1 Ko e kavenga ʻa Pāpiloné, ʻa ia naʻe mamata ki ai ʻa ʻĪsaia ko e foha ʻo ʻĀmosí.

2 Mou fusi hake ha fuka ʻi he funga ʻo ha moʻunga māʻolunga, hiki hake ʻa e leʻó ʻo kalanga kiate kinautolu, taʻalo kiate kinautolu, koeʻuhi ke nau hū ʻi he ngaahi matapā ʻo e ngaahi houʻeikí.

3 Kuó u fekauʻi ʻa hoku kakai kuo fakamāʻoniʻoniʻí, kuó u ui foki ʻa ʻeku kau mālohí, he ko ʻeku ʻitá ʻoku ʻikai kiate kinautolu ʻoku fiefia ʻi heʻeku pule kiate kinautolú.

4 Ko e longoaʻa ʻo e fuʻu tokolahi ʻi he ngaahi moʻungá ʻoku hangē ko e longoaʻa ʻa ha kakai tokolahí, ko ha longoaʻa fakamoveuveu ʻo e ngaahi puleʻanga ʻo e ngaahi kakai kuo tānaki fakataha, kuo tānaki fakataha, ʻe he ʻEiki ʻo e Ngaahi Kau Taú ʻa e ngaahi kau tau ʻo e taú.

5 ʻOku nau haʻu mei ha fonua mamaʻo, mei he ngataʻanga ʻo e langí, ʻio, ʻa e ʻEikí, mo e ngaahi mahafu ʻo hono houhaú, ke fakaʻauha ʻa e fonuá hono kotoa.

6 Ngala ʻa kimoutolu, he ʻoku ofi ʻa e ʻaho ʻo e ʻEikí; ʻe hoko mai ia ʻo hangē ha fakaʻauha mei he Māfimafí.

7 Ko ia ʻe vaivai ai ʻa e nima kotoa pē, pea ʻe vaivai ʻa e loto ʻo e tangata kotoa pē.

8 Pea te nau manavahē; ʻe puke ʻa kinautolu ʻe he ngaahi langá mo e ngaahi mamahí; te nau feofoʻaki ʻiate kinautolu; ʻe tatau ʻa honau matá mo e ngaahi ulo ʻo e afi.

9 Vakai, ʻoku haʻu ʻa e ʻaho ʻo e ʻEikí, ʻoku anga taʻeʻofa ʻi he tuputāmaki pea mo e houhau lahi, ke fakaʻauha ʻa e fonuá; pea te ne fakaʻauha ʻa e kau fai angahala ʻoku ʻi aí.

10 He ko e ngaahi fetuʻu ʻo e langí mo e ngaahi pupunga fetuʻu ʻi aí ʻe ʻikai te nau tuku mai ʻa honau māmá; ʻe fakapoʻuli ʻa e laʻaá ʻi hono halá, pea ʻe ʻikai fakaulo atu ʻe he māhiná ʻa hono māmá.

11 Pea te u tauteaʻi ʻa māmani koeʻuhi ko e koví, pea mo e kau fai angahalá koeʻuhi ko ʻenau hiá; te u fakangata ʻa e fie ʻeiki ʻo e kau pōlepolé, pea te u tuku ki lalo ʻa e angahiki ʻo e kakai fakamanavaheé.

12 Te u ngaohi ʻa e tangatá ke mahuʻinga hake ʻi he koula lelei; ʻio, ʻe mahuʻinga hake ha tangata ʻi he koula ʻo ʻŌfeli.

13 Ko ia, te u luluʻi ʻa e ngaahi langí, pea ʻe hiki ʻa māmani mei hono potú, ʻi he houhau ʻo e ʻEiki ʻo e Ngaahi Kau Taú, pea ʻi he ʻaho ʻo hono houhau kakahá.

14 Pea ʻe hoko ia ʻo tatau mo e ʻanitelope ʻoku tuli, pea hangē ha sipi ʻa ia ʻoku ʻikai maʻu ʻe ha tangata; pea ko kinautolu ʻe tafoki ʻa e tangata taki taha ki hono kakaí, pea hola taki taha ki hono fonua ʻoʻoná.

15 Ko kinautolu kotoa pē ʻoku pōlepolé ʻe hokaʻi ke ʻasi ʻaki ʻa e heletā; ʻio, pea ko kinautolu kotoa pē ʻoku kau mo e kau fai angahalá ʻe tō ʻi he heletā.

16 Ko ʻenau fānaú, ʻe laiki foki ʻi honau ʻaó; ʻe vete ʻa honau ngaahi falé, pea ʻe tohotohoʻi ʻa honau ngaahi uaifí.

17 Vakai, te u fakaʻitaʻi ʻa e kau Mītiá kiate kinautolu, ʻa ia ʻe ʻikai te nau tokanga ki he silivá mo e koulá, pea ʻe ʻikai foki te nau fiefia ai.

18 ʻE hanga ʻe heʻenau ngaahi kaufaná ʻo laiki foki ʻa e kau talavoú; pea ʻe ʻikai te nau maʻu ha momoʻi ʻofa ki he fua ʻo e mānavá; ʻe ʻikai fakamoʻui ʻe honau matá ʻa e fānaú.

19 Pea ko Pāpilone, ko e nāunauʻia taha ʻi he ngaahi puleʻangá, ko e kolo fakaʻofoʻofa ne hoko ko e pōlepoleʻanga ʻo e kau Kalitiá, ʻe hangē ia ko e hanga ʻe he ʻOtuá ʻo fakaʻauha ʻa e kolo ko Sōtoma mo Komolá.

20 ʻE ʻikai toe nofoʻi ia, pea ʻe ʻikai ke nofoʻia ia mei he toʻu tangata ki he toʻu tangata; pea ʻe ʻikai fokotuʻu ʻe he tangata ʻAlepeá ha fale fehikitaki ʻi ai; pea ʻe ʻikai mālōlō ai ʻa e kau tauhi-sipí mo ʻenau tākanga sipí.

21 Ka ʻe tākoto ʻi ai ʻa e fanga manu kaivao ʻo e feituʻu maomaonganoá; pea ʻe fonu ʻa honau ngaahi falé ʻi he fanga manu ʻoku tangi pea ʻe nofo ai ʻa e fanga lulú, pea ʻe meʻe ai ʻa e fanga sataiá.

22 Pea ʻe tangi ʻa e fanga manu kaivao ʻo e ngaahi ʻotu motú ʻi honau ngaahi fale liʻekiná, pea mo e fanga talākoní ʻi honau ngaahi fale fakatuʻi leleí; pea kuo ofi ke hokosia ʻa hono taimí, pea ʻe ʻikai fakatuotuai ʻa hono ʻahó. Koeʻuhi te u fakaʻauha vave ia; ʻio, koeʻuhi he te u ʻaloʻofa ki hoku kakaí, ka ʻe ʻauha ʻa e kau fai angahalá.