10. Kenani ena Gauna ni Veiyalayalati Makawa

Tani (Leisi) Sa vakaduria ko Jeropoami e dua na matakau koula me ra cuva kina na Matanitu ena Vualiku (1 Tui 12:26–33). Ko Tani na iyalayala kei Isireli makawa.

Ulunivanua ko Kameli Sa bolei ira na parofita i Peali ko Ilaija ka dolava na lomalagi me tau mai na uca (1 Tui 18:17–46).

Mikito Na vanua ni ivalu e vuqa (Dauvei. 4:13–16; 5:19; 2 Tui 23:29; 2 Vei. 35:20–23). Sa vakaduria ko Solomoni e dua na ilawalawa tamata me tarai Mikito cake (1 Tui 9:15). A vakamavoataki ko Josaia na Tui Juta ena dua na ivalu vata kei Fero Niko e Ijipita (2 Tui 23:29–30). Ena iKarua ni nona Lako Mai na Turaga, ena yaco ena Buca ko Jesireli e dua na iotioti ni veilecavi qaqa levu me tiki ni ivalu ni Amaketone (Joeli 3:14; iVakata. 16:16; 19:11–21). Na yaca Amaketone e ivakadewa va-Kirisi ni vosa vaka-Iperiu Har Megiddon, se na Ulunivanua ko Mikito.

Jesireli Na yaca ni dua na koro levu ena buca levu ka bulabula duadua e Isireli ka rau yaca vata ga. Era a tara eke e dua na vale vakatui na Tui ena Matanitu ena Vualiku (2 Samu. 2:8–9; 1 Tui 21:1–2). A vakaitikotiko ka mate eke na Ranadi ca ko Jesepeli (1 Tui 21; 2 Tui 9:30).

Peci-sani Era a sota vata kei ira na kai Kenani eke ko ira na Isireli (Josu. 17:12–16). A vesu tu ki na lalaga ni ivakaruru oqo na yagoi Saula (1 Samu. 31:10–13).

Tocani A volitaki yani ki na veivakabobulataki ko Josefa mai vei iratou na tuakana (iVakate. 37:17, 28; 45:4). A raica e dua na raivotu ko Ilaisa me baleta e dua na ulunivanua ka sinai tu ena ose kei na kareti (2 Tui 6:12–17).

Samaria Na koroturaga ni Matanitu ena Vualiku (1 Tui 16:24–29). Sa tara na Tui ko Eapi e dua na valetabu me baleti Peali (1 Tui 16:32–33). Erau sa cakacaka ka veiqaravi ko Ilaija kei Ilaisa (1 Tui 18:2; 2 Tui 6:19–20). Ena yabaki 721 B.K. era a taura kina na kai Asiria, ka ra vakacavara kina na nodra tauri vakavesu na tini na yavusa (2 Tui 18:9–10).

Sikemi Tara ko Eparaama e dua na icabocabo ni soro (iVakate. 12:6–7). A vakaitikotiko voleka eke ko Jekope. Rau a vakamatei ira kece na tagane ena koro oqo ko Simioni kei Livai (iVakate. 34:25). Na nona veivakauqeti ko Josua “digia edaidai” me qaravi na Kalou a yaco mai Sikemi (Josu. 24:15). Eke a tauyavutaka kina ko Jeropoami na imatai ni koroturaga ni Matanitu ena Vualiku (1 Tui 12).

Ulunivanua ko Epali kei na Ulunivanua ko Kirisimi A tawasei Isireli ena ulunivanua e rua oqo ko Josua—na veivakalougatataki me baleta na lawa a kacivaki mai na Ulunivanua ko Kirisimi, ka lako mai na Ulunivanua ko Epali na cudru (Josu. 8:33). E muri era a qai tara na kai Samaria e dua na valetabu e Kirisimi (2 Tui 17:32–33).

Penueli (Penieli) Sa veimoqe eke kei na dua na italai ni Turaga ko Jekope (iVakate. 32:24–32). E a vakarusa e ke o Kitioni e dua na vale cecere mai Mitiani (Dauvei. 8:5, 8–9).

Jopa A soko mai ke vaka ki Tasisi ko Jona me drotaka kina na nona kaulotu ki Ninive (Jona 1:1–3).

Sailo Ena nodra gauna na Dauveilewai, a tu eke na koroturaga kei na valecavu e Isireli (1 Samu. 4:3–4).

Peceli (Lusa) Eke erau sa tawase kina ko Loti kei Eparaama (iVakate. 13:1–11) ka raica e dua na raivotu (iVakate. 13; Epa. 2:19–20). A raica e dua na raivotu ko Jekope ni dua na ikabakaba sa yacovi lomalagi (iVakate. 28:10–22). A tu eke na valecavu ena dua na gauna (Dauvei. 20:26–28). Sa vakaduria e dua na matakau koula ko Jeropoami me ra cuva kina ko ira mai na Matanitu ena Vualiku (1 Tui 12:26–33).

Kipioni Era lawakitaki Josua eke ko ira na Aivaiti ki na dua na veiyalayalati (Josu. 9). Sa tu vakadua na matanisiga ka qaqa ko Josua ena dua na ivalu (Josu. 10:2–13). Oqo e dua na vanua a tu kina vakawawa na valecavu (1 Veigauna 16:39).

Ko Kesa, Asitoti, Asikiloni, Ekironi, Kaca (Na 5 na nodra koro lelevu na kai Filisitia) Era dau vakacibi ivalu vei Isireli mai na koro lelevu oqo ko ira na kai Filisitia.

Peceliema A bulu voleka eke ko Rejeli (iVakate. 35:19). Erau a vakaitikotiko eke ko Ruci kei Poasa (Ruci 1:1–2; 2:1, 4). A vakatokai na koro i Tevita (Luke 2:4).

Epironi Ko Eparaama (iVakate. 13:18), Aisake, Jekope (iVakate. 35:27), Tevita (2 Samu. 2:1–4), kei Apisalome (2 Samu. 15:10) era a vakaitikotiko eke. Oqo na imatai ni koroturaga kei Juta ena veiliutaki ni Tui ko Tevita (2 Samu. 2:11). E vakabauti ni ratou a bulu eke ena qara e Makipila ko Eparaama, Sera, Aisake, Repeka, Jekope, kei Lia (iVakate. 23:17–20; 49:31, 33).

Eni-keti Sa vunitaki koya mai vei Saula ko Tevita ka sega ni via vakamatei Saula (1 Samu. 23:29–24:22).

Kira Erau a vakaitikotiko eke ena dua na gauna ko Eparaama kei Aisake (iVakate. 20–22; 26).

Pieri-sepa A kelia eke ko Eparaama e dua na tobuwai ka veiyalayalati vata kei Apimeleki (iVakate. 21:31). Sa raica na Turaga ko Aisake (iVakate. 26:17, 23–24), ka sa vakaitikotiko eke ko Jekope (iVakate. 35:10; 46:1).

Sotoma kei Komora Sa digia ko Loti me vakaitikotiko e Sotoma (iVakate. 13:11–12; 14:12). Sa vakarusai Sotoma vata kei Komora na Kalou ena vuku ni caka ca (iVakate. 19:24–26). A qai vakayagataka na koro lelevu oqo ko Jisu me ivakatakarakara ni caka ca (Maci. 10:15).