1 Toja’ ut naq tinb’icha re li q’axal raaro inb’aan jun b’ich chirix li raaro inb’aan, chirix li rawimq uva. Li q’axal raaro inb’aan wan jun li rawimq uva sa’ jun li tzuul q’axal na’uuchin.

2 Ut kixyiib’ li korral chirix, ut kirisi chaq xpekul, ut kiraw rik’in xtoonal li uva q’axal sik’b’il ru, ut kixyiib’ jun li najt xteramil kab’l sa’ xyi, ut kixyiib’ ajwi’ li yatz’leb’aal uva chi sa’; ut kiroyb’eni naq taaruuchini li uva, a’ut k’iche’ uva kiruuchini.

3 Ut anajwan, ex li wankex Jerusalen, ut ex winq aj Juda, chexraqoq aatin, nintz’aama, chiwix laa’in ut chirix li wawimq uva.

4 K’a’ chik ru kiru raj xb’aanunkil re li wawimq uva li ink’a’ ta kinb’aanu chi sa’? Jo’kan ut, naq kiwoyb’eni naq taaruuchini li uva, kiruuchini b’an li k’iche’ uva.

5 Anajwan ut ab’ihomaq, tinye eere k’a’ru tinb’aanu re li wawimq uva—tinwisi lix korralil, ut taak’uxe’q; ut tint’an li tz’ak li xaqxo chirix, ut taayeq’manq.

6 Ut tinkanab’ chi sachso; moko setb’ilaq ta li ruq’ k’aam, chi moko k’alenb’ilaq; taamoq b’an li pajl ut li k’ix; tintaqlaheb’ li choql re naq ink’a’ te’xkanab’ li hab’ chi t’ane’k sa’ xb’een.

7 Xb’aan naq li rawimq uva re li Qaawa’ reheb’ li Teepal, a’an lix junkab’al laj Israel, ut eb’ li winq aj Juda a’aneb’ lix toon che’ li sa rilb’al; ut kixsik’ li raqb’a-aatin tiik, ut k’ehomaq reetal, rahob’tesink; kixsik’ li tiikilal, ut k’ehomaq reetal, li yaab’ak.

8 Rahilal sa’ xb’eeneb’ li neke’junajink re jun li ochoch rik’in li jun chik, toj reetal naq maajun na’ajej naru nawan, re naq te’k’ojob’aaq xjunes sa’ xyi li ch’och’!

9 Sa’ lin xik, chan li Qaawa’ reheb’ li Teepal, yaal naq te’kanaaq k’iila ochoch chi yamyo, ut li tenamit li ninqeb’ ut chaq’aleb’ ru chi maa’ani wan chi sa’.

10 Relik chi yaal, chiru lajeeb’ siir chi awimq uva jun uk’al taa’elq, ut chiru jun nimla chakach chi iyaj taa’uuchinq yal jun ch’ina chakach.

11 Rahilal sa’ xb’eeneb’ li neke’wakli eq’la re te’xtaaqe li uk’a nakaltesin, li neke’kana toj taa’ewuuq, ut neke’xamnak rik’in viin!

12 Ut wan li aarp, ut li violin, ut li tun, ut li xolb’, ut li viin sa’eb’ lix ninq’e; a’ut ink’a’ neke’xk’oxla lix k’anjel li Qaawa’, chi moko neke’xk’e reetal lix b’aanuhom li ruq’.

13 Jo’kan naq xikenaqeb’ lin tenamit chi preexil, xb’aan naq maak’a’ xnawomeb’; ut eb’ li winq k’eeb’ileb’ xloq’al neke’numta xtz’okajik, ut eb’ li k’iila tenamit reheb’ chaqihob’resinb’ileb’ rik’in chaqi-eel.

14 Jo’kan naq li xb’alb’a xnimob’resi rib’, ut xte li re chi q’axal teeto; ut lix loq’aleb’, ut lix k’ihaleb’, ut lix q’etq’etileb’, ut li ani nasaho’ xch’ool, te’kub’eeq chi sa’.

15 Ut taakub’siiq li winq ka’ch’in xwankil, ut taatuulanob’resiiq li winq kaw xmetz’ew, ut taatuulanob’resiiq li rilob’aal li ani terq’usinb’il.

16 A’b’anan li Qaawa’ reheb’ li teepal taataqsimanq xloq’al rik’in raqb’a-aatin, ut li Dios li sant ru taasantob’resiiq sa’ tiikilal.

17 Toja’ naq te’tzekanq li kok’ karneer jo’ chanru k’aynaqeb’, ut sa’eb’ li sachenaqil na’ajej reheb’ li ninqeb’ xtib’el, te’wa’aq laj jalanil tenamit.

18 Rahilal sa’ xb’eeneb’ li neke’kelonk re li maa’usilal rik’in xk’aamal li jo’maajo’il na’leb’, ut li maak jo’ rik’in xk’aamal li kareet;

19 Li neke’yehok re: Chixseeb’a rib’, chixb’aanu sa’ junpaat lix k’anjel, re taaruuq taqil; ut li na’leb’ tixk’e lix Santil Dios laj Israel, chinach’oq chaq ut chichalq, re taqanaw ru.

20 Rahilal sa’ xb’eeneb’ li neke’yehok us re li k’a’ru ink’a’ us, ut ink’a’ us re li k’a’ru us, li neke’xk’e q’ojyin choq’ saqen, ut saqen choq’ q’ojyin, li neke’xk’e li k’a choq’ ki’, ut li ki’ choq’ k’a!

21 Rahilal sa’ xb’eeneb’ li chaab’ileb’ xna’leb’ jo’ neke’ril rib’, ut seeb’eb’ chi na’leb’ank sa’ tz’aqal li rilob’aaleb’.

22 Rahilal sa’ xb’een li kaw xmetz’ew chiruk’b’al li viin, ut eb’ li wankeb’ xkawilal chixjunajinkil li uk’a nakaltesin;

23 Li neke’xk’e laj maak choq’ tiik xch’ool re xk’ulb’al li maatan, ut neke’xmaq’ li tiikilal chiru li tiik xch’ool!

24 Jo’kan ut, jo’ chanru naq li xam naxk’at li roq waj, ut li raq’ xam naxk’at lix mulel q’olom, te’kanaaq lix xe’eb’ chi q’ajenaq, ut li ratz’um taa’apuuq chanchan poqs, xb’aan naq ke’xtz’eq chaq lix chaq’rab’ li Qaawa’ reheb’ li Teepal, ut xik’ ke’ril li raatin lix Santil Dios laj Israel.

25 Jo’kan naq lochlo lix josq’il li Qaawa’ chirix lix tenamit, ut a’an kixye’ li ruq’ sa’ xb’eeneb’, ut kixsak’eb’, ut ke’chiiq’an li tzuul, ut ke’pejiik lix tib’eleb’ sa’ xyiheb’ li b’e. Rik’in ut chixjunil a’in moko ch’ananb’il ta lix josq’il; toj ye’b’il b’an li ruq’.

26 Ut a’an tixtaqsi jun eetalil chiruheb’ li tenamit li wankeb’ chaq chi najt, ut taaxuxb’aq chiruheb’ toj sa’ xmaril chaq’ li ruchich’och’; ut k’ehomaq reetal, te’xseeb’a rib’ chi k’ulunk sa’ junpaat; maajun sa’ xyanqeb’ taatawaaq, chi moko taatichk’oq.

27 Maajun taachalq xwara chi moko taawaarq; chi moko te’hite’q lix k’aamaleb’ lix yiitoq, chi moko taat’upe’q lix tz’apb’aleb’ lix xaab’;

28 Jutz’juuqeb’ li ru’ujeb’ lix tzimaj, ut k’onk’ooqeb’ li roqeb’ chixjunil lix tzimaj, ut li roqeb’ lix kawaay te’k’utunq chanchan kawil pek, ut lix b’eleb’aaleb’ chanchan li sut iq’, lix yaab’eb’ jo’ li kaqkojl.

29 Eb’ a’an te’xjap re chanchan li kaqkojl saaj; relik chi yaal, te’xjap re, ut te’xchap li ani yoob’il, ut tikto te’xk’am, ut maajun taakoloq.

30 Ut sa’ li kutan a’an te’tunluq chiruheb’ jo’ chanru natunluk li palaw; ut wi te’iloq sa’ ch’och’, k’ehomaq reetal, q’ojyin ut rahil ch’oolejil, ut taaq’ojyino’q li kutan sa’ li choxa sa’ xb’eeneb’.