1 Ere chiney e gube non ngom, gur Yosef, ni bin tomur i fakag. Gur e ni gargelegem u lan wuruʼ e binaw u napʼan e pi gafgow rog; arragon, u lan e pi rran ni thʼabi gel e kirbaenʼ rog e gargelegem e chitiningim.

2 Ere ngki falʼeg Somoel waʼatham ko re nam ney, nib nam ni thʼabi felʼ, ni nge mang tafnam nge pifakam, nge pifak pi walagem, ma nge paer nib ayuw ngom ni gubinfen, ni faʼan gara fol ko pi motochiyel rokʼ Fachaʼ nib Thothup ku Israel.

3 Ere chiney, o Yosef, ni bin tomur i fakag, ni gur e kug fekem kam chuw u wuruʼ e binaw ko pi gafgow rog, e nge falʼeg Somoel waʼatham ni gubinfen, ya pifakam e dab ni gatheayraed.

4 Ya musap, gur waʼamngini neag; ma gag gidiiʼen Yosef niʼir faram e ni fek nib kalbus nga lan yu Egypt. Ma rib felʼ e pi mʼag rokʼ Somoel ni tay ngakʼ Yosef.

5 Ere, Yosef e rriyulʼ ni guy e tirodaed e rran. Me yog ngakʼ ba michmich ni yib rokʼ Somoel, ni waʼamngin i yin e ra sunmiy Somoel ni Got riy ba paʼangin nib matʼaw ni fan ngakʼ e gidiiʼ ku Israel; gathi fare Messiah, ya ba paʼangin ni ra mʼing nge chuw, machane bayi paer u wunʼuy u lan fapi mʼag rokʼ Somoel ni fare Messiah e ra mʼug ngoraed u lan e tin tomur e rran, u gelingin e yaʼel, ni nge fekraed u fithikʼ e lumor nga tamilang—arragon, nga wuruʼ e lumor nib miith, ngo wuruʼ e kalbus ko gin nib puf-rogoy riy.

6 Ya Yosef e rriyulʼ ni micheg, ni gaʼar: Bay beeʼ nib Tathogthog banʼen u dakean ni bayi sunmiy Somoel ni Got rog, niʼir beeʼ nib Tathogthog banʼen u dakean ni bay ni melʼeg u waʼamngini neag.

7 Arragon, Yosef e rriyulʼ ni gaʼar: Baʼaray rogon ni ke yoeg Somoel ngog: Beeʼ nib Tathogthog banʼen u dakean nib melʼeg e gura sunmiy u waʼamngini neam; ma bay ni liyoer ngakʼ u fithikʼ e pi waʼamngini neam. Ma ire gura piiʼ e motochiyel ngakʼ ni nge rinʼ ba muruwel ni fan ngakʼ e pi waʼamngini neam, ni pi walagen, nib gaʼfan ngoraed, ni nge tamilngegraed ko fapi mʼag ni kug tay ngakʼ e pi chitamangmed.

8 Ma gura piiʼ ba motochiyel ngakʼ ni dakuriy reb e muruwel ni nge rinʼ, ma kemus ni re muruwel ni gura chiyliy ngakʼ. Ma bay gguy rogon nge paer nib felʼ bugwan u oewcheg; ya rarinʼ e muruwel rog.

9 Ma ra felʼ bugwan ni boed Moses, niʼir e kugog ni gura sunmiy ni fan ngomed, ni nge thapeg e gidiiʼ rog, ni gidiiʼ ku Israel.

10 Ere Moses e gura sunmiy, ni nge thapeg e gidiiʼ rom nga wuruʼ fare binaw nu Egypt.

11 Machane beeʼ nib Tathogthog banʼen u dakean e gura sunmiy u waʼamngini neam; ma gura piiʼ e gelingin ngakʼ ni nge yib nag e thin rog ngakʼ e pi awochngin ineam—ma gathi kemus ni nge yib nag e thin rog, ni yoeg Somoel, ya ngki micheg ngoraed e thin rog, ni ke yaen u fithikʼraed.

12 Ere, waʼamngini neam e ra yol; nge waʼamngin i yin Judah e ra yol; ma pinʼen ni ra yoloey waʼamngini neam, nge ku pinʼen ni ra yoloey waʼamngin i yin Judah, e yow ra peth nga taʼabang, ngar togopluw gow ko pi machib ni deriyulʼ mar tilegew e pi maleʼeg thin, mar yarmiyew e gapas nga fithikʼ pi waʼamngini neam, me tamilang nag laniyaenʼraed rokʼ e pi chitamangraed ni kakrom u lan e tin tomur e rran, ma ngki tamilang nag laniyaenʼraed ko pi mʼag rog, ni yoeg Somoel.

13 Mu dakean e moʼowaer rokʼ e ra yib gelngin riy, u lan e fare rran u napʼan nra tabab e muruwel rog u fithikʼ gubin e gidiiʼ rog, ni ngan sulwegmed, O gidiiʼ ku Israel, ni yoeg Somoel.

14 Ere baʼaray rogon ni prophesy nag Yosef, i gaʼar: Musap gaed, re Tathogthog banʼen u dakean nem e ra falʼeg Somoel waʼathan; ma piʼin ni yaedra gay rogon ni ngar gatheayed e yira gatheayraed ni poloʼ; ya re michmich ney, niʼir e ke yog ngog rokʼ Somoel, ni morngaʼagen waʼamngin i neag, e ra muguʼul. Ere musap gaed, rib mudugil u wunʼug ni ra muguʼul e re michmich ney.

15 Ma ngachol rokʼ e taʼab ngachol ngog; ma taʼab ngachol ngakʼ e chitamangin. Ma ra boedeg; ko renʼen, ni bayi fek Somoel iyib u paʼ, nu dakean fare gelingin rokʼ Somoel e ra thapeg e gidiiʼ rog riy.

16 Arragon, baʼaray rogon ni prophesied Yosef: Rib mudugil anʼug ko rennʼey, ni boed nib mudugil anʼug ko fare michmich rokʼ Moses; ya fare Somoel e ke gaʼar ngog, gura ayuweg pifakam ni gubinfen.

17 Ma fare Somoel e ke gaʼar: Gura sunmiy beeʼ ni Moses; ma gura piiʼ e gelingin ngakʼ u baley i sog; ma bay gu piiʼ e gonop ngakʼ ko yol. Machane dab gu yalʼuweg balowthen, ni nge yoʼor e nʼen ni nge weliy, ya dab gguy rogon ni nge salap ko welthin. Machane gura yoloey e motochiyel rog nggu piiʼ ngakʼ, nga bugul i paʼag; ma gura piiʼ beeʼ ni nge mang lʼugun ko welthin.

18 Ma fare Somoel e ki gaʼar ngog: Gura sunmiy beeʼ ni fan ngakʼ pi waʼamngini neam; ma bay gu piiʼ beeʼ ni nge mang lʼugun ko welthin. Me gag, e musap, gura piiʼ matʼawon ni nge yoloey morngaʼagen e pi waʼamngini neam, nge yaen ngakʼ pi waʼamngini neam; ma fachaʼ ni lʼugun ko welthin ni yib u waʼamngini neam e ra weliy morngaʼagen.

19 Ma pi thin ni bayi yoloey e ireram e pi thin nib gamog u lan e gonop rog ni nge yaen ngakʼ pi waʼamngini neam. Ma ra yaeni aw ni gowa pi waʼamngini neam e kar yoer gaed ngoraed u fithikʼ e fiyath; ya gumnang e mich roraed.

20 Ma bay ra yoer gaed u fithikʼ e fiyath; arragon, ni yaed be yoeg ngakʼ pi walagraed ni ngar kalgaed ngaenʼraed, ni aram rogon ni ke bukun e mfen ni kar chuw gaed. Ma bay yibi buch ni pi yoer roraed e bay yaen, ni boed rogon fini moem e thin roraed.

21 Ma bachan e mich roraed ere pi thin roraed e bay yaen u lʼugnag ngakʼ pi walagraed ni yaed pi waʼamngini neam; ma moʼowaer ko thin roraed e gura gelnag e mich roraed riy, ni nge yib ngaenʼraed e mʼag rog nug tay ngakʼ e pi chitamam.

22 Ere chiney, e musap, gur fakag i Yosef, ireray rogon ni prophesy fachaʼ ni chitamag ni kakrom.

23 Ma, bachan e biney e mʼag ere gur e ba felʼ waʼatham; ya pifakam e dab ni gatheayraed, ya yaedra motoyil ko thin ko fare ke babyor.

24 Ma bayi sum beeʼ nib madangdang u fithikʼraed, nib yoʼor banʼen nib felʼ ni ra rinʼ, ko thin nge ngongol, ma ra mang talin e muruwel u paʼ Got, mab gel e mich rokʼ, ma nge rinʼ e muruwel nib maʼangʼang, ma nge rinʼ banʼen ni rib felʼ u mit Got, ni nge yib nag fare sulyarmen ngakʼ fapi gidiiʼ ku Israel, nge pifak pi walagem.

25 Ere chiney, e ba felʼ waʼatham, gur Yosef. Musap, gur e gab achichig; ere ngam motoyil ko thin rokʼ walagem, i Nephi, ma yira rinʼ ngom ni boed rogon fapi thin ni kug weliy. Mu tay u wunʼum e thin rokʼ e chitamam ni ke ganowrug u puluwon. Amen.