Jepļaaktok eo an Ko̧jpeļ eo an Jisōs Kraist

Anij Ej Jemam̧ Ilan̄ Eo Ej Iakwe

Anij ej Jemam̧ ilo Lan̄. Ejeļā kajiōm̧ im ej iakwe eok eļapļo̧k am̧ maron̄ keidi. Ekōņaan bwe kwōn m̧ōņōņō ilo mour in im indeeo.

N̄an kōtōprak wun in, Jemed Ilan̄ eaar letok juon karōk ņa etan ko̧jpeļ * eo an Jisōs Kraist. Jisōs Kraist ej Nejin Anij; mour eo An im katak ko rej tōl n̄an aenōm̧m̧an ilo mour in im lan̄lōn̄ ilo mour indeeo.

Ko̧jpeļ eo ej Kōjeram̧m̧an Baam̧le ko im Kajjojo Armej

Ko̧jpeļ eo an Jisōs Kraist ej kōjeram̧m̧an aolep ro rej bōke im mour kake. Juon iaan jikin ko rem̧m̧an tata n̄an katakin im kōjerbal ko̧jpeļ eo ej ilo baam̧le ko. Anij eaar ejaaki baam̧le ko n̄an bōktok lem̧ōņōņō n̄an ajri ro Nejin, n̄an kōm̧m̧an bwe jen katak pedped ko rejim̧we ilo juon mejatoto in iakwe, im n̄an kōpooj kōj n̄an bar rool n̄an Ippān ālkin ad mej. Men̄e jemjerā ko an baam̧le remaron̄ in apan̄ jet iien, Jemed Ilan̄ ej kōjeram̧m̧an kōj ilo ad kajion̄ ļoor katak ko an Jisōs Kraist. Katak kein rej jipan̄ kōj kōkajoor baam̧le ko ad.

Jemedwōj Ilan̄ Ej Kwaļo̧k Ko̧jpeļ Eo An

Ejja m̧ōttan wōt karōk eo An, Anij ej kālōt rikanaan ro, āinwōt Adam, Noah, Abraham, im Moses. Rikanaan ro:

Katakin kōn Anij im rej rikam̧ool ro rejeno̧lo̧k an Nejin, Jisōs Kraist.
Bōk m̧adenļo̧k, ak tōl jān Irooj.
Katakin kōn ko̧jpeļ eo n̄an laļ in im ukōt naan eo an Anij.

Rikanaan ro rej bōk priesthood eo, ak mālim eo n̄an kōnono im jerbal ilo etan Anij n̄an tōl ajri ro Nejin. Armej ro rej ļoor rikanaan ro rej bōk kōjeram̧m̧an ko Anij eaar kalim̧m̧ur kaki. Ro rej kowaan ko̧jpeļ eo im rikanaan ro an Anij rej jerwani kōjeram̧m̧an ko im kōttoļo̧k er make jān Anij. Ro rej kowaan rikanaan ro im kakkuri kalim̧m̧ur ko aer n̄an ļoor Anij rej pād ilo juon jekjek eo ņa etan bun̄ jān tōmak.

Men̄e elōn̄ iaan ajri ro Nejin raar āliji im bar āliji aer kowane E im rikanaan ro An, Jemed Ilan̄ eaar wōnm̧aanļo̧k wōt n̄an an iakwe ajri ro Nejin. Ekōņaan letok n̄an kōj jabdewōt men jej kōņaan n̄an m̧ōņōņō kiiō im n̄an bar rool n̄an E ālkin ad mej. Jeje ko rekwojarjar rej kwaļo̧k juon jon̄ak an Anij ej āliji im bar āliji ilo an pukōt ajri ro Nejin, men̄e ejjab aolep iien jej ron̄jake:

Anij ej kālōt juon rikanaan.
Rikanaan ro rej katakin kōn ko̧jpeļ eo im rej tōl armej ro.
Anij ej kōjeram̧m̧an armej ro.
Jidik kōn jidik armej ro rej kowan ak jab pokake katak ko an rikanaan eo. Āliktata rej joļo̧k rikanaan eo im katak ko an im wōtlo̧k n̄an bun̄ jān tōmak.
Kōnke kōn bun̄ jān tōmak eo, armej ro rej jerwani jeļā eo kōn ko̧jpeļ eo. Mālim eo an priesthood kar bōk jān ibwilijier.
N̄e iien eo ejejjet im armej ro rej pojak n̄an ļoor E bar juon alen, Anij ej kālōt bar juon rikanaan, kōjepļaaktok priesthood eo im Kabun̄ eo, im ej tōl rikanaan eo n̄an katakin kōn ko̧jpeļ eo.

Jisōs Kraist Eaar Kajutak Kabun̄ Eo An

Jān tōre eo an Kōm̧anm̧an eo, ajri ro nejin Anij raar reim̧aanlo̧k n̄an itok eo an Rilo̧mo̧o̧r Jisōs Kraist. Āinwōt an kar kalim̧m̧ur kake, Jemedwōj Ilan̄ eaar jilkintok Nejin, Jisōs Kraist, n̄an laļ in elōn̄ļo̧k jān 2,000 iiō ko rem̧ootļo̧k.

Jisōs Kraist eaar mour juon mour eweppān, ejjab jerawiwi. Eaar kajutak Kabun̄ eo An, kar katakin kōn ko̧jpeļ eo An, im kar kōm̧m̧ane elōn̄ kabwilōn̄lōn̄ ko. Eaar kālōt jōn̄oulruo em̧m̧aan ro n̄an erom An Rijilōk, ekoba Peter, James, im John. Eaar katakin er im leļo̧k n̄an er mālim eo an priesthood eo n̄an katakin ilo Etan im n̄an kōm̧m̧ani kain̄i ko rekwojarjar, āinwōt peptaij.

Ke Jisōs eaar kajutak Kabun̄ eo An, Eaar bōk naan in kōmeļeļe ko jān Jemedwōj Ilan̄. Innām Eaar katakin rikaļoor ro An. Jisōs eaar katakin rikaļoor ro An bwe m̧adenļo̧k jān Anij eaar juon dekā eo me Enaaj kar kalōk Kabun̄ eo An ioon.

Ilo jem̧ļo̧kin ļo̧k mour eo An, Jisōs Kraist eaar en̄taan im mej kōn jerawiwi ko an jabdewōt ro raar mour ak ro renaaj mour ioon laļ in. En̄taan in ej ņa etan Pinmuur eo. Kōn en̄taan eo An, mej im Jerkakpeje eo, Rilo̧mo̧o̧r eo eaar kapidodoik n̄an kōj n̄an ad jeorļo̧k bōd. N̄an ro ewōr aer tōmak ilo E, ukweļo̧k, im kejparok kien ko An rej bōk jeorļo̧k bōd in jerawiwi ko aer im rej obrak kōn aenōm̧m̧an im lan̄lōn̄.

Ālkin Jerkakpeje eo An, Jisōs Kraist eaar tōl Rijilōk ro An kōn m̧adenļo̧k. Baibōļ eo rekoote elōn̄ wāween ko me Eaar wōnm̧aanļo̧k wōt ilo an tōl Kabun̄ eo An (lale Jerbal 10; Revelesōn 1:1). Kōn menin Kabun̄ eo an Jisōs Kraist kar tōl jān Anij im jab jān armej.

Bun̄ Jān Tōmak Eo Eļap

Ālkin mej eo an Jisōs Kraist, armej ro renana raar kakkure im m̧aan elōn̄ membōr ro an Kabun̄ eo. Membōr ro jet raar jidik kōn jidik ilo̧k jān pedped ko kar katakin jān Jisōs Kraist im Rijilōk ro An. Rijilōk ro kar m̧aan er, im mālim eo an priesthood—ekoba kii ko n̄an tōl im bōk m̧adenļo̧k n̄an Kabun̄ eo—kar būk jān laļ in. Kōnke Kabun̄ eo eaar jako an tōl jān mālim eo an priesthood, bōd kar deļōn̄ tok n̄an katak ko an Kabun̄ eo. Armej ro rem̧m̧an im elōn̄ iaan m̧ool ko raar pād wōt, bōtaab ko̧jpeļ eo āinwōt an kar ejaak jān Jisōs Kraist kar jako. Tōre in ej ņa etan Bun̄ Jān Tōmak eo Eļap.

Bun̄ Jān Tōmak in eaar tōprak in an kar jutak elōn̄ kabun̄ ko kōn katak ko rōtarpok. Ilo tōre in, elōn̄ em̧m̧aan ro im kōrā ro raar pukōt m̧ool eo, bōtaab raar jab maron̄ loe. Elōn̄ armej ro rem̧m̧an raar tōmak ilo Anij im Jisōs Kraist im kar kajion̄ n̄an meļeļe im katakin m̧ool eo, bōtaab eaar jab wōr tallep in ko̧jpeļ eo ak mālim eo an priesthood. Āinwōt juon tōprak, kajjojo epepen raar deļo̧n̄e bun̄ jān tōmak eo ilo an armej kar reel kōn ta eo epepen ko im̧aanļo̧k raar kōm̧m̧ane, ekoba okoktak ko n̄an ko̧jpeļ eo an Kraist.

Jet armej ro eļap kiļaer, āinwōt Martin Luther im John Calvin, raar kile bwe iminene ko im katak ko em̧ōj aer kar oktak ak jako. Raar kajion̄ n̄an bar kajutak kabun̄ ko me raar uwaaer. Ilo an ejjeļo̧k mālim an priesthood, mekarta, ko̧jpeļ eo an Kraist ejjab maron̄ in bar rool ļo̧k n̄an jekjek eo an jinoin tata. Juon jepļaaktok eaar menin aikuj.

Anij eaar jeļā enaaj kar wōr juon bun̄ jān tōmak. Kōn juon rikanaan ilo Kallim̧ur M̧okta, Eaar ba:

“Lo, raan ko rej itok,”… “n̄e Inaaj jilkinwōj juon n̄ūta ilo āneo; jab juon n̄ūta kōn pilawā ak maro kōn dān, ak enaaj kōn ron̄jake naan ko an Jeova:

“Im [armej] renaaj jebwāālel jān lo̧jet n̄an lo̧jet, im jān ean̄ n̄an reeaar; renaaj itok-itak in pukot Naan in Jeova, ak re ban loe.”

Amos 8:11–12

Jepļaaktok eo an Ko̧jpeļ eo

Ilo 1820, āinwōt An kar kōm̧m̧ane ilo bwebwenato, Jemed ilo Lan̄ bar juon alen eaar kālōt juon rikanaan n̄an kōjepļaaktok ko̧jpeļ eo im priesthood eo an n̄an laļ in. Etan rikanaan eo eaar Joseph Smith. Ke eaar juon likao wōt, Joseph eaar pok kōn oktak ko ibwilijin elōn̄ kabun̄ ko ilo eria eo an im eaar kōņaan jeļā ewi wōt kabun̄ eo ejim̧we. Jeļā bwe eaar jabwe meletlet ippān, eaar ļoor kapilōk eo loi ilo Baibōļ eo, “A eļan̄n̄e jabdewōt iaami ej aikuj mālōtlōt, en kajjitōk kōn e ippān Anij, eo Ej wūjlep n̄an armej otemjej, im jab eņo̧uk kake, im Enaaj leļo̧k n̄an e” (Jemes 1:5).

Joseph Smith eaar kālōt n̄an kajjitōk ippān Anij ta eo ej aikuj kōm̧m̧ane. Ke Joseph eaar jar n̄an jeļā m̧ool eo, Jemed Ilan̄ im Jisōs Kraist raar waļo̧k ļo̧k n̄an e. Jisōs eaar jiron̄ Joseph n̄an jab koba ļo̧k ilo jabdewōt kabun̄ ko, bwe “kōnke aoleper jab m̧ool” im “rej kepaaktok eō kōn tieer, bōtaab buruweer elap aer ettoļo̧k jān eō, rej kwaļo̧k katak ko im kien ko an armej, rej kōmōnmōn wāwen mwiliir, a ilo buruwer rej karmijete emōn eo ie” (Joseph Smith—History 1:19).

Āinwōt an Anij kar kōm̧m̧ane ippān Adam, Noah, Abraham, Moses, im rikanaan ro jet, Eaar kūr Joseph Smith n̄an erom juon rikanaan kōn e aolepen ko̧jpeļ eo eaar jepļaaktok.

Jepļaaktok eo an Priesthood eo

Ilo 1829, Joseph Smith eaar bōk ejja mālim eo an priesthood eo wōt me Jisōs Kraist eaar leļo̧k n̄an Rijilōk ro An. John Ripeptaij, eo eaar peptaiji Jisōs, eaar waļo̧k ļo̧k n̄an Joseph Smith im kar leļo̧k ioon Aaronic Priesthood, ak priesthood eo ettāļo̧k. Peter, James, im John (jilu iaan Rijilōk ro jinoin tata an Jisōs Kraist) tok ālik raar waļo̧k ļo̧k n̄an Joseph Smith im kar leļo̧k ioon Melkisedek Priesthood, ak priesthood eo eutiejļo̧k.

Ālkin an kar bōk mālim eo an priesthood, Joseph Smith eaar tōl ļo̧k n̄an an ejaake Kabun̄ eo an Jisōs Kraist bar juon alen ioon laļ in. Kōn e, Jisōs Kraist bar juon alen eaar kūr Jōn̄oulruo Rijilōk ro.

Ejja āinwōt an Jisōs Kraist kar tōl Rijilōk ro An kōn m̧adenļo̧k ālkin Jerkakpeje eo An, Ej wōnm̧aaņļo̧k wōt n̄an tōl Kabun̄ eo rainin kōn rikanaan ro remour im rijilōk ro. Būreejtōn eo an Kabun̄ eo an Jisōs Kraist im Armej ro Rekwojarjar ilo Raan-kein Āliktata ej rikanaan eo kar kālōte jān Anij rainin. E, rikakipilōklōk ro an, im Jōn̄oulruo Rijilōk ro rej kabwijer mālim eo an priesthood eo kar kabwijere jān aolep rikanaan ro im rijilōk ro ilo tōre ko im̧aanļo̧k. Em̧m̧aan rein rej rikanaan, rilolo, im ribōk m̧adenļo̧k.

Bok in Mormon

Ejja m̧ōttan wōt Jepļaaktok eo an ko̧jpel eo, Anij eaar bōk m̧aantak Bok in Mormon: Bar juon Kalim̧m̧ur kōn Jisōs Kraist. Kōn kajoor eo an Anij, Joseph Smith eaar ukōt bok in jān juon ļo̧o̧k in etto kar je ioon pilej ko̧o̧ļ ko. Bok in Mormon ej “juon ļo̧o̧k in m̧akūtkūt ko an Anij ippān armej ro etto ilo kar aelōn̄ in Amedka kaņ im ewōr ie tarlep in gosepl eo ejjeļo̧k jem̧ļo̧kin” (Kadkad in Book of Mormon).

Bok in Mormon ej juon kam̧ool ekajoor kōn Jisōs Kraist. Ej jipan̄ kōj meļeļe katak ko An, ekoba ko ilo Baibōļ eo.

Bok in Mormon ej kein kam̧ool an Jepļaaktok eo an ko̧jpeļ eo kōn Joseph Smith. Komaron̄ jeļā kōn kwe make bwe Bok in Mormon ej m̧ool. N̄an bōk jeļā in, kwoj aikuj riiti, kejōkļo̧jeņ kōn ennaan eo an, im ikirelel n̄an jeļā eļan̄n̄e ej m̧ool. Kwoj aikuj kajjitōk ippān Jemedwōj Ilan̄ n̄an kapene bwe ej naan eo An. Ilo am̧ kōm̧m̧ane menin, Enaaj kwaļo̧k n̄an eok kōn Jetōb Kwojarjar bwe ej m̧ool.

Ilo am̧ jeļā bwe Bok in Mormon ej m̧ool, kwonaaj barāinwōt jeļā kōn Jetōb Kwojarjar bwe Joseph Smith eaar juon rikanaan an Anij, bwe ko̧jpeļ eo an Jisōs Kraist eaar bar jepļaaktok kōn e, im bwe Kabun̄ eo an Jisōs Kraist im Armej ro Rekwojarjar ilo Raan-kein Āliktata ej tōl jān juon rikanaan im rijilōk ro rainin.

Ekōjkan Aō Maron̄ Jeļā (men kein rej m̧ool)?

Komaron̄ jeļā ennaan in ej m̧ool. Eļan̄n̄e kwoj kajjitōk ippān Jemam̧ Ilan̄ ilo jar, komaron̄ bōk juon uwaak jān E kōn Jetōb Kwojarjar. Jetōb Kwojarjar eo ej barāinwōt kūr Jetōb an Anij, im juon iaan jerbal ko An ej n̄an kam̧ool, ak kwaļo̧k kam̧ool, kōn m̧ool eo.

Jeļā in emaron̄ in kabwilōn̄lōn̄ im ukōt mour, bōtaab ekkā an itok āinwōt juon kalim̧m̧ur ejej uwaan, ilo an ejjeļo̧k men eļap ej kwaļo̧k kajoor eo an Anij. Jetōb Kwojarjar ej kapen m̧ool eo kōn en̄jake ko, ļōmņak ko, im̧we ko. Āinwōt an Baibōļ eo katakin, “A leen Jetōb, yokwe, lan̄lōn̄, aenōm̧m̧an, meadwōd, jouj, em̧m̧an, tiljek, ineem̧m̧an, [im] jatōr” (Galetia 5:22–23). En̄jake kein jān Jetōb Kwojarjar rej m̧adenļo̧k an juon make n̄an kwe bwe ko̧jpeļ eo an Jisōs Kraist eaar jepļaaktok kōn Joseph Smith ej m̧ool. Innām kwonaaj aikuj in kālōt eļan̄n̄e kwonaaj mour jokkun wōt juon ippān jeļā eo kwar bōke.