13. Ito-Itak In Mijenede Ko An Rijjilōk Paul

Geza Pilip eaar kwaļo̧k kōn Kraist im peptaiji eunōk riItiopia eo ilo iaļ eo an n̄an Geza (Jerb. 8:26–39).

Jerusalem Lale mab 12 kōn men ko reļļap ilo Jerusalem.

Joppa Piter eaar bōk juon visōn bwe Anij ej kōtļo̧k mennin leļo̧k in ukeļo̧k n̄an ro riAelōn̄ ko (Jerb. 10; 11:5–18). Piter eaar kōjerkak Tabita jān ro remej (Jerb. 9:36–42).

Sameria Pilip eaar jerbal ilo Sameria (Jerb. 8:5–13), im Piter im Jon tok ālik raar katakin ijin (Jerb. 8:14–25). Ālikin aer kar leļo̧k mennin letok eo an Jetōb Kwōjarjar, Saimōn rim̧adm̧ōd eo eaar kappukot n̄an wiaik mennin letok in jān er (Jerb. 8:9–24).

Seseria Ijin, ālikin an enjeļ eo kar jerbal ippān senturiōn eo etan Korniliōs, Piter ar kōtļo̧k e bwe en peptaij (Jerb. 10). Ijin Paul eaar kōm̧m̧ane naan in jojomar eo an im̧aan Agrippa (Jerb. 25–26; lale barāinwōt JS—B 1:24–25).

Damaskōs Jisōs eaar waļo̧kļo̧k n̄an Saul (Jerb. 9:1–7). Ālikin an Anenaiōs kar kōjepļaakļo̧k loļo̧kjeņ n̄an Saul, Saul ekar peptaij im ekar jinoe ministry eo an (Jerb. 9:10–27).

Antiok (ilo Siria) Ijin rikaļoor ro rekar m̧oktata ān̄inn̄in er riKristian (Jerb. 11:26). Agebōs eaar kanaane n̄ūta (Jerb. 11:27–28). Bōrojepel eļap eaar jebar ilo Antiok kōn m̧wijm̧wij (Jerb. 14:26–28; 15:1–9). Ilo Antiok Paul eaar jinoe mijen eo an kein karuo ippān Sailas, Barnebas, im Judas Barsebas (Jerb. 15:22, 30, 35).

Tarshish Ļām̧oran eo an Paul; ritōl ro an Paul raar jilkinļo̧k n̄an ijin n̄an oņaake mour eo an (Jerb. 9:29–30).

Saiprōs Ālikin kar kaen̄taan er, jet ian Ro Rekwōjarjar rekar kotok n̄an aelōn̄ in (Jerb. 11:19). Paul eaar ito-itak im deblo̧ke Saiprōs ilo ito-itak in mijenede eo an m̧oktata (Jerb. 13:4–5), āinwōt kar Barnebas im Mark tokālik (Jerb. 15:39).

Pepos Paul eaar kaliaik juon rim̧adm̧ōd ijin (Jerb. 13:6–11).

Derbe Paul im Barnebas raar kwaļo̧k gospel ilo jikin kwelo̧k in (Jerb. 14:6–7, 20–21).

Listra Ke Paul ar kōmour juon ekūrro, e im Barnebas armej ro raar kautiej erro āinwōt anij raņ. Rekar kade Paul im ļōmņak bwe ekar mej a kar bar kōmouri im eaar wōnm̧aanļo̧k wōt im kwaļo̧k naan (Jerb. 14:6–21). Ļām̧oran eo an Timote (Jerb. 16:1–3).

Aikoniōm Ilo mijen eo aerro m̧oktata, Paul im Barnebas raar kwaļo̧k ijin im kar kōlōļn̄o̧n̄ er kōn kade er (Jerb. 13:51–14:7).

Leodisia im Kolosse Leodisia ej juon ian branch ko an Kabun̄ eo Paul ar loļo̧k im kar bōk lōta jān e (Kol. 4:16). Ej barāinwōt juon ian jikin kwelo̧k ko jiljilimjuon rej ellaajrak ilo bok in Revelesōn (ko jet rej Epesōs, Smōrna, Pergamos, Thaietaira, Sardis, im Philadelphia; lale Rev. 1:11). Kolosse ej pād ļo̧k 18 kilomita n̄an rear in Leodisia. Paul eaar jeje n̄an Ro Rekwōjarjar rekar jokwe ijin.

Antiok (ilo Pisidia) Ilo mijen eo aerro m̧oktata, Paul im Barnebas raar katakin riJu ro bwe Kraist eaar itok jān ineen Devid. Paul eaar wūjlepļo̧k gospel eo n̄an Israel, innām n̄an ro riAelōn̄ ko. Rekar matōrtōre Paul im Barnebas im kar kadiwōjļo̧k er (Jerb. 13:14–50).

Mailitōs Ke e ekar pād ijin ilo mijen eo an kein kajilu, Paul eaar kakkōle elder ro an Kabun̄ eo bwe “kidu oļip ko rekanooj lāj” renaaj deļo̧n̄e bwijjin eo (Jerb. 20:29–31).

Patmōs Jon ekar juon rikalbuuj ioon āniin ke eaar bōki visōn ko kiiō rej pād ilo bok in Revelesōn (Rev. 1:9).

Epesōs Apollōs eaar kwaļo̧k ijin kōn kajoor (Jerb. 18:24–28). Paul, ilo mijen eo an kein kajilu, ar katakin ilo Epesōs ium̧win ruo iiō, im ukōte elōn̄ armej (Jerb. 19:10, 18). Ijin eaar leļo̧k mennin letok eo an Jetōb Kwōjarjar jān likūt pā ko ioon (Jerb. 19:1–7) im kōm̧anm̧an elōn̄ mennin bwilōn̄ ko, ekitbuuj kadiwōjļo̧k jetōb ettoon ko (Jerb. 19:8–21). Ijin rikabun̄-jar an Diana rekar kajerkak juon aitwerōk ņae Paul (Jerb. 19:22–41). M̧ōttan bok in Revelesōn kar je n̄an Kabun̄ eo ilo Epesōs (Rev. 1:11).

Troas Ke Paul eaar pād ijin ilo ito-itak in mijenede eo an kein karuo, eaar lo juon visōn kōn juon em̧m̧aan in Masedonia ej kajjitōk jipan̄ (Jerb. 16:9–12). Ke eaar pād ijin ilo mijen eo an kein kajilu, Paul eaar kōjerkak Eutikōs jān ro remej (Jerb. 20:6–12).

Pilippai Paul, Sailas, im Timote rekar ukōte juon kōrā etan Lidia, kadiwōjļo̧k juon jetōb ettoon, im kar den̄ļo̧ke er (Jerb. 16:11–23). Rekar bōk jipan̄ jān lan̄ n̄an maron̄ rōļo̧k jān kalbuuj (Jerb. 16:23–26).

Atens Paul, ilo mijen eo an kein karuo n̄an Atens, eaar kwaļo̧k ilo Bat an Mars (Areopegōs) kōn “anij eo jejjab jeļā kake” (Jerb. 17:22–34).

Korint Paul ar etal n̄an Korint ilo mijen eo an kein karuo, ijo eaar jokwe ippān Akula im Prisilla. Eaar kwaļo̧k ijin im peptaiji elōn̄ armej (Jerb. 18:1–18). Jān Korint, Paul eaar je lōta eo an n̄an riRom.

Tessalonika Paul ar kwaļo̧k ijin ilo ito-itak in mijenede eo an kein karuo. Kumi in mijenede eo an rekar etal n̄an Beria ālikin an riJu ro kar kōlōļn̄o̧n̄ er kōn mour ko aer (Jerb. 17:1–10).

Beria Paul, Sailas, im Timote raar lo elōn̄ armej rajimjim ilo jetōb n̄an katakin er ilo ito-itak in mijenede eo an Paul kein karuo. RiJu ro jān Tessalonika rekar ļooreļo̧k er im kaen̄taan er (Jerb. 17:10–13).

Masedonia Paul eaar katakin ijin ilo ito-itak ko an kein karuo im kajilu (Jerb. 16:9–40; 19:21). Paul eaar nebare jouj eo an Ro Rekwōjarjar ilo Masedonia, ro raar leļo̧k n̄an e im n̄an Ro Rekwōjarjar rejeram̧ōl ilo Jerusalem (Rom 15:26; 2 Kor. 8:1–5; 11:9).

Melita Paul ar itaak im rup wa eo waan ilo āniin ilo iaļ eo an ļo̧k n̄an Rom (Jerb. 26:32; 27:1, 41–44). Ekar jab jorrāān jān an jedpānit kar kiji im eaar kōmour elōn̄ ro raar nan̄inmej ioon Melita (Jerb. 28:1–9).

Rom Paul eaar kwaļo̧k ijin ruo iiō ium̧win an ritariņae lale e (Jerb. 28:16–31). E eaar barāinwōt jeje epistle ko, ak lōta ko, n̄an riEpesōs, riPilippai, im riKolosse im n̄an Timote im Pailimōn ke eaar kalbuuj ilo Rom. Piter eaar je lōta eo an m̧oktata jān “Babilon,” eo emaron̄ kar Rom, ejjab to ālikin an Nero kaen̄tanaane riKristian ro ilo Ā.K. 64. Ekkā tōmak bwe Piter im Paul rekar mej kōn tōmak eo aer ijin.