9. Laļ Eo In Kallim̧ur Em̧or

Toļ Ararat Jikin eo ekkar n̄an imminene wa eo waan Noa eaar ļāwōde (Jen. 8:4). Lukkuun jikin eo ejjeļo̧k ejeļā kake.

Ōr Jikin jokwe eo an Ebream m̧oktata, epaake lo̧n̄iin reba Upretis, Eijo enan̄in kar erom juon eo ko̧kkure āinwōt kein katok, eaar lo enjeļ eo an Jeova, im bōke Urim im Tumim eo (Jen. 11:28–12:1; Ebr. 1; 3:1). (Lale barāinwōt bar juon jikin n̄an Ōr ilo tuiōn̄in Mesopotemia.)

Babilon, Bebel (Shainar) M̧oktata rijokwe ie eaar Kush, ļeo nejin Ham, im tokālik Nimrod. Jikin eo riJered ro rekar jebar jān e ilo iien eo an Im̧ōn Bar in Bebel ilo meļaaj ko in Shainar. Tokālik ekar provincial kiāptōļ eo an Babilonia im jikin jokwe eo an Kiin̄ ro an riBabilon, ekobaik Nebukadnezar eo eaar bōk elōn̄ riJu ilo kōm̧akoko ilo Babiļon ālikin wōt an kar jeepepļo̧k eo an Jerusalem (587 M.K.). RiJu ro rekar pād ium̧win ineen kōm̧akoko ium̧win 70 iiō ko m̧ae iien eo an Kiin̄ Sairōs, eo eaar kōtļo̧k bwe riJu ro ren ro̧o̧l n̄an Jerusalem n̄an kalōk tampeļ eo. Daniel rikanaan eo eaar barāinwōt jokwe ijin ium̧win Nebukadnezar, Belshazzar, im Daraiōs Ⅰ (Jen. 10:10; 11:1–9; 2 Kiin̄ 24–25; Jer. 27:1–29:10; Eze. 1:1; Dan. 1–12; Omnai 1:22; Ether 1:33–43).

Shushan (Susa) Kiāptōļ eo an Laļ eo an riPōrsia ium̧win tōl ko an Daraiōs Ⅰ (Daraiōs Ļapļap eo), Xerxes (Ehasuirōs), im Artaxerxes. Jikin jokwe eo an Lerooj Ester, eo im peran im tōmak eo an eaar lo̧mo̧o̧ren riJu ro. Daniel im Nihimaia tokālik rekar jerbal ijin (Nih. 1:1; 2:1; Est. 1:1; Dan. 8:2).

Meļaaj in Dura Shadrak, Meshak, im Abednego kar joļo̧k er ilo juon kijeek ke rekar m̧akoko in kabun̄-jar n̄an annan̄ gold eo kōm̧anm̧an jān Nebukadnezar; Nejin Anij eaar oņaake er, im rekar waļo̧ktok n̄an kijeek eo ilo ejjeļo̧k jorrāān (Dan. 3).

Assiria Assur eaar kiāptōļ eo an Assiria m̧oktata, innām tok ālikin Nineve. Irooj ro an riAssiria Shalamaneser Ⅴ im Sargon Ⅱ rekar kōm̧m̧alijar ņae im bōk Aelōn̄ in Kiin̄ eo an Israel Ituiōn̄ im bōkļo̧k bwij ko jon̄oul ilo 721 M.K. (2 Kiin̄ 14–15; 17–19). Assiria eaar juon kōlōļn̄o̧n̄ n̄an Juda m̧ae 612 M.K., ke Babiļon eaar kōm̧m̧alijar ņae im bōk Assiria.

Nineve Kiāptōļ eo an Assiria. Assiria eaar jodiki āneen Juda ilo iien tōl ko an Hezekaia im ilo iien jerbal ko an rikanaan Aiseia. Jerusalem, jikin kwelo̧k kiāptōļ eo an Juda, kar lo̧mo̧o̧ren ilo kabwilōn̄lōn̄ ke juon enjeļ eaar m̧ane 185,000 ritariņae an riAssiria (2 Kiin̄ 19:32–37). Irooj eaar ba n̄an rikanaan Jona n̄an kūr jikin kwelo̧k in n̄an ukeļo̧k (Jona 1:2; 3:1–4).

Heran Ebream eaar jukjuk im amņak ijin ium̧win jikid iien m̧okta jān an etal n̄an Kenean. Jemān Ebream im ļeo jatin rekar pād wōt ijin. Rebeka (kōrā eo pāleen Aisak), im Rejel, Lia, Bila, im Zilpa (kōrā ro pāleen Jekab), rekar itok jān peļaakin ijin (Jen. 11:31–32; 24:10; 29:4–6; Ebr. 2:4–5).

Karkemish Nebukadnezar eaar anjo̧ jān Pero Niko ijin, eo ekar kōjjem̧ļo̧k maron̄ eo an riIjipt ilo Kenean (2 Kron. 35:20–36:6).

Sidon Jikin kwelo̧k in kar ellolo in Sidon, juon em̧m̧aan jibwin Ham, im ej jikin eo ituiōn̄tata in jikin kwelo̧k ko an riKenean (Jen. 10:15–20). Ekar ijo jikin amņak an Jezebel, eo eaar kwaļo̧k kadkadin kabun̄-jar n̄an Beal n̄an Israel (1 Kiin̄ 16:30–33).

Tair Ekar juon jikin m̧akūt eaorōk im juon ja ilo Siria. Hiram jān Tair eaar jilkinļo̧k wōjke aik im gold im em̧m̧aan in jerbal ro n̄an jipan̄ Solomon kalōke tampeļ eo an (1 Kiin̄ 5:1–10, 18; 9:11).

Damaskōs Ebream eaar lo̧mo̧o̧ren Lot epaake ijin. E kar jikin kwelo̧k eo eļaptata an Siria. Ilo iien irooj ko an Kiin̄ Devid, riIsrael raar kōm̧m̧alijar ņae jikin kwelo̧k in. Ilaija eaar kapiti Hazael bwe en kiin̄ ioon Damaskōs (Jen. 14:14–15; 2 Sam. 8:5–6; 1 Kiin̄ 19:15).

Kenean Ebream im ro nejin kar leļo̧k n̄an er āniin bwe en jikier n̄an indeeo (Jen. 17:8; 28).

Toļ Sainai (Horeb) Irooj ar kōnono n̄an Moses jān juon wōjke ettā eurur (Ex. 3:1–2). Kar leļo̧k n̄an Moses Kien eo im Kien ko Jon̄oul (Ex. 19–20). Irooj eaar kōnono n̄an Ilaija ilo juon ainikien emera, edik (1 Kiin̄ 19:8–12).

Izaion-giber Kiin̄ Solomon eaar kalōke juon “inej in wa ko” ilo Izaion-giber (1 Kiin̄ 9:26). Emaron̄ ijo in ilo ja in Lerooj in Shiba, ālikin an ron̄ļo̧k bun̄bun̄ eo an Solomon, eaar poļo̧k n̄an lo e (1 Kiin̄ 10:1–13).

Ijipt Ebream eaar ito-itak n̄an ijin kōnke n̄ūta eo eļap ilo Ōr (Ebr. 2:1, 21). Irooj eaar ba n̄an Ebream n̄an katakin riIjipt ro ta E eaar kwaļo̧kļo̧k n̄an e (Ebr. 3:15). Ālikin ļōm̧aro jein Josep raar wiakake e n̄an kōm̧akoko (Jen. 37:28), Josep eaar erom juon ripepe an m̧weo im̧ōn Potipar ijin. E rekar joļo̧k e ilo kalbuuj. Eaar ukōte ettōņak eo an Pero im kar leļo̧k n̄an e juon jikin maron̄ ilo Ijipt. Josep im ļōm̧aro jein kar bōktok er ippān doon. Jekab im nokwe eo an rekar em̧m̧akūttok n̄an ijin (Jen. 39–46). Ro nejin Israel raar jokwe ilo Goshen ilo iien eo rekar pād ilo Ijipt (Jen. 47:6).

RiIsrael ro raar wōrļo̧k im “kanooj kajoorļo̧k”; innām kar likūt er ilo ineen kōm̧akoko jān riIjipt (Ex. 1:7–14). Ālikin jet mennin kaen̄tanaan ko Pero eaar kōtļo̧k Israel bwe ren etal jān Ijipt (Ex. 12:31–41). Rekar bōkļo̧k Jeremaia n̄an Ijipt (Jer. 43:4–7).

Kaptor (Krit) Āneo āneen riMinan etto.