1 Chiney e gag, Nephi, e gubaʼadag ni nggog boech e thin ni morngaʼagen fapi thin ni kug yoloey, niʼir e yoeg Isaiah. Ya musap gaed, Isaiah e weliy boʼor banʼen nib moʼomawʼ ngakʼ boʼor e gidiiʼ rog ni ngar nanged fan; ya dar nanged morngaʼagen yalen fapi prophesy ntay u fithikʼ fapi Jews.

2 Ya gag, Nephi, e dawor gufil ngoraed boʼor banʼen ni morngaʼagen yalen fapi Jews; ya pi muruwel roraed e bogi muruwel nu milmor, nge pi ngongol roraed e bogi ngongol ko fananikan.

3 Ere, gube yol ngakʼ e gidiiʼ rog, ngakʼ gubin e piʼin nra thap ngoraed u tomuren e ngiyalʼ ney e pinnʼey ni gube yoloey, ni nge yog ni ngar nanged fapi gechig rokʼ Got, ni bay yib nga dakean gubin e pi nam, ni boed rogon e thin ni ke yoeg.

4 Ere, mmotoyil gaed, O gimed e gidiiʼ rog, ni gimed e gidiiʼ ku Israel, ma gimed lʼegiyilmed ko thin rog; ya fapi thin rokʼ Isaiah e dar tamilang u wunʼmed, machane rib tamilang u waenʼ gubin e piʼin ni yaed ba sug ko nangaenʼ ko prophecy. Machane nggu piiʼ ngomed ba prophecy, u rogon fare Kan ni Thothup ni bay rog; ere nggu prophesy u rogon nib tamilang ni immoy rog aram ko fare ngiyalʼ inʼen ni gub nga wuruʼ yu Jerusalem ni gamow e chitamag; ya musap gaed, yaʼel rog e rib falaenʼ ni nggu non nib tamilang ngakʼ e gidiiʼ rog, ni nge yog ni ngar nanged.

5 Arragon, nge yaʼel rog e rib falaenʼ ko thin rokʼ Isaiah, ya gag e gub u Jerusalem, ma oewcheg e keguy e pinʼen ni yib ko fapi Jews, ma gumnang ni fapi Jews e yaed manang fan e pinʼen ni yib rokʼ fapi profet, ma dakuriy boech e gidiiʼ ni manang fan e pinʼen nni weliy ngakʼ fapi Jew ni boed yaed, ma kemus ni faʼanra kan fil ngoraed ni boed yalen e pinʼen ni morngaʼagen fapi Jew.

6 Machane musap gaed, gag, Nephi, e dawor gufil ngakʼ pifakag yalen fapi Jew; machane musap gaed, gag, rog, ma kuʼug paer u Jerusalem, ere gumnang morngaʼagen e yunginnʼem iyaen; ma kug weliy ngakʼ pifakag morngaʼagen fapi gechig rokʼ Got, ni ke yibi buch u fithikʼ fapi Jew, kug weliy ngakʼ pifakag nrogon gubin e pinʼen ni weliy Isaiah, ma dag yoloey.

7 Machane musap gaed, nggu tabab ko tirog e prophecy, nrogon ni rayog ni nggu rinʼ nib tamilang; niʼir e gumnang ni dariy beeʼ nra oloboch riy; yug aram rogon machane, lan fapi rran nra muguʼul fapi prophecy rokʼ Isaiah e ranang e gidiiʼ riy fan, ko re ngiyalʼ inʼen nra yibi buch.

8 Ere, rib gaʼfan ngakʼ e gidiiʼ, ma pichaʼ nibe lemnag ni dariy fan, e yaed e rug ra non ngoraed, mug dugliy chirogon fapi thin ngakʼ e gidiiʼ rog; ya gumnang ni rib gaʼfan ngoraed u lan e tin tomur e rran; ya lan e re rran nem e yaedra nangfan e pinnʼem; ere, fan ngoraed mug yoloey e pinnʼem.

9 Ma rogon reb e mfen ni kan gatheay u fithikʼ fapi Jew ni bachan e denen, e aram rogon ni kan gatheayraed u rebo mfen ngo rebo mfen u rogon e pi denen roraed; ma dariy bagyaed ni kan gatheay ni denon fapi profet rokʼ Somoel ngoraed ko sommʼon.

10 Ere, kanoeg ngoraed morngaʼagen fare mogothgoth nra yibi aw nga dakeanraed, ko chingyalʼ inʼen ni ke chuw e chitamag u Jerusalem; yug aram rogon machane, ra ʼelʼel niged gumʼirchaʼraed; ma rogon e prophecy rog e kan gatheayraed, ma kemus ni piʼin nni fekraed ni kalbus nga lan yu Babylon e magaey.

11 Ere chiney e gube yoeg e rennʼey ni bachan fare yaʼel ni bay rog. Ma yug aram rogon ni kan fekraed machane yaedra sul bayay, ngar pired ko fare nam nu Jerusalem; ere, yira sulwegraed bayay ko fare nam ni taferaed.

12 Machane, musap gaed, yaedra tay e mael, ma ku yaed be rungʼag morngaʼagen e mael; ma napʼan nra yibi taw ko fare rran, ma fachaʼ ni Maʼagirag Rokʼ e en Chitamangiy, arragon, ni fachaʼ ni Chitamangiy nu tharmiy ngu fayleng, e ra yib i mʼug ngoraed u lan e dowef, ma musap gaed, yaedra fek yathin, ni bachan e pi denen roraed, nge ʼelʼel u gumʼirchaʼraed, nge gelyuwan roraed.

13 Musap gaed, yaedra kuruth nag; ma tomuren ni kar tayed nga lan ruʼen e yamʼ u lan dalip e rran me fos ko yamʼ, ni bay gelingin nra gol nigey; ma gubin e piʼin nra michaenʼraed nga fithingan e yaedra thap nga langgin gilʼilungun Got. Ere, yaʼel rog e rib falaenʼ ni nge prophesy ni morngaʼagen, ya kug guy e rran rokʼ, ma gumʼirchaʼ rog e be liyoer nga fithingan nib thothup.

14 Ere musap gaed bay yibi buch u tomuren ni ke fos fare Messiah ko yamʼ, ma ke mʼug ko gidiiʼ rokʼ, ni gubin e piʼin nib michaenʼraed nga fithingan, ma musap gaed, yu Jerusalem e bay ni gatheay bayay; ya gafgow ngakʼ e piʼin racham nib togopluw ngakʼ Got nge gidiiʼ ko galasia rokʼ.

15 Ere, fapi Jew e yaedra garar u dakean gubin e pi nam; arragon, ma ku aram rogon ngakʼ yu Babylon ni yira gatheay; ere, fapi Jew e ra garareg raed boech e nam.

16 Ma tomuren ni kan garareg raed, ma ke gechig nagraed fare Somoel ni Got u paʼ boech e nam ni bukun e mfen, arragon, iyib nga butʼ u rebo mfen ngo rebo mfen nge yibi madaʼ ko ngiyalʼ ni kan pingegaenʼraed nge michaenʼraed ngakʼ Kristus, ni fachaʼ ni Fak Got, nge fare bayul, ni fan ngakʼ gubin e gidiiʼ ni dariy napʼan—ma napʼan nra yib e re rran nem ni ke michaenʼraed ngakʼ Kristus, mar liyoer gaed ngakʼ fachaʼ ni Chitamangiy u fithingan, ko gumʼirchaʼ nib machalbog nge paʼayif nib beʼech, ma dab kur sap niged yug rebe Messiah, ma arame, ngiyalʼ innʼem, e bay yib fare rran ni thingari tʼuf ni nge michaenʼraed ko pinnʼey.

17 Ma fare Somoel e ra kʼiyeg paʼ bayay ko yan lʼagruw yay ni nge sulweg e gidiiʼ rokʼ u paʼ fare dodow ni malog nge minaenʼ ni ke aw e gidiiʼ rokʼ ngay. Ere, bayi rinʼ ba muruwel nib maʼangʼang mab ʼangʼang u fithikʼ e gidiiʼ.

18 Ere, ra fek e thin rokʼ iyaen ngoraed, ni ireram e pi thin nra pufthin nagraed ko bin tomur e rran, ya yira piiʼ ngoraed ni fan e ngan micheg u wunʼraed fare Messiah nib riyulʼ, niʼir e rafeked yathin; ma ngkun micheg u wunʼraed ni daki tʼuf roraed ni ngar sap niged rebo Messiah ni nge yib, ya dakuriy reb nra yib, ma kemus nreb e Messiah nib baen niʼir e ra baen nag e gidiiʼ; ya kemus ni taʼareb e Messiah ni weliy e pi profet morngaʼagen, ma re Messiah nem e ire rafek fapi Jews yathin.

19 Ya rogon e thin ko fapi profet, e fare Messiah e ra yib u lan nelʼ miriʼay e duw ko fare ngiyalʼ inʼen ni chuw e chitamag u Jerusalem; ma rogon e thin ko fapi profet, nge thin rokʼ fare angel rokʼ Got, e fithingan e ra yaeni aw ni Yesus Kristus, ni fachaʼ ni Fak Got.

20 Ere chiney, pi walageg, kug non nib tamilang ni nge dab mu oloboch gaed. Ma woed nib fos Somoel ni Got niʼir e fek yu Israel nga wuruʼ fare nam nu Egypt, me piiʼ ngakʼ Moses gelingin ni nge gol nag e pi nam u tomuren ni ke kʼaed raed e porchoyog ni yub, ni faʼan yaedra sap ko fare porchoyog ni ke pug ngalang u pʼoewchraed, ma ki piiʼ ngakʼ gelingin ni nge toey e war me yib e raen riy; arragon, musap gaed gube yoeg ngomed, ni boed fini riyulʼ e pinnʼey, ma boed nib fos fare Somoel ni Got, e aram rogon ni dakuriy reb e fithingan nga bayang u tane tharmiy, ya kemus ni chaʼaney i Yesus Kristus, niʼir e kug weliy morngaʼagen, e ire rathap e gidiiʼ u dakean.

21 Ere, ireray fan ni fare Somoel ni Got e ke michmicheg ngog ni pinnʼey ni gube yoloey e yira chaʼariy min ayuweg, min piiʼ iyib nga butʼ ngakʼ pifakag, u rebo mfen ngo rebo mfen, ni nge yog ni muguʼul fare michmich ngakʼ Yosef, ni pifak e dabra mʼaed u nʼumngin i napʼan nra paer e fayleng.

22 Ere, pinnʼey e ra yaen u rebo mfen ngo rebo mfen u nʼumngin i napʼan nra paer e fayleng; ma bay iyaen u rogon nib mʼagaenʼ ma baʼadag Got; ma pi nam ni rathap ngoraed e yira pufthin nagraed riy u rogon fapi thin ni kan yoloey.

23 Ya kug muruwel gaed nib gel ni nggu yol gaed, ni nggu pingegedaenʼ pifakmaed, nge pi walagmaed, ni nge michaenʼraed ngakʼ Kristus, me felʼ thilraed Got; ya gadaed manang nu dakean e murnguy e gadaed rathap riy, u tomuren ni kad rinʼed gubin nra yog ni ngad rinʼed.

24 Ma, yug aram rogon nib michaenʼmaed ngakʼ Kristus, ma gamaed be fol ko fare motochiyel rokʼ Moses, ma gamaed be sap nga mʼon nib miyuluy ngakʼ Kristus, nge yaeni madaʼ ko ngiyalʼ ni ke muguʼul fare motochiyel.

25 Ya, arayfan nni piiʼ fare motochiyel; ere fare motochiyel e ba yamʼ u wunʼmaed, ma kug fos gaed rokʼ Kristus ni bachan e mich romaed; machane gamaed be chaʼariy fare motochiyel ni bachan e kan chiyliy ngomaed.

26 Ma gamaed be weliy morngaʼagen Kristus, gamaed be falfalaenʼ rokʼ Kristus, gamaed be machib ni morngaʼagen Kristus, gamaed be prophesy ni morngaʼagen Kristus, ma gamaed be yol u rogon e pi prophecy romaed, ni nge yog ni nang pifakmaed e re ginnʼen ni ngar sap niged e manʼaegfan ko pi denen roraed ngay.

27 Ere, gamaed be weliy morngaʼagen fare motochiyel ni nge yog ni nang pifakmaed fare motochiyel nib yamʼ; ma rogon e naʼab roraed ko fare motochiyel nib yamʼ, e rayog ni ngar sap gaed riy nga mʼon ko fare yafos ni bay rokʼ Kristus, mar nanged fan fare motochiyel ni piiʼ. Ma tomuren ni ke muguʼul fare motochiyel u dakean Kristus, ma dakitʼuf ni ngar ʼelʼel niged gumʼirchaʼraed ngakʼ u napʼan ni ngan museg fare motochiyel.

28 Ere chiney e musap gaed, e gidiiʼ rog, gimed bogi gidiiʼ nib gelaenʼ, ere, kug non nib tamilang ngomed, ni dabiyog ni nga dab mu nanged fan. Ma fapi thin ni kug weliy e ra paer nib mich nib togopluw ngomed; ya rib gaman ni nge fil ngakʼ beeʼ e bin nib matʼaw e kanawoʼ; ya bin nib matʼaw e kanawoʼ e nge mich u wunʼuy Kristus ma dab kun fek yathin; ya dakean e fekyath romed ngakʼ e kagmed rafek riy yathin fapi profet nge fare motochiyel.

29 Ere chiney e musap gaed, gube yoeg ngomed ni bin nib matʼaw e kanawoʼ e nge michanʼuy ngakʼ Kristus, ma dab kun fek yathin; ma Kristus e ire Fachaʼ nib Thothup ku Israel; ere thingar mu siroʼ gaed u pʼoewchen, mi gimed liyoer ngakʼ u fithikʼ e pasig ngo laniyaenʼmed, nge gelingmed, nge gimed ni poloʼ; ma faʼan gimed rarinʼ e rennʼey ma dabiyog ni ngan chuwegmed.

30 Ma nʼumngin i napʼan nib tʼuf, e thingar murinʼ e pi muruwel nge pi gamʼing rokʼ Got nge yaeni madaʼ ko ngiyalʼ ni ke muguʼul fare motochiyel ni yoloey Moses.