1 Ma tomuren ni ke fos Kristus ko yamʼ ma ra yibi mʼug ngomed, pifakag, nge pi walageg nib tʼuf rog; ma pi thin ni ra weliy ngomed e ireram e motochiyel ni thingar mu rinʼed.

2 Ya musap gaed, gube yoeg ngomed ni kug guy nib yoʼor e mfen ni bayi mʼay, ma arame bay yib e mael nib gel nge maleʼeg thin nga fithikʼ e gidiiʼ rog.

3 Ma tomuren ni ke yib fare Messiah ma bay e pow ni yira piiʼ ko gidiiʼ rog ni morngaʼagen ni kan gargeleg, nge ku aram rogon ko yamʼ ni tay nge foskoyamʼ; ma fare rran e bagaʼ mab gel e gafgow riy ngakʼ e piʼin nib kireb, ya yaedra yimʼ; ma yaedra yimʼ ni bachan e ra chuweged fapi profet, nge fapi gidiiʼen Got, mar malang niged raed, mar liiʼed raed ngar mʼaed; ere laman rachaʼen fapi gidiiʼen Got e ra yaen u fithikʼ e butʼ ngalang ngakʼ Got nib togopluw ngoraed.

4 Ere, gubin e piʼin nib ʼuf, nge piʼin ni ma rinʼ e ngongol nib kireb, e napʼan nra yib fare rran ma yaedra moʼoruf, ni yoeg fare Somoel ko Yoʼor, ya yaed ra boed chabungen e pan nib malikʼ.

5 Ma piʼin nra liiʼ e pi profet, nge pi gidiiʼen Got, e ra fulʼraed e pi loew nib toʼaer u fayleng, ni yoeg fare Somoel ko Yoʼor; ma pi burey e ra thareyraed, ma ra fekraed e nifeng ni gel nga orel, ma pi naʼun e ra puth nga dakeanraed ngar werwer gaed mar bangbang gaed.

6 Ma ra abngeyraed e dirraʼ, nge uluch, nge durruʼ, nge gubin mite gafgow, ya fare nifiy ko damomuw rokʼ fare Somoel e ra urfiyraed, ma yaedra boed e matbulen e pan nib malikʼ, ma fare rran nibe yib e ra urfiyraed, ni yoeg fare Somoel ko Yoʼor.

7 O rib gel e amith nge gafgow ni amith ko yaʼel rog ni bachan e yamʼ ni kan tay ko gidiiʼ rog! Ya gag, Nephi, e kug guy, ma ke chugur ni nge gatheayeg u pʼoewchen Somoel; machane thingar gu yoer nag ngakʼ e Got rog ni ngug gaʼar: Pi kanawoʼ rom e rib matʼaw.

8 Machane musap gaed, piʼin nib matʼaw nra motoyil ko thin rokʼ fapi profet, ma dabra liiʼed raed, mar changar gaed nga mʼon ngakʼ Kristus nib miyuluy ko fapi pow ni kan piiʼ, ni yug aram rogon gubin e pi gafgow ni yibe tay ngoyiy—ma musap gaed, yaed e piʼin ni yaed e dabra mʼaed.

9 Machane fachaʼ ni Fak e tin nib Matʼaw e ra mʼug ngoraed; ma ra gol nagraed, mar pired rokʼ u fithikʼ e gapas, nge yaeni mʼay dalip e mfen, ma boʼor e piʼin bay ko bin aningeg e mfen ni yaedra yimʼ u fithikʼ e paʼ nib matʼaw.

10 Ma napʼan ni bayi mʼay e pinnʼey ma arame bay yib ba gafgow nib papay ngakʼ e gidiiʼ rog; ya, yug aram rogon e amith ko yaʼel rog, ma kug guy ni bay; ere, gumnang ni bay yibi buch; ma bay ra piiʼed yaed ni chuwaeyʼ ni dariy fan; ya, ya puluwon e ʼufʼuf roraed nge meechiyang roraed e yaedra fek ni gafgow; ya bachan e kar paged yaed nga paʼ fare moʼoniyanʼ ma kar melʼeged e pi muruwel nu milmor ma gathi tinu tamilang, ere thingar ranoed nga infierno.

11 Ya fare Kan ni Thothup rokʼ Somoel e dabiyog ni nge gubin e ngiyalʼ ma ngi i paer ko gidiiʼ. Ma napʼan ni fare Kan ni Thothup e ratal ni dabki paer ko gidiiʼ ma aram me yib fare gafgow nib papay, ma biney e be kirbaenʼ e yaʼel rog ngay.

12 Ere boed ni kug weliy morngaʼagen fare mʼagaenʼ ko fapi Jew, ni Yesus e ir fare Kristus, ma arame rib tʼuf ni fapi Gentiles e ngki mʼagaenʼraed ngay ni Yesus e ir fare Kristus, ni fare Got ni Gubinfen;

13 Ma, ma mʼug ngakʼ gubin e piʼin nib michaenʼraed ngakʼ, u dakean gelingin fare Kan ni Thothup; arragon, ngakʼ gubin e pi nam, nge mfen, nge thin, nge gidiiʼ, ni ma muruwliy e maʼangʼang, nge pow, nge ʼangʼang u fithikʼ e gidiiʼ u rogon e mich roraed.

14 Machane musap gaed, gube prophesy nag ngomed morngaʼagen fatin tomur e rran; morngaʼagen fapi rran ni aram napʼan ni fare Somoel ni Got e ra fek e pinnʼey iyib ngakʼ e gidiiʼ.

15 Ma tomuren ni pifakag nge pifak pi walageg e kar mul gaed ko mich, ma ke liiʼraed fapi Gentiles; arragon, tomuren ni fare Somoel ni Got e ke yinʼraed nga langab, make ufung e butʼ ngalang u baʼan wuruʼ e yoror, make nʼuf e yoror nib wup ni feraed; ma tomuren ni kar aw gaed nga butʼ nga fithikʼ e fiyath, nge madaʼ ko ngiyalʼ ni dakur moyed, machane fapi thin rokʼ e piʼin nib matʼaw e yira yoloey, ma pi meybil rokʼ e piʼin nib yulʼyulʼ e yira rungʼag, ma gubin e piʼin ni kar mul gaed ko mich e dab ni pagtilraed.

16 Ma piʼin ni yira gatheayraed e ra non ngoraed u fithikʼ e butʼ, ma thin roraed e ra yib u fithikʼ e fiyath, ma lamraed e boed laman beeʼ ni ku taʼab yaʼel e bay rokʼ; ya fare Somoel ni Got e ra piiʼ ngakʼ gelingin, ni nge yog ni kathkath nag morngaʼagraed, ni boed ni gowa be yib u fithikʼ e butʼ; ma thin roraed e ra kathkath u fithikʼ e fiyath nga wuruʼ.

17 Ya aray rogon ni yoeg fare Somoel ni Got: Yaedra yoloey e pinʼen ni ra un rinʼ u fithikʼraed, ma yira yoloey min chaʼariy u lan bake babyor, ma piʼin ni kar mul gaed ko mich e dabiyog ngoraed e pinnʼem, ya yaed ma gay ni ngar gatheayed e tirokʼ Got.

18 Ere, boed ni piʼin ni kan gatheayraed e kan gatheayraed nib papay; ma fare ulung rokʼ e piʼin kireb e ra boed fitiruʼ e grain nra chuw—arragon, ni aray rogon ni yoeg fare Somoel ni Got: Ma ra buch nib tomgin, ni rib gur—

19 Ma bay yibi buch, ni piʼin nra mul ko mich e yira liiʼraed nga paʼ fapi Gentiles.

20 Ma fapi Gentiles e kar langlang gaed ngalang nga fithikʼ e ʼufʼuf u oewchraed, ma kar mul gaed, ni bachan e rib noemow e maenwoʼ roraed, ni kar toeyed e galasia nib yoʼor; machane, kar tayed nga butʼ fare gelingin nge pi maʼangʼang rokʼ Got, mar machib niged ngoraed e tiroraed e gonop nge tiroraed e llowaenʼ, ni nge yog ni felʼ rograed mar kired oewchen e piʼin gafgow.

21 Ma boʼor e pi galasia ni kan toey nibe kʼaring e moʼowaenʼ, nge togopluw, nge fananikan.

22 Ma kubay bogi ulung nib miith, ni boed ni kakrom, nrogon fapi ulung rokʼ moʼoniyanʼ, ya ire chaʼ nib gaaʼ ko gubin e pinnʼey; arragon, fachaʼ nib gaaʼ ko mathang pogofan, nge pi muruwel nu milmor; arragon, ma be powiʼiyraed iyaen u baelʼigaf nib munguy ni kan bichiy nga balelʼugun raed, ni nge yaeni madaʼ ko ngiyalʼ ni ke mʼag raed ko fare yilʼ i gaf rokʼ nib el ni manemus.

23 Ya musap gaed, pi walageg nib tʼuf rog, gube yoeg ngomed ni fare Somoel ni Got e dar ma muruwel u fithikʼ e lumor.

24 Dariy banʼen nibe rinʼ ni gathi fan ko fayleng; ya rib tʼuf e fayleng rokʼ, ni piiʼ e pogofan rokʼ ni gomanga yog ni miliy gubin e gidiiʼ ngakʼ. Ere, dariy bee nibe chiyliy ngakʼ ni nge dabi thapeg woʼen e thap rokʼ.

25 Musap gaed, ke yoeg ku beeʼ, nibe gaʼar: Muchuw rog? Musap gaed, gube yoeg ngomed ni, Dawor; ya ke gaʼar: Mired ngog ni gimed gubin e gidiiʼ nu fayleng, mu chuwiʼiyed e milik nge honey, ni dab mu piiʼed e salpiy ma dariy puluwon.

26 Musap gaed, kaʼagu chiyliy ngakʼ bogniiʼ ni ngar chuw gaed u lan tagilʼ e moʼolung, ara pi naʼun ni tagilʼ e liyoer? Musap gaed, gube yoeg ngomed ni, Dawor.

27 Gul ke chiyliy ngakʼ bogniiʼ ni dabi thapegraed? Musap gaed gube yoeg ngomed ni, Dawor; ya ke piiʼ ni dariy puluwon ni fan ngakʼ gubin e gidiiʼ; ma ke chiyliy ngakʼ e gidiiʼ rokʼ ni ngar pingegedaenʼ gubin e gidiiʼ ngar kalgaed ngaenʼraed.

28 Musap gaed, gul ke chiyliy Somoel ngakʼ bogniiʼ ni nga dabra feked falngin? Musap gaed, gube yoeg ngomed ni, Dawor; ya gubin e gidiiʼ mab puf rogon ni nge yog ngoraed ni taʼareb rogon, ma dariy beeʼ ni yira siyeg rokʼ.

29 Ke chiyliy ni nge siy e pi gamʼing nib falʼngakʼ; ya, musap gaed, pi gamʼing nib falʼngakʼ e boed e gidiiʼ ni be machib ni kar ʼuf niged yaed ngalang ni ngar manged tamilang ko fayleng, ni nge felʼ rograed me yoeg e fayleng e soerokʼ ngoraed riy; machane darur gayed rogon ni nge felʼ rogon e paer rokʼ yu Zion.

30 Musap gaed, fare Somoel e ke mathngeluwol nag e biney; ere, fare Somoel ni Got e ke piiʼ ba motochiyel ni gubin e gidiiʼ ma thingari yog e tʼufeg ngoraed, nib tʼufeg ni adag. Ma faʼanra dariy e tʼufeg roraed ma dariy rograed. Ere, faʼanra bay e tʼufeg roraed ma dabra paged e chaʼ ni be muruwel u Zion ni nge yimʼ.

31 Ya chaʼ ni ma muruwel u Zion e ra muruwel ni fan ko Zion; ya faʼanra yaed be muruwel ni fan ko salpiy ma yaedra yimʼ.

32 Ma ku bayay, fare Somoel ni Got e ke chiyliy ni gidiiʼ e dabra thanged e fan; ma dabra baen gaed; ma dabra moroʼroʼ gaed; ma dabi un fithingan fare Somoel ni Got roraed u lʼugunraed ni dariy fan; ma dabra chogow gaed; ma dabra fananikan gaed; ma dabra togopluw gaed ngoraed; ma dab ur gathar gaed; ma dab rrinʼed reb e pinnʼey; ya enra rinʼ e ra yimʼ.

33 Ya dariy reb e pi ngongol ney nib kireb ni yib rokʼ Somoel; ya ire ma rinʼ e tin nib mangil u fithikʼ e gidiiʼ; ma dariy banʼen ni nge rinʼ ma kemus ni tin nib tamilang u laniyaenʼ e gidiiʼ; ma be piningraed ni yaed gubin ni ngar baed ngakʼ ngar feked boech e murnguy rokʼ; ma dar fek yathin e piʼin nibe yib ngakʼ, ni talimor nge wechwech, ni kalbus nge de kalbus, ni pumoʼon nge ppin; ma kubay u waenʼ fa piʼin dariy loren Got u wunʼraed; ma gubin ma taʼareb rogon rokʼ Got, ni Jew nge Gentile.