1 Ere chiney e gag, Nephi, e nggu museg e prophecy rog ngomed, pi walageg nib tʼuf rog. Ma dabiyog ni nggu yol nib yoʼor ma kemus ni buchʼuw banʼen, niʼir e gumnang nra yibi buch; ara kemus ni buchʼuw riy ko thin rokʼ walageg i Jacob e rayog ni nggu yoloey.

2 Ere, pinʼen ni kug yoloey e bagaman u wunʼug, ma kemus ni buchʼuw e thin e kubay ni thingar gu weliy ni morngaʼagen e machib rokʼ Kristus, ere, nggu non ngomed ni chirogon, u rogon fini tamilang e prophecy rog.

3 Ya yaʼel rog e ba mʼagaenʼ ko tamilang; ya aray rogon yalen fare Somoel ni Got ni ma muruwel u fithikʼ e gidiiʼ. Ya fare Somoel ni Got e ma piiʼ e tamilang nga laninʼuy; ya ma non ngakʼ e gidiiʼ u rogon e thin roraed, ni ngar nanged fan.

4 Ere, gubaʼadag ni ngam tayed u wunʼmed ni kug non ngomed ni morngaʼagen fare profet ni ke dag Somoel ngog, niʼir e ra tawfe nag fare Saaf rokʼ Got, niʼir e ra chuweg e pi denen ko gidiiʼ u fayleng.

5 Ere chiney, faʼanra fare Saaf rokʼ Got, niʼir e ba thothup, mab tʼuf ni ngan tawfe nag ko raen, ni nge muguʼuliy gubin e tin nib matʼaw, O ere, aram fini rib tʼuf rodaed, e piʼin ni daed thothup gaed, ni ngan tawfe nagdaed, arragon, tawfe ko raen!

6 Ere chiney, gubaʼadag ni nggu fithmed, pi walageg nib tʼuf rog, uw rogon ni fare Saaf rokʼ Got e ke muguʼuliy gubin e tin nib matʼaw u dakean e tawfe ko raen?

7 Damnanged niʼir beeʼ nib thothup? Machane yug aram rogon niʼir beeʼ nib thothup, me dag ko gidiiʼ, nu rarogon e dowef e sobutʼ nag ir riy u mit e en Chitamangiy, me micheg ngakʼ e en Chitamangiy niʼir e ra liyoer ngakʼ u dakean e fol ko pi motochiyel rokʼ.

8 Ere, tomuren ni kan tawfe nag ko raen me yib fare Kan ni Thothup nga dakean ni boed yaʼan ba bulogol.

9 Ere bayay, ki dag ko gidiiʼ fini wuʼinʼin fare paʼ i kanawoʼ, nge fini achichig langan fare garog, niʼir e yaedra yaen riy, niʼir e ke mʼon ke dag yalen ngoraed.

10 Me gaʼar ngakʼ e gidiiʼ: Mu leaked gag. Ere, pi walageg nib tʼuf rog, rayog ni ngad leaked Yesus ni faʼanra dabi mʼagaenʼ daed ngay ni ngad fol gaed ko fapi motochiyel rokʼ e en Chitamangiy?

11 Ma fachaʼ ni Chitamangiy e gaʼar: Mu kalgaed ngaenʼmed, mu kalgaed ngaenʼmed, min tawfe nagmed u fithingan Fakag nib Tʼuf rog.

12 Nge ku arragon, ni non fachaʼ ni Fak ngog, nibe gaʼar: Chaʼ ni yira tawfe nag u fithingag, e ire ra piiʼ fachaʼ ni Chitamangiy fare Kan ni Thothup ngakʼ, ni boed gag, ere, mu leaked gag, ngam rinʼed e pinʼen ni kam guyed gag ni kug rinʼ.

13 Ere, pi walageg nib tʼuf rog, gumnang ni faʼan gimed raleak fachaʼ ni Fak, u poloʼ i gumʼirchaʼmed, ni damur baen gaed nge sasaliyeb u mit Got, ya fithikʼ e lʼagaenʼ romed, ma gimed be kalngaenʼ ko pi denen romed, ma gimed be micheg ngakʼ fachaʼ ni Chitamangiy nib mʼagaenʼmed ngay ni ngam feked nga dakeanmed fithingan Kristus, u dakean e tawfe—arragon, ni ngam leaked e Somoel romed nge Tathapeg romed iyaen nga fithikʼ e raen, ni boed rogon e thin rokʼ, musap gaed, ma aram me yog ngomed fare Kan ni Thothup; arragon, ma aram me yib fare tawfe ko nifiy nge fare Kan ni Thothup; ma arame rayog ni ngam non gaed ni boed e pi angel, mi gimed tolul nag e soerokʼ ngakʼ Fachaʼ nib thothup ku Israel.

14 Machane, musap gaed, pi walageg nib tʼuf rog, iyib laman fachaʼ ni Fak ngog, nibe gaʼar: Tomuren ni kam kalgaed ngaenʼmed ko pi denen romed, mi gimed micheg ngakʼ e en Chitamangiy nib mʼagaenʼmed ngay ni ngam fol gaed ko pi motochiyel rog, u dakean e tawfe ko raen, ma kam thapeged fare tawfe ko nifiy nge fare Kan ni Thothup, ma rayog ni nga moeged e thin nib beʼech, arragon, ni boed ni ma non e pi angel, ma tomur riy mi gimed fek yathig, ma arame kay gub felʼ ni faʼan manga damnanged gag.

15 Mug rungʼag balam ni yib rokʼ e en Chitamangiy, nibe gaʼar: Arragon, fapi thin rokʼ fachaʼ ni Fakag nib Tʼuf rog e ba riyulʼ mab yulʼyulʼ. Enra athamgil nge madaʼ ko tomur, e arame chaʼ nra thap.

16 Ere chiney, pi walageg nib tʼuf rog, e gumnang riy ko rennʼey ni faʼanra dabi athamgil beeʼ nge madaʼ ko tomur, ni be leak wokon fachaʼ ni Fak fare Got nib fos, ma dabiyog ni nge thap.

17 Ere, mu rinʼed fapinʼen ni kugog ngomed ni kug guy ni fare Somoel nge Tabiyul romed e rarinʼ; ya, ya baʼaray fan ni kan dag ngog, nge yog ni ngam nanged e gin ngam maroed riy. Ya fare garog niʼir e gimed ra yaen riy, e kalngaenʼ nge tawfe ko raen; ma aram me yibe manʼaegfan ko pi denen romed u dakean e nifiy nge fare Kan ni Thothup.

18 Ma arame kam awgaed ngalan e re paʼ i kanawoʼ ney nib wuʼinʼin mab achichig radan nib sor iyaen ko yafos ni gubinfen; arragon, kam maroed ngalan fare garog; kam rinʼed ni boed rogon fapi motochiyel rokʼ fachaʼ ni Chitamangiy nge fachaʼ ni Fak; make yog ngomed fare Kan ni Thothup, niʼir e be micheg fachaʼ ni Chitamangiy nge fachaʼ ni Fak, ni ke muguʼuliy fare michmich ni tay, niʼir e faʼan gimed ra yaen riy ma rayog ngomed.

19 Ere chiney, pi walageg nib tʼuf rog, tomuren ni kam maroed nga langgin e re paʼ i kanawoʼ ney nib wuʼinʼin mab achichig radan, nggu fith, gubin make mʼay irinʼ? Musap gaed, gube gaʼar ngomed, Dawor; ya dabiyog ni ngam baed ngam madaʼ gaed ko giney ma kemus nu dakean fare thin rokʼ Kristus u fithikʼ e mich nib miyuluy ngakʼ, ni gimed be tagaʼ ni poloʼ nga dakean e pi ngongol rokʼ e chaʼ ni bay gelingin ni nge thapegey.

20 Ere, thingar mu piiʼed iyaen nga mʼon u fithikʼ e yulʼyulʼ romed ngakʼ Kristus, nib machalbog laniyaenʼmed ko athap, nge tʼufeg rokʼ Got ngakʼ gubin e gidiiʼ. Ere, faʼan gimed ra piiʼ iyaen nga mʼon, ni gimed be duwuriʼiyed gimed ko thin rokʼ Kristus, mi gimed athamgil nge madaʼ ko tomur, ma musap gaed, i gaʼar fachaʼ ni Chitamangiy: Rayog e yafos ni gubinfen ngomed.

21 Ere chiney, musap gaed, pi walageg nib tʼuf rog, ireray e kanawoʼ; ma dakuriy rebo kanawoʼ ara rebo fithingan ngabang u tane tharmiy ni rayog ni nge thap e gidiiʼ riy nga langgin gilʼilungun Got. Ere chiney, musap gaed, ireray e machib rokʼ Kristus, ma karimus aray e bin riyulʼ e machib rokʼ e en Chitamangiy, nge fare Fak, nge fare Kan ni Thothup, ni taʼareb e Got, ni dariy tungun. Amen.