11. Asaase Krɔnkrɔn no wɔ Ahyɛmu Fofor Mber mu

Tyre na Sidon Jesus dze Chorazin na Bethsaida too Tyre na Sidon ho (Matt. 11:20–22). Ɔsaa Amanamamnyi ɔbaa bi ne babaa yarba (Matt. 15:21–28).

Nsakyeree Bepɔw Jesus sakyeree wɔ Peter, James, na John hɔn enyim, na hɔn nsa kãa ahenman ne nsaafee no (Matt. 17:1–13). (Binom gye dzi dɛ Nsakyeree Bepɔw no bɛyɛ Bepɔw Hermon; binom so gye dzi dɛ ɔbɛyɛ Bepɔw Tabor.)

Caesarea Philippi Peter gyee dase dɛ Jesus nye Christ no na wɔdze ahenman no ne nsaafee bɔɔ no anohoba (Matt. 16:13–20). Jesus kãa nankasa No wu na No Wusoɛr ho asɛm (Matt. 16:21–28).

Galilee mantɔw Jesus dze No nkwaber mu dodowara yɛɛ ɔsomdwuma wɔ Galilee (Matt. 4:23–25). Ha na Ɔmaa Bepɔw do Nkyerɛkyerɛ no (Matt. 5–7); Ɔsaa kwatanyi yarba (Matt. 8:1–4); na Ɔsaan mu yii, Ɔhyɛɛ Asomafo Duebien no, na Ɔsomaa hɔn a, Judas Iscariot nko na ɔnnyɛ Galileenyi (Mark 3:13–19). Galilee na Christ a Ɔasoɛr no yii Noho kyerɛɛ Asomafo no (Matt. 28:16–20).

Galilee Po, a ekyir no wɔbɛfrɛɛ no Tiberias Po Jesus kyerɛkyerɛɛ fii Peter ne hɛmba no mu (Luke 5:1–3) na Ɔfrɛɛ Peter, Andrew, James, na John dɛ wɔmbɛyɛ nyimpa enufo (Matt. 4:18–22; Luke 5:1–11). Ɔmaa ehum so taa dzinn (Luke 8:22–25), kyerɛkyerɛɛ abɛbu fii hɛn no mu (Matt. 13), nantseew po do (Matt. 14:22–32), na Oyii Noho kyerɛɛ N’esuafo no No Wusoɛr ekyir (John 21).

Bethsaida Wɔwoo Peter, Andrew, na Philip wɔ Bethsaida (John 1:44). Jesus nye N’Asomafo no kɔr Bethsaida nkyɛn hɔ beebi kokoa mu. Nyimpadodow no kãa No do, na Ɔmaa mbanyin 5,000 edziban ma wodzii (Luke 9:10–17; John 6:1–14). Ha na Jesus saa onyifurafo yarba (Mark 8:22–26).

Capernaum Ha nye Peter ne fie (Matt. 8:5, 14). Capernaum mu, bea a Matthew frɛɛ no Jesus “nankasa no kurow,” Jesus saa mbubuinyi yarba (Matt. 9:1–7; Mark 2:1–12), saa ɔhamupanyin n’akowaa yarba, saa Peter ne yer ne nã yarba (Matt. 8:5–15), frɛɛ Matthew dɛ ɔmbɛyɛ N’Asomafo hɔn mu kor (Matt. 9:9), buee onyifurafo enyiwa, otuu abɔnsam (Matt. 9:27–33), Ɔsaa nyimpa bi a ne nsa adwe yarba Ahomgyeda (Matt. 12:9–13), Ɔmaa nkwa-paanoo ho nkyerɛkyerɛ (John 6:22–65), na Ɔgyee too mu dɛ Obotua tow, see Peter dɛ onkeyi sika mfi nam n’anomu (Matt. 17:24–27).

Magdala Ha nye Mary Magdalene no kurow mu (Mark 16:9). Jesus baa ha ber a Ɔmaa mbanyin 4,000 edziban ma wodzii ekyir no (Matt. 15:32–39), na Phariseefo na Sadduceefo no bisaa No dɛ Ɔnkyerɛ hɔn asɛnkyerɛdze a ofi sor (Matt. 16:1–4).

Cana Jesus daan nsu wenyin (John 2:1–11) na ɔsaa obirɛmpɔn bi ne babanyin a ɔwɔ Capernaum yarba (John 4:46–54). Cana so nye Nathanael ne fie (John 21:2).

Nazareth Ɔbɔfo baa Mary na Joseph hɔ bɛkasaa kyerɛɛ hɔn wɔ Nazareth (Matt. 1:18–25; Luke 1:26–38; 2:4–5). Wɔsanee fii Egypt bae no, ha na Jesus tsenaa Ne mbafobermu na Ne mberantsɛber mu (Matt. 2:19–23; Luke 2:51–52). Ɔkãa dɛ ɔyɛ Messiah no, na nankasa No nkorɔfo no poow No (Luke 4:14–32).

Jericho Jesus maa onyifurafo hun adze (Luke 18:35–43). Ɔnye Zacchaeus, “towgyefo mu panyin” so dzidzii, (Luke 19:1–10).

Bethabara John Onumanyi no dzii dase dɛ ɔyɛ “obi ne ndze a ɔretsẽa mu wɔ sar do” (John 1:19–28). John numaa Jesus wɔ Esutsen Jordan no mu na odzii dase dɛ Jesus nye Nyankopɔn n’Eguambaa no (John 1:28–34).

Judea Sar do John Onumanyi no kãa nsɛmpa no wɔ sar yi do (Matt. 3:1–4), bea a Jesus kyee kɔm nda 40 na wɔsɔɔ no hwɛe (Matt. 4:1–11).

Emmaus Christ a Ɔasoɛr no nye N’esuafo mu beenu nantsewee wɔ kwan a wɔdze kɔ Emmaus do (Luke 24:13–32).

Bethphage Esuafo beenu dze asoasoba brɛɛ Jesus, dza Ɔdze hyɛɛ Ne Jerusalem konyimdzi nhɛn mu no ase no (Matt. 21:1–11).

Bethany Ha nye Mary, Martha, na Lazarus hɔn fie (John 11:1). Mary tsiee Jesus ne nsɛm, na Jesus see Martha dɛ ɔasan mu afa “dza oye” (Luke 10:38–42); Jesus nyaan Lazarus fii ewufo mu (John 11:1–44); na Mary seraa Jesus n’anan ho ngo (Matt. 26:6–13; John 12:1–8).

Bethlehem Wɔwoo Jesus na wɔdze no too mbowa edzidzidaka mu (Luke 2:1–7); abɔfo bɛkãa kyerɛɛ nguanhwɛfo no dɛ w’awo Jesus (Luke 2:8–20); woraba bi kyerɛɛ enyansafo kwan ma wɔkɔr Jesus hɔ (Matt. 2:1–12); na Herod kunkum mbofra no (Matt. 2:16–18).