13. Ɔsomafo Paul n’Asɛmpasomafo Akwantu no

Gaza Philip kãa Christ ho nsɛmpa na onumaa Ethiopianyi ɔsaa ber a ɔrokɔ Gaza no (Ndwu. 8:26–39).

Jerusalem Hwɛ map 12 wɔ dza osisii wɔ Jerusalem no.

Joppa Peter nyaa enyido-adzehu dɛ Nyankopɔn ma Amanamamfo nnuho akyɛdze (Ndwu. 10; 11:5–18). Peter nyaan Tabitha fii ewufo mu (Ndwu. 9:36–42).

Samaria Philip yɛɛ ɔsomdwuma wɔ Samaria (Ndwu. 8:5–13), na ekyir no Peter na John kyerɛkyerɛɛ wɔ ha (Ndwu. 8:14–25). Ber a wɔdze Sunsum Krɔnkrɔn akyɛdze no maa ekyir no, Simon osumantunyi no pɛɛ dɛ ɔtɔ akyɛdze yi fi hɔn hɔ (Ndwu. 8:9–24).

Caesarea Ha na ekyir no a ɔbɔfo bi bɔsoom ɔhamupanyin bi a ne dzin dze Cornelius no, Peter maa no kwan ma wonumaa no (Ndwu. 10). Ha na Paul twitwae gyee noho wɔ Agrippa n’enyim no (Ndwu. 25–26; hwɛ JS—Aba 1:24–25 so).

Damascus Jesus yii noho kyerɛɛ Saul (Ndwu. 9:1–7). Ananias buee Saul n’enyiwa ekyir no, wonumaa Saul na ɔhyɛɛ no somdwuma ase (Ndwu. 9:10–27).

Antioch (ɔwɔ Syria) Ha na wodzii kan frɛɛ esuafo no Christianfo no (Ndwu. 11:26). Agabus hyɛɛ nkɔm dɛ ɔkɔm bɛba (Ndwu. 11:27–28). Mpaapaamu kɛse sii Antioch hɔ a ɔfa twatsiatwa ho (Ndwu. 14:26–28; 15:1–9). Antioch na Paul nye Silas, Barnabas, na Judas Barsabas hyɛɛ n’asɛmpasomafo akwantu a otsĩa ebien no ase (Ndwu. 15:22, 30, 35).

Tarsus Paul no kurow mu; Enuanom no somaa Paul ma ɔbaa ha dze abɔ no nkwa ho ban (Ndwu. 9:29–30).

Cyprus Wɔtseetsee hɔn ekyir no, Ahotseweefo no binom guanee baa supruw yi do (Ndwu. 11:19). Paul rutu n’asɛmpasomafo akwantu a odzi kan no oduaa Cyprus kɔree (Ndwu. 13:4–5), dɛ mbrɛ Barnabas na Mark so yɛɛ no ekyir no (Ndwu. 15:39).

Paphos Paul paa osumantunyi bi wɔ ha (Ndwu. 13:6–11).

Derbe Paul na Barnabas kãa nsɛmpa no wɔ kuropɔn yi mu (Ndwu. 14:6–7, 20–21).

Lystra Ber a Paul saa obubuanyi bi yarba no, wohuhoor ɔno na Barnabas tse dɛ enyame. Wosiiw Paul abo na wɔdween dɛ oewu mbom ɔbaa nkwa mu na ɔtoaa do kãa nsɛmpa no (Ndwu. 14:6–21). Timothy ne fie (Ndwu. 16:1–3).

Iconium Hɔn asɛmpakãdwuma a odzi kan mu no, Paul na Barnabas kãa nsɛmpa no wɔ ha na wohunahunaa hɔn dɛ wobesiw hɔn abo (Ndwu. 13:51–14:7).

Laodicea na Colossae Laodicea yɛ Asɔr no no nkorbata no mu kor a Paul kɛserae na onyaa nkrataa fii (Col. 4:16). Ɔyɛ kuropɔn esuon no a wɔkyerɛwee wɔ Nyikyerɛ nwoma no mu no so no mu kor (nkaa no so nye Ephesus, Smyrna, Pergamos, Thyatira, Sardis, na Philadelphia; hwɛ Nyi. 1:11). Colossae da kilomita 18 dze kɔ Laodicea no boka afamu. Paul kyerɛɛw nwoma dze kɛmaa Ahotseweefo no a wɔtsenaa ha no.

Antioch (ɔwɔ Pisidia) Paul na Barnabas hɔn asɛmpakãdwuma a odzi kan no mu no, wɔkyerɛkyerɛɛ Jewfo no dɛ Christ fi David n’asefo mu bae. Paul dze asɛmpa no maa Israelfo, na nkyii ɔdze maa Amanamamfo. Wɔtseetsee Paul na Barnabas na wɔpaam hɔn fii hɔ (Ndwu. 13:14–50).

Miletus Ber a ɔwɔ ha wɔ n’asɛmpakãdwuma a otsĩa ebiasa mu no, Paul bɔɔ elderfo a wɔwɔ Asɔr no mu no kɔkɔ dɛ “mpataku bɔn” bɛba abɛhɛn nguankuw no mu (Ndwu. 20:29–31).

Patmos Nna John yɛ adaduanyi wɔ supruw yi do ber a onyaa enyido-adzehu no a seisei ɔwɔ Nyikyerɛ nwoma no mu no (Nyi. 1:9).

Ephesus Apollos dze tum kãa nsɛmpa no wɔ ha (Ndwu. 18:24–28). Paul, n’asɛmpakãdwuma a otsĩa ebiasa no, ɔkyerɛkyerɛɛ wɔ Ephesus mfe ebien, ɔsakyeer nkorɔfo pii (Ndwu. 19:10, 18). Ha na ɔdze ne nsa guu nkorɔfo no do dze Sunsum Krɔnkrɔn no maa hɔn (Ndwu. 19:1–7) na ɔyɛɛ anwanwadze pii, otuu esunsum fĩ so (Ndwu. 19:8–21). Ha na hɔn a wɔsom Artemis no soɛree yɛɛ sakasaka dze tsiaa Paul (Ndwu. 19:22–41). Nyikyerɛ nwoma no n’afã bi mu nsɛm no wɔdze kɛmaa Ephesus Asɔr no (Nyi. 1:11).

Troas Ber a Paul wɔ ha wɔ n’asɛmpasomafo akwantu a otsĩa ebien mu no, ohun ɔbarimba bi wɔ Macedonia wɔ enyido-adzehu mu dɛ oribisa no mboa (Ndwu. 16:9–12). Ber a ɔwɔ ha wɔ n’asɛmpakãdwuma a otsĩa ebiasa mu no, Paul nyaan Eutychus fii ewufo mu (Ndwu. 20:6–12).

Philippi Paul, Silas, na Timothy sakyeer ɔbaa bi a ne dzin dze Lydia, wotuu sunsum fĩ, na wɔhwee hɔn mbaa (Ndwu. 16:11–23). Wonyaa mboa a ofi sor ma wofii efiadze (Ndwu. 16:23–26).

Athens Paul, ber a ɔwɔ n’asɛmpakãdwuma a otsĩa ebien mu wɔ Athens no, ɔkãa nsɛmpa no wɔ Mars Koko do (Areopagus) hɔ a, ɔfa “nyame a wonnyim” no noho (Ndwu. 17:22–34).

Corinth Paul, n’asɛmpakãdwuma a otsĩa ebien mu no, ɔkɔr Corinth, hɔ na ɔnye Aquila na Priscilla kɛtsenae. Ɔkãa nsɛmpa no wɔ ha na onumaa nkorɔfo pii (Ndwu. 18:1–18). Corinth na Paul kyerɛɛw no nwoma fi kɛmaa Romefo no.

Thessalonica Paul kãa nsɛmpa no wɔ ha ber a ɔwɔ n’asɛmpasomafo akwantu a otsĩa ebien mu no. Ekyir no a Jewfo no hunahunaa hɔn aamma woenya no dwudwoodwo no, n’asɛmpasomafo kuw no fii ha kɔr Berea (Ndwu. 17:1–10).

Berea Paul, Silas, na Timothy hun akra enyimnyamfo binom kyerɛkyerɛɛ hɔn wɔ Paul n’asɛmpasomafo akwantu a otsĩa ebien no mu. Jewfo fi Thessalonica kaa hɔn do na wɔtseetsee hɔn (Ndwu. 17:10–13).

Macedonia Paul kyerɛkyerɛɛ wɔ ha wɔ n’akwantu a otsĩa ebien na ebiasa no mu (Ndwu. 16:9–40; 19:21). Paul kamfoo Macedonia Ahotseweefo no, hɔn na wɔdze ntoboa maa ɔno nye Ahotseweefo ehiafo a wɔwɔ Jerusalem no wɔ hɔn nsa a ɔgow ho (Rom. 15:26; 2 Cor. 8:1–5; 11:9).

Melita Paul hɔn nsuhɛn no sɛɛe wɔ supruw yi do ber a wɔrokɔ Rome no (Ndwu. 26:32; 27:1, 41–44). Abowatsena kaa no naaso hwee annyɛ no na ɔsaa dodowara yarba wɔ Melita (Ndwu. 28:1–9).

Rome Paul kãa nsɛmpa no wɔ ha mfe ebien ber a nna ɔhyɛ aweɔmfo nsa wɔ ne fie (Ndwu. 28:16–31). Ɔkyerɛɛw nwoma, anaa nkrataa so dze kɛmaa Ephesusfo, Philippifo, Colossaefo, Timothy na Philemon ber a nna ɔda efiadze wɔ Rome. Peter kyerɛɛw no nwoma a odzi kan no fii “Babylon”, bɛyɛ dɛ ɔno nye Rome a, mber kakra ekyir wɔ Nero ne Christianfo tseetsee no wɔ Christ N’Awoo Ekyir wɔ afe 64 mu. Nkorɔfo gye dzi dɛ wokum Peter na Paul wɔ hɔn gyedzi ho wɔ ha.