1 Machane, musap gaed, u lan e tin tomur e rran, ara lan fapi rran ko fapi Gentiles—arragon, musap gaed gubin fapi nam ko fapi Gentiles nge fapi Jews, ni ruw rabaʼ ni piʼroraed ni ra yib nga dakean e re nam ney nge piʼin nra yaen nga dakean yug boech e nam, arragon, nga dakean gubin e pi nam u fayleng, musap gaed, yaedra chingawʼ ko denen nge gubin mite ngongol nib kireb—

2 Ma napʼan nra yib e re rran nem ma ra yib fare Somoel ko Yoʼor ngoraed, u fithikʼ e dirraʼ nge durruʼ, nge lingan nib gaaʼ, nge yokoʼ, nge nifeng ni gelʼ, nge fare nifiy nibe fulʼ e gabin.

3 Ma arame gubin e pi nam nra cham ngakʼ yu Zion, nge piʼin nra amith nagraed, e yaedra boed ba likʼay ko changar nnepʼ; arragon, ra yibi aw ngoraed, ni boed beeʼ nib moʼon nibe likʼay, nibe abich machane napʼan nra od make yimʼ e yaʼel rokʼ ko bilig; ara boed be nib moʼon ni ke balel nibe likʼay, nibe unum e raen machane napʼan nra od ma be yaen ni nge aw nga butʼ, ni ke yimʼ e yaʼel rokʼ ni balel; arragon, ma aram rogon ngakʼ e pi ulung ko gubin e pi nam ni yaedra cham ngakʼ fare Burey nu Zion.

4 Ya musap gaed, gimed gubin e piʼin ni gimed ma rinʼ e kireb, mu tal gaed ngam lem gaed, ya gimed ra gelʼgelʼ, ma gimed ra yoer; arragon, gimed ra chingawʼ ni gathi bachan e waeyin, ma gimed ra thigthig ni gathi bachan e rrom.

5 Ya musap gaed, fare Somoel e ke puʼoeg nga dakeanmed fare mol aran. Ya musap gaed, kam mileged oewchmed, ma kam feked yathin fapi profet; ma pi tiyugangʼ romed, nge pi tathogthog e ke upnguy ni bachan e denen romed.

6 Ma bay yibi buch ni fare Somoel ni Got e ra fek iyib ngomed e thin u bake babyor, ni thin rokʼ e piʼin ni kar mʼaed.

7 Ma musap gaed fare ke babyor e yira chaʼariy; ma lan e reke babyor nem e bay ba yiʼiy ni yib rokʼ Got riy, aram ko tabolngin e fayleng iyib nge madaʼ nga tungun.

8 Ere, bachan e pinʼen ni kan chaʼariy, ma arame pinʼen ni kan chaʼariy e dab ni piiʼ u lan fare rran ko ngongol ni kireb nge fananikan ko gidiiʼ. Ere fare ke babyor e yira tel roraed.

9 Machane fare ke babyor e yira piiʼ ngakʼ beeʼ nib moʼon, me fek e thin u lan fare ke babyor, niʼir e thin rokʼ fa piʼin ni yaed be mol u fithikʼ e fiyath, ma ki fek e pi thin ney nge piiʼ ngakʼ beeʼ;

10 Machane fapi thin ni kan chaʼariy e dabi piiʼ, ara piiʼ fare ke babyor. Ya fare ke babyor e yira chaʼariy u gelingin Got, ma fare yiʼiy u lan fare ke babyor e yira chaʼariy nge yaeni madaʼ ko ngiyalʼ nib mʼagaenʼ fare Somoel ngay, ni nge yog ni yibi mʼug; ya musap gaed, yaedra yiʼiy nag gubin banʼen aram ko tabolngin e fayleng iyib nge madaʼ nga tungun.

11 Ma fare rran e bay yib ni fapi thin ko fare ke babyor ni kan chaʼariy e bay ni biʼeg u dakean e naʼun; ma bay ni biʼeg u dakean fare gelingin rokʼ Kristus; ma gubin banʼen ma bay ni yiʼiy nag ngakʼ e gidiiʼ ni pinʼen ni kaʼaram iyib ni immoy u fithikʼ e gidiiʼ, nge pinʼen ni bay yib nge yaeni madaʼ nga tungun e fayleng.

12 Ere, napʼan e re rran nem ni yira piiʼ fare ke babyor ngakʼ fare moʼon niʼir e kug weliy morngaʼagen, ma bay ni mithaeg fare ke babyor rokʼ e fayleng, ni dariy oewchen beeʼ ni nge guy ma kemus ni fadalip i mich riy e yaedra guy, u dakean fare gelingin rokʼ Got, nge faʼanem niʼir e yira piiʼ ngakʼ; ma yaedra micheg nib riyulʼ fare ke babyor nge pinʼen ni bay u langgin.

13 Ma dakuriy beeʼ nra guy, ma kemus ni buchʼuw nrogon nib mʼagaenʼ Got ngay, ni ngar micheged e thin rokʼ ngakʼ e gidiiʼ; ya fare Somoel ni Got e yoeg ni thin rokʼ e piʼin nib yulʼyulʼ e ra non ni gowa yib ko pi yamʼ.

14 Ere, fare Somoel ni Got e bayi guy rogon nge yibi mʼug fapi thin ko fare ke babyor; mu lʼugun e yoʼor ni mich riy, nrogon ni baʼadag, e ra micheg e thin rokʼ; ma rigafgow ngakʼ e enra fek yathin fare thin rokʼ Got!

15 Machane musap gaed, bay yibi buch ni fare Somoel ni Got e ra gaʼar ngakʼ, fachaʼ nra piiʼ fare ke babyor ngakʼ: Mu fek e pi thin ney ni dawor ni chaʼariy ngam piiʼ ngakʼ beeʼ, ni nge dag ngakʼ beeʼ nib llowaenʼ, me gaʼar: Mu biʼeg e pinnʼey, wenig ngom. Ma fachaʼ nib llowaenʼ e ra gaʼar: Mu fek ngaray fare ke babyor, me fin gubiʼeg.

16 Ere chiney, e bachan e rir nu fayleng, nge felʼ rogon, e yaedra yoeg e biney riy, ma gathi bachan e rir rokʼ Got.

17 Ma fare moʼon e ra gaʼar: Dabiyog ni nggu fek fare ke babyor iyib, ya kan chaʼariy.

18 Ma aram me gaʼar fachaʼ nib llowaenʼ: Ere dabiyog ni nggu biʼeg.

19 Ere bay yibi buch, ni fare Somoel ni Got e ra piiʼ bayay fare ke babyor nge fapi thin riy ngakʼ fachaʼ dellowaenʼ; ma fare moʼon nide llowaenʼ e ra gaʼar: Gag e dariy banʼen ni gumnang.

20 Ma arame bayi gaʼar fare Somoel ni Got ngakʼ: Piʼin nib llowaenʼ e dabiyog ni nge biʼeg e pinnʼem, ya kar feked yathin, me gag e rayog ni nggu rinʼ e muruwel rog; ere gur e gara biʼeg e pi thin ni gura piiʼ ngom.

21 Dab mmath ko pinʼen ni kan chaʼariy, ya gura fek iyib ngoyiy ko ngiyalʼ nib mʼaganʼug ngay; ya gura dag ngakʼ e gidiiʼ ni gag e rayog ni nggu rinʼ e muruwel rog.

22 Ere, napʼan ni gara biʼeg fapi thin ni kug chiyliy ngom, ma ke yog ngom e pi mich riy niʼir e kug michmicheg ngom, ma arame ngam chaʼariy fare ke babyor bayay, mag mithaeg ngog, ni nge yog nug chaʼariy fapi thin ni dawor mu biʼeg, nge yaeni madaʼ ko ngiyalʼ ni kug guy nib mʼag u lan e gonop rog ni nggu yiʼiy nag gubin banʼen ngakʼ e gidiiʼ.

23 Ya musap gaed, I gag Got; ma gag ba Got ko maʼangʼang; ma gura dag ko fayleng ni taʼareb rogog fowap, nge daʼir, nge manemus; ma dagur muruwel u fithikʼ e gidiiʼ ma kemus nu rogon e mich roraed.

24 Ma ku bayay, bay yibi buch ni fare Somoel e ra gaʼar ngakʼ fachaʼ niʼir e ra biʼeg fapi thin ni yira piiʼ ngakʼ:

25 Ya nʼumngin u napʼan ni pi gidiiʼ ney e yaed be chugur niged yaed ngog u langraed, ma yaed be liyoer ngog u dapʼelʼugunraed, machane kar palog niged gumʼirchaʼaraed rog, ma madguwog ngoraed e kar filed u rogon e motochiyel ko gidiiʼ—

26 Ere, gura rinʼ ba maʼangʼang u fithikʼ e pi gidiiʼ ney, arragon, ba muruwel nib maʼangʼang mabʼangʼang, ya pi gonop ko piʼin nib gonop roraed nge piʼin nib llowaenʼ e ra mʼay, ma pi nangaenʼ rokʼ e piʼin nib gonop roraed e ra mʼay nga bayang.

27 Ere gafgow ngakʼ e piʼin ni ma gay rogon ni ngar mitheged e fonow roraed rokʼ Somoel! Ma pi muruwel roraed e bay u fithikʼ e lumor; ma yaedma gaʼar: Miniiʼ e be guy daed, nge miniiʼ e manang daed? Ma ku yaedma gaʼar: Rriyulʼ, ni pinʼen ni kam gatheay e yira lemnag ni boed e butʼ rokʼ e chaʼ ni ma maʼthʼib. Machane musap gaed, gura dag ngoraed, ni yoeg fare Somoel ko Yoʼor, ni gumnang gubin e pi muruwel roraed. Ya gul fare muruwel e ra yog ni nge gaʼar ngakʼ e chaʼ ni falʼeg, gathi gur e mu falʼegeg? Ara gul banʼen nni falʼeg, e ra yog ni nge yoeg ni chaʼ ni falʼeg, e dariy banʼen ni manangfan?

28 Machane musap gaed, i gaʼar fare Somoel ko Yoʼor: Gura dag ngakʼ e gidiiʼ ni kari ngoch napʼan ni yu Lebanon e bayi mang bangi rad nib galwog; ma farengi rad nib galwog e yira lemnag ni bangi garger.

29 Ma lan e re rran nem e ra rungʼag e piʼin baling fapi thin ko fare ke babyor, ma oewchen e piʼin nib maʼew e ra guy banʼen u fithikʼ e minaenʼ nge lumor.

30 Ma piʼin nib gumʼaenʼ e yaedra monʼog, ma falfalaenʼ roraed e bay rokʼ Somoel, ma piʼin nib gafgow u fithikʼ e gidiiʼ e yaedra falfalaenʼ rokʼ Fachaʼ nib Thothup ku Israel.

31 Ya boed fini riyulʼ nib fos Somoel e aram rogon ni yaedra guy ni fachaʼ nib kireb e ra mʼay fan, nge chaʼ nib tamuning e ra muʼuruf, ma gubin e piʼin ma sap nag rogon me rinʼ e kireb e yira chuwegraed.

32 Nge piʼin ma dugliy e kireb nga dakean beeʼ ni bachan bbugi thin ni ke yoeg, nge piʼin ni yaed ma tay e wup ni fan ngakʼ e chaʼ ni ma fonow nigey u langan e garog, nge piʼin ni ma chefeg nga orel e piʼin nib matʼaw ni bachan e fananikan ni dariy fan.

33 Ere, baʼaray rogon ni yoeg fare Somoel, niʼir e bayuliy Abraham, morngaʼagen e gidiiʼ ku Jacob; Jacob e dabi tamraʼ e chiney, ara mʼingkawon e chiney.

34 Ya napʼan nra guy pifak, ni fare waʼamngin e muruwel u paʼag, ni kar longbiyed, mar thothup niged fithingag, mar thothup niged Fachaʼ nib Thothup rokʼ Jacob, me yib ngoraed madguwan fare Got ku Israel.

35 Nge ku piʼin ni ke minaenʼ e yaʼel roraed e ra tamilang laniyaenʼraed, ma piʼin ni ma nonnon e yaedra nang e machib.