Ti Dios ti Naayat a Nailangitan nga Amam

Ti Dios ti Amam iti Langit. Personal nga am-ammonaka ken ipatpategnaka iti nalablabes ngem iti matukodmo. Kayatna nga agragsakka iti daytoy a biag ken iti kinaagnanayon.

Tapno maileppasmo daytoy a panggep, nangted ti Nailangitan nga Ama iti plano a maawagan iti ebanghelio* ni Jesucristo. Ni Jesucristo ti Anak ti Dios; ti biag ken dagiti pannursurona ket mangibagnos nga agturong iti talna iti daytoy a biag ken rag-o iti kinaagnanayon.

Ti Nailangitan nga Amatayo ket nayegnan—naisublinan—dagiti nadiosan a kinapudno a mabalinmo a sursuruen ken tungpalen. Naipalgak dagitoy a kinapudno kadagiti propeta manipud pay idi punganay.

Bendisionan ti Ebanghelio dagiti Pamilia ken Indibidual

Bendisionan ti ebanghelio ni Jesucristo ti amin nga umawat ken agtungpal iti daytoy. Maysa kadagiti kasayaatan a lugar a pakaisuruan ken pakayaplikaran iti ebanghelio ket kadagiti pamilia. Impasdek ti Dios dagiti pamilia a mangyeg iti kinaragsak kadagiti annakna, a mangpalugod kadatayo a mangsursuro kadagiti pudno a pagbatayan iti naayat nga aglawlaw, ken mangisagana kadatayo nga agsubli Kenkuana kalpasan ti ipapataytayo. Nupay mabalin a mapannubok dagiti relasion iti pamilia no dadduma, bendisionannatayo ti Nailangitan nga Ama bayat ti panangikarigatantayo a mangsurot kadagiti pannursuro ni Jesucristo. Tulongannatayo dagitoy a pannursuro a mangpapigsa kadagiti pamiliatayo.

Ipalgak ti Nailangitan nga Ama ti Ebangheliona

Kas paset ti planona, pumili ti Dios kadagiti propeta, a kas kada Adan, Noe, Abraham, ken Moises. Dagiti Propeta:

• Isuroda ti maipapan iti Dios ken naisangsangayanda a saksi ti Anakna, ni Jesucristo.

• Umawatda iti paltiing, wenno pangiturong manipud iti Apo.

• Isuroda ti ebanghelio iti lubong ken ipatarusda ti balikas ti Dios.

Umawat dagiti propeta iti priesthood, wenno ti turay nga agsao ken agtignay iti nagan ti Dios a mangidaulo kadagiti annakna. Dagiti tao a mangsurot kadagiti propeta ket umawatda kadagiti bendision nga inkari ti Dios. Dagiti di mangawat iti ebanghelio ken kadagiti propeta ti Dios ket mapukawda dagita a bendision ken mayadayoda ti bagbagida manipud iti Dios. Dagiti saan a mangawat kadagiti propeta ken mangliway iti panagkumitda a mangsurot iti Dios ket addada iti kasasaad a maawagan iti ikakalilis iti kinapudno.

Napukaw dagiti naipalgak a kinapudno bayat ti saan a panangawat dagiti tao kadagiti propeta.

Nupay adu kadagiti annakna ti nangulit-ulit a saan nangawat Kenkuana ken dagiti propetana, agtultuloy nga ayaten ti Nailangitan nga Ama dagiti annakna. Kayatna nga ited kadatayo ti amin a banag a kasapulantayo tapno agbalin a naragsak ita ken tapno makasubli Kenkuana kalpasan ti ipapataytayo. Ipakita dagiti nasantuan a kasuratan ti maysa a pagtuladan ti Dios iti maulit-ulit a panangtulong kadagiti annakna, nupay saantayo a kanayon a dumdumngeg:

• Pumili ti Dios iti maysa a propeta.

• Isuro ti propeta ti ebanghelio ken idauluanna dagiti tao.

• Bendisionan ti Dios dagiti tao.

• In-inut a saan nga ikankano wenno supringen dagiti tao dagiti pannursuro ti propeta. Kamaudiananna saanda nga awaten ti propeta ken dagiti pannursurona ket matnagda iti ikakalilis iti kinapudno.

• Gapu iti ikakalilis iti kinapudno, mapukaw dagiti tao ti pannakaammoda iti ebanghelio. Maibabawi ti turay ti priesthood manipud kadakuada.

• No dumteng ti umno a panawen ken nakasaganan dagiti tao a mangsurot manen Kenkuana, pumili ti Dios iti sabali pay a propeta, isublina ti priesthood ken ti Simbaan, ket iturongna ti propeta a mangisuro iti ebanghelio.

Impasdek ni Jesucristo ti Simbaanna

Manipud pay iti panawen ti Panagparsua, pinasungadanen dagiti annak ti Dios ti Mangisalakan a ni Jesucristo. Kas iti inkarina, imbaon ti Nailangitan nga Ama ti Anakna, ni Jesucristo, iti daga nasurok a 2,000 a tawen ti napalabasen.

Nagbiag ni Jesucristo iti naan-anay, awan mulitna a biag. Impasdekna ti Simbaanna, insurona ti ebangheliona, ken nagaramid iti adu a milagro. Nangpili iti sangapulo-ket-dua a lallaki tapno agbalin nga Apostolna, agraman da Pedro, Santiago, ken Juan. Sinuruanna ida ken inikkanna ida iti turay ti priesthood tapno mangisuroda babaen ti naganna ken tapno agaramidda kadagiti sagrado nga ordinansa, a kas iti panagbuniag.

Idi naipasdek ni Jesus ti Simbaanna, immawat Isuna kadagiti pangiturong manipud iti Nailangitan nga Ama. Kalpasanna sinuruanna dagiti disipulona. Insuro ni Jesus kadagiti pasurotna a ti paltiing manipud iti Dios ket isu ti bato a pangbangonanna iti Simbaanna.

Binukel ni Jesucristo ti Simbaanna:

• Inawagan ken inordenanna dagiti Apostol.

• Inikkanna ida iti turay a mangisuro ken mamuniag. Maawagan daytoy a turay iti priesthood.

• Kalpasan ti ipapatay ken Panagungarna, intuloyna ti nangiwanwan kadagiti Apostol babaen iti paltiing.

Iti gibus ti biagna, nagsagaba ken natay ni Jesucristo para kadagiti basol ti tunggal maysa a nagnaeden wenno agnaedto iti daga. Maawagan daytoy a sakripisio iti Pannubbot. Babaen ti panagsagaba, ipapatay, ken Panagungarna, inaramid ti Mangisalakan a mabalin kadatayo ti mapakawan. Dagiti addaan iti pammati Kenkuana, agbabawi, ken agtungpal kadagiti bilinna ket umawatda iti pannakapakawan dagiti basol ken mapnoda iti talna ken rag-o.

Kalpasan ti Panagungarna, inturong ni Jesucristo dagiti Apostolna babaen ti paltiing. Irekord ti Biblia ti adu a wagas a nangituloyanna nga inturong ti Simbaanna (kitaen iti Dagiti Aramid 10; Apocalipsis 1:1). Iti kasta inturong ti Dios ti Simbaan ni Jesucristo ket saan a dagiti tao.

Ti Nakaro nga Ikakalilis iti Kinapudno

Kalpasan ti ipapatay ni Jesucristo, pinarparigat ken pinapatay dagiti nadangkes a tao ti adu a miembro ti Simbaan. In-inut nga immadayo dagiti dadduma a miembro ti Simbaan manipud kadagiti pagbatayan nga insuro ni Jesucristo ken dagiti Apostolna. Napapatay dagiti Apostol, ket ti turay ti priesthood—agraman dagiti tulbek a pangiturong ken pangawat iti paltiing para iti Simbaan— ket naipanaw manipud iti daga. Gapu ta ti Simbaan ket saanen nga maidadauluan babaen iti turay ti priesthood, nagsaknap ti biddut kadagiti pannursuro ti Simbaan. Nagtalinaed dagiti nasayaat a tao ken ti adu a kinapudno, ngem napukaw ti ebanghelio nga impasdek ni Jesucristo. Maawagan daytoy a panawen iti Nakaro nga Ikakalilis iti Kinapudno.

Iti ipapatay dagiti Apostol ni Jesucristo, napukaw manen ti kinapudno.

Nagbanag daytoy nga ikakalilis iti kinapudno iti pannakabukel ti adu a simbaan nga addaan kadagiti agsusupadi a pannursuro. Kabayatan daytoy a panawen, adu a lallaki ken babbai ti nangsapul iti kinapudno, ngem saanda a nabirokan daytoy. Adu a nasayaat a tao ti namati iti Dios ken ni Jesucristo ken pinadasda nga awaten ken isuro ti kinapudno, ngem awananda iti pakabuklan ti ebanghelio wenno turay ti priesthood. Kas bungana, tinawid ti tunggal kaputotan ti kasasaad ti ikakalilis iti kinapudno bayat ti pannakaimpluwensia dagiti tao iti no ania ti impasa dagiti napalabas a kaputotan, agraman dagiti pannakabalbaliw ti ebanghelio ni Cristo.

Sumagmamano a naparegta a tattao, a kas kada Martin Luther ken John Calvin, ti nakailasin a nabalbaliwan wenno napukawen dagiti kannawidan ken doktrina. Inkarigatanda nga ireporma dagiti simbaan a nakaibilanganda. Nupay kasta, no awan ti turay ti priesthood, saan a mabalin a maisubli ti ebanghelio ni Cristo iti sigud a pormana. Maysa a pannakaisubli ti kasapulan.

Ammo ti Dios nga addanto ikakalilis. Babaen ti maysa a propeta iti Daan a Tulag, kinunana:

“Adtoy, umay dagiti aldaw…nga ipaw-itkonto ti bisin ditoy daga, saan a bisin iti tinapay, wenno waw iti danum, no saan ket a panagdengngeg kadagiti sao ni Jehova:

“Ket [dagiti tao] agbariw-asdanto manipud baybay agingga iti sabali a baybay, ken manipud amianan agingga iti daya, agtaraydanto nga agallaalla nga agsapul iti sao ni Jehova, ngem saandanto a matumpungan.”

Amos 8:11–12

Ti Pannakaisubli ti Ebanghelio

Idi 1820, kas iti inaramidnan iti unos ti pakasaritaan, pimmili manen ti Ama iti Langit iti maysa a propeta a mangisubli iti ebanghelio ken iti priesthood iti daga. Joseph Smith ti nagan dayta a propeta. Kas maysa nga agtutubo a lalaki, nariribukan ni Joseph kadagiti panagsusupadi dagiti adu a simbaan iti lugarna ket kinayatna a maammuan no ania a simbaan ti umno. Iti pannakaammona nga agkurang isuna iti kinasirib, sinurotna ti balakad a masarakan iti Biblia, “No siasino man kadakayo ti agkurang iti kinasirib, agdawat koma iti Dios; isu a mangted a sikakaasi kadagiti isu amin, ket saan a mangpabain; ket maitedto kenkuana” (Santiago 1:5).

Nakita ni Joseph Smith ti Nailangitan nga Ama ken ni Jesucristo. Maipanggep iti daytoy a padas, kinunana:

“Nakitak ti kasla adigi a lawag iti mismo a ngatuen ti ulok, a naranraniag pay ngem init, nga in-inut a nagpababa a nagdisso kaniak. …

Nakitak ti dua a Kinatao idi agdisso ti lawag kaniak, nga artapan ti lawag ken tan-okda ti amin a panangiladawan, a nagtakder iti angin iti ngatuek. Maysa kadakuada ti nagsao kaniak, nga inawagannak iti naganko, ket kinunana, intudona ti kaduana—

Daytoy ti Ay-ayatek nga Anakko. Dumngegka Kenkuana!”

Joseph Smith—Pakasaritaan 1:16–17

Inkeddeng ni Joseph Smith a saludsoden iti Dios no ania ti nasken nga aramidenna. Idi nagkararag ni Joseph tapno maammuanna ti kinapudno, nagparang ti Nailangitan nga Ama ken ni Jesucristo kenkuana. Imbaga ni Jesus ken ni Joseph a saan a kumappeng iti ania man kadagiti simbaan, ta “biddutda amin” ken “asidegda kaniak iti bibigda, ngem nakayakay ti pusoda kaniak; isursuroda a doktrina dagiti bilin ti tao; addaanda iti nadiosan a langa, ngem iliblibakda ti bileg nga adda iti dayta” (Joseph Smith—Pakasaritaan 1:19).

Kas iti inaramid ti Dios kada Adan, Noe, Abraham, Moises, ken kadagiti dadduma pay a propeta, inawaganna ni Joseph Smith nga agbalin a propeta a babaen kenkuana naisubli ti naan-anay nga ebanghelio.

Ti Pannakaisubli ti Priesthood

Idi 1829, inawat ni Joseph Smith ti isu met laeng a turay ti priesthood nga inted ni Jesucristo kadagiti Apostolna. Ni Juan Bautista, a nangbuniag ken ni Jesus, ket nagparang ken ni Joseph Smith ket intalekna kenkuana ti Aaronic Priesthood, wenno nababbaba a priesthood. Iti saan a nabayag nagparang ken ni Joseph Smith da Pedro, Santiago, ken Juan (tallo kadagiti sigud nga Apostol ni Jesucristo) ket intalekda kenkuana ti Melchizedek Priesthood, wenno nangatngato a priesthood.

Imbaon ni Jesucristo ni Juan Bautista ket kalpasanna ti tallo kadagiti Apostolna tapno itedda ken ni Joseph Smith ti turay ti priesthood.

Kalpasan a naawatna ti turay ti priesthood, nabilin ni Joseph Smith a mangbukel manen iti Simbaan ni Jesucristo iti daga. Babaen kenkuana, nangawag manen ni Jesucristo iti Sangapulo-ket-dua nga Apostol.

Kas iti panangidaulo ni Jesucristo kadagiti Apostolna babaen ti paltiing kalpasan ti Panagungarna, itultuloyna nga iturong ti Simbaan iti agdama babaen kadagiti sibibiag a propeta ken apostol. Ti Presidente ti Ti Simbaan ni Jesucristo dagiti Santo iti Ud-udina nga Aldaw ti napili a propeta ti Dios ita nga agdama. Isu, dagiti mamagbagana, ken dagiti Sangapulo-ket-dua nga Apostol ket agikutda iti turay ti priesthood nga inikutan idi dagiti amin a propeta ken apostol kadagiti napalabas a panawen. Dagitoy a lallaki ket propeta, mammaltiing, ken mammadto.

Ti Libro ni Mormon

Kas paset ti Pannakaisubli ti ebanghelio, inyeg ti Dios ti Libro ni Mormon: Mainayon a Pammaneknek ken ni Jesucristo. Babaen ti bileg ti Dios, impatarus ni Joseph Smith daytoy a libro manipud iti nagkauna a rekord a naisurat kadagiti balitok a pinanid. Ti Libro ni Mormon ket “kasuratan ti pannakilangenlangen ti Dios kadagiti umili iti America idi ugma ket linaonna ti pakabuklan ti agnanayon nga ebanghelio” (pakauna iti Libro ni Mormon).

Ti Libro ni Mormon ket maysa a nabileg a pammaneknek ken ni Jesucristo. Tulongannatayo daytoy a makaawat kadagiti pannursurona, agraman dagiti adda iti Biblia.

Ti Libro ni Mormon ket nakappapati a pammaneknek iti Pannakaisubli ti ebanghelio babaen ken ni Joseph Smith. Maammuam para iti bagim a pudno ti Libro ni Mormon. Tapno magun-odmo daytoy a pannakaammo, nasken a basaem daytoy, utobem ti mensahena, ken tarigagayam a maammuan no pudno daytoy. Nasken a kiddawem iti Nailangitan nga Ama a patalgedanna a balikasna daytoy. Bayat ti panangaramidmo iti kasta, ipalgaknanto kenka babaen iti Espiritu Santo a pudno daytoy.

Maammuam a pudno ti insuron dagiti misionario no basaem ken ikararagam ti maipapan iti Libro ni Mormon:

“No naimpusuan ti idadawatyo, ken addaan iti pudno a panggep, ken addaan iti pammati ken ni Cristo, iparangarangna ti kinapudnona kadakayo, babaen ti pannakabalin ti Espiritu Santo.

“Ket babaen ti pannakabalin ti Espiritu Santo maammuanyo ti kinapudno ti amin a banag.”

Moroni 10:4–5

Iti pannakaammom a pudno ti Libro ni Mormon, maammuamto met babaen ti Espiritu Santo a propeta ti Dios ni Joseph Smith, a naisubli ti ebanghelio ni Jesucristo babaen kenkuana, ken idadauluan ita nga agdama ti maysa a propeta ken dagiti apostol ti Ti Simbaan ni Jesucristo dagiti Santo iti Ud-udina nga Aldaw.

Kasano a Maammuak?

Maammuam a pudno daytoy a mensahe. No kiddawem iti Nailangitan nga Amam iti kararag, makaawatka iti sungbat manipud Kenkuana babaen iti Espiritu Santo. Maawagan pay iti Espiritu ti Dios ti Espiritu Santo, ket maysa kadagiti akemna ti agsaksi, wenno agpaneknek, maipapan iti kinapudno.

Kasano nga Agkararagak?

• Awagam ti Nailangitan nga Amam.

• Yebkasmo dagiti rikna ti pusom (panagyaman, panagsaludsod, panagkiddaw a mangipatalged iti kinapudno ti Libro ni Mormon ken ti no ania ti insuron dagiti misionario).

• Gibusam (“Iti nagan ni Jesucristo, amen”).

Mabalin a datdatlag ken makapagbalbaliw iti biag daytoy a pannakaammo, ngem gagangay a sumangbay daytoy a kas naulimek a pammatalged, nga awan dagiti nakakaskasdaaw a pannakaipakita iti pannakabalin ti Dios. Patalgedan ti Espiritu Santo ti kinapudno babaen kadagiti rikna, pampanunot, ken impresion. Kas naisuro iti Biblia, “Ti bunga ti Espiritu ket ayat, rag-o, talna, mabayag a panagitured, kinaanus, kinalaing, kinamanagtalek, kinaemma, [ken] panagteppel” (Taga Galacia 5:22–23). Dagitoy a rikna manipud iti Espiritu Santo ket personal a paltiing kenka a pudno ti ebanghelio ni Jesucristo kas naisubli babaen ken ni Joseph Smith. Kalpasanna kasapulamto a pilien no agbiagkanto met laeng a maitunos iti pannakaammo a naawatmon.

• Nailawlawag ti kaipapanan dagiti balikas a maris nalabaga kadagiti panid 18 ken 19.