1 Ere chiney, musap gaed, pi walageg nib tʼuf rog, gube tafnaey nag ni gimed be lemnag boech banʼen u lan gumʼirchaʼmed ni morngaʼagen e pinʼen ni ngam rinʼed u tomuren ni kam maroed nga langgin fare paʼ i kanawoʼ. Machane, musap gaed, mangfan ni gimed be lemnag e pinnʼey u lan gumʼirchaʼmed?

2 Dakum nanged ni kugog ngomed faram ni tomuren ni kam thapeged fare Kan ni Thothup ma rayog ni ngam non gaed ni boed e pi angel? Ere chiney, uw rogon me yog ni ngam mannaed ni boed e pi angel, ya gathi kemus nu dakean fare Kan ni Thothup?

3 Pi angel e manon u dakean gelingin fare Kan ni Thothup; ere, yaed mayoeg e thin rokʼ Kristus. Ere, gube gaʼar ngomed, mu duruwʼiyed gimed ko thin rokʼ Kristus; ya musap gaed, pi thin rokʼ Kristus e ra yoeg ngomed rogon gubin e pinʼen ni ngam rinʼed.

4 Ere, chiney u tomuren ni kug weliy e pi thin ney, ma faʼanra damur nanged fan meʼere ra yaeni aw ni bachan e damur deʼeriyed, ara mu tugtuguyed e mab; ere, danur fekmed nga tamilang, ere thingar mmʼaed u fithikʼ e lumor.

5 Ya musap gaed, bayay, gube yoeg ngomed ni faʼan gimed ra yaen u lan fare paʼ i kanawoʼ, mi gimed thapeg fare Kan ni Thothup, ma ra dag ngomed gubin banʼen ni ngam rinʼed.

6 Musap gaed, ireray fare machib rokʼ Kristus, ma arame dakuriy e machib ni ngan piiʼ nge yaeni madaʼ nga tomuren ni ke mʼug ngomed u lan e dowef. Ma napʼan nra mʼug ngomed u lan e dowef, ma pinʼen nra yoeg ngomed e ngam guyed rogon ngam rinʼed.

7 Ere chiney e gag, Nephi, e dab kiyog ni ngunon; ya fare Kan ni Thothup e ke tilegeg, ma ke pageg ni kemus ni mayoer e nggu tay ni bachan fare mich ni dariy, nge ngongol ni kireb, nge fekyath, nge gelaenʼ ko gidiiʼ; ya dabra gayed e llowaenʼ, ara ra nanged fan e llowaenʼ nib gaaʼ, u napʼan ni yibe piiʼ ngoraed u fithikʼ e tamilang, u rogon nra yog ni nge yaeni aw fini tamilang e thin.

8 Ere chiney, pi walageg nib tʼuf rog, gube pirʼeg ni kagmed be lemnag u lan gumʼirchaʼmed; ma be kireb anʼug ngay ni thingar guweliy morngaʼagen e tiney. Ya faʼan gimed ra motoyil ko fare Kan ni Thothup niʼir e mafil ko gidiiʼ ni nge meybil, ma gimed ranang ni thingar um meybil gaed; ya fare yaʼel ni moʼoniyanʼ e dar mafil ko gidiiʼ ni nge meybil, ya mafil ngakʼ ni nga dabi meybil.

9 Machane musap gaed, gube yoeg ngomed ni thingar um meybil gaed ni gubin e ngiyalʼ, ma dabi ngochngochaenʼmed; ma thingar dab mu rinʼed banʼen ngakʼ Somoel u mʼon riy ni ngam meybil gaed ngakʼ e en Chitamangiy u fithingan Kristus, ni nge falʼeg waʼathmed ko nʼen ni gimed be rinʼ, ni nge yaeni aw ni pinʼen ni gimed be rinʼ e ba mʼag nga rogon e paer ko yaʼel romed.