1 Pwacyena, pwacyena, Nga fahk lah Nga kena tuh kowos enenuh in oruh orekma wo nuh sin mwet suhkahsruhp; tuhsruhk liyacacng tuh kowos in tiac oruh orekma wo lowos ye muhtuhn mwet uh tuh elos in liye; fin tiac ohinge ac fah wacngihn molo sin Pahpah tomowos suc oasr inkuhsrao.

2 Ke ma inge, ke kowos fah oruh orekma wo lowos nimet ukyac mwe ukuk met liki kowos, oacna ke mwet wosounkacs elos oruh ke iwen lohlngohk ac ke inkacnek uh, tuh elos in kuh in kaksakihnyuck sin mwet uh. Pwacyena Nga fahk nuh suwos, elos eis tari molo.

3 Tuhsruhk ke kowos oruh orekma wo lowos nimet lwelah lacpo lacsac lowos in etuh lah meac lacpo lacyot lowos oruh;

4 Tuh orekma wo lowos in kuh in orek ke lukmac; ac Pahpah tomowos suc liye ke lukmac, El sifacna fah usot molo inwalihl.

5 Ac ke kowos pruhe kowos fah tiacna oruh oacna mwet wosounkacs, tuh elos luhngse pruhe, tulac ke iwen lohlngohk ac ke srowasrihk inkacnek uh, tuh elos in kuh in liyeyuck sin mwet uh. Pwacyena Nga fahk nuh suwos, elos eis tari molo.

6 Tuhsruhk kom, ke kom pruhe, ilyak nuh infuhkihl sum, ac ke kom kaliyac sruhnguhl uh, pruhe nuh sin Pahpah tomom suc oasr in lukmac; ac Pahpah tomom, suc liye ke lukmac, fah usot molo inwalihl.

7 Tuhsruhk ke kom pruhe, nimet kom kalweni in fahk ma wacngihn srihpac, oacna mwet pegan, tuh elos nuhnkuh muh elos fah lohngyuck ke sramsram yohk lalos.

8 Ke ma inge nimet kowos oruh oacna elos, tuh Pahpah tomowos El etuh ma kowos enenuh met liki kowos siyuck Sel.

9 Ke ma inge tukun ohiyac se inge kowos pruhe: Pahpah tuhmasr suc oasr inkuhsrao, muhtahl Inem.

10 Luhngse Lom in orek fin facluh oacna ke orek inkuhsrao.

11 Ac nuhnakmuhnahs nuh sesr ke ma koluk lasr, oacna ke kuht nuhnakmuhnahs nuh sin mwet suc orekma koluk nuh sesr.

12 Ac tiac kol kuht nuh ke mwe sruhf, tuhsruhk eiskuhtlac liki ma koluk.

13 Tuh tohkohsrahi ma Lom, ac kuh, ac wolacna, ma pahtpaht. Amen.

14 Tuh, kowos fin nuhnakmuhnahs nuh sin mwet uh ke orekma koluk lalos Pahpah tomowos inkuhsrao El fah oacyacpac nuhnakmuhnahs nuh suwos;

15 Tuhsruhk kowos fin tiacna nuhnakmuhnahs nuh sin mwet uh ke orekma koluk lalos Pahpah tomowos El fah tiac pac nuhnakmuhnahs nuh suwos ke orekma koluk lowos.

16 Yohkna, ke kowos lalo nimet oruh oacna mwet wosounkacs, in ngwetngwet in ahsor, tuh elos pihlesruh muhtahlos tuh elos in kuh in akihlenyuck sin mwet uh muh elos lalo. Pwacyena Nga fahk nuh suwos, elos eis tari molo.

17 Tuhsruhk kowos, ke kowos lalo, akmuhsraelah insifowos, ac twacnlah motowos;

18 Tuh kowos in tiac ahkkahlwemye nuh sin mwet uh lah kowos lalo, tuhsruhk nuh sin Pahpah tomowos, suc in lukmac; ac Pahpah tomowos, suc liye ke lukmac, fah usot molo inwalihl.

19 Nimet elohsack mwe kahsruhp nuh suwos sifacna fin facluh, yen watihl ac ras ac kuhnahoslah, ac mwet pihsrapasr elos ac kuhnahoslah utyak ac pihsrwaclah;

20 Tuhsruhk elohsack mwe kahsruhp nuh suwos sifacna inkuhsrao, yen watihl kuh ras tiac kuh in kuhnahoslah, ac yen ma mwet pihsrapasr elos tiacna kuh in kuhnahoslah utyak kuh pihsrwaclah.

21 Tuh yen ma sacohk lowos oasr we, insiowos oacyacpac oasr we.

22 Lahm luhn mahno uh pa ahtron muhta; ke ma inge, fin ahtron motom suwohswohs, monum nohfohn fah sesseslah ke kahlwem.

23 Tuhsruhk fin ahtron motom koluk, monum nohfohn fah sesseslah ke lohsr. Ke ma inge, fin kahlwem ma oasr in kom uh lohsr, fuhkah yohkiyacn lohsr uh!

24 Wacngihn kuhtwena mwet kuh in kuhlwacnsapuh leum luo; tuh el fah sruhnga sie ac luhngse mwet se sahyac, kuh fin tiac ohinge el fah pwacye nuh sin sie ac koase mwet se sahyac an. Kowos tiacna kuh in kuhlwacnsapuh God ac ma Kahsruhp.

25 Ac na tukun ma inge ke Jisus El fahklah kahs inge El ngwetwacng nuh yurun mwet singuculluo suc El tuh sulaclah, ac fahk nuh selos: Esam kahs ma Nga sruhmuhn uh. Tuh liye, kowos pa elos suc Nga sulaclah in luti nuh sin mwet inge. Ke ma inge Nga fahk nuh suwos, nimet nuhnkuh ke moul lowos, lah meac kowos fah kang, kuh meac kowos fah nihm; kuh nuh ke monuwos, meac kowos ac nukum. Yac moul uh tiac sacohk liki ikoac, ac mahno uh liki nuknuk?

26 Liye won yen engyeng uh, tuh elos tiac yok fihtac, elos tiac pac kosrwacni kuh oracni fahko uh nuh ke nien fihlma; tuhsruhk Pahpah tuhmowos inkuhsrao El kihtaclos. Yac kowos tiac sacohk luhkwelos?

27 Suc kac suwos ke kom fosrngah yac kom kuh in kap loesaclihk cubit se?

28 Ac efuh kom fosrngah ke nuknuk? Motko ke ros lili ke innimac uh lah elos kap fuhkah; elos tiac orekma, elos tiac pac orek nuknuk;

29 Ac tuhsruhk Nga fahk nuh suwos, lah finne Solomon, ke wolacna nuhkwewa lal, el tiacna nukum nuknuk yucnlac kahto oacna sie sin ros inge.

30 Ohinge, God El fin yucnwelah mah innimac uh, ma oasr misenge, ac litu ac sisiyang nuh ke nien manman, finne ohinge El fah nukum kowos, fin tiac srihklac luhlahlfongi lowos.

31 Ke ma inge nimet fosrngah, fahk, Meac kuht ac kang? kuh, Meac kuht ac nihm? kuh, Meac kuht ac nukum?

32 Tuh Pahpah tomowos inkuhsrao El etuh lah kowos enenuh ma inge nuhkwewa.

33 Tuhsruhk kowos in suk met tohkohsrahi luhn God ac suwohswohs Lal, ac ma inge nuhkwewa fah utuckot nuh suwos.

34 Ke ma inge nimet fosrngah ke lwen litu uh, tuh lwen litu uh ac fah fosrngahkihn ma la sifacna. Fal ma in fosrngahkihnyuck ke kais sie lwen.