1 Na Ewuradze see me dɛ: Fa ɔpon kɛse, na fa ɔdasanyi ne nsaano kyerɛw dza ɔfa, Maher-shalal-hash-baz ho;

2 Na mebɛma adasefo nokwafo, Ɔsɔfo Uriah, na Jeberechiah ba Zechariah, ma wɔakyerɛw.

3 Na mokɔr nkɔnhyɛnyibaa ne nkyɛn; na onyinsenee woo ɔbabanyin. Nna Ewuradze see me dɛ: To no dzin, Maher-shalal-hash-baz.

4 Na hwɛ, abofra no rinnya nyimdzee nnfrɛ, M’egya, na Me nã no, ansaana wɔabɔsoa Damascus ahonya na Samaria asadze edzi Assyriahen enyim akɔ.

5 Na Ewuradze kasaa kyerɛɛ me bio dɛ:

6 Susuampa dɛ ɔman yi apow Shiloah esu a ɔpem nyaa, na hɔn ho asɛpɛw Rezin nye Remaliah ba no ho yi;

7 Dɛm ntsi, afei, hwɛ, Ewuradze esutsen no mu esu a ɔyɛ dzen na ɔdɔɔ sõ no reba hɔn do, Assyriahen ɔnye n’enyimnyam nyina na ɔbɛba abɔfow n’esuka nyina na ɔatra n’esukɔn nyina do;

8 Na obodua Judah mu; na oeyir etwa mu akɔ; obodu kɔn ho mpo; na n’atsaban mu han bɛhyɛ w’asaase ne tɛtɛr nyina mã, O Immanuel.

9 O aman, hom nka mbɔ mu, na wɔbɔdwerew hom ara; ekyirekyir asaasedofo nyina, hom nyɛ aso: hom mmia, na wɔbɔdwerew hom.

10 Hom mbɔ mu mfa apam na ɔbɛyɛ kwa; hom nka asɛm no, na orinngyina; na Onyame kã hɛn ho.

11 Na Ewuradze dze nsa dzendzen kasaa dɛm kyerɛɛ me, na ɔdze kyerɛkyerɛɛ me, dɛ mma mennantsew ɔman yi no kwan do, dɛ:

12 Mma hom mmfrɛ dza ɔman yi frɛ no Tsirdoapam nyina dɛ Tsirdoapam a; eso mma hom nnsuro hɔn suro, eso mma hom akoma nntu.

13 Dɔm Ewuradze no, ɔno na hom mbu no krɔnkrɔn na ɔno na ɔnyɛ hom suro, na ɔnyɛ hom akomatu.

14 Na ɔbɛyɛ krɔnkrɔnbea ama hom, fintsiw bo, na patatsir botan ama Israel efiefi ebien nyina, na ɔayɛ apafir na efir ama hɔn a wɔtse Jerusalem.

15 Na dodowara befintsiw do na wɔahwehwe ase, na woebubu, na wɔatotɔ efir mu, ma wɔakyekyer hɔn.

16 Ɔwoara kyekyer dase no, sɔw mbra no ano wɔ m’esuafo mu.

17 Na emidze mobɔtweɔn Ewuradze a ɔdze n’enyim suma Jacob fi, na mahwɛ no kwan.

18 Hwɛ, emi ɔnye mba a Ewuradze dze ama me no, yɛyɛ nsɛnkyerɛdze nye anwanwadze wɔ Israel mu ofi dɔm Ewuradze a ɔtse Zion bepɔw do no hɔ.

19 Na sɛ wɔse hom dɛ, Hom mbisa asamamfrɛfo ɔnye abayifo a wosu twɔtwɔw na wɔyɛ huhuhuhu no a: aso onntwar dɛ ɔman bi wobisa hɔn Nyame hɔ adze? Aso mma wommbisa atseasefo ho asɛm wɔ ewufo hɔ?

20 Wɔnkɔ mbra ɔnye adasesɛm no hɔ; sɛ wɔannkasa dɛ mbrɛ asɛm yi tse a, ɔnodze nna ɔkyerɛ dɛ kan bi nnyi hɔn mu.

21 Na wobodua mu etwa mu, na adzen hɔn, na ɔkɔm adze hɔn; na ɔbɛba dɛ ɔkɔm nya dze hɔn a, hɔn ahom bɛtsew hɔn, na wɔadom hɔn hen na hɔn Nyankopɔn, na wɔadandan hɔn enyi akɔ sor.

22 Na wɔbɔhwɛ famu so, na hwɛ, ahokyer, nye sum nye ahoguan kusuwwyɛ nye yi; na wobosun hɔn egu sumpɔrwa no mu.