1 Ere chiney, e Jacob e weliy boʼor banʼen ngakʼ e gidiiʼ rog ko ngiyalʼ nem; machane kemus ni chuʼuw ney e gguy rogon ngan yoloey, ya pinʼen ni kug yoloey e ba gaman u wunʼug.

2 Ere chiney e gag, Nephi, nggu yoloey e thin rokʼ Isaiah nib boʼor, ya yaʼel nge dagur rog e ba mʼagaenʼ ko thin rokʼ. Ya bay gu taʼareb nag e thin rokʼ ko gidiiʼ rog, mug fek nggu piiʼ nge yaen ngakʼ gubin i pifakag, ya rriyulʼ ni ke guy e Tabiyul rog, ni boed ni kug guy.

3 Ma walageg, i Jacob, e ki guy ni boed ni kug guy; ere, bay gu piiʼ e thin rorow nge yaen ngakʼ pifakag ni nge micheg ngoraed ni thin rog e ba riyulʼ. Ere, u dakean e thin rokʼ dalip niiʼ, e gaʼar Got, gura yarmiy e thin rog riy. Machane, Got e ke piiʼ e michriy nib yoʼor, ma ke micheg gubin e thin rokʼ.

4 Musap gaed, yaʼel nge dagur rog e ba falaenʼ i micheg ngakʼ e gidiiʼ rog ni riyulʼ fare wub rokʼ Kristus; ya, ireray fan ni kan piiʼ fare motochiyel rokʼ Moses; ere gubin banʼen ni ke piiʼ Got aram ko tabolngin e fayleng, ngakʼ e gidiiʼ, e bogi pow rokʼ.

5 Ma kub falaenʼ e yaʼel nge dagur rog ko pi mʼag rokʼ Somoel ni ke tay ngakʼ e pi chitamangdaed; arragon, yaʼel nge dagur rog e rib falaenʼ ko murnguy rokʼ, nge yalen e justice rokʼ, nge gelingin, nge wurengaenʼ rokʼ u dakean fare tanam nib gaaʼ mab manechubog u rogon ni ngan chuw u paʼ e yamʼ.

6 Ma yaʼel nge dagur rog e rib falaenʼ i micheg ngakʼ e gidiiʼ rog ni faʼanra dabiyib Kristus ma gubin e gidiiʼ ma thingari yimʼ.

7 Ya faʼanra demoy Kristus ma demoy Got; ma faʼanra demoy Got ma daed moyed, ya dariy banʼen nni sunmiy. Ere bay ba Got niʼir Kristus, ma bay yib ko ngiyalʼ ni dugliy.

8 Ere chiney e nggu yoloey boech e thin rokʼ Isaiah, ni manga piʼin bay ko gidiiʼ rog nra guy e pi thin ney me yog ni nge oeb gumʼirchaʼraed mar falfalaenʼ gaed ngakʼ gubin e gidiiʼ. Ere chiney e baʼaray fapi thin, ni gomanga mu taʼareb niged ngomed nge gubin e gidiiʼ.