1 Anajwan ut laa’in, aj Nefi, ink’a’ tink’e li resilal lix xe’toonileb’ lin yuwa’ sa’ li xraqalil lin tz’iib’anb’il esil a’in; chi moko tink’e jun sutaq moqon chiruheb’ li perel ch’iich’ a’in li yookin chi tz’iib’ak wi’; xb’aan naq k’eeb’il sa’ li esil tz’iib’anb’il xb’aan lin yuwa’; jo’kan naq ink’a’ nintz’iib’a sa’ li k’anjel a’in.

2 Xb’aan naq tz’aqalin rik’in xyeeb’al naq laa’o ralal xk’ajol laj Jose.

3 Ut ink’a’ nawil rajom ru naq tink’e inch’ool chixyeeb’al resil chi tz’aqal re ru chixjunil li k’a’aq re ru re lin yuwa’, xb’aan naq ink’a’ naru xtz’iib’ankil chiruheb’ li perel ch’iich’ a’in, xb’aan naq nawaj naq taawanq xna’aj re tintz’iib’a li k’a’ru re li Dios.

4 Xb’aan naq lix tz’aqalil li wajom, a’an naq tinq’unb’esiheb’ xch’ool li winq re naq te’chalq rik’in lix Dios laj Abraham, ut lix Dios laj Isaak, ut lix Dios laj Jakob, ut te’kole’q.

5 Jo’kan naq li k’a’ru nawulak chiru li ruchich’och’ ink’a’ nintz’iib’a, a’an b’an li k’a’ru nawulak chiru li Dios, ut chiruheb’ li ani moko re ta li ruchich’och’.

6 Jo’kan ut, tink’e li taqlahom choq’ reheb’ li wiyajil, naq ink’a’ te’xram ruheb’ li perel ch’iich’ a’in rik’in li k’a’ru maak’a’ xloq’al choq’ reheb’ li ralal xk’ajoleb’ li winq.