Preface

Minahal nga mga bata:

Aniay libro sa mga kanta para ninyo. Mahimong kantahon ninyo kini bisan kanus-a, bisan asa. Inyong makanta ang ubang mga kanta aron makapakita og pagpasalamat ngadto sa Langitnong Amahan, ug ang uban kantahon aron malingaw.

Samtang manganta kamo, nindot ang inyong bation. Ang Espiritu Santo mohatag kaninyo og nindot nga pagbati aron matabangan kamo nga makasabut nga ang mga pulong ug mga mensahe tinuod. Makat-on kamo sa ebanghelyo niining paagiha, ug ang inyong pagpamatuod motubo kon kamo makat-on. Sayon kaayo ninyong mahinumduman unsay inyong nakat-unan kon inyo kining kantahon. Ang tono sa kanta makatabang kaninyo nga makahinumdom sa mga pulong ug makadala sa pagbati sa kanta nganha sa inyong mga kasingkasing. Ang mga gihulagway makatabang usab kaninyo nga makahibalo unsay gitudlo sa kanta. Kon makahibalo na kamo sa kanta, anaa na ninyo kini kanunay (pareha sa suod nga amigo) sa pagtabang kaninyo sa paghimo og matarung nga mga pagpili ug magmalipayon.

Ang musika maoy usa ka pinulongan nga masabtan sa tanan. Ang mga bata sa tibuok kalibutan mokanta sa parehong mga kanta. Ang musika makasumpay sa nangagi ngadto sa umaabut. Sa umaabut kining mga kantaha inyong makanta uban sa inyong kaugalingong mga anak.

Kining libroha adunay mga kanta hapit sa tanang mga hilisgutan sa ebanghelyo. Ang mga kanta nagpasabut sa atong mga pagtuo mahitungod sa kinabuhi sa langit, mahitungod sa pag-ampo, pagpasalamat, ug pagbinuotan, mahitungod sa misyon sa Manluluwas, mahitungod sa mga baruganan sa ebanghelyo; mahitungod sa kaimportante sa panimalay, pamilya, ug sa kabilin; mahitungod sa kanindot sa kinaiyahan ug sa mga panahon; ug mahitungod sa panginahanglan sa paglingawlingaw ug kalihokan. Ang katapusang seksyon mao ang musika nga mahimong patukaron sa dili pa o human sa usa ka miting––o sa inyong panimalay––aron makahimo og balaang kahimtang.

Sa umaabut kamo mahimong mga lider sa Simbahan ug sa kalibutan. Unsay inyong makat-unan gikan niining mga kantaha makatabang ninyo nga mahimong matinud-anon ug sa pagserbisyo nga matarung. Ang nindot nga pagbati nga gikahatag sa mga kanta makahatag kaninyo og kalipay ug kaisug ug makatabang kaninyo nga mahinumdom nga kamo mga anak sa Dios.