1 Ere chiney e gag, Jacob, e nggog ngomed bayay, pi walageg nib tʼuf rog, morngaʼagen e re paʼangin ney nib matʼaw ni kug weliy morngaʼagen.

2 Ya musap gaed, fapi michmich ni ke yog ngodaed e bogi michmich ngodaed u rogon e dowef; ere, arragon ni kan dag ngog ni boʼor rokʼ pifakdaed e rayimʼ u lan e dowef ni bachan e malog ko mich, machane, Got e ra wurengaenʼ ngakʼ boʼor i yaed; nge pifakdaed e yira sulwegraed, ni nge yog ni ngar baed ko renʼen nib riyulʼ ni ra tamilang nagraed ko Tabiyul roraed.

3 Ere, boed ni kugog ngomed, thingari tʼuf ni Kristus—ya fowngaen e yoeg e angel ngog ni ireray fithingan—ni ra yib nga fithikʼ fapi Jews, nga fithikʼ e piʼin nib gel e kireb roraed u fayleng; ma yaedra kuruth nag—ya rib gaʼfan u waenʼ e Got roraed, ma dakuriy rebo nam u fayleng ni yaedra kuruth nag e Got roraed.

4 Ya faʼanra ngan muruwliy e pi maʼangʼang nib gaaʼ u fithikʼ boech e gidiiʼ ma yaedra kalngaenʼ, mar nanged niʼir e Got rodaed.

5 Machane, bachan e pi gamʼing ni falʼngakʼ nge pi denen, ere piʼin bay u Jerusalem e yaedra ʼelʼel nag laniyaenʼraed ngakʼ, mar kuruth niged.

6 Ere, bachan e pi denen roraed, ma arame pi gafgow, nge uyngol, nge mʼar, nge puʼoeg rachaʼ e bayi aw nga dakeanraed; ma piʼin ni dab ni gatheayraed e yira garareg raed u fithikʼ gubin e pi nam.

7 Machane musap gaed, baʼaray rogon ni ke yoeg fare Somoel ni Got: Napʼan ni ra yib fare rran ni nge michaenʼraed ngog, ni gag Kristus, ma arame boed nug falʼeg ba mʼag nga thilraed e pi chitamangraed ni yira sulwegraed u rogon e dowef, u dakean e fayleng, ko pi binaw ni taferaed.

8 Ma bay yibi buch ni arame bay ni kunuy raed ngar chuw gaed ko yungi nʼen ni kar garar gaed ngay ni ke nʼuw napʼraed riy, ni boed e pi donguch u maday, nge fare aningeg i guruy e fayleng; ma fapi nam i gidiiʼ ko Gentiles e rib gamog u oewcheg, ni yoeg Got, ni ngan fekraed iyaen ko pi nam ni taferaed.

9 Arragon, fapi pilung ko Gentiles e bayra manged matam ni tachathowol ngoraed, ma pi leʼengin e pilung roraed e bayra manged matin ni tachathowol roraed; ere, fapi michmich rokʼ Somoel e rib gaʼfan ngakʼ fapi Gentiles, ya ire ke yoeg, ma miniiʼ e rayog ni nge togopluw ngay?

10 Machane musap gaed, re nam ney, e yoeg Got, ni nge mang ba nam ni tafenmed, ma fapi Gentiles e ra felʼ waʼathraed u dakean e re nam ney.

11 Ma re nam ney e ra mang ba nam nib puf rogon e paer riy ngakʼ fapi Gentiles, ma dabi sum e pilung nga dakean e re nam ney, ni ngar gagyeg gaed nga dakean fapi Gentiles.

12 Ma bay gu noemow nag nge gel e re nam ney ngakʼ gubin e pi nam ni kubay.

13 Ma enra cham nib togopluw ngakʼ Zion e ra yimʼ, ni yoeg Got.

14 Ya enra sunmiy ba pilung nge togopluw e ra yimʼ, ya gag, fare Somoel, ni pilung u tharmiy, e gura mang pilung roraed, ma gura mang ba tamilang ni gubinfen, ngakʼ e piʼin nra rungʼag e thin rog.

15 Ere, arayfan ni pi mʼag rog ni kug tay ko gidiiʼ e nge muguʼul, ni nggu rinʼ ngoraed ko ngiyalʼ ni yaed bay ko dowef, rib tʼuf ni thingar gu gatheay fapi muruwel nib miith nu milmor, nge mathang pogofan, nge pi ngongol ko fananikan.

16 Ere, enra cham nib togopluw ngakʼ Zion, ni Jew nge Gentile, ni kalbus nge dekalbus, pumoʼon nge ppin, e yaedra yimʼ; ya yaed e piʼin ni gathar ko fayleng ni poloʼ; ya piʼin ni gathi gamaed e yaed ba togopluw ngog, ni yoeg e Got rodaed.

17 Ya gura muguʼuliy e pi michmich rog nug tay ngakʼ e gidiiʼ, ni gura rinʼ ngoraed u napʼan ni yaed bay u lan e dowef—

18 Ere, pi walageg nib tʼuf rog, baʼaray rogon ni yoeg e Got rodaed: gura gafgow nag pifakmed u paʼ fapi Gentiles; machane, gura munguy nag gumʼirchaʼen fapi Gentiles, ni ngar pired ni boed ba matam ngoraed; ere, fapi Gentiles e ra felʼ waʼathraed min unegraed ko mathaʼeg nga fithikʼ fapi gidiiʼ ku Israel.

19 Ere, gura gapgep nag e re nam ney ngakʼ pifakamed, nge piʼin ni yaedra mathaʼeg nga fithikʼ pifakamed, ni gubinfen, ni nge mang ba nam ni taferaed; ya ba nam nib melʼeg, ni yoeg Got ngog, u fithikʼ gubin e pi nam, ere gubaʼadag ni gubin e gidiiʼ ni ngar pired u dakean ma ngar liyoer gaed ngog, ni yoeg Got.

20 Ere chiney, pi walageg nib tʼuf rog, kad guyed ni Got rodaed nib sug ko murnguy e ke piiʼ ngodaed e nangaenʼ nib gel ni morngaʼagen e pinnʼey, ere ngad tayed ir u wunʼdaed, ma gaed pag e pi denen rodaed, ma gathi nge mʼing kʼowdaed, ya dawor ni chuweg daed; machane, kan tuluf daed nga wuruʼ fare nam ni tafadaed; machane kan powiʼiydaed nga rebo nam nib felʼ, ya fare Somoel e ke falʼeg e day ni woʼdaed, ma gaed bay u dakean ba donguch u maday.

21 Machane rib mangil e pi michmich rokʼ Somoel ngakʼ e piʼin ni yaed bay u dakean e pi donguch u maday; ere bachan e ke yoeg e pi donguch, ere rib dugil ni ku bay boech nib yoʼor ma gathi kemus aray, ni kub sug e gidiiʼ u dakean ni pi walagdaed.

22 Ya musap gaed, fare Somoel ni Got e ke powiʼiy nga orel u bingyalʼ ngo bingyalʼ fapi gidiiʼ ku Israel, u rogon nib mʼagaenʼ ngay ma baʼadag. Ere chiney e musap gaed, fare Somoel e kumnang gubin e piʼin ni kar thaey gaed, ere kumnang daed.

23 Ere, nge falfalaenʼ med, ma ngam tayed u wunʼmed nib puf rogmed ni ngam rinʼed nrogon ni gimed baʼadag—ni ngam melʼeged e kanawoʼ ko yamʼ ni dabimus biʼid fa kanawoʼ ko yafos ni manechubog.

24 Ere, pi walageg nib tʼuf rog, mmʼaged gimed ko tin baʼadag Got, ma gathi tin baʼadag fare moʼoniyanʼ nge dowef; ma ngam tayed u wunʼmed, u tomuren ni kam mʼaged gimed ngakʼ Got, ni kemus nu fithikʼ ngu dakean fare murnguy rokʼ Got e gimed rathap riy.

25 Ere, manga yigi fasegmed Got ko yamʼ u dakean gelingin fare foskoyamʼ, nge fare yamʼ ni dabimus biʼid u dakean gelingin fare bayul, ni gomanga yog ni ngam thap gaed nga langgin gilʼilungun Got ni manechubog, ni nge yog ni ngam liyoer gaed ngakʼ u dakean e murnguy nu tharmiy. Amen.