2 Nīfai

Ngaahi Folofolá

Tohi ʻa Molomoná

Ngaahi Fakahokohokó
Talateú mo e Kau Fakamoʻoní
1 Nīfai
2 Nīfai
Sēkope
ʻĪnosi
Seilomi
ʻAmenai
Ngaahi Lea ʻa Molomona
Mōsaia
ʻAlamā
Hilamani
3 Nīfai
4 Nīfai
Molomona
ʻEta
Molonai

2 Nīfai

Vahe 1
ʻOku kikite ʻa Līhai ʻo kau ki ha fonua ʻo e tauʻatāina—ʻE fakamoveteveteʻi mo fakaʻauha hono hakó ʻo kapau te nau fakaʻikaiʻi ʻa e Tokotaha Māʻoniʻoni ʻo ʻIsilelí—ʻOkú ne naʻinaʻi ki hono ngaahi fohá ke nau ʻai ʻa e teunga tau ʻo e māʻoniʻoní. Taʻu 588–570 K.M. nai.
Vahe 2
ʻOku fou mai ʻa e huhuʻi ʻi he Mīsaia Māʻoniʻoní—ʻOku mahuʻinga ʻa e tauʻatāina ke filí (faingamālie ʻo e tauʻatāina ke filí) ki he moʻuí mo e hoko ko ha kakai ʻoku lelei angé—Naʻe hinga ʻa ʻĀtamá koeʻuhi ke ʻi ai ʻa e faʻahinga ʻo e tangatá—ʻOku tauʻatāina ʻa e tangatá ke fili ʻa e tauʻatāiná mo e moʻui taʻengatá. Taʻu 588–570 K.M. nai.
Vahe 3
ʻOku mamata ʻa Siosefa ʻi ʻIsipité ki he kau Nīfaí ʻi ha meʻa-hā-mai—ʻOkú ne kikite ʻo kau kia Siosefa Sāmita, ʻa ia ko e tangata kikite ʻi he ngaahi ʻaho fakaʻosí; mo Mōsese, ʻa ia te ne fakahaofi ʻa ʻIsilelí; pea mo hono ʻomi ʻo e Tohi ʻa Molomoná. Taʻu 588–570 K.M. nai.
Vahe 4
ʻOku naʻinaʻi mo tāpuakiʻi ʻe Līhai ʻa hono hakó—ʻOkú ne pekia pea tanu ia—ʻOku fiefia ʻa Nīfai koeʻuhi ko e angalelei ʻa e ʻOtuá—ʻOku falala ʻa Nīfai ki he ʻEikí ʻo taʻengata. Taʻu 588–570 K.M. nai.
Vahe 5
ʻOku ʻalu atu ʻa e kau Nīfaí mei he kau Leimaná, pea nau tauhi ʻa e fono ʻa Mōsesé, mo langa ha temipale—Naʻe motuhi atu ʻa e kau Leimaná ʻi heʻenau taʻetuí mei he ʻao ʻo e ʻEikí pea nau hoko ko ha fakamamahi ki he kau Nīfaí. Taʻu 588–559 K.M. nai.
Vahe 6
ʻOku toe fakamatala ʻa Sēkope ki he hisitōlia ʻo e kau Siú: Ko e nofo pōpula mo e foki mei Pāpiloné; ko e ngāue fakafaifekau mo e kalusefai ʻo e Tokotaha Māʻoniʻoni ʻo ʻIsilelí; ko e tokoni naʻa nau maʻu mei he kau Senitailé; mo hono toe fakafoki ʻo e kau Siú ʻi he ngaahi ʻaho fakaʻosí ʻi he taimi te nau tui ai ki he Mīsaiá. Taʻu 559–545 K.M. nai.
Vahe 7
ʻOku hoko atu e lau ʻa Sēkope mei he tohi ʻa ʻĪsaiá: ʻOku lea ʻa ʻĪsaia ʻo kau ki he Mīsaiá—ʻE folofola ʻa e Mīsaiá ʻo hangē ha tokotaha potó—Pea te ne tuku Hono tuʻá kiate kinautolu te nau kauʻimaea iá—ʻE ʻikai ikunaʻi ia—Fakafehoanaki mo e ʻĪsaia vahe 50. Taʻu 559–545 K.M. nai.
Vahe 8
ʻOku hoko atu e lau ʻa Sēkope mei he tohi ʻa ʻĪsaiá: ʻE fakafiemālieʻi ʻe he ʻEikí ʻa Saione ʻi he ngaahi ʻaho fakaʻosí mo tānaki ʻa ʻIsileli—ʻE ō mai ʻa kinautolu kuo huhuʻí ki Saione ʻi he fiefia lahi—Fakafehoanaki mo e ʻĪsaia vahe 51 mo e 52:1–2. Taʻu 559–545 K.M. nai.
Vahe 9
ʻOku fakamatala ʻe Sēkope ʻe toe tānaki mai ʻa e kau Siú ʻi honau ngaahi fonua kotoa ʻo e talaʻofá—ʻOku totongi huhuʻi ʻe he Fakaleleí ʻa e tangatá mei he Hingá—ʻE tuʻu hake ʻa e sino ʻo e kau pekiá mei he faʻitoká, pea mo honau laumālié mei heli mo palataisi—ʻE fakamāuʻi ʻa kinautolu—ʻOku fakahaofi ʻe he Fakaleleí mei he maté, mo heli, mo e tēvoló, mo e fakamamahi taʻengatá—ʻE fakamoʻui ʻa e kau māʻoniʻoní ʻi he puleʻanga ʻo e ʻOtuá—ʻOku fakahā ʻa e ngaahi tautea ki he ngaahi angahalá—ʻOku hoko ʻa e Tokotaha Māʻoniʻoni ʻo ʻIsilelí ko e tauhi ʻo e matapaá. Taʻu 559–545 K.M. nai.
Vahe 10
ʻOku fakamatala ʻe Sēkope ʻe kalusefai ʻe he kau Siú ʻa honau ʻOtuá—ʻE fakamovetevete ʻa kinautolu kae ʻoua kuo kamata ke nau tui kiate Ia—ʻE hoko ʻa ʻAmelika ko e fonua ʻo e tauʻatāina ʻe ʻikai pule ai ha tuʻi—Fakalelei ʻa kimoutolu ki he ʻOtuá pea maʻu ʻa e fakamoʻuí ʻi he ʻEne ʻaloʻofá. Taʻu 559–545 K.M. nai.
Vahe 11
Naʻe mamata ʻa Sēkope ki hono Huhuʻí—ʻOku hoko ʻa e fono ʻa Mōsesé ko hano fakataipe ʻo Kalaisi pea ʻokú ne fakamoʻoniʻi ʻe hāʻele mai. Taʻu 559–545 K.M. nai.
Vahe 12
ʻOku mamata ʻa ʻĪsaia ki he temipale ʻi he ngaahi ʻaho fakaʻosí, ko e tānaki ʻo ʻIsilelí, mo e fakamaau mo e melino ʻo e nofo tuʻí—ʻE fakavaivaiʻi ʻa e kakai ʻulu-pupulá mo e fai angahalá ʻi he Hāʻele ʻAnga Uá—Fakafehoanaki mo e ʻĪsaia vahe 2. Taʻu 559–545 K.M. nai.
Vahe 13
ʻE tauteaʻi ʻa Siuta mo Selusalema koeʻuhi ko ʻena talangataʻá—ʻOku taukapoʻi ʻe he ʻEikí mo fakamāuʻi ʻa Hono kakaí—ʻOku fakamalaʻiaʻi ʻa e ngaahi ʻofefine ʻo Saioné pea fakamamahiʻi koeʻuhi ko honau ngaahi anga-fakamāmaní—Fakafehoanaki mo e ʻĪsaia vahe 3. Taʻu 559–545 K.M. nai.
Vahe 14
ʻE huhuʻi mo fufulu ʻa Saione mo hono ngaahi ʻofefiné lolotonga ʻa e nofo-tuʻí—Fakafehoanaki mo e ʻĪsaia vahe 4. Taʻu 559–545 K.M. nai.
Vahe 15
Ko e ngoue vaine (ʻIsileli) ʻa e ʻEikí ʻe lala ia, pea ʻe fakamovetevete ʻa Hono kakaí—ʻE hoko mai ha ngaahi faingataʻa kiate kinautolu ʻi honau tuʻunga angatuʻu mo fakamoveteveteá—ʻE hiki hake ʻe he ʻEikí ha fuka pea tānaki mai ʻa ʻIsileli—Fakafehoanaki mo e ʻĪsaia vahe 5. Taʻu 559–545 K.M. nai.
Vahe 16
ʻOku mamata ʻa ʻĪsaia ki he ʻEikí—ʻOku fakamolemoleʻi ʻa e ngaahi angahala ʻa ʻĪsaiá—ʻOku ui ia ke ne kikite—ʻOkú ne kikite ʻo kau ki hono fakaʻikaiʻi ʻe he kau Siú ʻa e ngaahi akonaki ʻa Kalaisí—ʻE toe foki mai ʻa e toenga ʻo Hono hakó—Fakafehoanaki mo e ʻĪsaia vahe 6. Taʻu 559–545 K.M. nai.
Vahe 17
ʻOku tuʻu tau ʻa ʻIfalemi mo Sīlia ki Siuta—ʻE ʻaloʻi mai ʻa Kalaisi ʻi he tāupoʻou—Fakafehoanaki mo e ʻĪsaia vahe 7. Taʻu 599–545 K.M. nai.
Vahe 18
ʻE hoko ʻa Kalaisi ko e maka-tūkiaʻanga mo ha maka ke humu ai—Fekumi ki he ʻEikí, kae ʻikai ki he kau taula faʻahikehe ʻoku mapu ʻo hangē ha manupuná—Falala ki he fonó pea ki he fakamoʻoní ke maʻu mei ai ʻa e fakahinohinó—Fakafehoanaki mo e ʻĪsaia vahe 8. Taʻu 559–545 K.M. nai.
Vahe 19
ʻOku lea ʻa ʻĪsaia ʻo kau ki he Mīsaiá—ʻE mamata ʻa e kakai ʻi he fakapoʻulí ki ha maama lahi—ʻE ʻaloʻi mai ha tama kiate kitautolu—ʻE hoko ia ko e Pilinisi ʻo e Melinó pea te ne pule ʻi he taloni ʻo Tēvitá—Fakafehoanaki mo e ʻĪsaia vahe 9. Taʻu 559–545 K.M. nai.
Vahe 20
ʻOku hoko hono fakaʻauha ʻo ʻAsiliá ko e fakataipe ʻo hono fakaʻauha ʻo e kau angahalá ʻi he Hāʻele ʻAnga Uá—ʻE toe siʻi pē ʻa e kakaí hili ʻa e toe hāʻele mai ʻa e ʻEikí—ʻE foki mai ʻa e toenga ʻo Sēkopé ʻi he ʻaho ko iá—Fakafehoanaki mo e ʻĪsaia vahe 10. Taʻu 559–545 K.M. nai.
Vahe 21
ʻE fakamaau ʻa e tefito ʻo Sesé (Kalaisi) ʻi he māʻoniʻoni—ʻE ʻufiʻufi ʻe he ʻilo ʻo e ʻOtuá ʻa e māmaní ʻi he Nofo-tuʻí—ʻE fokotuʻu hake ʻe he ʻEikí ha fuka pea tānaki fakataha ʻa ʻIsileli—Fakafehoanaki mo e ʻĪsaia vahe 11. Taʻu 559–545 K.M. nai.
Vahe 22
ʻE fakafetaʻi ʻa e kakai kotoa pē ki he ʻEikí ʻi he nofo tuʻí—Te ne ʻafio ʻi honau lotolotongá—Fakafehoanaki mo e ʻĪsaia vahe 12. Taʻu 559–545 K.M. nai.
Vahe 23
ʻOku hoko hono fakaʻauha ʻo Pāpiloné ko e fakataipe ʻo e fakaʻauha ʻe hoko ʻi he Hāʻele ʻAngaua Maí—Ko ha ʻaho ia ʻo e houhau mo e sāuni—ʻE tō ʻa Pāpilone (ko e māmaní) ʻo taʻengata—Fakafehoanaki mo e ʻĪsaia vahe 13. Taʻu 559–545 K.M. nai.
Vahe 24
ʻE tānaki ʻa ʻIsileli pea fiefia ʻi heʻenau mālōlō ʻi he Nofo-tuʻí—Naʻe kapusi hifo ʻa Lusifā mei he langí koeʻuhi ko ʻene angatuʻú—ʻE ikunaʻi ʻe ʻIsileli ʻa Pāpilone (ko e māmaní)—Fakafehoanaki mo e ʻĪsaia vahe 14. Taʻu 559–545 K.M. nai.
Vahe 25
ʻOku fiefia ʻa Nīfai ʻi he lea mahinongofuá—ʻE mahino ʻa e ngaahi kikite ʻa ʻĪsaiá ʻi he ngaahi ʻaho fakaʻosí—ʻE foki ʻa e kau Siú mei Pāpilone, pea te nau kalusefai ʻa e Mīsaiá, pea ʻe fakamovetevetea mo tauteaʻi ʻa kinautolu—ʻE toe fakafoki ʻa kinautolu ʻi heʻenau tui ki he Mīsaiá—Te ne ʻuluaki hāʻele mai ʻi he taʻu ʻe onongeau hili ʻa e ʻalu atu ʻa Līhai mei Selusalemá—ʻOku tauhi ʻe he kau Nīfaí ʻa e fono ʻa Mōsesé pea nau tui kia Kalaisi, ʻa ia ko e Tokotaha Māʻoniʻoni ʻo ʻIsilelí. Taʻu 559–545 K.M. nai.
Vahe 26
ʻE ngāue mai ʻa Kalaisi ki he kau Nīfaí—ʻOku tomuʻa mamata ʻa Nīfai ki hono fakaʻauha ʻo hono kakaí—Te nau lea hake mei he efú—ʻE fokotuʻu hake ʻe he kau Senitailé ha ngaahi siasi loi mo e ngaahi kautaha fufū—ʻOku taʻofi ʻe he ʻEikí ʻa e ngāue fakataulaʻeiki kākaá. Taʻu 559–545 K.M. nai.
Vahe 27
ʻE ʻufiʻufi ʻe he fakapoʻulí mo e hē mei he moʻoní ʻa e funga ʻo e māmaní ʻi he ngaahi ʻaho fakaʻosí—ʻE ʻomai ʻa e Tohi ʻa Molomoná—ʻE ʻi ai ha kau fakamoʻoni ʻe toko tolu te nau fakamoʻoni ki he tohí—ʻE pehē ʻe he tangata potó ʻoku ʻikai te ne lava ʻo lau ha tohi kuo fakamaʻu—ʻE fakahoko ʻe he ʻEikí ha ngāue fakaofo mo fakaʻulia—Fakafehoanaki mo e ʻĪsaia vahe 29. Taʻu 559–545 K.M. nai.
Vahe 28
ʻE fokotuʻu ha ngaahi siasi loi ʻi he ngaahi ʻaho fakaʻosí—Te nau akoʻi ʻa e ngaahi tokāteline hala, taʻeʻaonga, mo ngali vale—ʻE lahi ʻa e hē mei he moʻoní ko e tupu mei he kau akonaki loí—ʻE fakatupu ʻe he tēvoló ha ʻita lahi ʻi he loto ʻo e kakaí—Te ne akoʻi ʻa e ngaahi faʻahinga kotoa pē ʻo e ngaahi tokāteline halá. Taʻu 559–545 K.M. nai.
Vahe 29
ʻE fakaʻikaiʻi ʻe he kau Senitaile tokolahi ʻa e Tohi ʻa Molomoná—Te nau pehē, ʻOku ʻikai te mau fie maʻu ha ngaahi Tohi Tapu kehe—ʻOku folofola ʻa e ʻEikí ki he ngaahi puleʻanga lahi—Te ne fakamāuʻi ʻa e māmaní mei he ngaahi tohi ʻa ia ʻe tohí. Taʻu 559–545 K.M. nai.
Vahe 30
ʻE lau fakataha ʻa e kau Senitaile kuo uluí mo e kakai ʻo e fuakavá—ʻE tui ha kau Leimana mo e kau Siu tokolahi ki he folofola ʻa e ʻOtuá pea nau hoko ko ha kakai fakaʻofoʻofa—ʻE fakafoki ʻa ʻIsileli pea ʻe fakaʻauha ʻa e kau fai angahalá. Taʻu 559–545 K.M. nai.
Vahe 31
ʻOku fakamatala ʻa Nīfai ki he ʻuhinga naʻe papitaiso ai ʻa Kalaisí—Kuo pau ke muimui ʻa e kakaí kia Kalaisi, ʻo papitaiso, mo maʻu ʻa e Laumālie Māʻoniʻoní, pea kātaki ki he ngataʻangá koeʻuhi kae fakamoʻui ʻa kinautolu—ʻOku hoko ʻa e fakatomalá mo e papitaisó ko e matapā ki he hala fāsiʻi mo lausiʻí—ʻOku maʻu ʻa e moʻui taʻengatá ʻe kinautolu ʻoku nau tauhi ʻa e ngaahi fekaú hili ʻa e papitaisó. Taʻu 559–545 K.M. nai.
Vahe 32
ʻOku lea ʻa e kau ʻāngeló ʻi he mālohi ʻo e Laumālie Māʻoniʻoní—Kuo pau ke lotu ʻa e tangatá pea maʻu ha ʻilo ʻiate kinautolu pē mei he Laumālie Māʻoniʻoní. Taʻu 559–545 K.M. nai.
Vahe 33
ʻOku moʻoni ʻa e ngaahi lea ʻa Nīfaí—ʻOku fakamoʻoni ia kia Kalaisi—Ko kinautolu ʻoku tui kia Kalaisí te nau tui ki he ngaahi lea ʻa Nīfaí, ʻa ia ʻe hoko ko e fakamoʻoni ʻi he fakamaauʻanga ʻo e ʻOtuá. Taʻu 559–545 K.M. nai.

Paaki

Fakakau ʻa e fakaʻilongaʻi ʻo e ngaahi meʻa mahuʻingá mo e laineʻí

Hū ki loto ke fakaʻaongaʻi

Fakakau ʻa e ngaahi futinoutí