God Pa Pahpah Pahkotwen Tomom Inkuhsrao

God pa Pahpah tomom Inkuhsrao. El etwekom wo ac luhngse kom yohk liki na luhmweyac sum. El kena tuh kom in engan ke moul se inge ac nwe tok ma pahtpaht.

In ahkfalye srihpac se inge, Pahpah Lucng El acse plwacn se pahngpahng wosasuc* luhn Jisus Kraist. Jisus Kraist pa Wen nuhtin God; moul ac mwe luti Lal pa kolyuck se nuh ke mihslac ke moul se inge ac engan nwe tok ma pahtpaht.

Pahpah tuhmasr Inkuhsrao El—fohlohkohnwack—ma pwacye muhtahl ma kom kuh in etuh ac moulkihn. Ma pwacye inge tuh ahkkahlwemyeyuck nuh sin mwet pahluh e ke muhtwacwaciyac ah.

Wosasuc uh Ahkinsewowoye Sucu an ac Kais Sie

Wosasuc luhn Jisus Kraist ahkinsewowoyaclos nuh kwewa suc insese ac moulkihn uh. Sie acn wo emet in luti ac moulkihn wosasuc uh pa yurin sucu an. God El oakiyac sucu uh in use mwe engan nuh sin tuhlihk Nahtuhl, in lwelah kuht in lutlutkihn ip yohk suwohs yen mihslac, ac in ahkoekuhtlac in fohlohk nuh Yohrohl tukun kuht misac. Finne inmahsrlon sucu uh kuh in upac ke kuhtuh pacl uh, Pahpah Lucng El ahkinsewowoye kuht ke kuht kwacfe in ukwe mwe luti luhn Jisus Kraist. Mwe luti inge kahsrwe kuht ahkfokokoye sucu lasr uh.

Pahpah Lucng El Ahkkahlwemye Wosasuc Lal

Ke ipin plwacn Lal uh, God El sule mwet pahluh, ma oacna Adam, Noah, Abraham, ac Moses. Mwet Pahluh:

• Luti ke God ac in mwet loh yohk srihpac luhn Wen Nahtuhl, Jisus Kraist.

• Eis fwackyuck, kuh kolyuck sin Leum.

• Luti wosasuc nuh facluh ac luhma kahs luhn God.

Mwet Pahluh eis pristut, kuh kuh suwohs in fahk ac mukwikwi ke inen God in kol tuhlihk Nahtuhl. Mwet suc ukwe mwet pahluh uh eis mwe insewowo God El olwelah uh. Elos suc srahngwesr lohng wosasuc ac mwet pahluh luhn God uh wacngihnlac mwe insewowo ingacn ac ahkloesyelos liki God. Elos suc srahngwesr lohng mwet pahluh ac kahingkuhnlah olweacng lalos in ukwe God uh oasr ke ohiyac se pahngpahng forlah liki ma pwacye.

Ahkkahlwemye ma pwacye uh tuhlac ke mwet uh srahngwesr lohng mwet pahluh uh.

Ne puhs sin tuhlihk Nahtuhl sikalweni na in srahngwesr lohng Sel ac mwet pahluh Lal uh, Pahpah Lucng El tiac tui in luhngse tuhlihk Nahtuhl. El ke use nuh sesr ma nuh kwewa kuht enenuh in engan inge ac in fohlohk nuh Yohrohl tukun kuht misac. Ma suhmuhslah uh ahkkahlwemye ohiyac se ke God El sikalweni in saplakyang nuh sin tuhlihk Nahtuhl, finne kuht tiac lohng ke pacl nuh kwewa:

• God El sule mwet pahluh se.

• Mwet pahluh se luti wosasuc ac kol mwet uh.

• God El ahkinsewowoye mwet uh.

• Mwet uh kais kuhtuh na tilac tuni kuh seahkos mwe luti luhn mwet pahluh. Elos kais kuhtuh na srahngwesr lohng mwet pahluh ac mwe luti lal ac puhtatyang nuh ke forlah liki ma pwacye.

• Ke srihpen forlah liki ma pwacye, mwet uh nuhkanlah etuh ke wosasuc uh. Kuh luhn pristut itucklac luhkwelos.

• Ke pacl uh fal ac mwet uh ahkolah in sifil ukwacl, God El sulwaclah pac mwet pahluh se, fohlohkohnwack pristut ac Alu uh, ac kol mwet pahluh se in luti wosasuc.

Jisus Kraist El Oakiyac Alu Lal

Ke pacl se ma Oreklac Facluh ah me, tuhlihk nuhtin God tuhpan tuhkuh luhn Mwet Lahngo Jisus Kraist. Oacna ke El olwelah ah, Pahpah Lucng El suhpwacma Wen Nahtuhl, Jisus Kraist, nuh facluh ke 2,000 yac somlah ah.

Jisus Kraist El moulkihn sie moul suwohs, nwacsnwacs. El oakiyac Alu Lal, luti wosasuc Lal, ac orwaclah mwe usrnguck pucspucs. El sulaclah mwet singucul luo in pa Mwet Sap Lal, weluhlwacng Piter, Jemes, ac Jon. El lotwelos ac sang kuh ke pristut in luti ke Inel ac in oruh akwuck muhtahl an, ma oacna pacptais.

Ke Jisus El oakiyac Alu Lal uh, El eis ahkuhtweyac sin Pahpah Lucng. Na El ahkuhtweyac nuh sin mwet tuhma lutlut Lal an. Jisus El luti mwet ukwacl uh lah fwackyuck tuhkuh sin God pa yot se ma El ac fah muhsaheack Alu Lal fac.

Jisus Kraist El oakiyac Alu Lal:

• El pahngon ac akmuhsraelah Mwet Sap uh.

• El sang nuh selos kuh Lal in luti ac pacptais. Kuh se inge pa pahngpahng pristut.

• Tukun misac ac Moulyak Lal, El tahfwelah na in kol Mwet Sap uh ke fwackyuck.

Ke sahflahiyacn moul Lal, Jisus Kraist El kweok ac misac ke ma koluk lasr kwewa suc moul met kuh suc ac tuhfah moul fin facluh. Kihsac se inge pa pahngpahng Iwaclah. Ke kweok, misac, ac Moulyak Lal, Mwet Lahngo El ahkfihsracsrye nuh sesr in kuh in eis nuhnak muhnahs. Elos suc luhlahlfongi ke El, auliyak, ac liyacacng masap Lal eis nuhnak muhnahs ke ma koluk ac sesseslah ke mihslac ac engan.

Tukun Moulyak Lal, Jisus Kraist El kol Mwet Sap Lal ah ke fwackyuck. Sihmlac in Pwacpuhl uh inkacnek puhs suc El tahfwelah in kol Alu Lal (liye Orekma 10; Fwackyuck 1:1). Ohinge Alu luhn Jisus Kraist kolyuck sin God ac tiac sin mwet uh.

Forlah Liki Ma Pwacye

Tukun misac luhn Jisus Kraist, mwet koluk ah koase ac onwelah mempucr puhs ke Alu uh. Kuhtuh mempucr sahyac ke Alu uh kuhflah liki ip yohk lutiyuck sin Jisus Kraist ac Mwet Sap Lal ah. Mwet Sap ah acnwucki, ac kuh luhn pristut—wi ki in kol ac eis fwackyuck nuh ke Alu uh— itucklac liki facluh. Ke srihpen Alu uh tilac kolyuck ke kuh luhn pristut, ma stuhuh ilyak nuh ke mwe luti ke Alu uh. Mwet wo ac ma pwacye puhs luhlah, tuhsruhk wosasuc oacna ke akwucki sel Jisus Kraist ac tuhlac. Puhlan pacl se inge pahngpahng Forlah Luhlahp Liki Ma Pwacye.

Wi misac luhn Mwet Sap Lal Jisus Kraist ah, mwe luti pwacye uh sifil tuhlac.

Forlah liki ma pwacye se inge pa sis sruhnwack luhn alu pucspucs uh wi mwe luti tikuclkucl uh. In pacl se inge, puhs mukul ac muhtwacn suk ma pwacye uh, tuhsruhk elos tiac konwacack. Mwet wowo pucspucs luhlahlfongi ke God ac Jisus Kraist ac srihke in etuh ac luti ma pwacye, tuhsruhk wacngihn yohkiyacn wosasuc kuh kuh luhn pristut. Ke srihpac sacn, kais sie fihl usrukihn luhman forlah liki ma pwacye ke mwet uh ukwe ma fihl met ah tahfwema, weacng eklac ke wosasuc luhn Kraist.

Kuhtuh mokleack mwet uh, ma oacna Martin Luther ac John Calvin, suc akihlen lah oruh sac ac mwe luti uh eklac kuh tuhlac. Elos srihke in sifil oaki alu suc ma elos oasr kac. Ke kuh luhn pristut wacngihn uh, pa oruh, wosasuc luhn Kraist koflah na fohlohklac oacna met ah. Fohlohkyak se pa enenweyuck uh.

God El etuh lah e tuhfah oasr forlah liki ma pwacye se. Sin sie mwet pahluh ke Wuhlweacng Mahtuh, El fahk:

“Liye, pacl se ac fah tuhkuh … Nga fah suhpwacma sracl nuh fin acn uh, tiac ke sracl in flao, kuh maluh ke kof, tuhsruhk ke lohng kahs luhn Leum:

“Ac [mwet] uh ac fah foroht forma liki Meoa Misa nuh ke Meoa Mediterranean, ac ke tafunyen epang nuh ke layen kuhtuhlacp. Elos ac fah suk kahs in luti sin Leum God yen nuh kwewa, tuh elos ac fah tiacna konacack.”

Emos 8:11–12

Fohlohkyak luhn Wosasuc

Ke 1820, oacna oruh Lal ke sramsram mahtuh uh me, Pahpah Lucng El sifil sule sie mwet pahluh in sifil fohlohkihn wosasuc ac pristut nuh facluh. Inen mwet pahluh sacn pa Joseph Smith. Ke el mwet fuhsr se ah, Joseph el fohsack ke ma siena inmahsrlon alu pucspucs ke pola acn sel ah ac kena etuh lah piyac kac alu pwacye uh. El etuh lah wacngihn etwacack yohrohl, oruh el ukwe fahk se in Pwacpuhl muh, “Fin oasr suwos suc wacngihn etwacack yohroh, lwelah elan siyuck sin God, suc sang nuh sin mwet nuh kwewa sukohsohk, ac tiac sruh; ac fah ituckyang” (Jemes 1:5).

Joseph Smith el liyacl Pahpah Lucng ac Jisus Kraist. Ke puhlakihn se inge, el fahk:

“Nga liye srun kahlwem soko tuhkuh fin sifuck, kahlmwelihk ahliki kahlwem ke faht uh, suc kais kuhtuh na puhtati ne tuhwi feik. …

“Ke kahlwem sac tuhwi feik ah Nga liye Mwet luo, suc kahlwem ac wolacna la koflah na luhmweyuck, tu lucng liki yuc yen engyeng uh. Sie selos kahs nuh sihk, pahngon yuc ke inek ac fahk, srihsrngi El suc ngiyac—

Pa inge Wen Kuloh Nuhtihk. Porongwacl!”

Joseph Smith—Sramsram Mahtuh 1:16–17

Joseph Smith el otwelah in siyuck sin God ma el enenuh in oruh. Ke Joseph el pruhe in etuh ma pwacye, Pahpah Lucng ac Jisus Kraist sikyang nuh sel. Jisus El fahk Joseph elan tiac wi kuhtwena alu inge, ke “srihpen elos nuh kwewa stuhuh” ac “elos tuhkuh fototo nuh yuruk ke inngoasrolos, tuhsruhk insiyaclos loesuhlah likiyuc, elos luti ke mwe luti ke masap luhn mwet, luhmahlah ma ohi, tuhsruhk lahfwekihn kuh la an” (Joseph Smith—Sramsram Mahtuh 1:19).

Oacna ke God El oruh nuh sel Adam, Noah, Abraham, Moses, ac mwet pahluh sahyac ah, El pahnglol Joseph Smith in oruh sie mwet pahluh suc kacl me fohnlah luhn wosasuc fohlohkihnyuckyak.

Fohlohkyak luhn Pristut

Ke 1829, Joseph Smith el eis kuh se pacna luhn pristut suc Jisus Kraist El tuh sang nuh sin Mwet Sap Lal ah. Jon Pacptais, suc pacptaiselah Jisus, sikyang nuh sel Joseph Smith ac sang nuh sel Aaronic Pristut, kuh pristut se ten ah. Piter, Jemes, ac Jon (tolu sin Mwet Sap luhn Jisus Kraist met ah) sikyang tok nuh sel Joseph Smith ac sang nuh sel Melchizedek Pristut, kuh pristut fuhlwact sac.

Jisus Kraist El suhpwacllah Jon Pacptais ac tolu sin Mwet Sap Lal in sang kuh luhn pristut nuh sel Joseph Smith.

Tukun el eis kuh luhn pristut, Joseph Smith el kolyucklac in sifil oakiyac Alu luhn Jisus Kraist fin facluh. Kacl, Jisus Kraist El sifil pahngon Mwet Sap Singucul Luo.

Oacna ke Jisus Kraist El kol Mwet Sap Lal ke fwackyuck tukun Moulyak Lal ah, El tahfwelah na in kol Alu uh mihsenge sin mwet pahluh ac mwet sap moul. Prestuhn ke Alu luhn Jisus Kraist luhn Mwet Luhlahlfongi ke Lwen-sahflah pa mwet pahluh sollac luhn God mihsenge. El, mwet kahsruh lal, ac Mwet Sap Singucul Luo sruok kuh luhn pristut suc tuh sruokyuck sin mwet pahluh ac mwet sap kwewa met ah. Mwet inge mwet pahluh, mwet liyactwen, ac mwet eis fwackyuck.

Puk luhn Mormon

Ke ipin Fohlohkyak luhn wosasuc, God El use Puk luhn Mormon: Sie Pac Wuhlweacng luhn Jisus Kraist. Ke kuh luhn God, Joseph Smith el luhngaslah puk se inge ke ma sihmlac mahtuh sihmihsyuck ke puhlwet kol. Puk luhn Mormon el “sie ma sihmlac ke oruh luhn God nuh sin mwet fin acn Macrike met ah ac fohnlah luhn wosasuc ma pahtpaht oasr kac” (muhtwacwacyen Puk luhn Mormon).

Puk luhn Mormon pa sie mwe loh kuhlwacna ke Jisus Kraist. Kahsrwe kuht in kahlwem ke mwe luti Lal, wi ma oasr in Pwacpuhl uh.

Puk luhn Mormon pa mwe ahkpwacyei ke Fohlohkyak luhn wosasuc sel Joseph Smith me. Kom kuh in etuh sum sifacna lah Puk luhn Mormon uh pwacye. In eis etwacack se kac, kom enenuh in riti, motko pweng kac, ac in kena etuh fin pwacye. Kom enenuh in siyuck sin Pahpah Lucng in ahkpwacyei lah kahs Lal pa inge. Ke kom oruh ohinge, El ac fah ahkkahlwemye nuh sum ke Nguhn Muhtahl lah ma inge pwacye.

Kom kuh in etuh lah ma misineri an luti kac uh pwacye kom fin rit ac pruhe ke Puk luhn Mormon:

“Kom fin siyuck ke inse pwacye, nuhnkuh yohk, luhlahlfongi ke Kraist, el ac fah ahkkahlwemye ma pwacye nuh sum, ke kuh luhn Nguhn Muhtahl.

“Ac ke kuh luhn Nguhn Muhtahl, kom kuh in etuh ma pwacye ke ma nuh kwewa.”

Moroni 10:4–5

Ke kom ac etuh lah Puk luhn Mormon pwacye uh, kom ac fah etuh pac ke Nguhn Muhtahl lah Joseph Smith el mwet pahluh se luhn God, lah wosasuc luhn Jisus Kraist fohlohkihnyuckyak sel, ac Alu luhn Jisus Kraist luhn Mwet Luhlahlfongi ke Lwen-sahflah kolyuck sin mwet pahluh se ac mwet sap mihsenge.

Ngwac Kuh in Etuh Fuhkah?

Kom kuh in etuh lah pweng se inge pwacye. Kom fin siyuck sin Pahpah tomom Inkuhsrao ke pruhe, kom kuh in eis top Sel ke Nguhn Muhtahl. Nguhn Muhtahl uh pahngpahng pac muh Nguhn luhn God, ac sie sin ma Kunacl uh pa in lohoh kac, kuh ahkpwacyei, ke ma suwos.

Ngwac Pruhe Fuhkah?

• Akihlen Pahpah tomom Inkuhsrao.

• Fahk puhla luhn insiyom (srui, siyuck an ngihsre in ahkkweye ma pwacye ke Puk luhn Mormon ac ke ma misineri an luti tari).

• Kaliyac (“Ke inen Jisus Kraist, amen”).

Etuh se inge kuh in usrnguck ac ikihl moul, tuhsruhk e kwacna tuhkuh ke atacn mihslac, te ke kuh sakihrihk luhn God. Nguhn Muhtahl ahkkweye ma pwacye ke puhla, nuhnak, ac mwe akucl an. Oacna ke lutiyuck ke Pwacpuhl uh, “Fahko luhn Nguhn pa luhngse, engan, mihslac, mongfihsrwacsr in kweok, fihlpacp, wolacna, luhlahlfongi, fihlpacp, [ac] mongfihsracsr” (Met Galatia 5:22–23). Puhla sin Nguhn Muhtahl inge pa mwe fahkwack la sifacna nuh sum lah wosasuc luhn Jisus Kraist oacna ke fohlohkihnyuckyak sel Joseph Smith ah pwacye. Na kom ac tuhfah enenuh in sulaclah lah kom ac moul fal nuh ke etwacack kom eis tari uh.

• Kahs ma tuhn sruhsrah an ahkuhtweyucki oasr ke sra puk 18 ac 19.