12. Jerusalemi ena Gauna nei Jisu

Kolikoca E dua na vanua e rawa ni vanua a vakamatei kina ko Jisu (Maci. 27:33–37).

iBulubulu ena Were E dua na vanua a rawa ni tu kina na ibulubulu a biu kina na yagoi Jisu (Joni 19:38–42). A rairai na Karisito sa vakaturi cake tale vei Meri na yalewa ni Makitala ena were ena tautuba ni Nona ibulubulu (Joni 20:1–17).

iTikotiko ni iValu ko Anitonia E rawa ni o koya na vanua oqo a beitaki, vakacacani, vakalialiai, ka vakanakuitataki kina ko Jisu (Joni 18:28–19:16). A vesu ka taleva lesu ko Paula na italanoa ni nona saumaki (Cakacaka 21:31–22:21).

Tobu e Peciseita A vakabula kina e dua na lokiloki ena siga ni Vakacecegu ko Jisu (Joni 5:2–9).

Valetabu Sa yalataka vei Sakaraia ko Keperieli ni na vakasucuma e dua na gonetagane ko Ilisapeci (Luke 1:5–25). A kasei na ilati ni valetabu ena gauna a mate kina na iVakabula (Maci. 27:51).

Varada nei Solomoni A tukuna kina ko Jisu ni ko Koya na luve ni Kalou. Era a segata na Jiu me ra vakaviriki Koya ena vatu (Joni 10:22–39). Sa vunautaka na veivutuni ko Pita ni oti na nona vakabula e dua na tamata tauvi gera (Cakacaka 3:11–26).

Matamata e Lagilagi Erau vakabula kina ko Pita kei Joni e dua na lokiloki (Cakacaka 3:1–10).

Delavuvu ni Valetabu A temaki mai vei Setani ko Jisu (Maci. 4:5–7). (E dua na vanua a rawa ni yaco kina na ka oqo.)

Ulunivanua Tabu (sega ni matata na vanua)

1. Era vakabauta na tamata ni oqo na vanua a tara kina ko Eparaama e dua na icabocabo ni soro me vakacabori Aisake kina (iVakate. 22:9–14).

2. A tara ko Solomoni e dua na valetabu (1 Tui 6:1–10; 2 Veigauna 3:1).

3. Era a vakarusa na valetabu na kai Papiloni rauta ena yabaki 587 B.K. (2 Tui 25:8–9).

4. A tara tale na valetabu ko Serupapeli ena rauta na 515 B.K. (Ese. 3:8–10; 5:2; 6:14–16).

5. A vakalevutaka ko Eroti na yavu ni valetabu ka tara vou na valetabu tekivu ena 17 B.K. A vakaraitaki kina ko Jisu ni se gonelailai (Luke 2:22–39).

6. Ni yabaki 12, sa veivakavulici voli ena valetabu ko Jisu (Luke 2:41–50).

7. Sa vakasavasavataka na valetabu ko Jisu (Maci. 21:12–16; Joni 2:13–17).

8. A veivakavulici ena valetabu ko Jisu ena vica na gauna (Maci. 21:23–23:39; Joni 7:14–8:59).

9. Era a vakarusa na kai Roma na valetabu ena ika 70 ni yabaki ni noda turaga, ena ruku ni lewa nei Taito.

Were mai Kecisemani A vakararawataki, volitaki yani, ka tauri vakavesu kina ko Jisu (Maci. 26:36–46; Luke 22:39–54).

Ulunivanua ni Veiolive

1. A tukuna rawa kina ko Jisu na vakarusai kei Jerusalemi kei na valetabu. A tukuna talega na iKarua ni Lako Mai (Maci. 24:3–25:46; raica talega JS—M).

2. A lako cake ki lomalagi ko Jisu mai na vanua oqo (Cakacaka 1:9–12).

3. Ena ika 24 ni Okotova, 1841, a vakatabuya kina ko Elder Osoni Aidi na vanua tabu me baleta na nodra lesu mai na kawa i Eparaama.

Waivure e Kaioni Sa lumuti kina me tui ko Solomoni (1 Tui 1:38–39). Sa lewa ko Esekaia me keli e dua na ikeli me vakadrodroi mai kina na wai mai na mataniwai ki na koro (2 Vei. 32:30).

Matamata ni Koro ni Wai Sa wilika ka vakadewataka na lawa i Mosese vei ira na tamata ko Esera (Nie. 8:1–8).

Buca ko Inomi Sa qaravi kina na kalou lasu ko Moloke, e okati kina na nodra cabori na gonelalai me isoro (2 Tui 23:10; 2 Veigauna 28:3).

Vale nei Kaiafa A kau yani ko Jisu ki vei Kaiafa (Maci. 26:57–68). Sa cakitaka kina ko Pita ni kilai Jisu (Maci. 26:69–75).

Tikina e Cake Na vanua e nanumi ni a kania kina na Kana vata ni Lako Sivia ko Jisu ka tauyavutaka kina na sakaramede (Maci. 26:20–30). A savata na yavadratou na iApositolo (Joni 13:4–17) ka vakavulici iratou (Joni 13:18–17:26).

Vale nei Eroti A kau yani na Karisito ki vei Eroti, e rairai ena vanua oqo (Luke 23:7–11).

Jerusalemi (sega ni matata na vanua)

1. Melikiseteki a veiliutaki vakatui e Selemi (iVakate. 14:18).

2. Taura na koro mai vei ira na Jepusaiti na Tui ko Tevita (2 Samu. 5:7; 1 Veigauna 11:4–7).

3. Sa vakarusai na koro mai vei ira na kai Papiloni rauta na 587 B.K. (2 Tui 25:1–11).

4. Sa vakasinaiti ira na lewevuqa na Yalo Tabu ena siga ni Penitiko (Cakacaka 2:1–4).

5. Erau a vesu ka kau mai ki na mataveilewai ko Pita vata kei Joni (Cakacaka 4:1–23).

6. Erau lasutaka na Turaga ka mate kina ko Ananaiasa kei Safaira (Cakacaka 5:1–10).

7. Erau sa vesu ko Pita vata kei Joni, ia a sereki rau mai valeniveivesu e dua na agilosi (Cakacaka 5:17–20).

8. Eratou a digitaka na iApositolo e vitu na tamata me ra vukei iratou (Cakacaka 6:1–6).

9. Sa sega ni ciqomi na ivakadinadina nei Sitiveni mai vei ira na Jiu, ka qai lauviri me mate (Cakacaka 6:8–7:60).

10. A vakamatei ko Jemesa ena vuku ni nona vakabauta (Cakacaka 12:1–2).

11. Sa sereki Pita mai na valeniveivesu e dua na agilosi (Cakacaka 12:5–11).

12. Eratou sa vakatulewa na iApositolo ena vuku ni cilivi (Cakacaka 15:5–29).

13. Era sa vakarusa na koro na kai Roma ena lewa nei Taito ena ika 70 ni yabaki ni noda Turaga.