1 Ere chiney, e musap gaed, pi walageg, kug non ngomed, u rogon ni ke wawliyeg fare Kan ni Thothup; ere, gumnang ni riyulʼ nra yibi buch.

2 Ma pinʼen ni yira yoloey ko fare ke babyor e rib gaʼfan ngakʼ e gidiiʼ, ma rib gaaʼ ni yigoʼ pifakmaed, niʼ piʼin ni ke magaey ko gidiiʼ ku Israel.

3 Ya bay yibi buch u lan e re rran nem ni pi galasia ni kan toey, ni gathi fan ngakʼ Somoel, e bayi gaʼar reb ngakʼ reb: Musap, Gag, e fen Somoel gag; ma boech e yaedra gaar: I gag, e fen Somoel gag; ma aram rogon nra yoeg gubin e gidiiʼ ni kar toeyed e galasia, ma gathi fan ngakʼ Somoel—

4 Ma bay ra togopluw gaed ngoraed; nge pi priest roraed e bay ra togopluw gaed ngoraed, ma bay ra machib niged e llowaenʼ roraed, mar feked yathin fare Kan ni Thothup, niʼir e ma piiʼ ngodaed e tin ni nga noeg.

5 Mar feked yathin fare gelingin rokʼ Got, ni Fachaʼ nib Thothup ku Israel; ma bay ra gaʼar gaed ngakʼ e gidiiʼ: Mmotoyil gaed ngomaed, ngam rungʼaged e yalen romaed; ya musap gaed dariy e Got e dabaʼ, ya fare Somoel nge fare Tabiyul e ke rinʼ e muruwel, ma ke piiʼ gelingin ngakʼ e gidiiʼ;

6 Musap gaed, mmotoyil gaed ko yalen rog; faʼan yaedra yoeg ni bay ba maʼangʼang ni kan gagyeg nag u paʼ Somoel, ma dabi mich u wunʼmed; ya biney e rran e gathi ir ba Got ko maʼangʼang; ya ke rinʼ e muruwel rokʼ.

7 Arragon, ma boʼor e piʼin ni bay ra gaʼar gaed: Ngan abich, min garbad, min falfalaenʼ, ya bayi gabul ma kad mʼaed; ma gaed bay ko dodow nib mangil.

8 Ma kub yoʼor e piʼin ni bay ra gaʼar gaed: Ngan abich, min garbad, min falfalaenʼ; machane nge yib madgun Got—ire yug rayog ni nge pag, ngan rinʼ buchʼuw e denen; arragon, yug rayog ni ngan baen buchʼuw, min fek yathin beeʼ ni bachan e thin rokʼ; mag fuʼog ba won ko buguliyoror rom; ya dariy e kireb ko biney; mag rinʼ gubin e pinnʼey, ya ra gabul ma kad mʼaed; ma faʼan rachey nib buch e rodaed, ma Got e bayi gechig nagdaed buchʼuw, ma ra yaeni tomur ma gaed ra thap nga langgin gilʼilungun Got.

9 Arragon, mab yoʼor e piʼin ni bay ra machib gaed ni aray rogon yalen, machib ni baen ma dariy fan mab meechiyang, e ra oeb u lan gumʼirchaʼraed, mar gayed rogon ni ngar mithaeged e pi gafarig roraed nib toʼaer rokʼ Somoel; nge pi muruwel roraed e bayi paer u milmor.

10 Ma rachaʼen pi gidiiʼen Got e yoer u fithikʼ e butʼ nib togopluw ngoraed.

11 Arragon, yaed gubin ma ka ranoed nga wuruʼ e woʼ; ma kar kireb gaed.

12 Bachan e ufʼuf, nge bachan e sensey ni baen, nge machib ni baen, me kireb e pi galasia roraed, ma pi galasia roraed e kar ʼuf gaed ngalang; ni bachan e ufanthin roraed ma kar ufʼuf gaed ngalang.

13 Yaed be moroʼroʼ ngakʼ e piʼin nib gafgow ni bachan e pi tagilʼ e liyoer roraed, yaed be moroʼroʼ ngakʼ e piʼin nib gafgow ni bachan e pi mad roraed ni falelʼ; ma yaed be gafgow nag e piʼin nib muding nge gafgowaenʼ, ni bachan e ufanthin roraed ma kar ʼuf gaed ngalang.

14 Yaed ba gelaenʼ mab tolngaenʼraed; arragon, ma bachan e ufanthin, nge denen, nge fananikan, nge gathar, ere yaed gubin ni ka ranoed nga wuruʼ e woʼ ma kemus ni buchʼuw iyaed e magaey, ni piʼin nib sobutʼaenʼ ni gidiiʼen Kristus; ya, kan wawliyraed, ni ke yoʼor yay ni kar oloboch gaed ni bachan e yibe machib nagraed ko pi motochiyel ko gidiiʼ.

15 O gimed e piʼin nib gonop, nge piʼin nib llowaenʼ nge piʼin nib falaʼab, ni kam langlang gaed ngalang nga fithikʼ e ufʼuf u gumʼirchaʼmed, nge gubin e piʼin nibe piiʼ e machib ni baen, nge gubin e piʼin nibe gathar, ma kar thilyeged e bin nib matʼaw yalen Somoel, gafgow, gafgow, gafgow ngoraed, ni yoeg fare Somoel ni Got ni Gubin Marayog Rokʼ, ya yira thuruyraed nga butʼ nga infierno!

16 Gafgow ngakʼ e piʼin ni ma chefeg nga orel e tin nib matʼaw ni bachan e fananikan ni dariy fan ma yaed be yoeg e thin nib togopluw ko tin nib mangil, ma yaed be yoeg ni dariy falʼngin! Ya fare rran e bay yib ni fare Somoel ni Got e bayi gur ni nge gechig nag e gidiiʼ nu fayleng; ma lan e rran nem u napʼan ni kar loel gaed nga fithikʼ e kireb e bay ni gatheayraed.

17 Machane musap gaed, faʼanra pi gidiiʼ nu fayleng e yaedra kalngaenʼ ko pi kireb nge fananikan roraed ma dab ni gatheayraed, ni yoeg fare Somoel ko Yoʼor.

18 Machane musap gaed, fare galasia nib gaaʼ mab kireb, niʼir e gathar ko poloʼ e fayleng, e thingari puth nge aw nga butʼ, ma rib almarin nra aw nga butʼ.

19 Ya gilʼilungun fare moʼoniyanʼ e rra puth, ma piʼin nib mang ngay e rib tʼuf ni ngan gagyeg nagraed nga dakean e kalngaenʼ, ara dangay ma fare moʼoniyanʼ e ra mʼag raed ko pi chen rokʼ ni dabimus biʼid, ma bay ni kʼaring e damomuw ngoraed, mar mʼaed;

20 Ya musap gaed, re rran nem e ire ra gagyeg u lan gumʼirchaʼen e gidiiʼ, me kʼaringraed ngar damomuw gaed ko tin nib mangil banʼen.

21 Ere boech e gidiiʼ e ra miliyaenʼraed me wawliy laniyaenʼraed iyaen ko fel rogon nu fayleng, ni arame yaedra gaʼar: Gubin banʼen mab felʼ rogon u Zion, arragon, Zion e ke monʼog, ma gubin banʼen mab felʼ rogon—ere aray rogon ni fare moʼoniyanʼ e ra baen nag e yaʼel roraed, me wawliyraed nib kolchiyaʼ iyaen nga infierno.

22 Ma musap gaed, boech e gidiiʼ e ra sabaenbaen nagraed iyaen nga orel, me yoeg ngoraed ni dariy e infierno; me gaʼar ngoraed: Gag e gathi gub moʼoniyanʼ, ya dariy e moʼoniyanʼ—ere aray rogon nra i kathkath nga lan telraed, nge yaeni madaʼ ko ngiyalʼ ni ke mʼag raed ko chen rokʼ, ni gin ni dabiyog ni ngan chuw riy.

23 Arragon, ke koelraed e yamʼ, nge infierno; nge yamʼ nge infierno nge fare moʼoniyanʼ, ma gubin e piʼin ni kan tayraed riy e dabisiy ni ngar sakʼiy gaed u mit fare gilʼ e pufthin rokʼ Got, min pufthin nagraed u rogon e pi ngongol roraed, ma ranoed u roem ni dabisiy ko fangi tagilʼ ni kan falʼeg ni fan ngoraed, nib lupath ko nifiy nge dramrom, nib gafgow ni dabimus biʼid.

24 Ere, gafgow ngakʼ e chaʼ ni kaygi pag ir, u Zion!

25 Gafgow ngakʼ e enra gaʼar: Gubin mab felʼ rogon!

26 Arragon, gafgow ngakʼ e enra motoyil ko pi machib ko gidiiʼ, me fek yathin fare gelingin Got, nge fare tawaʼath ko fare Kan ni Thothup!

27 Arragon, gafgow ngakʼ e enra gaʼar: Kug gaman gaed, ere daki tʼuf boech romaed!

28 Ere kemus aray, ma gafgow ngakʼ gubin e piʼin nibe tʼon, ma kar damomuw gaed ni bachan e tin riyulʼ rokʼ Got! Ya musap gaed, chaʼ ni ra dumow nga dakean e war e ra fek u fithikʼ e falfalaenʼ; ma chaʼ ra dumow nga dakean ba dayif ni yanʼ e be rus ni richey me puth.

29 Gafgow ngakʼ e enra gaʼar: Ke thap e thin rokʼ Got ngomaed, ere daki tʼuf romaed boech e thin rokʼ Got, ya kug gaman gaed!

30 Ya musap gaed, baʼaray rogon ni yoeg fare Somoel ni Got: Gura piiʼ ko gidiiʼ, ni bayilʼ nga dakean bayilʼ, nib yalen nga dakean yalen, ni buchʼuw aray nge buchʼuw aram; ma nge felʼ waʼathan e piʼin ni yaedra motoyil ko pi yalen rog, mar lʼiged telraed ko fonow rog, ya yaedra fil e gonop; ya enra fek, e kug ra piiʼ boech ngakʼ; ma piʼin nra gaʼar, Kug gaman gaed, e yira chuweg roraed e chuʼuw inʼen ni bay roraed.

31 Ra buch waʼathan e chaʼ nra tay e pagaenʼ rokʼ ngakʼ e gidiiʼ, ara nga paʼ e dowef, ara nge motoyil ko pi fanow ko gidiiʼ, ma dabi buch ni faʼanra fanow roraed, e yib u gelingin fare Kan ni Thothup.

32 Gafgow ngakʼ fapi Gentiles, ni yoeg fare Somoel ni Got ko Yoʼor! Ya yug aram rogon ni gura nʼuw nag napʼan ni gube kʼiyeg paʼag ngoraed u rebo rran ngo reb, ma yaedra fek yathig; machane, ra wureng anʼug ngoraed, ni yoeg fare Somoel ni Got, ni faʼan yaedra kalngaenʼ marbaed ngog; ya kug nʼuw nag napʼan i kʼiyeg paʼag ni poloʼ e rran, ni yoeg fare Somoel ni Got ko Yoʼor.