1 Ma o lenei, o a’u, o Nifae, ou te faaauau ona faia i papatusi nei se tala o a’u taualumaga, ma la’u nofoaiga ma la’u auaunaga; o le mea lea, ina ia faaauau la’u tala, e ao ina ou tautala lava e uiga i mea a lo’u tamā, ma a o’u uso foi.

2 Aua faauta, sa oo ina ua uma ona faaiu e lo’u tamā le tautala mai o upu o lana miti, ma le apoapoaiina foi o i la’ua ia filiga atoatoa, sa tautala atu o ia ia te i laua e uiga i tagata Iutaia—

3 E faapea a uma ona faaumatia o i latou, e oo i lena lava aai tele o Ierusalema, ma ave faatagataotauaina le toatele i Papelonia, e tusa ma le taimi faatulagaina a le Alii, o le a toe foi mai i latou, ioe, e toe aumai lava i latou mai le faatagataotauaina; ma a uma ona toe aumai o i latou mai le faatagataotauaina o le a toe maua e i latou le laueleele o lo latou tofi.

4 Ioe, i le ono selau tausaga mai le taimi na tuua ai e lo’u tamā Ierusalema, o le a faatu mai ai e le Alii le Atua se perofeta i totonu o tagata Iutaia—o se Mesia lava, po o, i ni isi upu, o le Faaola o le lalolagi.

5 Ma sa tautala foi o ia e uiga i perofeta, le toatele na’uā o se aofai o i latou na molimau mai e uiga i nei mea, e uiga i lenei Mesia, o lē na tautala i ai o ia, po o lenei Togiola o le lalolagi.

6 O le mea lea, sa leiloloa tagata uma ma i ai i se tulaga pa’ū, ma o le a le faaolaina vagana ai ua latou faalagolago i lenei Togiola.

7 Ma sa tautala foi o ia e uiga i se perofeta o lē o le a sau muamua mai i le Mesia, e teuteu le ala o le Alii—

8 Ioe, o le a alu atu lava o ia ma alaga i le vao: Inā teuteu ia e outou le ala o le Alii, ma ia faasa’osa’o ona ala; ona ua i ai se tasi ua tu mai ia te outou o lē ua outou lē iloaina; ma o ia ua malosi silisili atu ia te a’u, o lē ou te lē agavaa e tatala le nonoa o lona seevae. Ma e tele mea sa tautala mai ai lo’u tamā e uiga i lenei mea.

9 Ma sa fai mai lo’u tamā o le a ia papatiso i Petapara, i tala atu o Ioritana; ma sa fai mai foi o ia o le a ia papatiso i le vai; o le a papatisoina lava e ia le Mesia i le vai.

10 Ma a uma ona papatisoina e ia le Mesia i le vai, o le a iloa e ia ma molimau atu ua ia papatisoina le Tamai Mamoe a le Atua, o lē o le a aveesea agasala a le lalolagi.

11 Ma sa oo ina ua uma ona tauina mai e lo’u tamā ia upu, sa tautala atu o ia i o’u uso e uiga i le talalelei o le a tala’i atu i totonu o tagata Iutaia, ma e uiga foi i le faaitiitia o tagata Iutaia i le lē talitonu. Ma a uma ona latou fasioti o le Mesia, o lē o le a afio mai, ma a uma ona fasiotia o ia, o le a toetu mai o ia mai le oti, ma o le a ia faaali atu o ia lava i Nuuese, e ala i le Agaga Paia.

12 Ioe, sa tele mea sa tautala mai ai lo’u tamā e uiga i Nuuese, ma e uiga foi i le aiga o Isaraelu, e faatusaina i latou i se laau olive, o le a fa’i ese ona lala ma o le a faataapeapeina i luga o le lalolagi atoa.

13 O le mea lea, sa fai mai ai o ia ua tatau ai ona taitai atu o i matou ma le lotogatasi i le laueleele o le folafolaga, e faataunuu ai le afioga a le Alii, ia faataapeapeina i matou i luga o le lalolagi atoa.

14 Ma a mavae ona faataapeape le aiga o Isaraelu o le a toe faapotopoto faatasi i latou; po o i lona aotelega, pe a mavae ona maua e Nuuese le atoatoaga o le Talalelei, o lala moni o le laau olive, po o vaega o totoe o le aiga o Isaraelu, o le a sulu i totonu, pe o le a o mai i le malamalama o le Mesia moni, lo latou Alii ma lo latou Togiola.

15 Ma sa faapea le ituaiga o gagana sa vavalo ma tautala atu ai lo’u tamā i o’u uso, ma le tele foi o isi mea ou te lē tusia i lenei tusi; ona ua ou tusia le tele o i latou ua tatau ai ia te a’u i le isi a’u tusi.

16 Ma o nei mea uma, ua ou tautala atu ai, sa faia a’o nofo lo’u tamā i se faleie, i le vanu o Lemuelu.

17 Ma sa oo ina ua uma ona faalogo atu o a’u, o Nifae, i upu uma a lo’u tamā, e uiga i mea sa vaai i ai o ia i se faaaliga vaaia, ma mea foi sa tautala mai ai o ia i le mana o le Agaga Paia, o le mana lea sa maua e ia i le faatuatua i le Alo o le Atua—ma o le Alo o le Atua o le Mesia o lē o le a afio mai—o a’u, o Nifae, sa ou manao foi ia mafai ona ou vaai, ma faalogo, ma iloa e uiga i ia mea, i le mana o le Agaga Paia, le meaalofa lea a le Atua ia i latou uma o e e saili ma le filigā ia te ia, e pei o taimi anamua faapea foi i le taimi o le a faaali mai ai o ia lava i le fanauga a tagata.

18 Aua e tutusa lava o ia ananafi, i le asō, ma le faavavau; ma ua saunia le ala mo tagata uma mai le faavaega o le lalolagi, pe afai latou te salamo ma o mai ia te ia.

19 Aua o ia o lē e saili ma le filiga o le a maua e ia; ma o le a faaali ia te i latou mealilo a le Atua, e ala i le mana o le Agaga Paia, e faapei taimi nei o taimi anamua, ma e faapei foi taimi anamua o taimi o le a oo mai; o le mea lea, o le ala o le Alii o se taamilosaga faavavau e tasi.

20 O le mea lea ia manatua ai, le tagata e, o le a aumai oe i le faamasinoga mo au mea uma na fai.

21 O le mea lea, afai na e saili e fai le amioleaga i aso o loo e nofo vaavaaia ai, o le a maua oe i le lē mamā i luma o le nofoa-faamasino o le Atua; ma e leai se mea e lē mamā e mafai ona nofo faatasi ma le Atua; o le mea lea, e tatau ai ona lafoaiina ese oe e faavavau.

22 Ma ua tuu mai e le Agaga Paia le pule ou te tautala atu ai nei mea, ma lē faafitia i latou.