hunter e, ua itehia mai ia’na te puai e te tamarûraa i roto i to’na ti‘aturiraa papû e, te arata‘ihia nei te Ekalesia eiaha e te taata, e Iesu Mesia Iho râ, ma te faaineine e ma te faaûru i te feia Ta’na e pii nei ia peresideni :
« To’u nei puai rahi roa a‘e i roto i teie mau ava‘e i ma‘iri a‘enei, o to’u ïa iteraa papû tamau e, na te Atua teie ohipa, eiaha na te taata. O Iesu Mesia te upoo o teie Ekalesia. O o’na tera e arata‘i ra, ma te parau e te ohipa. Ua mauruuru roa vau, e eita e nehenehe e parau, ia piihia vau no te tahi tau ia riro ei mauihaa i roto i to’na rima no te peresideni i ta’na ekalesia. Ahani râ aita teie ite e, o te Mesia te upoo o te Ekalesia, eita ïa e roaa ia’u e i te tahi noa’tu taata ia amo i te teimaha o teie piiraa tei tae mai.
« Te farii nei au i teie hopoi‘a, te fa‘i nei au i te rima faatupu semeio o te Atua i roto i to’u oraraa. E rave rahi taime to’na faaherehereraa i to’u ora ma te tuu faahou mai i to’u puai, e rave rahi taime to’na faaho‘iraa mai ia’u mai te hiti o te mure ore e ua faati‘a ia’u ia haere â i roto i ta’u taviniraa i te tahuti nei, no te tahi faahou tau. Ua uiui haere au i te tahi taime no te aha i faahereherehia ai to’u ora. I teie nei râ, tei te hiti teie uiraa e o ta’u noa e ani nei, o te faaroo ïa e te mau pure a te mau melo o te Ekalesia ia ti‘a ia tatou ia rave amui i te ohipa, ia haa vau e outou no te faatupu i te mau opuaraa a te Atua i roto i teie tau o to tatou oraraa …
« Ua toru ahuru ma pae matahiti i teie nei to’u piiraahia ei melo no te Tino Ahuru Ma Piti. E apî rahi ta’u i fana‘o i roto i te roaraa o tera mau matahiti … E mea nee noa vau i teie nei, e mea papû râ te feruriraa, e ua vai taure‘are‘a noa to’u varua …
« Mai to’u mau taea‘e na mua’tu ia’u, te farii nei au i teie piiraa ma te haapapûraa e, e arata‘i mai te Atua i ta’na peropheta. Te farii haehaa nei au i teie piiraa ia tavini e te amui atu nei au i to’u reo i te Salamo ra, ‘O Iehova to’u puai e to’u paruru : te ti‘aturi nei to’u aau ia’na, e ua turuhia mai au’ (Salamo 28:7). »1
Ei melo no te Pŭpŭ no te Tino Ahuru Ma Piti Aposetolo, ua a‘o te peresideni Hunter i te Feia Mo‘a i te Mau Mahana Hopea Nei ia pee i te peresideni o te Ekalesia.
Te mau haapiiraa a Howard W. Hunter
1
I roto i te mau tau tuuraa atoa, ua faati‘a te Atua i te mau peropheta ei auvaha no’na.
Ia huri te hoê taata i te mau api no te Faufaa Tahito, e itehia i reira te mau papa‘iraa a te mau taata rahi no tahito ra, tei piihia ei mau peropheta. I roto i te mau mea e vai ra i roto i te mau buka no te Faufaa Apî, te vai ra te mau papa‘iraa, te mau haapiiraa e te aamu o te mau taata no te anotau no muri rii mai, tei piihia ei peropheta. Te vai atoa ra te papaa parau a te mau peropheta i te mau pae too‘a o te râ o te ao, tei faateitei i to ratou reo, no te poro i te parau a te Fatu, ma te pato‘i i te parau ti‘a ore e ma te haapii i te mau parau tumu o te evanelia. Ua vaiiho pauroa ratou i to ratou ite.
Te peropheta, e taata ïa tei piihia e tei faati‘ahia e te Fatu no te faahaere i mua te mau opuaraa a te Atua i rotopu i ta’na mau tamarii. E taata tei farii i te autahu‘araa e o te paraparau nei ma te mana. Ua riro te mau peropheta ei mau orometua e ei mau paruru no te evanelia. E faaite papû ratou no te ti‘araa atua o te Fatu Iesu Mesia. Ua tohu atea te mau peropheta i te mau ohipa e tupu ananahi, e ere râ te reira ta ratou hopoi‘a faufaa roa‘e, noa’tu e, e tapa‘o te reira no te mana peropheta.
Ua titau-noa-hia te faatereraa parau ti‘a i roto i te mau tau tuuraa atoa, e no reira te Atua i ma‘iti ai i te mau peropheta na mua roa i to ratou taeraa mai i roto i te oraraa tahuti nei [hi‘o Ieremia 1:5 : Aberahama 3:23].2
Ia tuatapapahia te mau heheuraa a te Fatu i roto i te mau papa‘iraa mo‘a, te vai ra te haapapûraa e, na te heheuraa tamau e arata‘i nei i te mau peropheta e te Ekalesia noa’tu te tau. Ahani aita te heheuraa tamau, eita ïa Noa e faaineinehia no te diluvi tei tapo‘i i te fenua. Eita ïa Aberahama e arata‘ihia mai Harana i Heberona, te fenua i parauhia. Na te heheuraa tamau i arata‘i i te mau tamarii no Iseraela mai roto atu i te faatîtîraa, no te ho‘i i te fenua i parauhia. Na roto i te mau peropheta, ua arata‘i te heheuraa i te mau tautooraa misionare, ua faatere i te patu-faahou-raa i te hiero no Solomona e ua teitei te reo no te pato‘i i te ôraa mai te mau raveraa paieti ore i rotopu ia Iseraela.
Na mua i to te Mesia haereraa i ni‘a i te ra‘i, ua parau fafau oia i na aposetolo ahuru ma hoê e toe ra : « E inaha tei piha‘i atoa iho ïa vau ia outou e tae noa’tu i te hopea o teie nei ao » (Mataio 28:20). I muri mai i to’na haereraa i ni‘a i te ra‘i, ua arata‘i oia i te Ekalesia na roto i te heheuraa e tae noa’tu te poheraa o te mau aposetolo e te taivaraa mai te Ekalesia a Iesu Mesia tei tupu i muri iho.3
I roto i te aai o te ao, e tae roa mai i teie nei mahana, ua fana‘o te Ekalesia i te hoê peropheta e te hi‘o e te heheu parau. I te upoo o te Ekalesia, te vai nei Iesu Mesia o te arata‘i nei i ta’na peropheta … Ua riro to’na na tauturu [e] te mau melo no te Apooraa no te Tino Ahuru Ma Piti… ei mau peropheta atoa e ei mau hi‘o e ei mau heheu parau … Aita e faufaa i te mau melo o te Ekalesia ia faaroo i te hoê pû e ta‘iraa papû ore to’na. E nehenehe ta ratou ia ti‘aturi i te reo o to ratou feia faatere, ma te ite e, te arata‘ihia nei ratou e te Fatu.4
2
Te horo‘a nei te Atua i te arata‘iraa i Ta’na mau tamarii na roto i te hoê peropheta ora i teie mahana.
Ua itehia i roto i te hoê orama te tahi tapa‘o taa ê o te mau mahana hopea hou te tae-piti-raa mai o te Fatu, ua itehia e tera aposetolo tei papa‘i i te buka Apokalupo. Ua parau oia e :
« Hi‘o atura vau i te hoê melahi i te maueraa na ropu i te rêva nei : ma te evanelia e ti‘a i te vairaa ra ei pororaa’tu i te feia e parahi i te ao nei ra, i te mau fenua atoa, e te mau opu atoa, e te mau reo atoa, e te mau nunaa atoa » (Apokalupo 14:6) …
Te faa‘ite papû nei tatou i to te ao atoa nei e, ua fâ a‘ena mai te mau tavini no te ra‘i mai i to tatou nei anotau, no te hopoi mai i te haamanaraa mai ni‘a mai i te ra‘i e no te faaho‘i faahou mai i te mau parau mau tei mo‘e no te mau haapiiraa e te mau raveraa iino. Ua paraparau faahou mai te Atua e te tamau nei ho‘i i te horo‘a mai i te arata‘iraa i Ta’na mau tamarii na roto i te hoê peropheta ora i teie mahana. Te faaite nei tatou e, mai tei parau-fafau-hia mai, tei piha‘i iho noa oia i ta’na mau tavini e te faatere nei oia i te mau ohipa a Ta’na Ekalesia i te mau fenua atoa. Mai i tahito ra, te faatere nei te heheuraa i te ohipa a te mau misionare, te paturaa o te mau hiero, te piiraa o te mau ti‘a faatere i roto i te autahu‘araa, e te faaara nei te reira ia tatou i mua i te mau ino o te sotaiete o te nehenehe e pato‘i i te faaoraraa o te mau tamarii a te Metua.
I roto i te hoê heheuraa i te tino tohu o teie anotau, o Iosepha Semita, ua parau te Fatu :
« No te mea aita vau e hi‘o i te huru o te taata, e te hinaaro nei au ia ite te mau taata atoa nei e te oioi mai nei te taeraa mai o te reira mahana : aita e â i tae i te hora, ua fatata mai râ te reira, e rave-ê-hia’tu ai te hau no ni‘a mai i te ao nei, ei reira te diabolo e mana’i i ni‘a iho i to’na iho basileia.
« E e mana atoa te Fatu i ni‘a i to’na iho feia mo‘a, e e faatere arii mai oia i rotopu ia ratou » (PH&PF 1:35–36).
Te faatere arii nei te Faaora i rotopu i te Feia Mo‘a i teie mahana na roto i te heheuraa tamau. Te faaite papû nei au e, tei piha‘i iho oia i ta’na mau tavini i teie mahana e e na reira noa e tae noa’tu i te hopea o te ao nei.
Eiaha na to tatou mata ia tapiri-roa-hia, e ua haapae noa’tura tatou i te heheuraa no te tau tahito noa. E mea aroha te Atua e e mea here ho‘i i ta’na mau tamarii atoa noa’tu te tau, e ua faaite ho‘i oia ia’na iho i teie taime no te aai.5
Ua heheu te Fatu i to’na mana‘o e to’na hinaaro i ta’na mau peropheta tei faatahinuhia. E taheraa heheuraa faaea ore o te tamau noa nei mai te puna pape i te ra‘i ra i te mau tavini a te Atua tei faatahinuhia. Mai te pohe mai â o te peropheta Iosepha Semita, ua tamau noa te reo o te Fatu i te faaroohia mai mutaa ra.6
3
I roto i teie tau o‘e pae varua, e nehenehe ta tatou ia ite i te auhune pae varua na roto i te faarooraa i te reo o te peropheta.
Ua riro te o‘e ei hoê o te mau ati rahi mâtauhia i te tau no te Faufaa Tahito, e ua taa maitai i te mau taata te mau faahopearaa haamou no te oreraa te maa ia tupu e no te po‘iaraa te taata. Ua faatumu roa Amosa i ni‘a i teie faaauraa papû a tohu ai oia i te hoê o‘e pae varua. Ua parau oia : « … e ere râ, i te o‘e maa ore, e te hiaai i te pape, i te faaroo râ i te parau a Iehova » [Amosa 8:11] …
Ua riro te mea e itehia nei i teie mahana, te taa ore e te inoino i roto i te taata e te mau haapa‘oraa faaroo a tamata ai ratou i te faaafaro i to ratou feaaraa pae faaroo e tafifiraa, ei faahaamana‘oraa ia tatou i te mau parau a Amosa : « … i te hororaa e te ho‘iraa mai, i te imiraa i te parau a Iehova, e ore roa râ e itea » [Amosa 8:12].
Te imi nei ratou i te rave‘a no te tatara i te fifi ma te ore e patu i ni‘a i te papa no te heheuraa, mai ta te Fatu i parau mai ia na reira [hi‘o Mataio 16:17–18] …
E ere te taa ore e te inoino ta te ao e mauiui nei i te hoê mea mâtauhia i te mau melo haapa‘o maitai no te Ekalesia … E reo e vai ra o te nehenehe e ti‘aturihia e te taata atoa e faaroo to ratou e te hinaaro ho‘i ia ti‘aturi. Papû roa e, te ora nei tatou i roto i te tau o‘e, mai tei vauvauhia mai e Amosa …Teie râ, i roto i teie mea e hi‘ohia nei ei o‘e pae varua, e rave rahi tei ite i te auhuneraa pae varua.
O… to’u nei iteraa papû haehaa e, ua faaho‘i-faahou-hia mai i teie mau mahana hopea nei te evanelia i to’na îraa, e te vai nei te hoê peropheta i ni‘a i te fenua nei o te paraparau nei i te mana‘o e te hinaaro o te Fatu i te taata e faaroo mai to’na tari‘a e o te faatupu ho‘i i te faaroo no te pee ia’na.7
4
Mai te mea e pee tatou i te mau haapiiraa a te mau peropheta ora, eita tatou e mo‘e.
No te mau taata o te mau tau tuuraa e te mau anotau i ma‘iri, ua riro te peropheta faufaa roa a‘e, te peropheta e ora ra e te haapii ra e te heheu ra i te hinaaro o te Fatu i tera ra taime. I roto i te mau tau tuuraa atoa i ma‘iri, ua faati‘ahia te mau peropheta e te Fatu ei auvaha no’na i mua i te taata o tera anotau e no te mau fifi i tera ra tau.
O te peropheta e ora ra i teie nei to tatou ti‘a faatere, to tatou orometua. E mea na roto ia’na tatou e farii ai i te arata‘iraa i roto i teie tau apî. Mai te mau peho atoa o te fenua nei, tatou e paturu nei ia’na ei peropheta na te Fatu, te faaite nei tatou i to tatou mauruuru no teie puna o te arata‘iraa hanahana …
Ia apapa tatou i roto i to tatou feruriraa i te mau peropheta mai te haamataraa e tae roa mai i to tatou nei anotau, e taa ia tatou te haamaitairaa rahi e tae mai i ni‘a ia tatou na roto i te faaûruraa o te hoê peropheta ora. Maitai ho‘i e, e haapii mai te aai o te ao ia tatou e, ia ore tatou e hinaaro ia faaroo i te mau parau faaararaa ma te pee i te mau haapiiraa a te peropheta o te Fatu, tei raro a‘e ïa tatou i te mau haavâraa a te Atua.8
Tei te peresideni ana‘e o te Ekalesia te ti‘araa mana no te farii i te mau heheuraa no te Ekalesia taatoa e aore râ no te horo‘a i te tatararaa mana no ni‘a i te mau papa‘iraa mo‘a e te mau haapiiraa tumu o te Ekalesia :
« E ore roa te hoê taata e ma‘itihia ia farii i te mau faaueraa e te mau heheuraa i roto i teie ekalesia nei maori râ o [te Peresideni o te Ekalesia], no te mea te farii nei oia i te reira mai te au i ta Mose i na reira ra » (PH&PF 28:2).9
Ia pee tatou i te parau, te a‘o e te mau haapiiraa a te feia faatere o te Ekalesia a arata‘i ai ratou ia tatou, eita tatou e mo‘e ia au i te mau mea faufaa o to tatou iho faaoraraa e faateiteiraa.10
Ua î roa vau i te mauruuru no te mau heheuraa tei haamau i te faanahoraa faahiahia e arata‘i nei i ta’na Ekalesia. Te taata atoa tei faatoro‘ahia ei aposetolo e tei faataahia ei melo no te Pŭpŭ no te Tino Ahuru Ma Piti Aposetolo, ua paturuhia ïa ratou ei peropheta, ei hi‘o e ei heheu parau. Tei te Peresideniraa Matamua e te Pŭpŭ no te Tino Ahuru Ma Piti Aposetolo, tei piihia e tei faatoro‘ahia no te mau i te mau taviri o te autahu‘araa, te haamanaraa e te hopoi‘a no te faatere i te Ekalesia, no te faatere i to te reira mau oro‘a, no te haapii i to te reira haapiiraa tumu e no te haamau e ia tape‘a noa i to te reira mau raveraa.
I te taime e ma‘ihia te peresideni o te Ekalesia e aore râ eita e roaa ia’na ia amo pauroa i te mau hopoi‘a o to’na toro‘a, na to’na na tauturu, to’na na apiti i roto i apooraa no te Peresideniraa Matamua, e amo i te ohipa a te Peresideniraa. No te mau uiraa rarahi, te mau ture, te mau faanahoraa e aore râ te mau haapiiraa tumu, e tuatapapahia te reira na roto i te pure e te apooraa o na tauturu i roto i te Peresideniraa Matamua e te Pŭpŭ no te Tino Ahuru Ma Piti Aposetolo. Aita hoê faaotiraa mai roto mai i te Peresideniraa Matamua e te Pŭpŭ no te Tino Ahuru Ma Piti Aposetolo e ravehia maori râ na roto i te reo hoê roa o te mau melo o te apooraa.
Ia au i teie faanahoraa faaûru, e haere noa te Ekalesia i mua ma te faaea ore. E riro noa te faatereraa o te Ekalesia e te faaohiparaa i te mau horo‘a peropheta tei ahuhia e teie mau mana faatere aposetolo o te mau e o te faaohipa nei i te mau taviri atoa o te autahu‘araa.11
« Ua riro te taime no te amuiraa ei taime anaanaearaa pae varua, i reira te ite e te iteraa papû e faarahihia e e haapaarihia ».
5
I roto i te amuiraa rahi, e farii tatou i te parau a‘o a te mau peropheta, a te mau hi‘o e a te mau heheu parau.
Ia feruri ana‘e au i ni‘a i te mau a‘oraa o te amuiraa [rahi], e ui au ia’u iho nei i teie uiraa : Nahea e ti‘a ai ia’u ia tauturu i te tahi mau taata ia farii i te maitai e te mau haamaitairaa a to tatou Metua i te Ao ra ? Tei roto te pahonoraa i te peeraa i te arata‘iraa tei fariihia mai roto mai i te mau taata ta tatou e paturu nei ei peropheta, ei hi‘o e ei heheu parau, e te tahi atoa mau hui mana faatere rahi. A tuatapapa ana‘e tatou i ta ratou mau parau, tei parauhia mai ia au i te Varua o te faaûruraa, e a hi‘o pinepine ana‘e i te reira. Ua heheu te Fatu i to’na hinaaro i te Feia Mo‘a i roto i teie amuiraa.12
E rave rahi parau a‘o faaûru a te mau peropheta, hi‘o e heheu parau, e a te tahi atoa mau hui mana faatere rahi a te Ekalesia tei horo‘ahia i roto i te amuiraa rahi. Ua faaitoito mai te mau peropheta o teie nei anotau ia faariro tatou i te tai‘oraa i te mau puhararaa o te amuiraa i roto i te mau ve‘a a te Ekalesia ei mea faufaa e te tamau i roto i ta tatou iho tuatapaparaa i te parau. E na reira te amuiraa rahi e riro mai ai, mai te huru ra te tahi tuhaa hau e aore râ te tahi tuhaa faaaano i Te Parau Haapiiraa e te Mau Parau Fafau.13
Ua riro te taime no te amuiraa ei taime anaanaearaa pae varua, i reira te ite e te iteraa papû e faarahihia e e haapaarihia, maori râ, te ora e te haamaitai nei te Atua ia ratou o te haapa‘o maitai. E taime te reira e ama ai teie ite, o Iesu te Mesia, te Tamaiti a te Atua ora, i roto i te aau o te feia tei roaa te hinaaro papû ia tavini ia’na e ia haapa‘o i ta’na mau faaueraa. Ua riro te amuiraa ei taime no to tatou mau feia faatere ia horo‘a ia tatou i te arata‘iraa faaûru no to tatou oraraa—e taime no te mau varua ia putapu e te mau faaotiraa ia ravehia no te riro ei tane e ei vahine maitai a‘e, ei metua tane e ei metua vahine maitai a‘e, ei mau tamaiti e ei mau tamahine faaroo a‘e, ei mau hoa e ei mau taata tupu maitai a‘e …
Tatou tei putuputu i ô nei i teie mahana [i roto i te amuiraa rahi], te titau nei tatou i te tahi ite taa ê e te hoê roa no te evanelia a te Faaora. Te mea maere roa’tu i te feia a tahi ra e mâtau nei ia tatou, o to tatou ïa faaiteraa i mua i to te ao nei e, te arata‘ihia nei tatou e te hoê peropheta ora na te Atua—hoê o te tauaparau nei ia’na, o te faaûruhia nei e o te farii nei i te heheuraa no ô mai i te Fatu.14
Te mau mana‘o tauturu no te tuatapaparaa e te haapiiraa
Uiraa
-
A hi‘o i te mau haapiiraa a te peresideni Hunter i roto i te tuhaa 1. No te aha te Atua i horo‘a mai ai i te mau peropheta i roto i te mau tau tuuraa atoa ? E aha te tahi o te mau ohipa a te mau peropheta ? Nahea e nehenehe ai ta tatou e tauturu i te mau tamarii ia roaa te hoê iteraa papû no ni‘a i te mau peropheta ?
-
Nahea te fana‘oraa i te hoê peropheta ora e haamaitai nei ia tatou i teie mahana ? (A hi‘o i te tuhaa 2). No te aha e mea faufaa ia vai te « taheraa heheuraa faaea ore » mai te Atua ra i Ta’na mau peropheta ora ?
-
E aha te tahi mau faaiteraa te ora ra tatou i te hoê tau « o‘e pae varua » ? (A hi‘o i te tuhaa 3). E aha te mau haamaitairaa tei fariihia e outou no te peeraa i te reo o te peropheta ora ?
-
Te haapii nei te peresideni Hunter e, « tei te peresideni ana‘e o te Ekalesia te ti‘araa mana no te farii i te mau heheuraa no te Ekalesia taatoa (tuhaa 4). No te aha e mea maitai ia ite i te reira ? No te aha e mea maitai ia ite e, « eita tatou e mo‘e » ia pee tatou i te peropheta ?
-
A feruri i te faufaa o te amuiraa rahi i roto i to outou oraraa (A hi‘o i te tuhaa 5). E aha te tahi mau haapiiraa no roto mai i te amuiraa rahi tei haamaitai ia outou ? Nahea e ti‘a ai ia outou ia faariro i te amuiraa rahi ei faaûruraa mana rahi a‘e i roto i to outou oraraa e to outou utuafare ?
Te mau papa‘iraa mo‘a
Amosa 3:7 : Mataio 10:41 : Luka 1:68–70 : Iritiraa a Iosepha Semita, 2 Petero 1:20–21 : Mosia 8:15–18 : PH&PF 1:14–16, 37–38 : 21:1, 4–6 : 43:2–6 : 107:91–92
Tauturu haapiiraa
I roto i te piha haapiiraa, a tapura i ni‘a i te iri papa‘iraa te tahi o te mau uiraa e hiti mai mai roto mai i te mau taata no te tahi atu faaroo no ni‘a i te tumu parau o teie pene. A ani i te mau melo o te piha haapiiraa ia hi‘o i roto i te pene, ia itehia mai te tahi mau pahonoraa, ei reira ia faaite mai i ta ratou i ite mai.