1 Ma bay yibi sum beeʼ ko ganong rokʼ Jesse, nge ba noef ni bayi sum u likʼngin.

2 Ma fare Kan ni Thothup rokʼ Somoel e ra toffan nga dakean, fare nangaenʼ ko gonop nge nangfan, fare nangaenʼ ko fonow nge gelingin, fare nangaenʼ ko llowaenʼ nge madguwan Somoel;

3 Ma ra guy rogon nge papay ni nge nangfan madguwan fare Somoel; ma dabi dugliy u rogon e changar rokʼ, ara fonow u rogon e motoyil rokʼ.

4 Ya yalen nib matʼaw e ra dugliy e piʼin nib gafgow, me fonow ni taʼab rogon ni fan ngakʼ e piʼin nib muding u fayleng; ma ra gatheay fare fayleng ko thin u lʼugun, nge nifeng u lʼugun e ra liiʼ e piʼin nib kireb ngay.

5 Ma tin nib matʼaw e ra mang liiʼed u lukungun, ma yulʼyulʼ e ra mang liiʼed nib langab nga lukungun.

6 Pi wolf e yaedra paer e saaf nib felʼ thilraed, nge leopard e yaedra mol nga butʼ u fithikʼ pifak e kaming, ma pifak e garbaw nge layon ni ke felʼ yangren nge gamanman nib sugsug e yaedra paer u taʼabang; ma beeʼ nib bitir e ra powiʼiyraed.

7 Ma garbaw nge bear e yaedra abich u taʼabang; nge pifakraed e yaedra mol nga butʼ u taʼabang; ma layon e yaedra kay kenggin e grain ni boed e garbaw.

8 Nge bitir nib achichig nra i fafel u langan i tafen e porchoyog ma dabi kʼaed, nge bitir ni kub achig nra tay paʼ nga langgin tafen e porchoyog ma dabi kʼaed.

9 Ma dabra kʼaeded ara madʼad gaed ngakʼ beeʼ u gaʼangin yang fare burey rog nib thothup, ya fayleng ni poloʼ e ra sug ko llowaenʼ rokʼ Somoel, ni boed e day nibe tharey e butʼ u maday.

10 Ma lan e re rran nem e bay yib ba likʼngin rokʼ Jesse, nra sakʼiy nge mang pow rokʼ e gidiiʼ; niʼir e bayi gay fapi Gentiles; ma toffan rokʼ e rib mangil.

11 Ma bay yibi buch u lan e re rran nem ni fare Somoel e ra kʼiyeg paʼ bayay ko yan lʼagruw yay ni nge sulweg e tin ni ke magaey ko gidiiʼ rokʼ nra yaeni aw, u Assyria, ngu Egypt, ngu Pathros, ngu Cush, ngu Elam, ngu Shinar, ngu Hamath, nge pi donguch nu maday.

12 Me pug ngalang ba pow ni fan ngakʼ e pi nam, me kunuy nga taʼabang fapi gidiiʼ ku Israel ni kan tulufraed, me kunuy nga taʼabang fapi ganong ku Judah u lan fa aningeg i tabthung ko fayleng.

13 Fare moʼowaenʼ rokʼ yu Efraim e kura chuw, ma pi toʼogor rokʼ yu Judah e yira chuwegraed; yu Efraim e dabi awaenʼ ngakʼ yu Judah, nge yu Judah e dabi gafgow nag yu Efraim.

14 Machane yaedra changeg nga dakean likʼ i poen piyu Philistine iyaen ko ngael; ma yaedra fek e chugum u tane mael rokʼ e piʼin ni bay nga lan e ngek; mar mʼaged paʼaraed ngakʼ yu Edom nge yu Moab; ma pi bitir nu Ammon e yaedra fol roraed.

15 Ma fare Somoel e ra gatheay ni poloʼ fare yunmon ko day nu Egypt; ma nifeng rokʼ nib gel e ra rurug paʼ riy nga dakean fare lulʼ, me buthug nge gaman medilip paʼ, me yaen e gidiiʼ u dakean nib malikʼ e sus u ayraed.

16 Ma bay yib ba kanawoʼ nib gaaʼ ni fan ngakʼ e tin ni ke magaey ko gidiiʼ rokʼ ni ke aw u Assyria, ni boed Israel u lan fare rran ni yib nga wuruʼ fare nam nu Egypt.