Vakaiʻi ʻo e Nofo Kemí

“Koeʻuhí ke fai ʻe he tangata kotoa pē ha fakamatala kiate au ki he anga ʻo hono lakanga tauhi kuo vahe kiate iá” (Tokāteline mo e Ngaahi Fuakava 104:12).

ʻI hoʻomou fakataha ke vakaiʻi e nofo kemí, ʻe tataki kimoutolu ʻe he Laumālié ke fakatupulaki pea ako mei hoʻomou ngaahi aʻusiá. ʻOku totonu ke fakataha e kau taki nofo kemi toʻu tupú mo e kakai lalahí fakatouʻosi he ʻaho takitaha pea ʻi he fakaʻosinga ʻo e kemí ke vakaiʻi e ngaahi ʻekitivitī ʻo e kemí. ʻOku totonu ke nounou pē e ngaahi vakaiʻi fakaʻahó mo tokoni ke fakatupulaki e tuʻunga lelei ʻo e aʻusiá.

ʻI hoʻo vakaiʻi hoʻo aʻusia ʻi he nofo kemí, fakakaukau ki he ngaahi fehuʻi ko ʻení:

• Naʻe hokohoko lelei ʻetau ngaahi ʻekitivitií ʻo hangē ko ia ne palaní? Ko e hā hono ʻuhingá?

• Ko e hā ha meʻa ne mei toe lelei ange ai e ʻahó ni?

• Ko e hā ha meʻa naʻe ngāue lelei?

• Ko e hā ha ngaahi tefitoʻi moʻoni ne tau akoʻi, pea ko e hā ha ngaahi meʻa mahuʻinga naʻe ako ʻe he kau finemuí?

• ʻOku ʻi ai nai ha palopalema ʻoku fie maʻu ke tau fakaleleiʻi?

• Naʻe ongoʻi nai ʻe he kau finemuí e Laumālié he ʻahó ni? Kapau naʻe ʻikai, ko e hā ha meʻa ʻe lava ke kehe ʻetau fakahoko ʻapongipongí?

Lolotonga e fakataha ki hono vakaiʻi e kemí ʻi heʻene ʻosí, fai e ngaahi fehuʻi ko ʻení mo ha ngaahi meʻa kehe ke fakapapauʻi ʻa e meʻa ne ola leleí mo e founga ʻe lava ke fakalakalaka ange ai ʻi he taʻu foʻoú:

• Ne tau aʻusia ʻetau taumuʻá? Ko e hā hono ʻuhingá?

• Naʻe fēfē ʻetau teuteu fakalaumālié?

• Naʻe fēfē ʻetau fealēleaʻaki fakatahá?

• Ko e hā ne ako ʻe he kau finemuí fekauʻaki mo e fetauhiʻakí?

• Naʻe fakahoko fēfē ʻe he kau taki nofo kemi ʻa e toʻu tupú honau ngaahi fatongiá?

• Naʻe fakamālohia fēfē e ngaahi fāmili ʻo e kau finemuí?

• Ko e fē ʻa e feituʻu mo e taimi ʻi he nofo kemí naʻe ongoʻi ai ʻe he kau finemuí ʻa e Laumālié?

• Ko e hā te tau lava ʻo fai ke tokoni ki he kau finemuí ke hokohoko atu ʻenau ongoʻi mo muimui ʻi he Laumālié?

• Ko e hā kuo hoko ʻi he moʻui ʻa e kau finemuí ko ha ola ʻo e nofo kemí?

• Ko e hā ha ngaahi fakakaukau ʻoku tau maʻu ki he nofo kemi hoko ʻa e Kau Finemuí?

ʻE hokohoko atu e tupulaki hoʻomou ngaahi aʻusia ʻi he nofo kemí ʻi hoʻomou tauhi ha ʻū lekooti ʻoku kakató. ʻOku totonu ke kau ʻi he lekooti ko ʻení ha fakamatala nounou ki he ngaahi ʻekitivitií, lipooti ʻo e patisetí, fakamatala ki he fefonongaʻakí mo e nofoʻangá, meʻatokoní, tokolahi ʻo kinautolu ne kaú, ʻū taá, mo ha ngaahi fakamoʻoni kapau ʻe malava. Ko e ngaahi lekōtí ni ko ha maʻuʻanga tokoni mahuʻinga ia kiate kinautolu te nau palani e nofo kemí ki he ngaahi taʻu ka hoko maí.

Fakaafeʻi e kau finemuí ke fakakaukau ki heʻenau ngaahi aʻusia ʻi he nofo kemí. Poupouʻi kinautolu ke vahevahe mo honau fāmilí mo e kaungāmeʻá ʻa e meʻa ne nau akó. ʻI he ngaahi ʻekitivitī Mutualé, ʻe lava ke hoko atu hoʻo tānaki ki he ngaahi taukei naʻe ako ʻe he kau finemuí ʻi he nofo kemí. ʻE lava foki ke mou aleaʻi ʻi he lēsoni ʻo e Sāpaté ʻa e ngaahi tokāteline ne akoʻi ʻi he nofo kemí. Kapau ne ola lelei hoʻomou ngaahi ʻekitivitií, fakakaukau ke vahevahe ia mo e niʻihi kehé.