Omuaraa

Ua faanaho te Peresideniraa Matamua e te Pŭpŭ no te Tino Ahuru Ma Piti Aposetolo i teie mau buka, Te mau haapiiraa a te mau Peresideni o te Ekalesia no te tauturu ia outou ia haafatata atu i to outou Metua i te Ao ra, e ia faahohonu i to outou ite no te evanelia a Iesu Mesia tei faaho‘i-faahou-hia mai. A tuu noa ai te Ekalesia i te buka apî i roto i teie mau buka e roaa ïa ia outou te hoê haaputuraa buka evanelia no to outou utuafare. Ua opuahia teie mau buka no te tuatapaparaa a te taata hoê e no te mau haapiiraa i te Sabati. E tauturu atoa te reira ia outou ia faaineine i te tahi atu mau haapiiraa e aore râ mau a‘oraa e ia pahono i te mau uiraa no ni‘a i te haapiiraa tumu a te Ekalesia.

Te vauvau nei teie buka i te mau haapiiraa a te peresideni Howard W. Hunter, tei tavini ei Peresideni no te Ekalesia a Iesu Mesia i te Feia Mo‘a i te Mau Mahana Hopea Nei mai te 5 no tiunu 1994, e tae atu i te 3 mati 1995

Te tuatapaparaa a te taata hoê

A tuatapapa ai outou i te mau haapiiraa a te peresideni Howard W. Hunter a titau i te faaûruraa a te Varua Maitai na roto i te pure. E tauturu te mau uiraa i te pae hopea o te pene tata‘itahi ia outou ia feruri, ia maramarama e ia faaohipa i te mau haapiiraa a te peresideni Hunter. E tauturu atoa teie mau mana‘o i muri nei ia outou:

Papa‘i i te mau mana‘o o te feruriraa e o te aau e tae mai na roto i te Varua Maitai, i roto i ta outou tuatapaparaa.
A reni i te mau tuhaa ta outou e hinaaro e hamanaʻo. A opua ia tamau aau i te tahi mau tuhaa e aore râ a tapa‘o i te reira i roto i ta outou mau papa‘iraa mo‘a, i pihaʻi iho i te irava tuʻati.
Tai‘o i te hoê pene e aore râ te hoê tuhaa hau i te hoê taime, ia maramarama hohonu a‘e outou i te reira.
A ui ia outou iho i te tahi mau uiraa mai teie i muri nei, Nahea te mau haapiiraa a te Peresideni Hunter i te faarahi i to’u maramaramaraa i te mau parau tumu o te evanelia? Eaha ta te Fatu e hinaaro nei ia haapii au mai roto mai i teie mau haapiiraa?
A ui ia outou iho nahea te mau haapiiraa i roto i teie buka e nehenehe ai e tauturu ia outou i roto i ta outou mau tamataraa e te mau mana‘ona‘oraa.
Faa‘ite i to outou utuafare e i te mau hoa i te mau mea ta outou i apo mai.

Haapii mai roto atu i teie buka

Na te mau arata‘iraa i raro nei e tauturu ia outou ia haapii mai roto atu i teie buka, i te fare anei e aore ra, i te pureraa.

Faaineine no te haapii

Titau i te arata‘iraa a te Varua Maitai a faaineine ai outou no te haapii. A tuatapapa i te pene na roto i te pure ia ti‘a ia outou ia papû maitai i te mau haapiiraa a te peresideni Hunter. E haapii outou ma te aau tae e te puai rahi a‘e mai te mea e e faaûru ta’na mau parau ia outou iho (a hi‘o PH&PF11:21).

I roto i te rahiraa o te mau pene ua rahi aʻe te mau materia no te haapii atu i te taime e vai ra no te haapiiraa. Na roto i te pure, a ma‘iti i roto i te pene te mau haapiiraa ta outou e mana‘o ra, e riro i te tauturu rahi atu i te mau taata ta outou e haapii ra.

A faaitoito i te feia ta outou e haapii ra ia tuatapapa i te pene hou a haere mai ai, e ineine maitai a‘e ïa ratou no te tau‘aparau e no te faatupu i te maitai i roto i te tahi e te tahi.

I roto i ta outou faaineineraa no te haapii a haapa‘o maitai i te tuhaa ra Te mau mana‘o tauturu no te tuatapaparaa e te haapiiraa i te pae hopea o te pene tata‘itahi. I raro a‘e i te reira upoo parau e ite outou i te mau uiraa te mau papa‘iraa mo‘a tuʻati e te mau tauturu haapiiraa. E tu‘ati maitai te mau uiraa e te mau papa‘iraa mo‘a i ni‘a i te pene i reira ratou e itehia ai. Na te mau tauturu haapiiraa e faaohipa hau atu i te haapiiraa mai e i te haapiiraa‘tu i te evanelia.

Omua i te pene

A omua ai outou i te pene a imi i te raveʻa no te faatupu i te hoê huru i reira hoi te Varua e nehenehe ai e haaputapû i te aau e i te mana‘o o te feia ta outou e haapii ra. E nehenehe ta outou e faa‘ohipa i te hoê e aore râ e rave rahi atu â mana‘o i muri nei :

A tai‘o e aore ra, a hi‘o faahou i te tuhaa i parauhia « No roto mai i te oraraa o Howard W. Hunter » i te haamataraa o te pene, e a tau‘a parau i ni‘a i te reira.
A aparau no ni‘a i te hoê faahitiraa parau, te hoê hoho‘a e aore râ te hoê irava no roto mai i te pene
A himene amui i te hoê himene.
A faa‘ite poto noa i te hoê ohipa tei tupu i ni‘a ia outou iho no ni‘a i te tumu parau.

A faaitoito i te tauʻaraa parau no ni‘a i te mau haapiiraa a te peresideni Hunter.

A haapii ai outou i teie buka a ani ia vetahi ê ia faaite mai i to ratou mau mana‘o ia ui i te mau uiraa e ia haapii i te tahi e te tahi. Mai te mea e e amui mai ratou i roto i te aparauraa e ineine rahi atu â ïa ratou no te apo mai e no te farii i te heheuraa no ratou iho.

A vaiiho i te mau tau‘araa parau maitatai ia tere noa na eiaha râ e tamata i te haapii i te taatoaraa o te mau tumu parau. A arata‘i i te mau Aparauraa ia faatumuhia hoi te reira i ni‘a iho i te mau Haapiiraa a te peresideni Hunter.

E rave‘a tauturu faufaa rahi roa te mau uiraa i te pae hopea o te pene tata‘itahi no te faaitoito i te aparauraa. E nehenehe atoa ta outou e faaineine i ta outou iho mau uiraa taaê no te taata ta outou e haapii nei. Teie i raro nei te tahi atu mau mana‘o no te faaitoito i te aparauraa :

A ani i te mau piahi ia faa‘ite mai e, eaha ta ratou i haapii mai na roto i ta ratou iho tuatapaparaa i te pene. E mea maitai atoa ia farerei i te tahi mau piahi i roto i te hepetoma e ia ani ia ratou ia haere ineine mai no te faaite i te mea ta ratou i apo.
A faaue i te tahi mau taata e aore ra, te tahi mau pŭpŭ na‘ina‘i ia tai‘o i te tahi o te mau uiraa i ma‘itihia i te pae hopea o te pene. A ani i te mau piahi ia imi i te mau haapiiraa e vai ra i roto i te pene o te tuati i te mau uiraa. I muri iho a ani ia ratou ia faa‘ite mai i to ratou mau mana‘o e ta ratou mau hi‘oraa.
A tai‘o amui outou i te tahi o te mau haapiiraa a te peresideni Hunter i roto i te pene. A ani i te mau piahi ia faaite mai i te tahi hi‘oraa i roto i te mau papa‘iraa mo‘a e aore râ i roto i te mau ohipa ta ratou iho i ite no te faahoho‘a i te mea e haapiihia ra
A ani i te mau piahi ia ma‘iti i te hoê tufaa e ia tai‘o i te reira ma te mamu noa. A ani ia ratou ia amui ei pŭpŭ taipiti e aore râ taitoru taata i roto o tei maiti i te hoê â tuhaa e ia aparau i te mea ta ratou i haapii mai.

A faaitoito i te faaohiparaa e te faaiteraa

E auraa taa ê te tae mai i roto i te mau piahi no ni‘a i te mau haapiiraa a te peresideni Hunter mai te peu e faa‘ite ratou i te reira ia vetahi ê e e faa‘ohipa ratou i te reira i roto i to ratou oraraa. E nehenehe ta outou e faa‘ohipa i te hoê e aore râ e rave rahi atu â mana‘o i muri nei :

A ani i te mau piahi nahea ratou e nehenehe ai e faaohipa i te mau haapiiraa a te peresideni Hunter i roto i ta ratou mau hopoi‘a i te utuafare e i roto i te Ekalesia. Ei hi‘oraa, e ti‘a ia outou ia tauturu ia ratou ia feruri e ia aparau nahea ratou e nehenehe ai e faaohipa i ta’na mau haapiiraa i roto i to ratou ti‘araa ei mau tane faaipoipo ei mau vahine faaipoipo ei mau metua ei mau tamaiti ei mau tamahine ei mau taea‘e haapii utuafare e aore râ ei mau tuahine hahaere.
A ani i te mau piahi ia faa‘ite mai i to ratou mau iteraa na roto i te faaohiparaa i te mea ta ratou i apo mai.
A faaitoito i te mau piahi ia faaite i te tahi o te mau haapiiraa a te peresideni Hunter i te mau melo no te utuafare e i te mau hoa.

Faahope i te aparauraa

A puohu poto noa i te haapiiraa e aore râ a ani i te hoê e aore râ e piti piahi ia puohu mai. A faa‘ite i to outou iteraa papû no ni‘a i te mau haapiiraa ta outou i aparau. E hinaaro atoa paha outou e ani i te tahi ia faaite mai i to’na iteraa papû.

Hamaramaramaraa no ni‘a i te mau materia tauturu

Te mau haapiiraa i roto i teie buka e mau faahitiraa parau ïa no roto mai i te mau a‘oraa e te mau papa‘iraa a te peresideni Hunter. No te mau faahitiraa ua tape‘a-maite-hia te mau faatomaraa, te papa‘iraa, te mau reta rahi e te mau paratarafa o te mau papa‘iraa tumu maori râ ua taui te mau reta i te nene‘iraa no te haamaitai i te tai‘oraa. No te reira tumu, e ite paha outou i te tahi mau tu‘ati-ore-raa i roto i te papa‘iraa. Ei hi‘oraa, te mau taʻo no te faahiti i te Atuaraa te vai ra ua papa‘i-naʻinaʻi-hia e te vai ra ua papa‘i-rarahi-hia.

Ua faaohipa pinepine atoa te peresideni Hunter i te mau parau mai te mau tane, te tane e te taata nei no te parau i te mau taata atoa te tane e te vahine. Ua faaohipa pinepine atoa oia i te mau ta‘o o’na, ta’na e oia no te parau i na apeni e piti. E peu matarohia te reira i roto i te paraparau i to’na tau, e e tano te reira no te tane e te vahine ia faaohipa ana‘e oia i te reira.