1 ʻIo, he ʻoku folofola peheni ʻe he ʻEikí: Kuó u veteʻi koe, pe kuó u liʻaki koe ke taʻengata? He ʻoku folofola peheni ʻe he ʻEikí: ʻOku ʻi fē ʻa e tohi ʻo e vete ʻo hoʻo faʻeé? Kuó u tukuange koe kia hai, pe ko hai ʻiate kinautolu naʻá ku moʻua ki ai kuó u fakatau atu ʻa kimoutolu ki aí? ʻIo, kuó u fakatau ʻa kimoutolu kia hai? Vakai, kuo mou fakatau ʻa kimoutolu koeʻuhi ko hoʻomou ngaahi angahalá, pea ko e meʻa ʻi hoʻomou ngaahi maumau-fonó, ko ia kuo tukuange ai ʻa hoʻomou faʻeé.

2 Ko ia, ʻi heʻeku haʻú, naʻe ʻikai ke ʻi ai ha tangata; ʻi heʻeku uí, ʻio, naʻe ʻikai ha taha ke tali mai. ʻE fale ʻo ʻIsileli, kuo vaivai koā ʻa hoku nimá ʻo ʻikai ai te u lava ʻo huhuʻi koé, pea ʻoku ʻikai koā haku mālohi ke u fakahaofi koe? Vakai, ʻi heʻeku folofola ʻi he valokí ʻoku ou fakamōmoa ʻa e tahí, ʻoku ou liliu ʻa honau ngaahi vaitafé ke hoko ko ha feituʻu maomaonganoa pea mo honau fanga iká ke namukū koeʻuhi kuo maha hono ngaahi vaí, pea ʻoku nau mate ko e tupu mei he fieinuá.

3 ʻOku ou fakakofuʻi ʻa e ngaahi langí ʻaki ʻa e fakapoʻuli pea ʻoku ou ngaohi ʻa e tauangaʻá ko honau kofu.

4 Kuo foaki kiate au ʻe he ʻEiki ko e ʻOtuá ʻa e ʻelelo ʻo e potó, koeʻuhi ke u ʻiloʻi ʻa e founga ke u lea ʻaki ha lea ʻi he faʻahitaʻu totonu kiate koe, ʻE fale ʻo ʻIsileli. ʻO ka mou ka helaʻia, ʻokú ne ʻā hake ʻi he pongipongi kotoa pē. ʻOkú ne fakaongo hoku telingá ke u fanongo ʻo hangē ko e potó.

5 Kuo fakaava ʻe he ʻEiki ko e ʻOtuá ʻa hoku telingá, pea naʻe ʻikai te u angatuʻu, pe tafoki meiate ia.

6 Naʻá ku tuku atu hoku tuʻá ki he tokotaha kauʻimaeá, mo hoku kouʻahé kiate kinautolu naʻa nau fusi hoku kavá. Naʻe ʻikai te u fufuuʻi hoku matá mei he manukiʻi mo ʻanuhia aú.

7 He ʻe tokoniʻi au ʻe he ʻEiki ko e ʻOtuá, ko ia ʻe ʻikai veuveuki au. Ko ia, kuó u ngaohi hoku matá ke hangē ko ha maka-afí, pea ʻoku ou ʻiloʻi ʻe ʻikai te u mā.

8 Pea ʻoku ofi mai ʻa e ʻEikí, pea ʻokú ne fakatonuhiaʻi au. Ko hai ʻe fakakikihi mo au? Tuku ke ma tutuʻu fakataha. Ko hai ʻa hoku filí? Tuku ke ne ʻunuʻunu mai kiate au, pea te u lea pea te u taaʻi ʻaki ia ʻa e mālohi ʻo hoku ngutú.

9 Koeʻuhi ʻe tokoniʻi au ʻe he ʻEiki ko e ʻOtuá. Pea ko kinautolu kotoa pē ʻe fakahalaʻi aú, vakai, te nau fakaʻau kotoa pē ʻo motuʻa ʻo hangē ko ha kofú, pea ʻe keina ʻa kinautolu ʻe he ané.

10 Ko hai ʻiate kimoutolu ʻoku manavahē ki he ʻEikí, ʻa ia ʻoku talangofua ki he leʻo ʻo ʻene tamaioʻeikí, ʻa ia ʻoku ʻeveʻeva ʻi he poʻulí, pea ʻoku ʻikai maʻu ha māmá?

11 Vakai ʻa kimoutolu kotoa pē ʻoku tafunaki ʻa e afí, pea kāpui ʻaki ʻa kimoutolu ʻa e ngaahi kalofiamá, mou ʻeveʻeva ʻi he maama ʻo hoʻomou afí pea ʻi he ngaahi kalofiama ʻa ia kuo mou tafunakí. Ko e meʻa ia te mou maʻu mei hoku nimá—te mou tokoto hifo ʻi he mamahi.