1 Na afei ɔbaa dɛ ber a Jesus kãa dɛm nsɛm yi wiei no ɔdaan noho bio hwɛɛ nyimpadodow no na obuee n’ano kasaa kyerɛɛ hɔn bio dɛ: Nokwar, nokwar, mese hom dɛ, Mma hom mmbu atsɛn, amma woemmbu hom atsɛn.

2 Na atsɛmbu kor a hom dze bobu no, wɔdze bobu hom; na esusudze kor a hom dze susu no, wɔdze bosusu ama hom.

3 Na ɔyɛ dɛn na ehwɛ duaba a ɔwɔ wo nua enyiwa mu, na enndwen mpuna a ɔwɔ w’ankasa w’enyiwa mu ho?

4 Anaaso dɛ ebɛyɛ dɛn ase wo nua dɛ: Ma minyi duaba mfi w’enyiwa mu, na hwɛ, mpuna wɔ w’ankasa w’enyiwa mu?

5 Ɔwo onyisomkyerɛnyi, dzi kan yi mpuna fi w’ankasa w’enyiwa mu; nna ibohu yie eyi duaba no efi wo nua enyiwa mu.

6 Mma hom mmfa dza no ho tsew no mma nkraman, eso mma hom nntow hom bota nngu mpreko enyim, amma wɔammfa hɔn anan enntsiatsia do, na wɔannsan bio ammbɛtsetsew hom mu.

7 Hom mbisa na wɔbɛma hom; hom nhwehwɛ na hom bohu; hom mbɔ mu na wobobue hom.

8 Na obiara a obisa no onya; na nyia ɔhwehwɛ no ohu; na nyia ɔbɔ mu no wobobue no.

9 Anaaso dɛ hom mu woana, na sɛ ne ba bisa no paanoo a, ɔbɛma no ɔbo?

10 Anaaso sɛ obisa no esunam a ɔbɛma no ɔwɔ?

11 Sɛ hom a hom muo yi nyim mbrɛ hom si dze akyɛdze pa ma hom mba a, mpɛn ahen ara na hom Egya a ɔwɔ sor no nnkɛfa ndzɛmba pa ama hɔn a wobisa no?

12 Dɛm ntsi, adze biara a hom pɛ dɛ nyimpa yɛ ma hom no, hom nyɛ dɛmara so mma hɔn, na iyi nye mbra no nye nkɔnhyɛfo no.

13 Hom nhɛn abow tseaba no mu, na abow a ɔtsɛw, na ɔkwan a ɔyɛ tɛtɛr nye dza wɔdze kɔ ɔsɛɛ mu, na piinara wɔ hɔ a wɔfa mu.

14 Osiandɛ abow a ɔyɛ tseaba na ɔkwan a ɔyɛ heaheaba nye dza wɔdze kɔ nkwa mu, na kumaabi na wohu.

15 Hom nhwɛ yie wɔ nkɔnhyɛfo atorfo ho, na wɔba hom nkyɛn wɔ nguannwoma akataho mu, na hɔn mu dze, wɔyɛ mpataku edzifodzipɛfo.

16 Hɔn aba na hom dze bohu hɔn. Ana nyimpa tsetsew wenyin aba wɔ nsoɛ do, anaaso adɔmba wɔ kɔkrɔ do?

17 Dɛmara na dua pa ɔsow eduaba pa; na dua a ɔaprɔw dze, ɔsow eduaba bɔn.

18 Dua pa nntum nnsow eduaba bɔn, na eso dua a ɔaprɔw nntum nnsow eduaba pa.

19 Dua biara a ɔnnsow eduaba pa no, wotwa, na wɔtow kyen gya mu.

20 Dɛm ntsi hom dze hɔn eduaba bohu hɔn.

21 Nnyɛ obiara a ɔse me dɛ, Ewuradze, Ewuradze, na ɔbɔkɔ sor ahenman no mu; na nyia ɔbɛyɛ m’Egya a ɔwɔ sor no ne pɛ a.

22 Da no mu no dodowara bɛse me dɛ Ewuradze, Ewuradze, ana yɛammfa wo dzin annhyɛ nkɔm, na yɛammfa wo dzin enntu mbɔnsam, na yɛammfa wo dzin annyɛ tum ndwuma pii?

23 Na aber no, mebɛpaa mu makã akyerɛ hɔn dɛ: Minnyin hom da; hom mfi me nkyɛn nkɔ, hom a hom yɛ emumuyɛ ndwuma.

24 Dɛm ntsi, obiara a otsie me nsɛm yi na ɔyɛ no, medze no bosusu badwembanyi a osii ne dan wɔ ɔbotan do no—

25 Na nsu tɔree, na nsuyirii bae, na ehum tui, ma wɔboor dan no, na ɔannhwe ase, osiandɛ wɔtoow ne fapem wɔ ɔbotan do.

26 Na obiara a otsie me nsɛm yi na ɔnnyɛ no, wɔdze no bosusu kotobonyi a osii ne dan wɔ anhwea do—

27 Na nsu tɔree, na nsuyirii bae, na ehum tui boor dan no, na ɔhwee ase, na n’asehwe no sõ.