1 Fa indro ny Tompo, ny Tompon’ny maro dia manaisotra amin’i Jerosalema sy amin’i Joda ny vatsy sy tohana, ny tohan’aina rehetra amin’ny mofo sy ny vatsy manontolo amin’ny rano—

2 Ny lehilahy mahery sy ny lehilahy mpianady, ny mpitsara sy ny mpaminany ary ny malina sy ny anti-panahy;

3 Ny mpifehy ny dimampolo sy ny manan-kaja ary ny mpanolotsaina sy ny ombiasy fatsora ary ny mpandahateny mahay.

4 Ary Izaho hanome azy ankizy ho printsiny, ary zazakely no hanapaka azy.

5 Ary hampahoriana ny vahoaka, ny tsirairay hampahory ny hafa, ary ny tsirairay dia hampahorian’ny namany; ny ankizy haneho fiavonavonana amin’ny anti-panahy, ary ny olon-tsotra amin’ny manan-kaja.

6 Rehefa hazonin’ny olona iray ny rahalahiny ao an-tranon-drainy ka hilazany hoe: Ianao no manana lamba, aoka ho mpifehy anay, ary aza avela ho tonga eo an-tananao izao faharavana izao—

7 Hiozonozona izy amin’izany andro izany, hanao hoe: Tsy te ho mpanasitrana aho; satria tsy misy hanina na lamba ao an-tranoko; aza atao mpifehy ny vahoaka aho.

8 Fa rava i Jerosalema ary mirodana i Joda, satria ny lelany sy ny asany dia samy manohitra ny Tompo, ka mihantsy ny mason’ny voninahiny.

9 Ny toetry ny tarehiny dia vavolombelona miampanga azy sy mampiharihary fa mitovy amin’ny an’i Sodoma ny fahotany, tsy azony afenina. Lozan’ny fanahiny fa efa nampidi-doza tamin’ny tenany izy.

10 Lazao amin’ny marina fa efa mandry ny aminy; fa hihinana ny vokatry ny asany izy.

11 Lozan’ny olon-dratsy fa ho fongana izy; fa hanody azy ny valin’ny nataon’ny tanany!

12 Ary zaza no mpampahory ny vahoakako ary vehivavy no manapaka azy. Ry vahoakako, ireo izay mitarika anao no mampaniasia anao sy mandrava ny soritry ny lalanao.

13 Mitsangana ny Tompo hisolo vava ary mitsangana Izy hitsara ny vahoaka.

14 Ny Tompo dia hitsara anao miaraka amin’ireo anti-panahin’ny vahoakany sy ny printsiny; satria efa laninareo ny teo amin’ny tanimboly ary ny fananan’ny mahantra nendahina taminy dia ao an-tranonareo.

15 Inona no tianareo holazaina? Montsamontsaninareo ny vahoakako ary torotoroinareo ny tavan’ny mahantra, hoy ny Tompo Andriamanitry ny Maro.

16 Ary hoy koa ny Tompo hoe: Satria miavonavona ny zanakavavin’i Ziona sy mandeha milanjalanja loha sy maolamaola fijery, kasikasy famindra raha mandeha ary mampikorintsana ny fehin-tongony.

17 Noho izany dia hampisy takopery ny tampon-dohan’ny zanakavavin’i Ziona ny Tompo ary hampiseho ny fitanjahany.

18 Ary amin’izany andro izany dia hoesorin’ny Tompo ny hakanton’ny firavany mikorintsana mbamin’ny fehiloha sy ny rado mitarehim-bolan-tsinanana;

19 Ny rojo sy ny haba ary ny lamba fisalobonana;

20 Ny satroka sy ny haba amin’ny ranjo mbamin’ny fehiloha sy ny fitehirizan-dranomanitra ary ny kavina;

21 Ny peratra sy ny kavina amin’ny orona;

22 Ny fitafiana miraratra sy ny palitao ary ny kapaoty sy ny poketra;

23 Ny fitaratra sy ny lamba hariry madinika ary ny saly sy ny voaly.

24 Ary ny zavatra hitranga dia ny manitra hosoloana maimbo; ary ny sikina hosoloana tady; ary ny volo voamboatra hosoloana loha sola; ary ny akanjo miebanebana hosoloana lamba fisaonana; ary ny hatsaran-tarehy hosoloana marika mahamay.

25 Ho lavon-tsabatra ny lehilahy ao aminao ary ho lavo an’ady ny mahery fo ao aminao.

26 Ary hitomany sy hisaona ny vavahadiny ary ho aolo izy sy hipetraka amin’ny tany.