1 Pea naʻe hoko ʻo pehē naʻe pehē mai ʻe he ʻāngeló kiate au: Mamata, pea vakai ki ho hakó kae ʻumaʻā foki ʻa e hako ʻo ho ngaahi tokouá. Pea naʻá ku vakai atu ʻo mamata ki he fonua ʻo e talaʻofá; pea naʻá ku vakai ki ha ngaahi fuʻu kakai tokolahi, ʻio, ʻa ia naʻe hangē honau tokolahí ko e ʻoneʻone ʻo e tahí.

2 Pea naʻe hoko ʻo pehē naʻá ku mamata ki ha ngaahi fuʻu kakai tokolahi kuo fakataha ke fetauʻaki, ʻiate kinautolu; peá u vakai ki ha ngaahi tau mo e ngaahi ongoongo ʻo e ngaahi tau mo e ngaahi fuʻu fakaʻauha lahi ʻi he heletā ʻi hoku kakaí.

3 Pea naʻe hoko ʻo pehē naʻá ku vakai ki he ʻalu atu ha ngaahi toʻu tangata lahi, ʻi he founga ʻo e ngaahi tau mo e ngaahi fekeʻikeʻi ʻi he fonuá; pea naʻá ku vakai ki he ngaahi kolo lahi, ʻio, naʻe lahi fau ʻo ʻikai ai te u lau ia.

4 Pea naʻe hoko ʻo pehē naʻá ku mamata ki ha ʻao fakapoʻuli ʻi he funga ʻo e fonua ʻo e talaʻofá; pea naʻá ku mamata ki he ngaahi ʻuhila, peá u fanongo ki he ngaahi mana, mo e ngaahi mofuike, mo e ngaahi faʻahinga ʻuʻulu leʻo-lahi kehekehe kotoa pē; peá u mamata ki he fonuá mo e ngaahi maká ʻoku mavaeua, peá u mamata ki he ngaahi moʻungá ʻoku holo hifo ʻo movete; peá u mamata ki ha ngaahi potu tokalelei ʻo e fonuá, kuo mafahifahi; peá u mamata ki ha ngaahi kolo lahi kuo ngalo hifo; peá u mamata ki ha ngaahi kolo lahi kuo vela ʻi he afi; peá u mamata ki ha ngaahi kolo lahi naʻe hinga ki he kelekelé koeʻuhi ko e ngalulululu ʻa e kelekelé.

5 Pea naʻe hoko ʻo pehē ʻi he hili ʻeku mamata ki he ngaahi meʻa ko iá, naʻá ku sio ki he ʻao ʻo e fakapoʻuli matolú, naʻe mahuʻi atu ia mei he funga ʻo e fonuá; pea vakai, naʻá ku mamata ki he ngaahi fuʻu kakai tokolahi kuo ʻikai tō koeʻuhi ko e ngaahi tautea lalahi fakamanavahē ʻa e ʻEikí.

6 Pea naʻá ku mamata ki he ngaahi langí ʻoku matangaki; pea hāʻele hifo ʻa e Lami ʻa e ʻOtuá mei he langí; pea naʻe hāʻele hifo ia ʻo fakahā ia kiate kinautolu.

7 Pea naʻá ku mamata foki mo fakamoʻoniʻi naʻe hāʻele hifo ʻa e Laumālie Māʻoniʻoní ki he toko hongofulu mā ua kehé; pea naʻe fakanofo mo fili ʻa kinautolu ʻe he ʻOtuá.

8 Pea naʻe lea mai ʻa e ʻāngeló kiate au, ʻo pehē: Vakai ki he kau ākonga ʻe toko hongofulu mā ua ʻa e Lamí, ʻa ia kuo fili ke nau ngāue ki ho hakó.

9 Pea naʻá ne pehē mai kiate au: ʻOkú ke manatu ki he kau ʻaposetolo ʻe toko hongofulu mā ua ʻa e Lamí? Vakai ko kinautolu ia te nau fakamāuʻi ʻa e ngaahi faʻahinga ʻe hongofulu mā ua ʻo ʻIsilelí; ko ia, ko e kau faifekau ʻe toko hongofulu mā ua mei ho hakó, ʻe fakamāuʻi ʻe kinautolu mo kinautolu foki; he ʻoku mou ʻo e fale ʻo ʻIsilelí.

10 Pea ko e kau faifekau ko ʻeni ʻe toko hongofulu mā uá ʻokú ke vakai ki aí te nau fakamāuʻi ʻa ho hakó. Pea, vakai, ʻoku nau māʻoniʻoni ʻo taʻengata; he ko e meʻa ʻi heʻenau tui ki he Lami ʻa e ʻOtuá kuo fakahinehinaʻi ʻa honau ngaahi kofú ʻi hono taʻataʻá.

11 Pea naʻe pehē mai ʻe he ʻāngeló kiate au: Vakai! Pea naʻá ku mamata, ʻo u vakai ki ha toʻu tangata ʻe tolu naʻa nau moʻui ʻi he māʻoniʻoni; pea naʻe hinehina ʻa honau ngaahi kofú ʻo hangē ko e Lami ʻa e ʻOtuá. Pea naʻe pehē mai ʻe he ʻāngeló kiate au: Kuo fakahinehinaʻi ʻa kinautolu ní ʻi he taʻataʻa ʻo e Lamí, koeʻuhi ko ʻenau tui kiate iá.

12 Pea ko au, Nīfai, naʻá ku mamata foki ki he tokolahi ʻo e toʻu tangata hono faá naʻa nau ʻalu atu ʻi he māʻoniʻoni.

13 Pea naʻe hoko ʻo pehē naʻá ku mamata ki he ngaahi fuʻu kakai tokolahi ʻo e fonuá kuo nau fakataha kātoa.

14 Pea naʻe pehē mai ʻe he ʻāngeló kiate au: Vakai ki ho hakó, kae ʻumaʻā foki mo e hako ʻo ho ngaahi tokouá.

15 Pea naʻe hoko ʻo pehē naʻá ku mamata atu ʻo vakai ki he kakai ʻo hoku hakó kuo nau fakataha ʻi ha ngaahi fuʻu kakai tokolahi ke tau mo e hako ʻo hoku ngaahi tokouá; pea kuo nau fakataha ke tau.

16 Pea lea mai ʻa e ʻāngeló kiate au, ʻo pehē: Vakai ki he matavai ʻo e vai ʻuli ʻa ia naʻe mamata ki ai ʻa hoʻo tamaí; ʻio, ʻa e vaitafe ʻa ia naʻá ne lau ki aí; pea ko hono ngaahi lolotó ko e ngaahi loloto ia ʻo helí.

17 Pea ko e ngaahi ʻao fakapoʻulí ko e ngaahi ʻahiʻahi ia ʻa e tēvoló ʻa ia ʻoku fakakuihi ʻa e matá, mo fakafefeka ʻa e loto ʻo e fānau ʻa e tangatá, mo tohoakiʻi atu ʻa kinautolu ki he ngaahi hala fālahi, pea nau ʻauha ai mo hē.

18 Pea ko e fuʻu fale lahi mo ʻataʻatā, ʻa ia naʻe mamata ki ai ʻa hoʻo tamaí, ko e ngaahi mahalo laulaunoa mo e loto-hīkisia ia ʻo e fānau ʻa e tangatá. Pea ʻoku vahevahe ʻa kinautolu ʻe ha vanu lahi mo fakamanavahē; ʻio, ʻa e folofola ʻo e fakamaau totonu ʻa e ʻOtua Taʻengatá, pea mo e Mīsaiá, ʻa ia ko e Lami ʻa e ʻOtuá, ʻa ia kuo fakamoʻoniʻi ʻe he Laumālie Māʻoniʻoní, talu mei he kamataʻanga ʻo māmaní ʻo aʻu mai ki he taimí ni, pea fai atu mei he taimí ni ʻo taʻengata.

19 Pea lolotonga ʻa e lea ʻaki ʻe he ʻāngeló ʻa e ngaahi lea ní, naʻá ku vakai atu ʻo mamata ki he tau ʻa e hako ʻo hoku ngaahi tokouá mo hoku hakó, ʻo hangē ko e lea ʻa e ʻāngeló; pea koeʻuhi ko e loto-hīkisia ʻa hoku hakó mo e ngaahi ʻahiʻahi ʻa e tēvoló, naʻá ku vakai naʻe ikunaʻi ʻe he hako ʻo hoku ngaahi tokouá ʻa e kakai ʻo hoku hakó.

20 Pea naʻe hoko ʻo pehē naʻá ku vakai atu, ʻo mamata ki he kakai ʻo e hako ʻo hoku ngaahi tokouá, kuo nau ikunaʻi ʻa hoku hakó; pea nau ʻalu atu ʻi ha ngaahi fuʻu kakai tokolahi ʻi he funga ʻo e fonuá.

21 Pea naʻá ku mamata kiate kinautolu kuo nau fakataha ʻi ha ngaahi fuʻu kakai tokolahi; pea naʻá ku mamata ki he ngaahi tau mo e ngaahi ongoongo ʻo e ngaahi tau ʻiate kinautolu; pea naʻá ku mamata ki he ʻosi atu ha ngaahi toʻu tangata lahi ʻi he ngaahi tau mo e ngaahi ongoongo ʻo e ngaahi tau.

22 Pea naʻe pehē mai ʻe he ʻāngeló kiate au: Vakai, ko kinautolu ní te nau fakaʻauʻauhifo ʻi he taʻetui.

23 Pea naʻe hoko ʻo pehē naʻá ku vakai, naʻe hili ʻenau fakaʻauʻau hifo ʻi he taʻetuí, naʻa nau hoko ko e kakai lanu fakapoʻupoʻuli mo fakalielia mo ʻuli, pea fonu ʻi he fakapikopiko mo e ngaahi anga-fakalielia kehekehe kotoa pē.