1 Nīfai

Ngaahi Folofolá

Tohi ʻa Molomoná

Ngaahi Fakahokohokó
Talateú mo e Kau Fakamoʻoní
1 Nīfai
2 Nīfai
Sēkope
ʻĪnosi
Seilomi
ʻAmenai
Ngaahi Lea ʻa Molomona
Mōsaia
ʻAlamā
Hilamani
3 Nīfai
4 Nīfai
Molomona
ʻEta
Molonai

1 Nīfai

Vahe 1
ʻOku kamata ʻe Nīfai ʻa e lekooti ʻo hono kakaí—ʻOku mamata ʻa Līhai ʻi ha meʻa-hā-mai ki ha pou afi peá ne lau mei ha tohi ʻo e kikite—ʻOkú ne fakafetaʻi ki he ʻOtuá, mo ne tomuʻa fakahā ʻa e hāʻele mai ʻa e Mīsaiá, mo ne kikiteʻi hono fakaʻauha ʻo Selusalemá—ʻOku fakatangaʻi ia ʻe he kau Siú. Taʻu 600 K.M. nai.
Vahe 2
ʻOku ʻave ʻe Līhai ʻa hono fāmilí ki he feituʻu maomaonganoa ʻi he matātahi ʻo e Tahi Kulokulá—ʻOku nau tuku ʻenau koloá—ʻOku fai ʻe Līhai ha feilaulau ki he ʻEikí, pea akoʻi hono ngaahi fohá ke nau tauhi ʻa e ngaahi fekaú—ʻOku lāunga ʻa Leimana mo Lēmiuela ʻo kau ki heʻena tamai—ʻOku talangofua ʻa Nīfai, peá ne lotu ʻi he tui; ʻoku folofola mai ʻa e ʻEikí kiate ia, pea ʻoku fili ia ke pule ki hono ngaahi tokouá. Taʻu 600 K.M. nai.
Vahe 3
ʻOku foki ʻa e ngaahi foha ʻo Līhaí ki Selusalema ke ʻomai ʻa e ngaahi peleti ʻo e palasá—ʻOku fakafisi ʻa Lēpani ke tukuange ʻa e ngaahi peletí—ʻOku naʻinaʻi mo poupou ʻa Nīfai ki hono ngaahi tokouá—ʻOku kaihaʻasi ʻe Lēpani ʻenau koloá, peá ne feinga ke fakapoongi ʻa kinautolu—ʻOku taaʻi ʻe Leimana mo Lēmiuela ʻa Nīfai mo Samu, pea ʻoku valokiʻi kinaua ʻe ha ʻāngelo. Taʻu 600–592 K.M. nai.
Vahe 4
ʻOku tāmateʻi ʻe Nīfai ʻa Lēpani ʻi he fekau ʻa e ʻEikí, peá ne maʻu ʻa e ngaahi peleti ʻo e palasá ʻi ha filioʻi kākā—ʻOku loto ʻa Sōlami ke fononga ki he fāmili ʻo Līhaí ʻi he feituʻu maomaonganoá. Taʻu 600–592 K.M. nai.
Vahe 5
ʻOku lāunga ʻa Selaia kia Līhai—ʻOkú na fiefia fakatouʻosi ʻi he foki mai hona ngaahi fohá—ʻOkú na ʻohake ha ngaahi feilaulau—ʻOku kau ʻi he ngaahi peleti ʻo e palasá ʻa e ngaahi tohi ʻa Mōsesé mo e kau palōfitá—ʻOku fakahā ʻe he ngaahi peleti ko e hako ʻo Siosefa ʻa Līhai—ʻOku kikite ʻa Līhai ʻo kau ki hono hakó mo hono fakatolonga ʻo e ngaahi peletí. Taʻu 600–592 K.M. nai.
Vahe 6
ʻOku tohi ʻe Nīfai ʻa e ngaahi meʻa ʻa e ʻOtuá—Ko e taumuʻa ʻa Nīfaí ke fakalotoʻi ʻa e tangatá ke haʻu ki he ʻOtua ʻo ʻĒpalahamé ʻo moʻui. Taʻu 600–592 K.M. nai.
Vahe 7
ʻOku toe foki atu ʻa e ngaahi foha ʻo Līhaí ki Selusalema ʻo fakalotoʻi ʻa ʻIsimeli mo hono falé ke nau kaungā fononga fakataha mo kinautolu—ʻOku angatuʻu ʻa Leimana mo ha niʻihi—ʻOku naʻinaʻi ʻa Nīfai ki hono ongo tokouá ke na tui ki he ʻEikí—ʻOku nau haʻi ia ʻaki ha ngaahi afo, pea nau alea ke fakaʻauha ia—ʻOku fakahaofi ia ʻi he mālohi ʻo e tuí—ʻOku kole fakamolemole hono ongo tokouá—ʻOku fai ʻe Līhai mo kinautolu kotoa pē naʻe ʻiate iá ha feilaulau mo e ngaahi feilaulau tutu. Taʻu 600–592 K.M. nai.
Vahe 8
ʻOku mamata ʻa Līhai ʻi ha meʻa-hā-mai ki he ʻakau ʻo e moʻuí—ʻOkú ne kai ʻi hono fuá peá ne fakaʻamu ke kai ai foki mo hono fāmilí—ʻOkú ne mamata ki ha vaʻa ukamea, mo ha hala fāsiʻi mo lausiʻí, mo ha ngaahi ʻao fakapoʻuli ʻokú ne kāpui ʻa e kakaí—ʻOku kai ʻa Selaia, Nīfai, mo Samu ʻi he fua ʻo e ʻakaú, kae fakafisi ʻa Leimana mo Lēmiuela. Taʻu 600–592 K.M. nai.
Vahe 9
ʻOku hiki ʻe Nīfai ha lekooti ʻe ua—ʻOku ui kinaua taki taha ko e ngaahi peleti ʻa Nīfaí—ʻOku ʻi he ngaahi peleti lalahí ʻa e hisitōlia fakatuʻasinó; pea ʻoku fakatautautefito ʻa e ngaahi peleti īkí ki he ngaahi meʻa ʻoku toputapú. Taʻu 600–592 K.M. nai.
Vahe 10
ʻOku kikiteʻi ʻe Līhai hono fetuku pōpula ʻo e kau Siú ʻe he kakai ʻo Pāpiloné—ʻOkú ne lea ʻo kau ki he hāʻele mai ʻi he lotolotonga ʻo e kau Siú ha Mīsaia, mo ha Fakamoʻui, mo ha Huhuʻi—ʻOku lea foki ʻa Līhai ʻo kau ki he haʻu ha tokotaha ʻa ia te ne papitaiso ʻa e Lami ʻa e ʻOtuá—ʻOku fakamatala ʻa Līhai ʻo kau ki he pekia mo e toetuʻu ʻa e Mīsaiá—ʻOkú ne fakatatau hono fakamoveteveteʻi mo e tānaki ʻo ʻIsilelí ki ha fuʻu ʻōlive—ʻOku fakamatala ʻa Nīfai ʻo kau ki he ʻAlo ʻo e ʻOtuá, mo e meʻafoaki ʻo e Laumālie Māʻoniʻoní, mo e fie maʻu ke māʻoniʻoní. Taʻu 600–592 K.M. nai.
Vahe 11
ʻOku mamata ʻa Nīfai ki he Laumālie ʻo e ʻEikí, pea fakahā mai kiate ia ʻi ha meʻa-hā-mai ʻa e ʻakau ʻo e moʻuí—ʻOkú ne mamata ki he faʻē ʻa e ʻAlo ʻo e ʻOtuá pea ako ʻo ʻilo ki he āfeitaulalo ʻa e ʻOtuá—ʻOkú ne mamata ki he papitaiso, ngāue fakafaifekau, mo hono kalusefai ʻo e Lami ʻa e ʻOtuá—ʻOkú ne mamata foki ki hono ui mo e ngāue fakafaifekau ʻa e Kau ʻAposetolo ʻe Toko Hongofulu Mā Ua ʻa e Lamí. Taʻu 600–592 K.M. nai.
Vahe 12
ʻOku mamata ʻa Nīfai ʻi ha meʻa-hā-mai ki he fonua ʻo e talaʻofá; ko e māʻoniʻoni, angahala, mo e tō ʻa hono kakaí; ko e hāʻele mai ʻo e Lami ʻa e ʻOtuá ʻi honau lotolotongá; ko e anga hono fakamāuʻi ʻo ʻIsileli ʻe he Kau Ākonga ʻe Toko Hongofulu Mā Uá mo e Kau ʻAposetolo ʻe Toko Hongofulu Mā Uá; pea mo e tuʻunga fakalielia mo fulikivanu ʻo kinautolu ʻoku fakaʻauʻauhifo ʻi he taʻetuí. Taʻu 600–592 K.M. nai.
Vahe 13
ʻOku mamata ʻa Nīfai ʻi ha meʻa-hā-mai ki he siasi ʻo e tēvoló ʻoku fokotuʻu ʻi he lotolotonga ʻo e kau Senitailé, ko hono ʻiloʻi mo hono nofoʻi ʻo ʻAmeliká, ko e mole ha ngaahi konga mahinongofua lahi mo mahuʻinga ʻo e Tohi Tapú, ko e tupu ai ʻa e tuʻunga ʻo e hē ʻa e kau senitailé, ko e fakafoki mai ʻo e ongoongoleleí, mo hono ʻomai ʻo e tohi ʻo e folofolá ʻi he ngaahi ʻaho fakaʻosí, mo hono langa hake ʻo Saioné. Taʻu 600–592 K.M. nai.
Vahe 14
ʻOku fakahā ʻe ha ʻāngelo kia Nīfai ʻa e ngaahi tāpuaki mo e ngaahi malaʻia ʻe tō ki he kau Senitailé—ʻOku ua pē ʻa e siasí: ko e siasi ʻo e Lami ʻa e ʻOtuá mo e siasi ʻo e tēvoló—ʻOku fakatangaʻi ʻa e Kau Māʻoniʻoni ʻa e ʻOtuá ʻi he ngaahi puleʻanga kotoa pē ʻe he fuʻu siasi lahi mo fakalieliá—ʻE tohi ʻe he ʻAposetolo ko Sioné ʻo kau ki he ngataʻanga ʻo e māmaní. Taʻu 600–592 K.M. nai.
Vahe 15
ʻE maʻu ʻe he hako ʻo Līhaí ʻa e ongoongoleleí mei he kau Senitailé ʻi he ngaahi ʻaho fakaʻosí—ʻOku fakatatau hono tānaki ʻo ʻIsilelí ki ha fuʻu ʻōlive ʻa ia ʻe toe fakahoko ki ai hono ngaahi vaʻa totonú—ʻOku fakamatalaʻi ʻe Nīfai ʻa e meʻa-hā-mai ʻo e ʻakau ʻo e moʻuí peá ne fakamatala ki he fakamaau totonu ʻa e ʻOtuá ʻi hono vahevahe ʻo e kau angahalá mei he kau māʻoniʻoní. Taʻu 600–592 K.M. nai.
Vahe 16
ʻOku faingataʻa hono tali ʻe he kau angahalá ʻa e moʻoní—ʻOku mali ʻa e ngaahi foha ʻo Līhaí mo e ngaahi ʻofefine ʻo ʻIsimelí—ʻOku fakahinohinoʻi ʻe he Liahoná ʻa honau hala ʻi he feituʻu maomaonganoá—ʻOku hā mai ʻa e ngaahi fakahinohino mei he ʻEikí ʻoku tohi ʻi he Liahoná mei he taimi ki he taimi—ʻOku mate ʻa ʻIsimeli; ʻoku lāunga hono fāmilí koeʻuhi ko honau ngaahi faingataʻaʻiá. Taʻu 600–592 K.M. nai.
Vahe 17
ʻOku fekauʻi ʻa Nīfai ke ne foʻu ha vaka—ʻOku fakafili kiate ia hono ongo tokouá—ʻOkú ne naʻinaʻi kiate kinaua ʻaki haʻane toe fakamatala ki he hisitōlia ʻo e ngaahi ngāue naʻe fai ʻe he ʻOtuá ki ʻIsilelí—ʻOku fonu ʻa Nīfai ʻi he mālohi ʻo e ʻOtuá—ʻOku taʻofi hono ongo tokouá ke ʻoua te na ala kiate ia, telia naʻá na mae ʻo hangē ko e musie mōmoa. Taʻu 592–591 K.M. nai.
Vahe 18
ʻOku fakaʻosi ʻa e vaká—ʻOku fakamatala ki hono fanauʻi ʻo Sēkope mo Siosefá—ʻOku kamata ʻa e folau ki he fonua ʻo e talaʻofá—ʻOku kau ʻa e ngaahi foha ʻo ʻIsimelí mo honau ngaahi uaifí ʻi he fakafiefia mo e angatuʻú—ʻOku haʻi ʻa Nīfai, pea teke fakaholomui ʻa e vaká ʻe ha afā lahi—ʻOku tukuange ʻa Nīfai, pea ʻoku lolomi ʻa e afaá ʻi heʻene lotú—Ko e tūʻuta ʻa e kakaí ki he fonua ʻo e talaʻofá. Taʻu 591–589 K.M. nai.
Vahe 19
ʻOku ngaohi ʻe Nīfai ha ngaahi peletí mei he maka ukamea, pea tohi ki ai ʻa e hisitōlia ʻo hono kakaí—ʻE hāʻele mai ʻa e ʻOtua ʻo ʻIsilelí ʻi he hili ha taʻu ʻe onongeau mei he taimi naʻe ʻalu ai ʻa Līhai mei Selusalemá—ʻOku fakamatala ʻa Nīfai ki Heʻene ngaahi mamahí mo hono kalusefaí—ʻE fehiʻanekina ʻa e kau Siú pea fakamoveteveteʻi ʻo aʻu ki he ngaahi ʻaho fakaʻosí, pea te nau toe tafoki ai ki he ʻEikí. Taʻu 588–570 K.M. nai.
Vahe 20
ʻOku fakahā ʻe he ʻEikí Hono ngaahi finangaló ki ʻIsileli—Kuo fili ʻa ʻIsileli ʻi he afi kakaha ʻo e faingataʻaʻia, pea ke nau ʻalu atu mei Pāpilone—Fakafehoanaki mo e ʻĪsaia vahe 48. Taʻu 588–570 K.M. nai.
Vahe 21
ʻE hoko ʻa e Mīsaiá ko e maama ki he kau Senitailé pea te ne fakatauʻatāinaʻi ʻa e kau pōpulá—ʻE toe tānaki mai ʻa ʻIsileli ʻi he mālohi ʻi he ngaahi ʻaho fakaʻosí—ʻE hoko ʻa e ngaahi tuʻí ko ʻenau ngaahi tamai tauhi—Fakafehoanaki mo e ʻĪsaia vahe 49. Taʻu 588–570 K.M. nai.
Vahe 22
ʻE fakamovetevete ʻa ʻIsileli ʻi he funga ʻo e māmaní kotoa—ʻE tauhi mo fafangaʻi ʻe he kau Senitailé ʻa ʻIsileli ʻaki ʻa e ongoongoleleí ʻi he ngaahi ʻaho fakaʻosí—ʻE tānaki mai ʻa ʻIsileli mo fakahaofi, pea ʻe tutu ʻa e kau fai angahalá ʻo hangē ko e veve—ʻE fakaʻauha ʻa e puleʻanga ʻo e tēvoló, pea ʻe haʻi ʻa Sētane. Taʻu 588–570 K.M. nai.