1 Im ālikin men kein, n̄a, Nipai, iaar ro̧o̧l jān kōnono ippān Irooj n̄an im̧ōn kōppād eo im̧ōn jema.

2 Im ālikin men kein, eaar kōnono n̄an eō, im ba: Lo iaar ettōņak juon tōņak, eo ie Irooj eaar kean̄ eō bwe kwe im ļōm̧aro jeiūm̧ naaj ro̧o̧l n̄an Jerusalem.

3 Bwe lo, ippān Leban epād ļo̧o̧k eo kōn riJu ro im barāinwōt menmenbwij eo an ro jim̧m̧aō, im kar m̧wijit ioon pileij brass ko.

4 Kōn menin, Irooj eaar jiron̄ eō bwe kwe im ļōm̧aro jeiūm̧ aikuj ilo̧k n̄an m̧weo im̧ōn Leban, im pukoti ļo̧o̧k ko, im būktok n̄an āne jem̧aden in.

5 Im kiiō, lo ļōm̧aro jeiūm̧ rej ellotaan, im ba epen men in iaar likūt ioer; ak lo iaar jab likūt ioer, ak men in ej kien an Irooj.

6 Kōn menin ilo̧k, nejū, im kwōnaaj lo jouj jān Irooj, kōnke kwaar jab ellotaan.

7 Im ālikin men kein n̄a, Nipai, iaar ba n̄an jema: Inaaj ilo̧k im kōm̧m̧ani men ko Irooj eaar kean̄, bwe ijeļā Irooj ejjāmin letok kien ko n̄an ro nejin armej, eļan̄n̄e Ejjab kōpooj juon iaļ n̄an aer kōtōprak men eo Ej kean̄ er.

8 Im ālikin men kein, ke jema eaar ron̄ naan kein eaar lukkuun m̧ōņōņō, bwe eaar jeļā bwe iaar bōk jeraam̧m̧an jān Irooj.

9 Im n̄a, Nipai, im ļōm̧aro jeiū kōm eaar ilo̧k ilo āne jem̧aden, kōn im̧ōn kōppād ko am, n̄an wanlōn̄ļo̧k n̄an āneen Jerusalem.

10 Im ālikin men kein, ke kōm ar wanlōn̄ļo̧k n̄an āneen Jerusalem, n̄a im ļōm̧aro jeiū kōm ar etale an doon ļōmņak.

11 Im ālikin men kein, kōm ar kūbween kijdik—lale wōn iaam en ilo̧k n̄an m̧weo im̧ōn Leban. Im eaar wōtlo̧k ioon Leman; im Leman eaar ilo̧k n̄an m̧weo im̧ōn Leban, im eaar kōnono ippān ke ej jijet ilowaan m̧weo im̧ōn.

12 Im eaar kōņaan jān Leban ļo̧o̧k ko kar m̧wijit ioon pileij brass ko, ko eaar pād menmenbwij eo an jema.

13 Im lo, ālikin men kein, Leban eaar illu, im kadiwōjļo̧ke jān im̧aan mejān; im eaar jab kōņaan bwe en būki ļo̧o̧k ko. Kōn menin, eaar jiron̄ e: Lo kwe kwōj juon riko̧o̧t, im inaaj m̧an eok.

14 Ak Leman eaar ko jān im̧aan mejān, im ba men ko Leban eaar kōm̧m̧ani, n̄an kōm. Im eaar jino am lukkuun būrom̧ōj, im ļōm̧aro jeiū raar nan̄in ro̧o̧lļo̧k n̄an jema ilo āne jem̧aden.

15 Ak lo iaar ba n̄an er bwe: āinwōt Irooj emour im āinwōt ad mour, jejamin naaj wanlaļļo̧k n̄an jemād ilo āne jem̧aden m̧ae iien jej kōtōprak men eo Irooj eaar jiron̄ kōj.

16 Kōn menin, jen tiljek ilo kōjparok kien ko an Irooj; kōn menin jen wanlaļļo̧k n̄an āneen jolōt eo an jemād, bwe lo eaar likūt gold im silver, im mennin aorōk otemjej. Im men in eaar kōm̧m̧an kōn kean̄ eo an Irooj.

17 Bwe eaar jeļā bwe Jerusalem naaj aikuj ko̧kkure, kōn wōt nana ko an armej raņ.

18 Bwe lo, raar kajekdo̧o̧n naan ko an rikanaan ro. Kōn menin, eļan̄n̄e jema en kar jokwe ilo āneen ālikin kar jiron̄ e n̄an ilo̧k jān e, lo, enaaj kar bar mej. Kōn menin, e eaikuj bwe en kar diwōjļo̧k jān āneo.

19 Bwe lo, ej jeļāļo̧kjeņ an Anij bwe jen bōk ļo̧o̧k kein, bwe jen maron̄ kōjparok n̄an ro nejid kajin eo an ro jemād;

20 Im barāinwōt bwe jen maron̄ kōjparok n̄an er naan ko kar kōnono kaki jān lo̧n̄iin aolep rikanaan ro rekwōjarjar, ko kar liļo̧k n̄an er kōn Jitōbōn im kajoor in Anij, jān jinoin laļ, em̧ool n̄an iien in.

21 Im ālikin men kein, ilo wāween kōnono rot in iaar karreel ļōm̧aro jeiū, bwe ren tiljek ilo kōjparok kien ko an Anij.

22 Im ālikin men kein, kōm ar wanlaļļo̧k n̄an āneen jolōt eo am, im kōm ar ain am gold, im am silver, im mennin aorōk ko am.

23 Im ālikin am kar aini men kein ippān doon, kōm ar bar wanlōn̄ļo̧k n̄an m̧weo im̧ōn Leban.

24 Im ālikin men kein, kōm ar etal ippān Leban, im kar kōņaan bwe en letok n̄an kōm ļo̧o̧k ko kar m̧wijit ioon pileij brass ko, bwe kōm naaj kar leļo̧k n̄an e am gold, im am silver, im mennin aorōk ko am.

25 Im ālikin men kein, ke Leban eaar lo m̧weiuk ko am, im bwe raar lukkuun ļap, eaar lukkuun ankoņaki, jon̄an eaar kadiwōjļo̧k kōm, im jilkintok ro karejeran n̄an m̧an kōm, bwe en maron̄ bōk m̧weiuk ko am.

26 Im ālikin men kein, kōm ar ko im̧aan ro karejeran Leban, im kōm aikuj kar likūt ilik m̧weiuk ko am, im raar pād ium̧win pein Leban.

27 Im ālikin men kein, kōm ar ko n̄an āne jem̧aden, im ro karejeran Leban raar jab maron̄ jibwe kōm, im kōm ar tilekek ilo ro̧n̄ in juon dekā.

28 Im ālikin men kein, Leman eaar illu ippa, im barāinwōt ippān jema; im barāinwōt kar Lemuel, bwe eaar ron̄jake naan ko an Leman. Kōn menin Leman im Lemuel raar kōnono elōn̄ naan eddo n̄an kōm, kōm ro jatier m̧aan, im raar den̄ļo̧ke kōm kōn juon aļaļ.

29 Im ālikin men kein, raar den̄ļo̧ke kōm kōn aļaļ eo, lo, enjeļ in Irooj ej itok im jutak im̧aer, im eaar kōnono n̄an er, im ba: Etke kom̧ro ej den̄ļo̧ke ļein jātimi kōn aļaļ in? Kom̧ro ej jab jeļā ke bwe Irooj eaar kāālete bwe en ripepe ioomi, im men in kōn wōt jero̧wiwi ko ami? Lo kom̧ naaj bar wanlōn̄ļo̧k n̄an Jerusalem, im Irooj enaaj lewōj Leban ilo peimi.

30 Im ālikin enjeļ eo eaar kōnono n̄an kōm, eaar ilo̧k.

31 Im ālikin enjeļ eo eaar ilo̧k, Leman im Lemuel raar bar jino ellotaan, im ba: Ekōjkan Irooj Enaaj letok Leban ilo peid? Lo, e juon em̧m̧aan ekajoor, im emaron̄ tōl lemn̄oul, aaet, em̧ool emaron̄ m̧an lemn̄oul; innām etke jab kōj?