1 Li aatin kiril laj Isaias, ralal laj Amos, chirix Juda ut Jerusalen:

2 Ut taak’ulmanq sa’ roso’jik li kutan, naq taaxaqab’aaq li tzuul re li rochoch li Qaawa’ sa’ xb’eeneb’ chaq li ninqi tzuul, ut taqsinb’ilaq xloq’al sa’ xb’eeneb’ chaq li kok’ tzuul, ut chixjunileb’ li tenamit te’xik rik’in.

3 Ut naab’al tenamit te’xik ut te’xye, Chalqex, ut chootaqe’q sa’ xtzuul li Qaawa’, sa’ rochoch lix Dios laj Jakob; ut a’an tooxtzol chirix lix b’e, ut laa’o toob’eeq chiru li ruq’ xb’e; xb’aan naq aran Sion taa’elq chaq li chaq’rab’, ut li raatin li Qaawa’ aran chaq Jerusalen.

4 Ut a’an taaraqoq aatin sa’ xyanqeb’ li tenamit, ut tixch’iilaheb’ naab’al li tenamit: ut te’xten lix yok’leb’ ch’iich’ choq’ k’anjeleb’aal re k’alek, ut lix juch’juukil che’ choq’ ch’otleb’aal che’—li jun tenamit ink’a’ chik tixtaqsi li yok’leb’ ch’iich’ chiru li jun chik chi tenamit, chi moko chik te’xtzol li pleetik.

5 Ex xjunkab’al laj Jakob, chalqex, ut choob’eeq sa’ xsaqenkil li Qaawa’; relik chi yaal, chalqex, xb’aan naq sachenaq eeb’e chejunilex, li junjunq sa’ lix maa’us aj b’e.

6 Xb’aan a’in, at Qaawa’, naq xakanab’ xjunes laa tenamit, lix junkab’al laj Jakob, xb’aan naq ch’olaninb’ileb’ chaq sa’ xjayal li releb’ saq’e, ut neke’ab’in chiruheb’ laj q’e jo’eb’ laj Filisteo, ut neke’saylan xch’ool rik’in li ralal xk’ajoleb’ laj jalanil tenamit.

7 Nujenaq ajwi’ lix ch’och’eb’ rik’in plaat ut oor, chi moko wan ta roso’jik lix b’ihomaleb’; lix ch’och’eb’ nujenaq ajwi’ chi kawaay, chi moko wan ta roso’jikeb’ lix kareet.

8 Nujenaq ajwi’ lix ch’och’eb’ rik’ineb’ li pak’b’il dios; neke’xloq’oni lix yiib’ahomeb’ li ruq’, li k’a’ru pak’b’il rik’in ru’ujeb’ li ruq’ a’an.

9 Ut li winq ka’ch’in xwankil ink’a’ naxkub’si rib’, ut li xnimal ru winq ink’a’ naxtuulanob’resi rib’, jo’kan ut, maakuy lix maak.

10 Ex aj maak, okanqex sa’ li pek, ut muq aawib’ chi poqs, xb’aan naq tatsak’e’q xb’aan li xiw chiru li Qaawa’, ut lix loq’al lix nimajwal wankil.

11 Ut taak’ulmanq naq taatuulanob’resiiq lix taqenaqil ilob’aal li winq, ut taakub’simanq lix q’etq’etileb’ li winq, ut ka’ajwi’ li Qaawa’ taqsinb’ilaq xloq’al sa’ li kutan a’an.

12 Xb’aan naq lix kutankil li Qaawa’ reheb’ li Teepal taachalq chi seeb’ sa’ xb’eeneb’ chixjunil li tenamit, relik chi yaal, sa’ xb’een li junjunq; relik chi yaal, sa’ xb’een laj q’etq’et ut li terq’usinb’il, ut sa’ xb’een li junjunq li taqsinb’il, ut a’an taak’ame’q taq’a.

13 Relik chi yaal, ut lix kutankil li Qaawa’ taachalq sa’ xb’eeneb’ chixjunil lix toonal li yaw aran Libano, xb’aan naq ninqeb’ xteram ut taqenaqeb’; ut sa’ xb’eeneb’ chixjunileb’ lix toonal li ji aran Basan;

14 Ut sa’ xb’eeneb’ chixjunil li ninqi tzuul, ut sa’ xb’eeneb’ li kok’ tzuul, ut sa’ xb’eeneb’ chixjunil li ninqi tenamit li taqsinb’ileb’, ut sa’ xb’eeneb’ chixjunqaleb’ li tenamit;

15 Ut sa’ xb’een li junjunq chi najt xteramil kab’l, ut sa’ xb’een li junjunq chi kawil xaqxookil tz’ak;

16 Ut sa’ xb’eeneb’ chixjunil li jukub’ sa’ palaw, ut sa’ xb’eeneb’ chixjunil li jukub’ chalenaqeb’ chaq Tarsis, ut sa’ xb’eeneb’ chixjunil li jalam-uuch li saheb’ rilb’al.

17 Ut taakub’simanq lix taqlijikeb’ li winq, ut lix q’etq’etileb’ li winq taakub’siiq taq’a, ut ka’ajwi’ li Qaawa’ taqsinb’ilaq xloq’al sa’ li kutan a’an.

18 Ut a’an tixsacheb’ chi junajwa li pak’b’il dios.

19 Ut toxe’okaq sa’ xhopolaleb’ li pek, ut sa’eb’ li ochochpek re li ch’och’, xb’aan naq li xiw chiru li Qaawa’ taachalq sa’ xb’eeneb’, ut lix loq’al lix nimajwal wankil tixsak’eb’, naq taawakliiq a’an chixchiq’b’al li ch’och’ chi q’axal xuwajel.

20 Sa’ li kutan a’an, jun li winq tixtz’eq lix pak’b’il dios plaat, ut lix pak’b’il dios oor, li kixpak’ chaq re tixloq’oni, reheb’ li b’a, ut reheb’ li sotz’;

21 Re te’xik sa’ ritz’ileb’ li pek, ut sa’ xb’eeneb’ li pek q’es ru, xb’aan naq li xiw chiru li Qaawa’ taachalq sa’ xb’eeneb’, ut lix nimajwal xwankil lix loq’al tixsak’eb’, naq taawakliiq a’an chixchiq’b’al li ch’och’ chi q’axal xuwajel.

22 Kanab’omaq li winq, li wan sa’ ru’uj li namusiq’ak wi’; b’ar put ru lix wankilal a’an?