Lesona 26 Anomea mo le Sauniuniga o le Vasega: Iloaina ma le Faamaloloina mai Sauaga
“Lesona 26 Anomea mo le Sauniuniga o le Vasega: Iloaina ma le Faamaloloina mai Sauaga,” Anomea a le Faiaoga O Le Aiga e Faavavau (2022)
“Lesona 26 Anomea mo le Sauniuniga o le Vasega,” Anomea a le Faiaoga O Le Aiga e Faavavau
Ata
o tagata e toalua o loo feopoopoa’i
Lesona 26 Anomea mo le Sauniuniga o le Vasega
Iloaina ma le Faamaloloina mai Sauaga
O le faasaunoa o se agasala matuia. Ua lapatai mai perofeta ma aposetolo e faapea “o tagata taitoatasi o e … faasaunoa i taitoalua po o fanau … o le a i ai se aso tou te tutu atu ai e tali atu i luma o le Atua” (“O Le Aiga: O Se Folafolaga i le Lalolagi,” ChurchofJesusChrist.org). A o e suesue i lenei lesona, vaavaai pe mafai faapefea ona e iloa le taimi o loo tupu ai sauaga ma le auala e mafai ai ona faamaloloina e le Alii i latou o e ua aafia i sauaga.
Vaega 1
O le a le sauaga?
O a tatou filifiliga e mafai ona i ai ni taunuuga eseese mo i tatou ma isi. O le mea e faanoanoa ai, o nisi tagata latou te faaaogaina ma le le amiotonu lo latou faitalia e sauaina ai isi.
“E tele taimi e leai se faauigaga se tasi o le faasaunoa e mafai ona faaaoga i tulaga uma. Ae, e tele āūga ogaoga eseese o amioga faasaua. O lea āūga e faasolosolo mai le faaaogaina i nisi taimi o upu malolosi e oo atu lava i le faaoo o se manu’a matuia” (Tusitaulima Aoao: Auauna Atu i O Le Ekalesia a Iesu Keriso o le Au Paia o Aso e Gata Ai, 38.6.2.4, ChurchofJesusChrist.org). O sauaga e mafai ona tupu e ala i le tuulafoaiina po o le agaleagaina o isi i auala faaletino, faalefeusuaiga, faalelagona, po o mea tautupe.
E pei ona ta’ua i se tasi o faamatalaga o lomiga a le Ekalesia:
Ua faamoemoeina i tatou e le Alii ina ia faia mea uma tatou te mafaia e taofia ai sauaga faatautala ma ia puipuia ma fesoasoani atu ia i latou ua afaina ai. E leai se tasi e faamoemoeina e onosaia amioga sauā faatautala. …
… O tagata afaina … e le tuuaia i latou mo amioga faataumaoi a isi—e tusa lava po o ai e sauaina i latou. O se tagata e afaina e le ta’usalaina. (Gospel Topics, “Abuse,” topics.ChurchofJesusChrist.org)
Sa talanoaina e Elder Jeffrey R. Holland o le Korama a Aposetolo e Toasefululua lo tatou tiutetauave o ni soo o Iesu Keriso ina ia aloese mai le sauaina o isi, aemaise lava o tagata o o tatou aiga:
Ata
Elder Jeffrey R. Holland
Ua le tatau ea ona faaluaina lo tatou faaeteete i le avea ai o ni soo o le Alii o Iesu Keriso. … E leai ma se tulaga e tatau ai ona ta’usalaina i tatou i pule’aga amioletonu po o soo se ituaiga o sauaga po o amioga lē mamā—faaletino, faalelagona, faaleekalesia, po o soo se isi lava ituaiga. …
I le tele o taimi, o alii, tamaitai faamaoni, e oo lava i tamaiti e mafai ona ta’usalaina i le tautatala atu ma le agaleaga, e oo lava i upu faatauma’oi, ia i latou e tele lava o ē ua faamauina ia i latou e ala i se sauniga paia i totonu o le malumalu o le Alii. E tofu tagata uma ma se aia tatau e alofagia ai, ia lagona le toafilemu, ma maua le saogalemu i le aiga. Faamolemole, se’i o tatou taumafai ia tausisia lena siosiomaga iina. O le folafolaga o le avea ma sē e faatupuina le filemu o le a e mauaina le Agaga Paia e fai ma au soa tumau ma o le a tafe atu faamanuiaga ia te oe “e aunoa ma ni ala faamalosia” e faavavau ma faavavau lava [Mataupu Faavae ma Feagaiga 121:46]. (“E Le Pei Ona Avatu e le Lalolagi,” Liahona, Me 2021, 37; tagai foi Efeso 4:29–32)
Ata
aikona, mafaufau loloto
Mafaufau Loloto e Sauniuni ai mo le Vasega
O a mataupu faavae o le talalelei ua solia pe a tupu le sauaina?
Vaega 2
E mafai faapefea ona ou iloa o loo tupu le sauaina?
“E i ai faailoga masani e matau lelei i le auala e masani ona amata ma faaauau ai le sauaina” (“Iloaina o Mamanu o le Sauaina,” abuse.ChurchofJesusChrist.org). O le iloaina ma le malamalama i nei faailoga e mafai ona tatala ai le faitotoa mo le Alii e galue ai e ala atu ia te oe e fesoasoani ai e taofi le sauaina po o le taofia o tulaga e ono taitai atu ai i sauaga faatautala.
Ata
aikona, suesue
Suesue e Sauniuni ai mo le Vasega
Faaalu ni nai minute e suesue ai le punaoa “Iloaina o Mamanu o le Sauaina” (abuse.ChurchofJesusChrist.org), ma auai i le vasega ua saunia e faasoa mai mea sa e aoaoina.
Aua lava nei tuuitiitia le ogaoga o le sauaina ia te oe lava po o se isi lava tagata. “Afai o oe po o se tasi e te iloaina ua sauaina, saili vave le fesoasoani mai i pulega faalemalo, taitai perisitua, auaunaga e puipuia tamaiti, po o auaunaga e puipuia tagata matutua” (“In Crisis? Talk Now,” abuse.ChurchofJesusChrist.org). Mo nisi faamatalaga e uiga i le lipotia o sauaga faatautala, tagai “O Le A Se Mea E Tatau Ona Ou Faia Pe Afai Ou te Iloa pe Masalomia o Loo Sauaina Se Tasi?” (abuse.ChurchofJesusChrist.org).
Ata
aikona, mafaufau loloto
Mafaufau Loloto e Sauniuni ai mo le Vasega
Mafaufau pe mafai faapefea ona e faaaogaina aoaoga o i lenei vaega e puipuia ai oe lava ma avea o se meafaigaluega a le Alii i le puipuia o isi mai le sauaina.
Vaega 3
E faapefea ona faamaloloina a’u pe afai na sauaina au?
O tagata na afaina i sauaga faatautala e mafatia i manu‘a loloto. O tiga ma mafatiaga na latou oo i ai e mafai ona taitai atu ai i luitau faalemafaufau, faalelagona, faaleagaga, ma faaletino.
Na lapatai mai Elder Richard G. Scott o le Korama a Aposetolo e Toasefululua:
Ata
Elder Richard G. Scott
Afai na sauaina pe faia faatautala oe, o le a taumafai Satani e faatalitonu oe faapea e leai se vaifofo. … O lana fuafuaga o le faia lea o mea uma na te mafaia e tuueseese ai oe mai lou Tama ma Lona Alo. Aua nei faatagaina Satani e faatalitonu oe faapea e le toe mafai ona e maua se fesoasoani. (“O Le Faamaloloina o Taunuuga Faataumaoi o le Sauaina po o le Faatautala,” Liahona, Me 2008, 41)
O le Fomai Sili, o Iesu Keriso, e mafai ona tuuina atu le faamoemoe ma le faamalologa sili i fanau uma a le Atua. Na aoao atili mai Elder Scott:
Ata
Elder Richard G. Scott
O le filifiliga saoloto o se elemene taua tele i le fuafuaga o le fiafia a lo tatou Tama oi le Lagi. Sa malamalama o Ia o le a i ai nisi o Ana fanau agaga e faaaogaina ma le faaletatau lena filifiliga saoloto, ma mafua ai ni faafitauli matuia i isi. O nisi o le a solia le faatuatuaga paia, e pei o se tamā po o se tagata o le aiga na te faatautalaina se tamaitiiti taumamaina. Talu ai o lo tatou Tama Faalelagi e tonu a’ia’i, o lea e tatau ai ona i ai se ala e faatoilalo ai taunuuga matautia o lena faaaogaina le lelei o le saolotoga mo le tagata ua aafia fua ma le tagata na faatinoina. O le faamalologa e maua ai le mapusaga, e maua mai i le mana o le Togiola a Lona Alo Pele, o Iesu Keriso, e toe faalelei ai le mea ua le tonu. O le faatuatua ia Iesu Keriso ma i Lona mana faamalolo e tuuina atu ai i le tagata na sauaina ia auala e foia ai taunuuga leaga o amioga le tonu a le isi tagata. …
O le faamalologa e mafai ona amata i se epikopo faautauta po o se peresitene o le siteki, po o se faufautua faapolofesa atamai. Afai e gau lou vae, o le a e le filifili e fofo lava e oe. O le sauaina matuia, e mafai foi ona manuia mai se fesoasoani faapolofesa. E tele auala e amata ai le faamalologa, ae ia e manatua o se fofo atoa lava e maua mai i le Faaola, le Alii o Iesu Keriso, lo tatou Matai ma le Togiola. Ia faatuatua faapea o le faatasi ai ma galuega o le a mafai ai e Lana Togiola atoatoa, faavavau, ma le le iu ona faamalolo lou mafatia mai taunuuga o le faatautala po o le sauaina. (“O Le Faamaloloina o Taunuuga Faataumaoi o le Sauaina po o le Faatautala,” 40, 42)
Sa fetalai le perofeta o Isaia e uiga i le misiona ma le mana o le Faaola e faamalolo ai.
Ata
aikona, suesue
Suesue e Sauniuni ai mo le Vasega
Faitau le Isaia 61:1–3, ma vaavaai mo le faamoemoe ua ofo mai e Iesu Keriso i soo se tasi na mafatia i sauaga.
Ina ia malamalama atili i le fasifuaitau “matagofie e sui a’i le lefulefu” (fuaiupu 3), atonu e fesoasoani le iloa e masani ona sasaa e Isaraelu lefulefu i luga o o latou ulu i taimi o le faanoanoa po o le faavauvau. Na folafola mai e le Alii e suia nei lefulefu i le matagofie, po o se palealii po o se ufiufi matagofie o le ulu. O i latou o e faatinoina le faatuatua ia Iesu Keriso e mafai ona maua lenei meaalofa paia o le faamalologa ma le alofa.
Mafaufau e matamata le vitio “The Prince of Peace” (2:32), ma mafaufau pe faapefea ona fesoasoani Iesu Keriso i le tuuina atu o le filemu i e ua afaina i sauaga.
Sa faamautinoa mai e Peresitene Jean B. Bingham, Peresitene Aoao o le Aualofa:
Ata
Peresitene Jean B. Bingham
Po o a lava mea ua tatou mafatia ai, o [Iesu Keriso] o le pogai o le faamalologa. O i latou ua aafia i soo se ituaiga o sauaga … e mafai ona faaatoatoa e le Togiola o le lalolagi. Peitai, o le a le ulufale mai o Ia e aunoa ma se valaaulia. E tatau ona tatou o mai ia te Ia ma faatagaina o Ia e faatino Ana vavega. (“Ina Ia Atoa Lo Outou Olioli,” Liahona, Nov. 2017, 86)
Ata
aikona, mafaufau loloto
Mafaufau Loloto e Sauniuni ai mo le Vasega
O le a se mea ua e faia e valaaulia ai le faamafanafanaga, fesoasoani, ma le faamalologa mai le Faaola, i soo se tulaga? O le a se mea e mafai ona fesoasoani ia te oe ina ia onosai ma faamaoni i le aluga o taimi e ono manaomia e faamalolo ai?