1 Ere chiney e gag, Nephi, e nggu weliy morngaʼagen fapi prophecy ni ke weliy e chitamag, ni morngaʼagen Yosef, ni faʼan nni fek iyaen nga lan yu Egypt.

2 Ya musap gaed, rriyulʼ ni ke prophesy nag morngaʼagen gubin pifak. Ma pi prophecy ni ke yoloey, e dakuriy boech ngab yang nib yoʼor nib felʼ ngay. Ma ke prophesy nag morngaʼagdaed, nge tin ni kubay nga mʼon e mfen rodaed; ma kan yoloey nga dakean e plate ni brass.

3 Ere, tomuren ni ke muʼ e chitamag ko welthin ni morngaʼagen fapi prophecy rokʼ Yosef, me pining pifak Laman, ni pagael ni fak nge ppin ni fak, nge gaʼar ngoraed: Musap gaed, e pi pagael ni fakag nge pi ppin ni fakag, ni piʼin pagael nge ppin ni fak e bin sommʼon i fakag, gu baʼadag ni ngam motoyil gaed ko thin rog.

4 Ya fare Somoel ni Got e ke gaʼar: Nʼumngin i napʼan ni gimed ra fol ko pi motochiyel rog ma gimed ra monʼog u lan fare nam; ma nʼumngin i napʼan ni dab mu fol gaed ko pi motochiyel rog ma yira chuwegmed rog.

5 Machane musap gaed, e pi pagael nge pi ppin ni fakag, dabiyog ni nggu waen nga loew nge madaʼ ko ngiyalʼ ni kug tay ba tawaʼath nga dakeanmed; ya musap gaed, gumnang ni faʼan yira chuguliymed ngam ilal gaed nga dakean e wok nib felʼ ma dab mu palog gaed riy.

6 Ere, faʼanra ke buch waʼathmed, musap gaed, nggu tay e tawaʼath rog u dakeanmed, ni nge chuweg e buch waʼath romed ngan tay nga dakean loelugen e gallabthir romed.

7 Ere, bachan e tawaʼath rog ere fare Somoel ni Got e dabi pag ni ngam mʼaed; ma, ra wurengaenʼ ngomed nge pifakmed ni gubinfen.

8 Ere yibi buch u tomuren ni ke muʼ e chitamag ko welthin ngakʼ fapi pagael nge ppin ni fak Laman, me yoeg ni fapi pagael nge ppin ni fak Lemuel e ngan fekraed iyaen nga pʼoewchen.

9 Me non ngoraed, ni gaʼar: Musap gaed, e pi pagael nge ppin ni fakag, ni gimed e pagael nge ppin ni fak e bin lʼagruw i fakag; musap gaed nggu piiʼ e tawaʼath romed ni taʼareb rogon ko bin ni kug tay rokʼ fapi pagael nge ppin ni fak Laman; ere, gimed e dab ni gatheaymed ni poloʼ; machane aram ko tomur e yira tawaʼath nag pifakmed.

10 Ere yibi buch u napʼan ni ke muʼ e chitamag ko numon ngoraed, musap gaed, me non ngakʼ e pi pagael ni fak Ishmael, arragon, nge gubin chon e tabinaew rokʼ.

11 Ma tomuren ni ke muʼ ko numon ngoraed, me non ngakʼ Sam, ni gaʼar: Rib felʼ waʼatham, nge pifakam; ya gur e gara tafnaʼ fare nam ni boed walagem i Nephi. Ma pifakam e yira thiʼegraed nga fithikʼ pifak; me gur e gara boed walagem, ma pifakam e yaedra boed pifak; ma gur e ba felʼ waʼatham u lan gubin e pi rran rom.

12 Me yibi buch u tomuren ni ke non e chitamag, i Lehi, ngakʼ gubin chon e tabinaew rokʼ, u rogon e thamthaem ko gumʼirchaʼ rokʼ nge fare Kan ni Thothup rokʼ Somoel ni bay rokʼ, me gel e pilibthir rokʼ iyaen. Me yibi buch ni arame yimʼ, min kʼeyag.

13 Me yibi buch ni de yoʼor e rran nga tomuren ni ke yimʼ, ma Laman nge Lemuel nge pi pagael ni fak Ishmael e ra damomuw gaed ngog ni bachan e pi fonow rokʼ Somoel.

14 Ya gag, Nephi, e ni tawasar ngog ni nggu non ngoraed, ni boed ni ke yoeg; ya boʼor bogi banʼen ni kug weliy ngoraed, ma ku aram rogon ni ke rinʼ e chitamag, u mʼon ni nge yimʼ; ni tin yoʼor riy e kan yoloey nga dakean yuyang e plates rog; ya bagaʼ ni chep ni kakrom e kan yoloey nga dakean e yungnem e plates rog.

15 Ma dakean e yungney e gube yoloey ngay e pinʼen nib gaʼfan ko yaʼel rog, nge boech nib yoʼor ko fapi chep nib thothup ni kan ker nga dakean fapi plates ni brass. Ya yaʼel rog e rib falaenʼ ko pi chep nib thothup, nge gumʼirchaʼ rog e ma lemnag, ere gu yoloey ni fan ko naʼab nge felʼ rogon ko bitir rog.

16 Musap gaed, yaʼel rog e ba falaenʼ ko tirokʼ Somoel banʼen; ma gumʼirchaʼ rog e yug be lemnag e pinʼen ni kug guy ma kug rungʼag.

17 Machane, yug aram rogon fini felʼ Somoel, nibe dag ngog e pi muruwel rokʼ nib felʼ mab maʼangʼang, me yoer e gumʼirchaʼ rog ni gaʼar: O karug gafgow! Arragon, gumʼirchaʼ rog e kari kirbaenʼ ni bachan e dowef rog; yaʼel rog e kari kirbaenʼ ni bachan e pi denen rog.

18 Kug paer nga sabol, ni bachan e pi lumel nge denen ni rib moem ni be chalongbiyeg.

19 Ma napʼan ni gube athapeg ni nggu falfalaenʼ, me moen gumʼirchaʼeg ni bachan e pi denen rog; machane, gumnang ko miniiʼ e ba paganʼug ngakʼ.

20 Got rog e ke paer nib ayuw ngog; ke powiʼiyeg u fithikʼ e pi gafgow rog u lan wuruʼ e binaw; ma ke thapegeg u dakean farengi day nib toʼaer.

21 Ke suguyeg ko tʼufeg rokʼ, nibe yaen ni nge muʼuruf dugreg riy.

22 I balyang nag e pi toʼogor rog, nge madaʼ ko ngiyalʼ ni kar tʼon gaed u pʼoewcheg.

23 Musap gaed, ke rungʼag e wenig rog ni rran, ma ke piiʼ ngog e tamilang u dakean e changar u malikʼay ni ke nepʼ.

24 Ma ra rran mug meybil nib tinoewey u pʼoewchen; arragon, lungug e kug piiʼ ngalang nib tolang; ma ke yib e pi angel nga butʼ ngar pigpig gaed ngog.

25 Ma dakean i poen e Kan ni Thothup rokʼ e kan fek e yaʼel rog riy iyaen nga pʼebugul e burey nib tolang. Ma oewcheg e ke guy bogi banʼen nib maʼangʼang, arragon, nib pag fini maʼangʼang ni nge guy e gidiiʼ ko biney e changar; ere nni chiyliy ngog ni dab gu yoloey.

26 O ma, faʼanra kug guy bogi banʼen nib felʼ, faʼanra fithikʼ e adag rokʼ Somoel ngakʼ e gidiiʼ e ke yibi mʼug riy ngakʼ e gidiiʼ u fithikʼ e murnguy rokʼ, me ere mangfan ni nge yoer gumʼirchaʼeg me paer e yaʼel rog u lan e loway ko kirbaenʼ, make waer dugreg, make mʼay gelingig, ni bachan e pi gafgow rog?

27 Ma mangfan ni nggu pageg ko denen, ni bachan e dowef rog? Arragon, mangfan ni nggu pageg ko pi lumel, ni nge yib tagilʼ fachaʼ i moʼoniyanʼ u lan gumʼirchaʼeg ni nge gatheay e gapas rog me gafgow nag e yaʼel rog? Mangfan ni nggu puwaenʼ ni bachan e toʼogor rog?

28 Mu od, o yaʼel rog! Dab kum mul nga fithikʼ e denen. Mu falfalaenʼ, O gumʼirchaʼeg, ma dab kum piiʼ tagilʼ fachaʼ ni toʼogor ko yaʼel rog.

29 Dab mu damomuw bayay ni bachan e pi toʼogor rog. Dab mu mʼay nag gelingig ni bachan e pi gafgow rog.

30 Mu falfalaenʼ, O gumʼirchaʼeg, mag yoer ngakʼ Somoel, mag gaʼar: O Somoel, gura liyoer ngom ni gubinfen; arragon, yaʼel rog e ra falfalaenʼ rom, o Got rog, nge fare war ko woʼen e thap rog.

31 O Somoel, gara bayul nigeg ni poloʼ? Gara lufeg u paʼ e pi toʼogor rog? Gara guy rogon ni nge yog nug sungor nga yaʼan e denen?

32 Gomanga yigi maen e pi garog nu infierno ni gubin e ngiyalʼ u pʼoewcheg, ni bachan e ke mʼing anʼug ma kug kalnganʼug! O Somoel, dab mu ning e pi garog rom ko tin nib matʼaw banʼen u pʼoewcheg, ni nge yog nug waen ko fare kanawoʼ nib sobutʼ u loway, ni nge yog nug kol ayuw ko fare kanawoʼ ko fonow!

33 O Somoel, gara chalongbiyeg nga madan e tin nib matʼaw rom! O Somoel, muguy rogon ni nggu miil u paʼ e pi toʼogor rog! Gara falʼeg e woʼ rog nge kʼikʼiy u pʼoewcheg! Dab mu tay e maen woʼ nga kanawoʼ rog—ya ngam bing e woʼ rog u pʼoewcheg, ma gathi gag e ngam magawon nag e woʼ rog, ya pi woʼ ko toʼogor rog.

34 O Somoel, kug paganʼug ngom, ma nggu paganʼug ngom ni gubinfen. Dab gu tay e pagaenʼ rog nga paʼ e dowef; ya gumnang nib buch waʼathan e chaʼ ni ra tay e pagaenʼ rokʼ nga paʼ e dowef. Arragon, rib buch waʼathan e chaʼ ni ra tay e pagaenʼ rokʼ ngakʼ beeʼ ara tagaʼ nga paʼ e dowef.

35 Arragon, gumnang ni Got e ra piiʼ nib puf rogon ngakʼ e chaʼ nra ning ngakʼ. Arragon, Got rog e ra piiʼ ngog, ni faʼan gura ning ngakʼ banʼen, ni de kireb; ere gura non ngom nib gaaʼ lamag; arragon, gura yoer ngom, o Got rog, ni gur e war rog ko tin nib matʼaw banʼen. Musap, lamag e gubinfen ni bay iyib ngom ngalang, ni gur e war rog nge Got rog ni dabimus biʼid. Amen.