1 Pea ko ʻeni vakai, naʻe hoko ʻo pehē naʻe fanongo ʻa e kakai kotoa pē ʻo e fonuá ki he ngaahi folofolá ni, pea nau fakamoʻoni ki ai. Pea hili ʻa e ngaahi folofolá ni naʻe ʻi ai ʻa e fakalongolongo ʻi he fonuá ʻo feʻunga mo e ngaahi houa lahi.

2 He naʻe pehē fau hono lahi ʻo e ʻohovale ʻa e kakaí, ko ia naʻa nau tuku ʻenau tangí mo e tangilāulaú koeʻuhi ko e mole ʻa honau kāinga kuo maté; ko ia naʻe ʻi ai ʻa e fakalongolongo ʻi he fonuá kotoa ʻo feʻunga mo e ngaahi houa lahi.

3 Pea naʻe hoko ʻo pehē naʻe toe ongo mai ha leʻo ki he kakaí, pea naʻe fanongo ʻa e kakai kotoa pē, ʻo nau fakamoʻoni ki ai, ʻo ne folofola:

4 ʻOiauē ʻa kimoutolu ʻa e kakai ʻo e ngaahi fuʻu kolo lalahí ni ʻa ia kuo toó, ʻa ia ko e hako ʻo Sēkopé, ʻio, ʻa ia ʻoku ʻo e fale ʻo ʻIsilelí, hono ʻikai ke tuʻo lahi ʻa ʻeku tānaki fakataha ʻa kimoutolu ʻo hangē ko e tānaki fakataha ʻe he motuʻa moá ʻa hono ʻuhikí ʻi hono lalo kapakaú, peá u fafanga ʻa kimoutolu.

5 Pea ʻoku ou toe pehē, hono ʻikai ke tuʻo lahi ʻa ʻeku fie tānaki fakataha ʻa kimoutolu ʻo hangē ko e tānaki fakataha ʻe he motuʻa moá ʻa hono ʻuhikí ʻi hono lalo kapakaú, ʻio, ʻA kimoutolu ʻa e kakai ʻo e fale ʻo ʻIsilelí, ʻa ia kuo mou toó; ʻio, ʻA kimoutolu ʻa e kakai ʻo e fale ʻo ʻIsilelí, ʻa kimoutolu ʻoku nofo ʻi Selusalemá, ʻo hangē foki ko kimoutolu kuo toó; ʻio, hono ʻikai ke tuʻo lahi ʻa ʻeku fie tānaki fakataha ʻa kimoutolu ʻo hangē ko e tānaki fakataha ʻe he motuʻa moá ʻa hono ʻuhikí, ka naʻe ʻikai te mou loto ki ai.

6 ʻA kimoutolu ʻe fale ʻo ʻIsileli ʻa ia kuó u fakahaofí, ko e hā hano tuʻo lahi ʻo haʻaku tānaki fakataha ʻa kimoutolu ʻo hangē ko e tānaki fakataha ʻe he motuʻa moá ʻa hono ʻuhikí ki hono lalo kapakaú, ʻo kapau te mou fakatomala pea tafoki kiate au ʻi he loto-fakamātoato.

7 Ka ʻikai, ʻE fale ʻo ʻIsileli, pea ʻe hoko ʻo lala ʻa e ngaahi potu ʻo homou ngaahi nofoʻangá kae ʻoua ke hokosia ʻa e taimi ʻo hono fakahoko ʻo e ngaahi fuakava naʻe fai ki hoʻomou ngaahi tamaí.

8 Pea ko ʻeni naʻe hoko ʻo pehē ʻi he hili ʻa e fanongo ʻa e kakaí ki he ngaahi folofola ní, vakai, naʻa nau kamata ke toe tangi mo ngala koeʻuhi ko e mole ʻo honau kāingá mo e ngaahi kaumeʻá.

9 Pea naʻe hoko ʻo pehē naʻe ʻosi pehē atu ʻa e ʻaho ʻe tolú. Pea kuo pongipongi, pea kuo mole atu ʻa e fakapoʻulí mei he funga ʻo e fonuá, pea naʻe tuku ʻa e ngalulululu ʻa e fonuá, pea naʻe ʻosi ʻa e mafahifahi ʻa e ngaahi maká, pea naʻe ʻosi mo e ngaahi ʻuʻulu fakailifia ʻa e fonuá, pea naʻe ʻosi mo e ngaahi fuʻu longoaʻá.

10 Pea naʻe toe fehokotaki fakataha ʻa e fonuá, ʻo tuʻu maʻu; pea ko e tengihia, mo e tangi, mo e ngala ʻa e kakai kuo fakamoʻuí naʻe ʻosi ia; pea naʻe liliu ʻenau tengihiá ko e fiefia, pea mo ʻenau ngaahi tangilāulaú ko e fakamālō mo e fakafetaʻi ki he ʻEiki ko Sīsū Kalaisi, ko honau Huhuʻí.

11 Pea kuo fakahoko ʻo aʻu mai ki he ʻaho ko iá ʻa e ngaahi folofola kuo lea ʻaki ʻe he kau palōfitá.

12 Pea ko kinautolu naʻe māʻoniʻoni ange ʻi he kakai naʻe fakamoʻuí, pea ko kinautolu ia naʻa nau tali ʻa e kau palōfitá kae ʻikai tolomakaʻi ʻa kinautolú; pea ko kinautolu ia naʻe ʻikai te nau lilingi ʻa e toto ʻo e kau māʻoniʻoní, ʻa ia naʻe fakamoʻuí—

13 Pea naʻe fakamoʻui ʻa kinautolu ʻo ʻikai fakangalo hifo mo tanu ʻi he kelekelé; pea naʻe ʻikai fakamelemo ʻi he ngaahi loloto ʻo e tahí; pea naʻe ʻikai tutu ʻaki ʻa e afí, pea naʻe ʻikai tanu hifo ʻo laiki ke maté; pea naʻe ʻikai ʻave atu ʻa kinautolu ʻi he ʻahiohió; pea naʻe ʻikai fulutāmakia ʻi he mao ʻo e ʻahú mo e fakapoʻulí.

14 Pea ko ʻeni, ko ia ia ʻokú ne lau ʻení, tuku ke mahino kiate ia; ko ia ia ʻokú ne maʻu ʻa e ngaahi folofolá, tuku ke ne fakatotolo ai, peá ne mamata mo vakai pe ʻoku ʻikai ʻi he ngaahi maté mo e ngaahi fakaʻauhá ni ʻi he afí, mo e ʻahú, mo e ngaahi afaá, mo e ngaahi ʻahiohió, pea ʻi he fakamanga hake ʻa e kelekelé ke folo hifo ʻa kinautolú, pea mo e ngaahi meʻá ni kotoa pē ʻa hono fakahoko ʻo e ngaahi kikite ʻa e tokolahi ʻo e kau palōfita māʻoniʻoní.

15 Vakai, ʻoku ou pehē kiate kimoutolu, ʻIo, kuo fakamoʻoni ʻa e tokolahi ki he ngaahi meʻá ni ʻi he hāʻele mai ʻa Kalaisí, pea naʻe tāmateʻi ʻa kinautolu koeʻuhi ko ʻenau fakamoʻoni ki he ngaahi meʻá ni.

16 ʻIo, naʻe fakamoʻoni ʻa e palōfita ko Seinosí ʻo kau ki he ngaahi meʻá ni, pea lea foki mo Seinoki ki he ngaahi meʻá ni, koeʻuhi ʻoku nau fakamoʻoni ʻo tautefito kiate kimautolu, ʻa ia ko e toenga ʻo honau hakó.

17 Vakai, naʻe fakamoʻoni foki mo ʻetau tamai ko Sēkopé ʻo kau ki ha toenga ʻo e hako ʻo Siosefá. Pea vakai, ʻoku ʻikai koā ko e toenga ʻa kitautolu ʻo e hako ʻo Siosefá? Pea ko e ngaahi meʻá ni ʻoku fakamoʻoni ʻo kau kiate kitautolú, ʻikai koā kuo tohi ʻi he ngaahi peleti ʻo e palasa ʻa ia naʻe ʻomi ʻe heʻemau tamai ko Līhai mei Selusalemá?

18 Pea naʻe hoko ʻo pehē ʻi he konga fakamuimui ʻo hono tolungofulu mā fā ʻo e taʻu, vakai, te u fakahā kiate kimoutolu ko e kakai ko ia ʻo Nīfai naʻe fakahaofí, kae ʻumaʻā foki mo kinautolu naʻe ui ko e kau Leimaná, ʻa ia naʻe fakahaofí, naʻe fai kiate kinautolu ha ngaahi lelei lahi, pea lilingi hifo ha ngaahi tāpuaki lahi ki honau ʻulú, ko ia ʻi he hili leva ʻa e hāʻele hake ʻa Kalaisi ki he langí, naʻá ne fakahā moʻoni ia ʻe ia kiate kinautolu—

19 ʻO ne fakahā hono sinó kiate kinautolu, mo akonaki kiate kinautolu; pea ʻe fai ha fakamatala ki heʻene ngāué ʻamui ange. Ko ia ʻoku ou fakaʻosi ʻi he taimí ni ʻa ʻeku ngaahi leá.