1 A’ut k’ehomaq reetal, sa’eb’ li roso’jik kutan, malaj sa’ xkutankileb’ laj Gentil—relik chi yaal, k’ehomaq reetal naq chixjunileb’ lix tenamiteb’ laj Gentil ut jo’kaneb’ ajwi’ laj Judio, eb’ li te’k’ulunq sa’ xb’een li ch’och’ a’in jo’ ajwi’ li te’wanq sa’ jalaneb’ chik li ch’och’, relik chi yaal, sa’ xb’eeneb’ chixjunil li ch’och’ re li ruchich’och’, k’ehomaq reetal, te’kalaaq rik’in maa’usilal ut li k’iila paay chi tz’eqb’eetalil—

2 Ut naq taachalq li kutan a’an te’ula’aniiq xb’aan li Qaawa’ reheb’ li Teepal, rik’in raq’ kaaq ut rik’in hiik, rik’in nimla choqink, ut rik’in kawil hab’, ut rik’in kaq-sut-iq’, ut rik’in xxamlel li xam aj sachonel.

3 Ut chixjunileb’ li tenamit li neke’pleetink re Sion, ut li neke’rahob’tesink re, te’wanq chanchan jun li matk’ li namatk’iman chi q’eq; relik chi yaal, taawanq reheb’, jo’ chanru re jun li winq taatz’okaaq, li namatk’ek, ut k’ehomaq reetal naq yoo chi wa’ak, a’ut na’aj ru, ut toj wan xtz’okajik li raam; malaj jo’ re junaq winq taachaqiq re li namatk’ek, ut k’ehomaq reetal naq na’uk’ak, a’ut na’aj ru ut k’ehomaq reetal naq tawajenaq, ut toj wan k’a’ru naxsik’ li raam; relik chi yaal, jo’ka’in ajwi’ naq te’wanq lix k’ihaleb’ chixjunil il tenamit li te’pleetinq re li Tzuul Sion.

4 Xb’aan naq k’ehomaq reetal, chejunilex laa’ex li nekexb’aanunk re li maa’usilal, xaqab’omaq eerib’ ut chisachq eech’ool, xb’aan naq teejap eere, ut kawaq xyaab’ eekux; relik chi yaal, texkalaaq a’ut moko rik’in ta viin, textaktakinq, a’ut moko rik’in ta uk’a nakaltesin.

5 Xb’aan naq k’ehomaq reetal, li Qaawa’ xhoy sa’ eeb’een li musiq’ej re chamal wark. Xb’aan naq k’ehomaq reetal, laa’ex xemutz’ lee ru, ut xetz’eqtaanaheb’ li profeet, ut eb’ laj taqlanel eere, ut eb’ laj ilol na’leb’ kixtz’apeb’ ru sa’ xk’ab’a’ lee maa’usilal.

6 Ut taak’ulmanq naq li Qaawa’ Dios tixk’e chi k’utmank cheru li raatin jun li hu, ut a’anaq li raatineb’ li ak xe’war.

7 Ut k’ehomaq reetal naq k’eeb’ilaq xtz’apb’al li hu; ut sa’ li hu taawanq jun lix k’utb’esihom li Dios, chalen chaq sa’ xtiklajik li ruchich’och’ toj sa’ roso’jik.

8 Jo’kan ut, sa’ xk’ab’a’ li k’a’aq re ru tz’apb’il chaq, li k’a’ru tz’aptz’o ink’a’ taaq’axtesimanq sa’ xkutankil lix maa’usilal ut xtz’eq’b’eetalil li tenamit. Jo’kan naq li hu moko taak’eemanq ta reheb’.

9 A’ut li hu taaq’axtesimanq re jun winq, ut a’an tixq’axtesi li raatin li hu, a’an li raatineb’ li ani ak xe’war sa’ li poqs, ut tixq’axtesi re jalan chik;

10 A’ut li aatin li tz’aptz’o chaq ink’a’ tixq’axtesi, chi moko tixq’axtesi li hu. Xb’aan naq li hu k’eeb’ilaq xtz’apb’al xb’aan lix wankilal li Dios, ut li k’utb’esinb’il na’leb’ li tz’aptz’o chaq taak’uulamanq sa’ li hu toj reetal naq tixtaw li kutan k’oxlanb’il xb’aan li Qaawa’ naq taak’utmanq li aatin; xb’aan naq k’ehomaq reetal, a’an naxk’utb’esi chixjunil li k’a’aq re ru chalen chaq sa’ xk’ojlajik li ruchich’och’ toj sa’ roso’jik.

11 Ut taawulaq xq’ehil naq eb’ li aatin sa’ hu li ke’wan chi tz’aptz’o te’yeemanq sa’ xb’eeneb’ chaq li kab’l; ut te’yeemanq rik’in lix wankilal li Kristo; ut chixjunil li k’a’aq re ru taak’utb’esimanq chiruheb’ li ralal xk’ajoleb’ li winq, li wanjenaq jun sutaq sa’ xyanqeb’ li ralal xk’ajoleb’ li winq, ut li toj taawanq jun sutaq, chalen toj sa’ roso’jik li ruchich’och’.

12 Jo’kan ut, sa’ li kutan a’an naq li hu taaq’axtesimanq chiru li winq li kin’aatinak wi’, muqmuuq li hu chiru li rilob’aal li ruchich’och’, re naq maajun aj ilob’aal taa’iloq re, ka’ajwi’ oxib’ chi aj yehol nawom te’iloq re, rik’in lix wankilal li Dios, rochb’een li taaq’axtesiiq wi’ li hu; ut eb’ a’an te’xch’olob’ naq yaal li hu ut li k’a’aq re ru wan chi sa’.

13 Ut maajun chik wan li taa’iloq re, ka’ajwi’ tana’ junjunq jo’ chanru naraj li Dios, re te’xch’olob’ xyaalalil li raatin chiruheb’ li ralal xk’ajoleb’ li winq; xb’aan naq li Qaawa’ Dios kixye naq li raatineb’ li tiikeb’ chaq chi paab’ank taa’aatinaq jo’ raj sa’ xyanqeb’ chaq li kamenaq.

14 Jo’kan ut, li Qaawa’ Dios taa’ok chixk’eeb’al chi k’utmank li aatin sa’ li hu; ut rik’in xtz’uumaleb’ re jo’ k’ihaleb’ laj yehol nawom li naxk’oxla naq us, a’an tixxaqab’ xwankil li raatin; ut rahilal chichalq sa’ xb’een li ani taatz’eqtaananq re li raatin li Dios!

15 A’ut k’ehomaq reetal, taak’ulmanq naq li Qaawa’ Dios tixye re li ani chi aj-u tixq’axtesi li hu: Chap li aatin a’in li moko tz’aptz’o ta ut q’axtesi re jalan chik, re tixk’ut chiru li ani tzolb’il, ut tixye: Il a’in li tz’iib’anb’il, nintz’aama. Ut li tzolb’il tixye: K’am chaq li hu, ut laa’in tinwil xsa’.

16 Ut anajwan, re te’nimaaq xloq’al xb’aan li ruchich’och’ ut re xk’ulb’al xtumin naq te’xye a’in, moko re ta lix loq’al li Dios.

17 Ut li winq tixye: Ink’a’ naru nink’am chaq li hu, xb’aan naq k’eeb’il xtz’apb’al.

18 Toja’ naq li tzolb’il tixye: Ink’a’ ninru chirilb’al xsa’.

19 Jo’kan ut, taak’ulmanq naq li Qaawa’ Dios tixq’axtesi wi’chik li hu ut li aatin wan chi sa’ re li ani moko tzolb’il ta; ut li winq li moko tzolb’il ta tixye: Moko tzolb’ilin ta.

20 Toja’ naq li Qaawa’ Dios tixye re: Li ani tzolb’ileb’ ink’a’ te’iloq xsa’, xb’aan naq xe’xtz’eqtaana, ut laa’in ninru chixb’aanunkil tz’aqal lin k’anjel; jo’kan naq laa’at taawil li aatin li tink’e aawe.

21 Maach’e’ li k’a’aq re ru tz’apb’il, xb’aan naq laa’in tink’e chi k’ute’k a’an sa’ li kutan k’oxlanb’il inb’aan; xb’aan naq tink’ut chiruheb’ li ralal xk’ajoleb’ li winq naq ninru chixb’aanunkil tz’aqal ink’anjel.

22 Jo’kan ut, naq aawilom li aatin li xatintaqla wi’, ut xataweb’ laj yehol nawom li xinyeechi’i aawe, chirix a’an taak’e wi’chik xtz’apb’al li hu, ut taamuq choq’ we, re naq laa’in tinkol rix li aatin li moko aawilom ta, toj reetal naq tink’oxla rik’in xchaab’ilal inna’leb’ naq us xk’utb’esinkil chixjunil li k’a’aq re ru chiruheb’ li ralal xk’ajoleb’ li winq.

23 Xb’aan naq k’e reetal, laa’in li Dios, ut laa’in jun Dios re sachb’a-ch’oolej, ut laa’in tink’ut chiru li ruchich’och’ naq juntaq’eetin ewer, anajwan, ut chi junelik, ut moko nink’anjelak ta sa’ xyanqeb’ li ralal xk’ajoleb’ li winq, ka’ajwi’ jo’ chanru lix paab’aaleb’.

24 Ut jo’kan wi’chik, taak’ulmanq naq li Qaawa’ tixye re li ani taaril xsa’ li aatin li taaq’axtesiiq re:

25 Rik’in naq li tenamit a’in neke’nach’ok chaq wik’in rik’ineb’ li re, ut rik’in xtz’uumaleb’ re neke’xnima wu, a’b’anan xe’xnajtob’resi lix ch’ooleb’ wik’in, ut rik’in xna’leb’eb’ li winq naq tzolb’ileb’ chixxuwankil wu—

26 Jo’kan ut, laa’in tin’ok chixb’aanunkil jun li sachb’a-ch’oolejil k’anjel sa’ xyanq li tenamit a’in, relik chi yaal, jun li sachb’a-ch’oolejil k’anjel ut jun li eetalil, xb’aan naq taa’oso’q lix na’leb’eb’ li ninq xna’leb’ ut li ani tzolb’il sa’ xyanqeb’, ut taamuqe’q lix tawomeb’ ru li seeb’eb’ chi na’leb’ank sa’ xyanqeb’.

27 Ut rahilal sa’ xb’eeneb’ li neke’sik’ok chi cham xmuqb’al lix na’leb’eb’ chiru li Qaawa’! Ut lix k’anjel wankeb’ sa’ q’ojyin; ut neke’xye: Ani na’ilok qe, ut ani nanawok qu? Ut neke’xye ajwi’: Relik chi yaal naq yal taak’oxlamanq chanchan lix meelb’ laj pak’onel naq taab’alq’usi li k’a’aq re ru. A’ut k’ehomaq reetal, laa’in tink’ut chiruheb’, chan li Qaawa’ reheb’ li Teepal, naq ninnaw chixjunil lix k’anjeleb’. Xb’aan naq ma tixye tab’i’ li yiib’anb’il re li ani xyiib’ank re, a’an moko xinixyiib’ ta? Malaj li k’a’ru pak’b’il re li ani xpak’ok re, moko wan ta xna’leb’?

28 A’ut k’ehomaq reetal, chan li Qaawa’ reheb’ li Teepal: laa’in tink’ut chiruheb’ li ralal xk’ajoleb’ li winq naq yal junpaataq chik ut taasutq’isiiq Libano choq’ ch’och’ na’uuchin, ut li ch’och’ na’uuchin taak’ehe’q xloq’al jo’ jun li k’iche’.

29 Ut sa’ li kutan a’an eb’ li tz’ap xik te’rab’i li aatin sa’ li hu; ut lix naq’eb’ ru li mutz’ te’iloq chaq sa’ aak’ab’ ut sa’ chaq li q’ojyin.

30 Ut te’taamq ajwi’ li tuulan, ut lix sahileb’ xch’ool rik’in li Qaawa’ taawanq, ut li neb’a’ sa’ xyanqeb’ li winq te’saho’q sa’ xch’ool rik’in lix Santil Dios laj Israel.

31 Xb’aan naq jo’ chanru naq ch’olch’o naq yo’yo li Qaawa’, te’ril chi yaal naq li ani xuwajel na’oso’ xwankil, ut oso’jenaq laj hob’onel, ut chixjunileb’ li neke’sik’ok re li maa’usilal isinb’ileb’ chaq;

32 Ut eb’ li neke’jitok re junaq winq sa’ xk’ab’a’ jun li aatin, ut neke’xk’e jun ra’al choq’ re li ani nach’iilan sa’ li okeb’aal, ut neke’xtz’eqtaana li tiik xna’leb’ chanchan li k’a’ru yal jo’maajo’.

33 Jo’kan ut, jo’ka’in naxye li Qaawa’, li kitojok rix laj Abraham, chirix lix junkab’al laj Jakob: Laj Jakob ink’a’ chik taaxutaanaq, chi moko chik taasaqpetz’inq li rilob’aal.

34 Naq narileb’ b’an li ralal xk’ajol, lix yiib’ahom li wuq’, sa’ lix yanq, eb’ a’an te’xsantob’resi lin k’ab’a’, ut te’xsantob’resi lix Santil Dios laj Jakob, ut te’xxuwa ru lix Dios laj Israel.

35 Jo’kan ajwi’ eb’ li xe’sach sa’ li musiq’ej te’xk’ul xna’leb’, ut eb’ li xe’wech’in chaq te’xtzol li tzol’leb’.