Fare Babyor ku Omni

1 Musap gaed, yibi buch ni gag, Omni, e ke motochiyel nag ngog e chitamag, i Jarom, ni thingar gu yoloey oren banʼen nga dakean e pi plates ney, ya ngan chaʼariy e chep ni morngaʼagen e thaʼ romaed ni kakrom i yib—

2 Ere, lan e pi rran rog, e gu baʼadag ni ngam nanged ni boʼor e cham nug tay ko sayden rog nug be ayuweg e pi gidiiʼ rog, ni fapi Nephites, ni nga dabra mul gaed ngar awgaed nga paʼ e pi toʼogor roraed, ni fapi Lamanites. Machane musap gaed, ku mus ngog ma gag rebe tadenen, ma dawor gu fol ko fapi yalen nge fapi motochiyel rokʼ Somoel ni boed rogon ni thingar gurinʼ.

3 Ere yibi buch ni ke yaeni gaman lʼagruw miriʼay nge medilip i ragag nge nelʼ e duw ni ke yaen, ni boʼor e ngiyalʼ niʼug pirʼeged e gapas; ma boʼor e ngiyalʼ ni kuʼug pirʼeged e mael ni ubchiyaʼ nge puʼoeg rachaʼ. Arragon, ma ngan ngocheg i weliy, ma ke gaman lʼagruw miriʼay nge meruk i ragag nge lʼagruw e duw ni ke yaen, ma kug chaʼariy e pi plates ney ni rogon e pi motochiyel rokʼ e pi chitamag; mug fek nggu piiʼ ngakʼ fakag i Amaron. Ma arame kug muʼ.

4 Ere chiney, e gag, Amaron, e gu yoloey e pinʼen nug yoloey, ni buchʼuw nga langgin fare ke babyor rokʼ e chitamag.

5 Musap gaed, yibi buch ni ke gaman dalip miriʼay nge riliwʼ e duw ni ke yaen, ma oren e tin nib gel e kireb rokʼ ko fapi Nephites e ni liiʼraed ngar mʼaed.

6 Ya fare Somoel e dabi pag, u tomuren ni ke powiʼiyraed nga wuruʼ e nam nu Jerusalem ma ke chaʼariy raed ma ke ayuwegraed ni nga dabra mul gaed nga lan paʼ e pi toʼogor roraed, arragon, dabi pag ni fapi thin ni dabi micheg nib riyulʼ, ni ir faram e ke weliy ngakʼ e pi chitamangdaed, ni gaʼar: Nʼumngin i napʼan ni dab mu fol gaed ko pi motochiyel rog ma dabiyog ni ngam monʼog gaed u lan farengi nam.

7 Ere, fare Somoel e yib nag e gechig ngoraed nib tinoewey; machane yug aram rogon, me tay e piʼin nib mangil ni dar mʼaed, ya chuweg raed u paʼ e pi toʼogor roraed.

8 Me yibi buch nug piiʼ fapi plates ngakʼ walageg i Chemish.

9 Chiney e gag, Chemish, e gu yol ni buchʼuw e pinʼen ni gu yoloey, nga langgin fare ke babyor ni yol walageg ngay; ya musap gaed, gguy e pinʼen nib tomur ni yoloey, ni yoloey nga paʼ; ni yoloey u lan e re rran ni baʼaram ni piiʼ e pinnʼem ngog. Ma ireray yalen ni gamaed be chaʼariy fapi chep, ya ri aray rogon e pi motochiyel rokʼ e pi chitamangmaed. Ma arame kug muʼ.

10 Musap gaed, i gag, Abinadom, gag beeʼ nib pagael ni fak Chemish. Musap gaed, yibi buch nug gguy ni boʼor e mael nge togopluw u thilin e gidiiʼ rog, ni fapi Nephites, nge fapi Lamanites; me gag, e sayden rog e gufek boʼor e pogofan rokʼ fapi Lamanites ngay u napʼan ni gube yororiy pi walageg.

11 Ere muguyed, fapi chep ko pi gidiiʼ ney e ni ker nga dakean e plates niʼir e ke af u paʼ e pi pilung, u gubin e pi mfen; ma gumnang ni dariy morngaʼagen ba yiʼiy nga bang ma kemus ni bin baʼaray ni kan yoloey, ara ba prophecy; ere, tin nib gaʼfan e kan yoloey. Ere nggu museg u roey.

12 Musap gaed, i gag Amaleki, e beeʼ nib pagael ni fak Abinadom. Musap gaed, nggu weliy ngomed morngaʼagen Mosiah, niʼir e mang pilung ko fare nam nu Zarahemla; ya muguyed, i chiyliy Somoel ngakʼ ni nge chuw u lan fare binaw ku Nephi, ma gubin e piʼin ni yaedra motoyil ko thin rokʼ Somoel e ku yaedra un ngakʼ ngar chuw gaed u lan fare binaw, nga ranoed nga lan wuruʼ e binaw—

13 Me yibi buch ni rinʼ nrogon ni ke chiyliy Somoel ngakʼ. Mar chuw gaed ko farengi nam nga ranoed nga lan wuruʼ e binaw, ni gubin e piʼin ni motoyil ko thin rokʼ Somoel; ma ni powiʼiyraed u dakean e pi machib ni yoʼor nge pi yiʼiy. Ma daʼun tal i fonow nagraed ko fare thin rokʼ Got; ma un powiʼiyraed nga gelingin i paʼ, u lan wuruʼ e binaw iyaen nge madaʼ ko ngiyalʼ ni karbaed ko farengi binaw ni kanoeg ni farengi binaw nu Zarahemla.

14 Mar pirʼeged bogi gidiiʼ, ni kanoeg ni fapi gidiiʼ nu Zarahemla. Chiney, e immoy ni rib gel e falfalaenʼ u fithikʼ fapi gidiiʼ nu Zarahemla; ma riki gel e falfalaenʼ u Zarahemla, ni bachan Somoel ni lʼoeg fapi gidiiʼ rokʼ Mosiah ni bay fapi plates ni brass roraed ni bay fapi chep ko Jew riy.

15 Musap gaed, yibi buch ni Mosiah e pirʼeg ni fapi gidiiʼ nu Zarahemla e rabaed u Jerusalem ko fare ngiyalʼ i nʼen ni Zedekiah, ni pilung nu Judah, e ni fek ni kalbus nga Babylon.

16 Ere ra milekag gaed u lan wuruʼ e binaw iyaen, mar uned u paʼ Somoel ngar thʼaebed nga barbaʼ farengi day nib gaaʼ, ngar baed ko farengi nam niʼir e pirʼeg raed Mosiah riy; ma arame ra pired u roem ni kaʼaram iyib.

17 Ma napʼan e re ngiyalʼ innʼem ni pirʼeg raed Mosiah, ma kar ra yoʼor gaed. Machane aram rogon, ma bayoʼor e mael ni kar tayed nge togopluw ni almarin, ma kan liiʼraed ko sayden u bingyalʼ ngo bingyalʼ; ma thin roraed e daki papluw; ma dar feked ba chep nge un ngoraed; ma yaed be yoeg ni deriyulʼ ni bay e Anisunmiy raed; nge Mosiah, ara fapi gidiiʼ rokʼ Mosiah, e yog ni ngar nanged salapraed.

18 Machane yibi buch ni Mosiah e guy rogon ni ngan fil ngoraed e thin rokʼ. Me yibi buch u tomuren ni kan fil ngoraed e thin rokʼ Mosiah, me piiʼ Zarahemla ba chep ni morngaʼagen e pi chitamangin, nrogon ni kum nang; min yoloey, machane gathi nga dakean e tiney e plates.

19 Me yibi buch ni fapi gidiiʼ rokʼ Zarahemla, nge rokʼ Mosiah, e ra gak gaed nga taʼabang; ma Mosiah e ra turguyed ni nge mang pilung roraed.

20 Me yibi buch u lan fapi rran rokʼ Mosiah, ma bay ba barbaʼ i malang nib gaaʼ nni fek iyib ngakʼ ni bay e yol ni kan ker nga dakean; me yibi piliyeg e pi thin ni kan ker nga dakean fa yungi plates u dakean fare tawaʼath nge gelingin Got.

21 Mar piiʼed bbabyor ni morngaʼagen beeʼ ni Coriantumr fithingan, nge yamʼ ntay ko gidiiʼ rokʼ. Ma Coriantumr e ni pirʼeg ni fapi gidiiʼ rokʼ Zarahemla e yaed e ra pirʼeged; me paer roraed u langgin mereb e pul.

22 Ma ki weliy buchʼuw e thin ni morngaʼagen pi chitamangin. Ma tin sommʼon e gallabthir rokʼ e rabaed ko fare wulyang, u napʼan fare ngiyalʼ i nʼen ni thilyeg Somoel e thin rokʼ fapi gidiiʼ; ma fare gechig ni ubchiyaʼ rokʼ Somoel e yibi aw nga dakeanraed u rogon e pi gechig rokʼ, ni rib matʼaw; nge pi yil roraed e rib garar u lan farengi binaw ni bay nga lan e leluʼoch.

23 Musap gaed, gag, Amaleki, e ni gargelegeg u lan e pi rran rokʼ Mosiah; mug paer nge madaʼ ko ngiyalʼ nug guy ni ke yimʼ; ma Benjamin, nib pagael ni fak, e yinʼ luwan ko lung.

24 Ere muguyed, kug gguy, u lan e pi rran rokʼ fare pilung i Benjamin, ba mael ni ubchiyaʼ nge puʼoeg rachaʼ ni yoʼor u thilin fapi Nephites nge fapi Lamanites. Machane musap gaed, fapi Nephites e ra gel gaed ngoraed; arragon, ni fare pilung i Benjamin e tuluf raed ngar chuw gaed u lan fare binaw nu Zarahemla.

25 Me yibi buch ni gube pilibthir iyaen; ma, dariy e bitir rog, ma bachan e gumnang ni pilung i Benjamin e beeʼ nib moʼon nib maʼtaw u pʼoewchen Somoel, ere, nggu piiʼ e pi plates ney ngakʼ, ma gube ning chilen ngakʼ gubin e gidiiʼ ni ngar baed ngakʼ Got, ni Fachaʼ nib Thothup ku Israel, me mich u wunʼraed ko prophesy ni yibe tay, nge yiʼiy, nge pigpig ko pi angel, nge tawaʼath ko thin ni ma yib u bolowthey, nge tawaʼath ko piliyeg thin, nge gubin banʼen nib felʼ; ya dariy banʼen nib mangil ni dar yib rokʼ Somoel: ma tin nib kireb e ma yib rokʼ moʼoniyanʼ.

26 Ere chiney, pi walageg nib tʼuf rog, rug baʼadag ni ngam baed ngakʼ Kristus, niʼir Fachaʼ nib Thothup ku Israel, ni nge yog ni ngam thap gaed, me yog ngomed fare gelingin e bayul rokʼ. Arragon, mired ngakʼ, ngam piiʼed gimed ni poloʼ nib maligach ngakʼ, ma kum ʼulʼul gaed ko damunmun romed nib baley nge pi meybil romed, mi gimed tay riy ni aram rogon nge yaeni madaʼ ko tomur; ma woed nib fos Somoel e aram rogon ni gimed ra thap.

27 Ere chiney e nggu weliy boech morngaʼagen ba ulung i gidiiʼ nranoed nga lan wuruʼ e binaw ni ngar suloed ko fare binaw rokʼ Nephi; ya yaed ba ulung i gidiiʼ nib yoʼor ni yaed baʼadag ni ngar suloed ko binaw ni taferaed.

28 Ere, ranoed nga lan wuruʼ e binaw. Ma aenibgaʼ roraed e beeʼ nib moʼon nib gel mab yargael, ma beeʼ nib ʼelʼel laniyaenʼ, ere ire kʼaring e maleʼeg thin nga fithikʼraed; ma yaed gubin nra mʼaed, kemus ni wugem i yaed e magaey, u lan wuruʼ e binaw, ma arame ra suloed bayay ko fare nam nu Zarahemla.

29 Me yibi buch ni kur feked buʼulung e gidiiʼ nib yoʼor, mar milekag gaed bayay nga lan wuruʼ e binaw.

30 Me gag, Amaleki, e bay beeʼ nib pagael ni walageg, niki un ngoraed; ma ka arame gu nang morngaʼag raed. Me gag e ke chugur ni ngan tayeg nga loew; ma pi yungi plates ney e ke sug. Ma arame kug muʼ ko numon.