1 Na ɔbaa dɛ sor ɔbɔfo no see me dɛ: Hwɛ, na hu w’asefo, na wo nuanom so hɔn asefo. Na mohwɛe, na muhun anohoba asaase no; na muhun dɔmtutuw, nyew, na hɔn dodow dɔɔ sõ dɛ mpoano anhwea.

2 Na ɔbaa dɛ muhun dɔmtutuw dɛ wɔaboa hɔn ano roko tsia hɔnho; na muhun ɔkõ na metsee akõkoekõ nka na ewudzi pii a wɔdze afona dzii wɔ mo nkorɔfo no mu.

3 Na ɔbaa dɛ muhun ebusuasantsen pii a woetwa mu kɔ, ɔnam akõkoekõ na wentwiwentwi a ɔwɔ asaase no do ntsi; na muhun nkurow pii, nyew, menntum annkan hɔn dodow mpo.

4 Na ɔbaa dɛ muhun sum ehubɔwhubɔw wɔ anohoba asaase no enyi; na muhun asenaman, na metsee wimu mpaapaamu na asaasewosow na dede huuhu pii nka; na muhun asaase na mbotan a apaapaa; na muhun akoko dɛ worudwurudwuruw gu; na muhun asaase dɛ apaapaa; na muhun nkuropɔn pii a amemem; na muhun pii a gya ahyew hɔn; na muhun pii so a asaasewosow ntsi edwurudwuruw egu asaase do.

5 Na ɔbaa dɛ muhun iyinom ekyir no, muhun sum ehubɔhubɔw dɛ ofi asaase enyi kɔ; na hwɛ, muhun dɔmtutuw a wɔannhwehwe ase osian Ewuradze n’atsɛmbu kɛse huhu no ntsi.

6 Na muhun dɛ sor ebue; na Nyame Eguambaa no fi sor risian; na ɔbaa famu beyii noho kyerɛɛ hɔn.

7 Na muhunii na midzii dase dɛ Sunsum Krɔnkrɔn no tɔɔ duebien bi so do; na Nyankopɔn hyɛɛ hɔn asɔfo na oyii hɔn.

8 Na sor ɔbɔfo no see me dɛ: Hwɛ Eguambaa n’esuafo duebien, hɔn na wɔasan mu eyi hɔn dɛ wɔmbɔsom w’asefo.

9 Na ɔsee me dɛ: Ana ekaa Eguambaa n’asomafo duebien no? Hwɛ hɔn na wobobu Israel ebusuakuw duebien no atsɛn; dɛm ntsi wobobu w’asefo asɔfo duebien no atsɛn; osiandɛ hom yɛ Israel fifo.

10 Na dɛm asomfo duebien a ehu hɔn yinom na wobobu w’asefo atsɛn. Na hwɛ, wɔyɛ atseneneefo afebɔɔ; ɔnam hɔn gyedzi a ɔwɔ Nyame Eguambaa no mu ntsi wɔahor hɔn ntar ma ayɛ fitaa wɔ no bɔgyaa mu.

11 Na sor ɔbɔfo no see me dɛ: Hwɛ! Na mohwɛe, na muhun ebusuasantsen ebiasa a etwa mu kɔ wɔ tseneneeyɛ mu no; na hɔn ntar yɛ fitaa tse dɛ Nyame Eguambaa nedze no. Na sor ɔbɔfo no see me dɛ: Wɔayɛ iyinom fitaa wɔ Nyame Eguambaa no bɔgyaa no mu, osian hɔn gyedzi a ɔwɔ no mu ntsi.

12 Na emi, Nephi, so muhun ebusuasantsen a ɔtɔ do anan no mu dɔm pii a woetwa mu kɔ wɔ tseneneeyɛ mu.

13 Na ɔbaa dɛ muhun asaase no do dɔmtutuw a wɔaboa hɔn ano.

14 Na sor ɔbɔfo no see me dɛ: Hwɛ w’asefo, na wo nuanom so hɔn asefo.

15 Na ɔbaa dɛ mohwɛe na muhun m’asefo dɔm pii dɛ wɔaboa hɔn ano na woetsia mo nuanom hɔn asefo no; na wɔaboaboa hɔn ano dɛ wɔrobɔkõ.

16 Na sor ɔbɔfo no see me dɛ: Hwɛ, nsunyiwa fĩfĩ no a w’egya hunii no nye no; nyew, esutsen no a ɔkãa ho asɛm no; na no bun nye hɛl no bun.

17 Na sum ehubɔhubɔw no yɛ abɔnsam nsɔhwɛ a ofura enyiwa, na ɔdze pirim adasamba hɔn akoma, na ogya hɔn fa kwan tɛtɛr mu ma wɔhera na wɔyew.

18 Na dan kɛse pontonn no a w’egya hunii no, yɛ esusuhun na adasamba hɔn ahantanyɛ. Bun kɛse bi da hɔn ntamu; nyew, Onnyiewiei Nyankopɔn ne pɛrpɛr na Messiah no a ɔyɛ Nyame Eguambaa no a Sunsum Krɔnkrɔn gye noho dase fitsi wiadze ahyɛse dze besi ndɛ, na ofitsi dɛm aber yi na afebɔɔ.

19 Na aber a sor ɔbɔfo no kãa nsɛm yi no, mohwɛe na muhun dɛ mo nuanom hɔn asefo no nye m’asefo no ridzi esi dɛ mbrɛ sor ɔbɔfo no n’asɛm tse; na osian m’asefo hɔn ahantanyɛ, na abɔnsam no nsɔhwɛ ntsi, muhun dɛ mo nuanom hɔn asefo no ahyɛ m’asefo no do.

20 Na ɔbaa dɛ mohwɛe na muhun dɛ mo nuanom hɔn asefo no edzi m’asefo no do konyim; na dɔmtutuw no kɛhyɛɛ asaase enyi mã.

21 Na muhun dɔmtutuw no dɛ wɔaboa hɔn ano; na muhun ɔkõ na metsee akõkoekõ nkã wɔ hɔn mu; na akodzi nye akõkoekõ nkã a metsee ekyir no, muhun dɛ ebusuasantsen pii etwa mu kɔ.

22 Na sor ɔbɔfo no see me dɛ: Hwɛ iyinom nyinara bɔwodow wɔ gyedzi mu.

23 Na ɔbaa dɛ ekyir no a muhun dɛ wɔawodow wɔ gyedzi mu no wobirii, yɛɛ nkɔwkɔw, na nyimpa a wɔpɛ fĩ, na enyihaw na ebusudze ahorow ahyɛ hɔn mã.