Olutel Ebangkelio er a Jesus Kristo

A Oubeltik el Reng el Dios a Demam er a Babeluades

A Dios a Demam el ngar er a Babeluades. Ngii a kmal ungil medengelkau e kmal betik a rengul er kau. Ngii a soal a bom ngar er a deoureng er tia el klengar me a diak a ulebengelel.

Me a mo uchul eng mekedmokl tia el moktek, ea Chedam er a Babelaudes a mla kudmeklii a uldasou el okedongall el ebangkelio * er a Jesus Kristo. A Jesus Kristo a Ngelekel a Dios el Sechal; ea klengar Ngii me a osischeklel a omekrael er kid el mo er a budech er tial klengar me a deoureng er a diak a ulebengelel klengar.

A Ebangkelio a Omekngeltengat a Telungalk me a Derstang el Chad

A ebangkelio er a Jesus Kristo a omekngeltengat er tirke el rokui el kongei e oltirakl er ngii. A tang er a kot el ungil basio el mosisechakl er ngii a ebangkelio a chelsel a telungalk. A Dios a mla kudmokl a telungalk el mo uchul a deoureng el mo er a Rengelekel, el meskid a techall el suub a melemalt el osisechakl er a chelsel a ungil basio, e kudmeklid el lemuut el mo er Ngii ruriul er a kodall. Meng uaisei el deleuill er a telungalk a lebebil er a taem eng ko er a kmal meringel, eng di a Chedam er a Babeluades a mo omekngeltengat er kid sel dolasem el oltirakl osischeklel a Jesus Kristo. Aikal osisechakl a ngosukid el smisiich a telungalk er kid.

A Chedam er a Babeluades a Ochotii Ebangkelio er Ngii

Meng tebechedel sel Uldesuel, ea Dios a melilt er a reprofet, el uaia rua Adam, Noah, Abraham, me a Moses. Reprofet:

Olisechakl el kirel a Dios e tokubets el sioning er a Ngelekel Sechal, el Jesus Kristo.
Melai ocholt, malechub a ulekrael er a Rubak.
Olisechakl er a ebangkelio el mo er a beluulechad e oleiuid a tekingel a Dios.

A reprofet a nguu a priesthood, malechub eng ngerachel el mengedecheduch e ngar er a omeruul lobang a ngklel a Dios el omekrael er a Rengelekel. A rechad el oltirakl er a reprofet a ngmai a klengeltengat el Dios a mla yaksok. Tirkel mo ouketui er a ebangkelio me a reprofet er a Dios a diak bol ngai a klengeltengat e mo cheroid er a Dios. Tirkel mo ouketui er a reprofet e mo diak el blak a rengrir el oltirakl er a Dios a soiseb er a teletael el okedongall el rebet.

Meng uaisei el betok er a Rengelekel a mla mo cheroid er Ngii e ouketui er a reprofet er Ngii, eng di a Chedam er a Babelaudes a melemolem el oubeltik el reng el mo er a Rengelekel. Ngii a soal meskid a rokui el dousbech meng sebeched el mo ngar er a deoureng er chelechang e lmuut el mo er Ngii ruriul er a kodall. A chedaol llechukl a ocholt a teletael el Dios a melemolem el omes er a Rengelekel, eng di kid a blechoel el diak dorrenges:

A Dios a ngiltii a profet.
A profet olisechakl er a ebangkelio e omekrael er a rechad.
A Dios omekngeltengat er a rechad.
Eng di a rechad a mekekokterir el mengoit a osischeklel a profet. Seikid e tir a mo ouketui er a profet me a osischeklel e soiseb er a rebet.
Meng tiaikid el rebet a uchul, ea rechad a mo diak lodengelii ebangkelio. A ngerachel er a priesthood a mo dibus er a delongelir.
E sel bo el ungil taem el rechad a mla mo kldmokl el lmuut el mo oltirakl er Ngii, ea Dios a ngiltii a kuk chimong er a profet, e olutii a priesthood me a Ikelesia, e mekrolii a profet el mo olisechakl er a ebangkelio.

A Jesus Kristo a Kildmeklii a Ikeleisa er Ngii

Me ngulemuchel er a Blebelel a Beluulechad, ea rengelekel a Dios a ulelsingch er sel taem el lemei a Osobel el Jesus Kristo. Meng uaia ikel Ngii a mle yaksok, ea Chedam er a Babeluades a uldureklii a Ngelekel, el Jesus Kristo, el mei er a beluulechad er a erul telael el rak er a memong.

A Jesus Kristo a kiliei er a cherrungel, e melemalt el klengar. Ngii a kildmeklii a Ikelesia er Ngii, ulsisecheklii ebangkelio er Ngii, e riruul a betok el ongasireng el omeruul. Ngii a millilt er a reteruich me a terung el chad el mo Apostol, el uldimukl er tir a Petrus, Jakobus, me a Johanes. Ngii a ulsisechakl er tir e milsterir a ngerachel er a priesthood el mo olisechakl el ngar er a Ngklel e meruul chedaol ruoll, el uaia techolb e chelid.

A Jesus er a lekedmeklii a Ikelesia er Ngii, eng ngilai a tekoi er a mo teletelel er a Chedam er a Babeluades. E Ngii a ulsisechakl er a Rechedal. A Jesus a ulisechakl er a Rechedal el kmo a ocholt er a Dios a dodai el Ngii a mo mekedecherur a Ikelesia er Ngii.

A mocha er a ulebongel er a klengar Ngii, ea Jesus Kristo a mlo chuarm er a ringel e mlad el kirel a kngterir a rebek el chad el tir a mla kiei malechub ete mo kiei er a beluulechad. Tial ringel me a ongarm a okedongall el Tngakireng. Ngokiu a ringel el mlor Ngii, Kodellel, me a Okiis er a Kodall, ea Osobel a rirellii meng sebeched el mo mousubes er a kngtid. Tirkel mo obang a klaumerang er Ngii, ouchel a rengrir, e oltirakl a Llechul a mo nguu a klausubes er a kngterir e mo mui er a budech me a deoureng.

Uriul er a Okisel er a Kodall, ea Jesus Kristo a ulemekrael er a reapostol el okiu ocholt. A Biblia ouchais a betok el teletael el Ngii a millemolem el omekrael er a Ikelesia er Ngii (mesa Rrellir a Reaposto l10; Ocholt 1:1). Seikid ea Ikelesia er a Jesus Kristo a mle ulekrael er a Dios e diak el chad.

Sel Klou el Rebet

Uriul er a kodellel a Jesus Kristo, ea remekngit el chad a uldechelakl e milkedoterir a rebetok el chedal a Ikelesia. A rebebil er a rechedal a Ikelesia a mlor cheroid er a ikel osisechakl el Jesus Kristo me a Reapostol er Ngii a ulsisechakl. A Reapostol a lulmekeuad er tir, ea ngerachel er a priesthood—luldimukl er ngii aikel kiis er a omeleiul ocholt el kirel a Ikelesia—a mlengai er a beluulechad. Meng Ikelesia el mlo diak el ulekrael er a ngerachel er a priesthood a uchul, eng betok el cheleuid a siliseb er a chelsel osisechakl er a Iekelsia. A rungil chad me a betok el klemrang amlo medechel, eng di a cheldellel ebangkelio er a Jesus Kristo a ririid. Tial taem a okedongall el Klou el Rebet.

Tial rebet a mlo uchul eng mokdubech a betok el ikelesia el kakerous osisechakl el lolab. Chelsel tiaikid el taem, ete betok el sechal me a redil a ulsiik er a klemerang, eng ding dimlak el sebecherir el metik er ngii. Te betok el ungil chad a uluumerang er a Dios me a Jesus Kristo e millasem el mo medengei e olisechakl a klemerang, eng ding dimlak lobang a cherrengelel a ebangkelio malechub eng ngerachel er a priesthood. Meng mlo uaisei, el bek el telcheroll a soiseb er tiaikid el teletael er a rebet ele tir el omdid a teletael el milkedmokl er tirkel uchei er tir, luldimukl a ngeldengodech el teletael er a ebangkelio er a Kristo.

A rebebil er a mle mellomes el chad, el uaia Martin Luther me a John Calvin, a milsang el kmo a osisechakl a mla mengodech malechub eng mla remiid. Te millasem el omekbeches er a ikelesia el tir a mle chad er ngii. Eng di a lak a ngerachel er a priesthood, eng uaisei, el diak el sebechel a ebangkelio er a Kristo el moluut el mor sel merang el teletelel. A olutel ebangkelio a mle klou a belkul.

A Dios a mle medengei el kmo ng morngii a rebet. Ngokiu a profet er a Uodel el Renged, e Ngii a dilung el kmo:

“A taem, a meremang el bo kuldurokl er a bosech el mei er a beluu, el diak el bosech er a kall, me a diak el bosech er a chederreng, ng bai mo bosech er a oderngesel a tekingel a Rubak:

“Ea rechad a mo mechitechut e mo meleuaoch er a diluches el mo er a dimes, e ngar er a ongos el mor ngebard, e mo osiik er ker me ker a tekingel a Rubak, e diak el betik er ngii.”

Amos 8:11–12

Olutel Ebangkelio

Sera 1820, el uaia ikel Ngii a mla meruul er a bek el reksi, ea Chedam er a Babeluades a liluut el ngiltii a profet el mo olluut er a ebangkelio me a priesthood el mei er a beluulechad. A ngklel ngikal profet a Joseph Smith. Me sera le ngeasek el chad, ea Joseph a mlo rrau a rengul el kirel a betok el ikelesia er a chelsel a basio el kiliei er ngii e mle soal mo medengei el kmo ngerang el ikelesia a klemerang. Meng mle medengei el kmo ngii olngesonges, e ngultirakl er a llach el biltik er ngii er a chelsel a Biblia el kmo, “A lengarngii er kemiu a olngesonges er a llomeserreng, e lolengit er a Dios, me le bsang, ele ngungil a tekingel; e diak a lekiresii er a ngii dil chad” (Jakobus 1:5).

A Joseph Smith a ulekerei er a Dios el kmo ng mekerang. A Joseph er a loluluuch el soal mo medengelii a klemerang, ea Chedam er a Babeluades me a Jesus Kristo a dilum er ngii. A Jesus a silbedii a Joseph el kmo ng diak el bol chad er a ngii dil klechelid, ele “ngii el rokui a cheleuid” ele “ng di omelkingir a kmeed er ngak, eng di a rengrir a cheroid er ngak, tir olisechakl a suobel me a osischeklel a chad, lobang a teletael er a kledios, eng ding diak a klisiich el obang” (Joseph Smith—History 1:19).

Meng diuaia ikel bla loruul a Dios lobengkel a Adam, Noah, Abraham, Moses, me a rebebil er a profet, e Ngii a milkedongii a Joseph Smith el mo profet el ngii a mle uchul ea cherrengelel ebangkelio a mloluut.

Olutel a Priesthood

Sera 1829, ea Joseph Smith a ngiluu osisiu el ngerachel er a priesthood el Jesus Kristo a milsterir a Reapostol er Ngii. A Johanes el Techolb, el ngii a millecholb er a Jesus, a mlo duum er a Joseph Smith e milsang a Aaronic Priesthood, malechub eng sel ngariou el priesthood. A Petrus, Jakobus, me a Johanes (tirkel tedei el meral mle Apostol er a Jesus Kristo) a mlo duum er a Joseph Smith ruriul e milsang a Melchizedek Priesthood, malechub e ngarbab el priesthood.

Uriul er a lenguu a ngerachel er a priesthood, ea Joseph Smith a kildmeklii a cheldellel a Ikelesia er a Jesus Kristo el luuetang el mei er a beluulechad. Ngokiu ngii, ea Jesus Kristo a luuetang el omekedong er a Reteruich me a Terung el Apostol.

Meng diuaia Jesus Kristo el ulemekrael er a Reapostol er Ngii el okiu a ocholt ruriul er a Okiis er a Kodellel, e Ngii a melemolem el omekrael er a Ikelesia er chelechal sils lokiu a ngar el profet me a reapostol. A Merreder er a Ikelesia er a Jesus Kristo er a Uriul-klebesei el Santo a ngii a mla mengilt el profet er a Dios er chelechal sils. Ngii, me a recounselors er ngii, me a Reteruich me a Terung el Apostol a obang a ngerachel er a priesthood el lulebang tirkel rokui el profet me a reapostol er a ngara mong el taem. Tirkal chad a profet, chad er a ues, me a ocholt.

Babier er a Mormon

A tang er a telengtengil a Olutel ebangkelio, ea Dios a mla meskid a Babier er a Mormon: El Dirrek el Ouchais el kirel a Jesus Kristo Ngokiu a klisiich er a Dios, ea Joseph Smith a uleliuiid a reksi er a rechuodel el mle llechukl er a kolt el tibereberk el sintsyu. A Babier er a Mormon a “reksi er a Dios lobengterir a rechad er a ngar er a mong el taem er a Beluu er a Merikel e obang a cherrengelel a diak a ulebengelel ebangkelio” (uchelel a Babier er a Mormon).

A Babier er a Mormon a mesisiich el sioning er a Jesus Kristo. Tiang a ngosukid el mo medengei a Osischeklel, el diuaia ikel ngar er a Biblia.

A Babier er a Mormon a mesisiich el olchotel a Olutel ebangkelio lokiu a Joseph Smith. Kau a sebechem el di kau el mo medengei el kmo a Babier er a Mormon a klemerang. Alsekum eng soam el mo medengelii a klemerang el kirel, eng kirem el menguiu, melbedebek a tekoi er a chelsel, e soam el mo medengelii a klemerang. E kirem el oker er a Chedam er a Babeluades meng meketeklii el kmo aikang el tekoi a Tekingel. Sel bo moruul el uaisei, e Ngii a mo ochotii lokiu Chedaol Reng el kmong klemerang.

Me sel bo modengei el kmo a Babier er a Mormon a klemerang, eke dirrek el mo medengei lokiu Chedaol Reng el kmo a Joseph Smith a mle profet er a Dios, ea ebangkelio er a Jesus Kristo a mloluut el okiu ngii, ea Ikelesia er a Jesus Kirsto er a Uriul-klebesei el Santo a ulekrael er a profet me a reapostol er chelechal sils.

Ak Mekerang e mo Medengei?

Kau a sebechem el mo medengei el kmo tial klumech a klemrang. Alsekum eke olengit er a Chedam er a Babeluades lokiu a nglunguuch, eng sebechem el nguu a nger er Ngii el okiu a Chedaol Reng. A Chedaol Reng a dirrek el okedongall el Reng er a Dios, ea tang er a Urerel a sioning, malechub e ngouchais, el kirel a klemrang.

Tial klemedengei a sebechel el kmal mo ongasireng e ngodechii a klengar, eng ding blechoel mei el chelellakl el diak el sal mo chomolt a mesisiich el klisichel a Dios. A Chedaol Reng a meketeklii a klemerang el okiu a domelchesiu, uldasou, me a ultebenged. El uaia osisechakl el ngar er a Biblia el kmo, “A rdechel a Reng a beltik el reng, deurreng, budech, klloureng, blekokeuiirreng, ungilreng, klaumerang, me a delmedemekerreng” (Galatia 5:22–23). Aikaikid el domelchesiu el okiu Chedaol Reng a ocholt lekor kau el kmo a ebangkelio er a Jesus Kristo el mla moluut el okiu a Joseph Smith a klemerang. Seikid e kau a kirem el melilt el kmo ng soam el mo kiei el oltirakl aikal llach el kau a mla ngmai.