Jebta 7
Ļōm̧aro nejin Liai rej ro̧o̧l n̄an Jerusalem im kaeruwaineneik Ishmael im ro im̧weo im̧ōn n̄an ļoor er ilo em̧m̧akūt eo aer—Leman im ro jet raar jum̧ae—Nipai ej kōketak ro jein m̧aan bwe en wōr aer tōmak ilo Irooj—Raar lukwōje kōn tomede ko im karōk wāween ko̧kkure—E ej rōļo̧k jān kajoor in tōmak—Ro jein m̧aan rej kajjitōk jeorļo̧k bōd—Liai im ro ippān rej katok katok ko im joortak kijeek ko. Iturinļo̧k 600–592 M.K.
1 Im kiiō ikōņaan bwe kom̧in jeļā, bwe ālikin an jema, Liai, kar kōm̧m̧ani kanaan kein kōn ineen, ālikin men kein, Irooj eaar bar kōnono n̄an e im ba bwe ej jab em̧m̧an bwe e, Liai, en bōk baam̧le eo an im ilo̧k n̄an āne jem̧aden make iaan; a bwe ro nejin m̧aan ren aikuj bōk kōrā nejier n̄an pāleer, bwe ren maron̄ kajutak ineen n̄an Irooj ilo āneen kallim̧ur.
2 Im ālikin men kein, Irooj eaar jiron̄ e bwe n̄a, Nipai, im ļōm̧aro jeiū, aikuj bar ro̧o̧l n̄an āneen Jerusalem, im bōk laļļo̧k Ishmael im baam̧le eo an n̄an āne jem̧aden.
3 Im ālikin men kein, n̄a, Nipai, iaar bar, ippān ļōm̧aro jeiū, etal ilo āne jem̧aden n̄an wanlōn̄ļo̧k n̄an Jerusalem.
4 Im ālikin men kein, kōm ar wanlōn̄ļo̧k n̄an m̧weo im̧ōn Ishmael, im kōm ar lo jouj ilo turin mejān Ishmael, jon̄an kōm ar maron̄ kōnono n̄an e naan ko an Irooj.
5 Im ālikin men kein, Irooj eaar kameoeoik būruōn Ishmael, im barāinwōt ro ilo m̧weo im̧ōn, jon̄an raar itok ippām ilo ilo̧k eo am im wanlaļļo̧k n̄an āne jem̧aden n̄an im̧ōn kōppād eo an jōmem.
6 Im ālikin men kein, kōm ar ilo̧k ilo āne jem̧aden, lo Leman im Lemuel, im ruo iaan kōrā ro nejin Ishmael, im ruo em̧m̧aan nejin Ishmael im baam̧le ko aer, raar jum̧ae kōm; aaet, ņae eō, Nipai, im Sam, im jemāer, Ishmael, im kōrā eo pāleen, im kōrā ro jilu jet nejin.
7 Im ālikin men kein, ilo kar jum̧ae in, raar kōņaan ro̧o̧l n̄an āneen Jerusalem.
8 Im kiiō, n̄a, Nipai, iaar būrom̧ōj kōn kijn̄en̄e an burueer, kōn menin iaar kōnono n̄an er, im ba, aaet, n̄an Leman im Lemuel barāinwōt: Lo kom̧ij jeiū em̧m̧aan, im ewi wāween bwe en pen būruōmi, im pilo ilo koļmānļo̧kijeņ ko ami, bwe kom̧ ar aikuj bwe n̄a Nipai, eo jātimi m̧aan, in kōnono n̄an kom̧, aaet, im kwaļo̧k juon jon̄ok n̄an kom̧?
9 Ewi wāween bwe kom̧ in kar jab eo̧ron̄ naan ko an Irooj?
10 Ewi wāween bwe kom̧in kar meļo̧kļo̧k bwe kom̧ ar lo juon enjeļ in Irooj?
11 Aaet, im ewi wāween kar ami meļo̧kļo̧k men ko reļļap Irooj eaar kōm̧m̧an n̄an kōj, ilo kōjo̧o̧r kōj jān pein Leban, im barāinwōt bwe jān maron̄ būki ļo̧o̧k ko?
12 Aaet, im ewi wāween bwe kom̧in kar meļo̧kļo̧k bwe Irooj ej maron̄ kōm̧m̧an men otemjej ekkar n̄an ankilaan, n̄an ro nejin armej, eļan̄n̄e rej kwaļo̧k wōt aer tōmak ilo E? Kōn menin, jen m̧ool n̄an e.
13 Im eļan̄n̄e jenaaj m̧ool n̄an e, jenaaj bōk āneen kallim̧ur; im naaj jeļā ilo iien ko rej itok bwe naan an Irooj naaj kakūrm̧ool kōn jorrāān eo an Jerusalem; bwe aolep men kein ko Irooj eaar kōnono kōn jorrāān eo an Jerusalem rej aikuj naaj kūrm̧ool.
14 Bwe lo, Jetōb in Irooj ejjab to ejako an pād ilo er; bwe lo, raar kajekdo̧o̧n rikanaan ro, im Jeremaia raar joļo̧k ilo kalbuuj. Im raar pukot n̄an bōk mour eo an jema, jon̄an raar lukwarkwar e jān āneo.
15 Kiiō lo, ij ba n̄an kom̧ bwe n̄e kom̧ naaj ro̧o̧l n̄an Jerusalem kom̧ naaj bar jako ippāer. Im kiiō, ewōr ami kāālet, kom̧in wanlōn̄ļo̧k n̄an āneo, im keememej naan kein iaar kōnono n̄an kom̧, bwe n̄e kom̧ wanlōn̄ļo̧k kom̧ naaj barāinwōt jako; bwe āindein Jetōb in Irooj ej kipel eō bwe in aikuj kōnono.
16 Im ālikin men kein n̄a, Nipai, ke eaar jem̧ļo̧k aō kōnono naan kein n̄an ļōm̧aro jeiū, raar ļōkatip ippa. Im ālikin men kein, raar door peier ioō, bwe lo, raar kanooj illu, im raar lukwōj eō kōn tomede ko, bwe raar pukot n̄an bōk mour eo aō, bwe remaron̄ likūt eō ilo āne jem̧aden bwe mennin mour awiia ren kan̄e eō.
17 A ālikin men kein, iaar jar n̄an Irooj, im ba: O Irooj, kōn tōmak eo aō eo ej ilo Kwe, kwōn kōjo̧o̧r eō jān pein m̧aan rein jeiū; aaet, letok n̄an eō kajoor n̄an tūm̧i to kein ko ij lokjak kaki.
18 Im ālikin men kein, ke iaar ba naan kein, lo, to ko raar mejaļļo̧k jān peiū im neō, im iaar jutak im̧aan ļōm̧aro jeiū, im iaar bar kōnono n̄an er.
19 Im ālikin men kein, raar bar illu ippa, im pukot n̄an likūt peier ioō; a lo, juon iaan kōrā ro nejin Ishmael, aaet im barāinwōt jinen, im juon iaan ļōm̧aro nejin Ishmael, raar akweļap n̄an ļōm̧aro jeiū, jon̄an raar kaenōm̧m̧an burueer; im eaar bōjrak aer kijejeto n̄an bōk aō mour.
20 Im ālikin men kein, raar būrom̧ōj, kōn naan ko aer, jon̄an raar badikdik im̧aō, im akweļap iba bwe in jeorļo̧k aer bōd kōn men eo raar kōm̧m̧ane ņae eō.
21 Im ālikin men kein, iaar m̧ool ilo jeorļo̧k aer bōd kōn aolep raar kōm̧m̧an, im iaar kōketak er bwe ren jar n̄an Irooj aer Anij kōn jeorļo̧k bōd. Im ālikin men kein, raar kōm̧m̧an āinwōt. Im ālikin aer kar jar n̄an Irooj kōm ar bar ito-itak ilo iaļ eo am ļo̧k n̄an im̧ōn kōppād eo an jema.
22 Im ālikin men kein, kōm ar tōprakļo̧k ilo im̧ōn kōppād eo an jema. Im ālikin aō im ļōm̧aro jeiū im aolepān m̧weo im̧ōn Ishmael kar wanlaļtak n̄an im̧ōn kōppād eo an jema, raar leļo̧k kam̧m̧oolol n̄an Irooj aer Anij; im raar katok katok ko im joortak kijeek ko n̄an E.