1 Ere chiney e gag, Nephi, e dabiyog ni nggu yoloey gubin banʼen ni kan machib nag u fithikʼ e gidiiʼ rog; ara gub salap ko yol, ni boed e numon; ya napʼan nra non beeʼ u gelingin fare Kan ni Thothup ma fare Kan ni Thothup e ma fek iyaen nga langgin gumʼirchaʼen e gidiiʼ.

2 Machane musap gaed, boʼor e piʼin nib ʼelʼel gumʼirchaʼen nib togopluw ko fare Kan ni Thothup, ni arame dariy tagilʼ u fithikʼraed; ere, kar nʼiged boʼor banʼen ni kan yoloey ma yaed be lemnag ni bogi banʼen ni dariy fan.

3 Machane gag, Nephi, e kug yoloey e tin ni kug yoloey, ma gube lemnag nib gaʼfan, ma rib gaaʼ niffan ko gidiiʼ rog. Ya guma meybil ni gubin e ngiyalʼ ni rran ni fan ngoraed, ma oewcheg e ma gardaʼ nag e gayul rog ni nepʼ, ni bachraed; ma guma yoer ngakʼ Got u fithikʼ e mich, ma gumnang ni nra rungʼag e meybil rog.

4 Ma gumnang ni fare Somoel ni Got e ra piiʼ angin e meybil rog ngakʼ e gidiiʼ rog. Ma pi thin ni kug yoloey u fithikʼ e moʼowaer e ra gelnagraed; ya ra miliyaenʼraed ni ngar rinʼed e tin nib mangil; ma ra ayuwegraed riy ngar nanged morngaʼagen e pi chitamangraed; ma be weliy morngaʼagen Yesus, mar miliyed laniyaenʼraed ni nge michaenʼraed ngakʼ, ni ngar athamgil gaed nge madaʼ ko tomur, niʼir e yafos ni gubinfen.

5 Ma be non nib gel nib togopluw ko denen, u rogon fini tamilang e tin riyulʼ; ere, dariy beeʼ nra puwaenʼ ko thin ni kug yoloey ma kemus ni chaʼ ni yow fare yaʼel ni moʼoniyanʼ.

6 Guma falfalaenʼ ko tamilang; guma falfalaenʼ ko tin riyulʼ; guma falfalaenʼ ku Yesus, ya ke bayuliy e yaʼel rog ke chuw u infierno.

7 Bay e tʼufeg rog ko gidiiʼ rog, nge mich rog nib gel ngakʼ Kristus nug ra guy nib yoʼor e yaʼel ni dariy thibngiraed u gilʼ e pufthin rokʼ.

8 Bay e tʼufeg rog ngakʼ fapi Jew—gube yoeg e Jew, ni bachan e gube wupfan ngakʼ e piʼin ni baʼaram ni gub roraed.

9 Ma kubay e tʼufeg rog ngakʼ fapi Gentiles. Ya musap gaed, ya dariy bagyaed e pichaʼaney ni rayog ni nggu athapeg ma kemus ni faʼan yaedra falʼeg thilraed Kristus, ma ranoed nga langgin fare garog nib achig radan, ma ranoed ko fachi paʼ i kanawoʼ nib wuʼinʼin nib sor iyaen ko yafos, mar tayed riy ni aram rogon iyaen nge madaʼ nga tomuren fare rran u napʼan e yafos.

10 Ere chiney, pi walageg nib tʼuf rog, nge fapi Jews, nge gubin e gidiiʼ ko tin tomur e rran u fayleng, mmotoyil gaed ko pi thin ney ma nge michaenʼmed ngakʼ Kristus; ma faʼanra dabi michaenʼmed ko pi thin ney ma nge michaenʼmed ngakʼ Kristus. Ma faʼanra michaenʼmed ngakʼ Kristus ma ra michaenʼmed ko pi thin ney, ya ireray e thin rokʼ Kristus, ni ke piiʼ ngog; ma be fil ngakʼ gubin e gidiiʼ ni ngar rinʼed e tin nib mangil.

11 Ma faʼanra gathi ireray e thin rokʼ Kristus, meʼere ngam turguyed u wunʼmed—ya Kristus e ra dag ngomed, u gelingin nge falʼngin, ni ireram e thin rokʼ, ko bin tomur e rran; ma gimed nge gag e gadaed ra sakʼiy ngad saboliyed gadaed u gilʼepufthin rokʼ; mi gimed ranang ni ke chiyliy ngog ni nggu yoloey e pinnʼey, ni yug aram rogon ni dag salap.

12 Ma gube meybil ngakʼ e en Chitamangiy u fithingan Kristus ni nge yoʼor i gadaed, ni faʼanra gathi gadaed gubin, ni manga yog ni thap nga langgin gilʼilungun ko fare rran nib gaaʼ mab tomur.

13 Ere chiney, pi walageg nib tʼuf rog, ni gubin e gidiiʼ ku Israel, nge gubin e gidiiʼ ko tin tomur e rran, gube non ngomed ni gowa beeʼ nibe non u fithikʼ e fiyath nibe gaar: Kefelʼ nge madaʼ ko fare rran nib gaaʼ ni bay yib.

14 Ma gimed e piʼin ni dab mu feked e murnguy rokʼ Got, mi gimed tayfan fapi thin rokʼ e Jews, nge thin rog, nge pi thin ni bay yib nga butʼ u lʼugun fare Saaf ku Got, e musap gaed, gube piiʼ ba fangich ngomed ni dabimus biʼid, ya pi thin ney e ra gafgow nagmed ko bin tomur e rran.

15 Ya nʼen ni bay gu chaʼariy u fayleng, e yira togopluw nag ngomed u gilʼepufthin; ya aray rogon ni ke chiyliy Somoel ngog, ma thingar gufol riy. Amen.