1 Ac na tukun ma inge ke Jisus El ahksahfye kahs inge El ngwetngwet raunweack acn uh nuh yurun un mwet pucspucs sac, ac fahk nuh selos: Liye, kowos lohng ma suc Nga luti met liki Nga sowack nuh yurun Pahpah tuhmuhk; ke ma inge, kuhtwena mwet suc esam kahs Luhk inge ac oruh ma inge, Nga fah ahkmoulyaclwack ke lwen sahflah.

2 Ac tukun ma inge ke Jisus El fahklah kahs inge El puhlakihn lah oasr mwet inmahsrlolos suc motko, ac nuhnkuh lah meac kena Lal nuh ke masap lal Moses; tuh elos tiacna kahlwem ke mwe fahk se lah ma mahtuh uh somlah, ac ma nuhkwewa eklac sasuc.

3 Ac El fahk nuh selos: Nimet motko muh Nga fahk nuh suwos lah ma mahtuh uh somlah, ac ma nuhkwewa eklac sasuc.

4 Liye, Nga fahk nuh suwos lah masap sac ahkpwacyeiyucklac ma tuh ituckyang nuh sel Moses.

5 Liye, Nga pa El suc sang masap sac, ac Nga pa El suc wuhlweacng nuh sin mwet Luhk Israel; ke ma inge, masap uh ahkpwacyeiyucklac Keik, tuh Nga tuhkuh in ahkpwacyei masap uh; ke ma inge masap sac sahflah.

6 Liye, Nga tiacna kuhnahoslah mwet pahluh, kahs in pahluh ma soenna ahkpwacyeiyucklac Keik, pwacyena Nga fahk nuh suwos, ac fah ahkpwacyeiyucklac.

7 Ac ke srihpen Nga fahk nuh suwos lah ma mahtuh uh somlah, Nga tiac kuhnahoslah ma tuh sruhmuhnyuck ke ma ac tuhkuh.

8 Tuh liye, wuhlweacng se ma Nga tuh oraclah nuh sin mwet Luhk soenna ahkpwacyeiyucklac nohfohn; tuhsruhk masap se ma tuh ituckyang nuh sel Moses sahflah Keik.

9 Liye, Nga pa masap, ac kahlwem. Ngwet nuh Yuruk, ac muhtweng ne ke na sahflah, ac kowos fah moul; tuh nuh sel suc muhtweng ne ke na sahflah Nga fah sang moul ma pahtpaht.

10 Liye, Nga usot nuh suwos masap; ke ma inge liyacacng masap Luhk. Ac pa inge masap ac mwet pahluh, tuh pwacyena elos fahkwack Keik.

11 Ac na tukun ma inge ke Jisus El fahklah kahs inge, El fahk nuh selos mwet singuculluo suc El tuh sulaclah:

12 Kowos pa mwet tuhma lutlut Luhk; ac kowos pa sie kahlwem nuh sin mwet inge, suc pa sie un mwet luhlah luhn mwet lal Joseph.

13 Ac liye, pa inge acn in usru lowos; ac Pahpah El usot ma inge nuh suwos.

14 Ac tiac ke kuhtwena pacl Pahpah El acse nuh Sihk masap tuh Nga in fahk ma inge nuh sin mwet wiyowos fin acn Jerusalem.

15 Tiac pacna ke kuhtwena pacl Pahpah El acse nuh Sihk masap tuh Nga in fahk nuh selos ke sruf sahyac luhn mwet Israel, suc Pahpah El tuh kohllah liki acn we.

16 Pa inge ma Pahpah El sapkihn nuh Sihk, tuh Nga in fahk nuh selos:

17 Tuh oasr sip sahyac Luhk suc tiac ma ke u se inge; oacyacpac Nga enenuh in usaclos, ac elos fah lohng puhsrwek; ac fah oasr sie u, ac sie mwet shepherd.

18 Ac inge, ke srihpen lihkkeke ac suhlahlahlfongi, elos tiacna kahlwem ke kahs Luhk; ke ma inge Nga sapkihnyuck in tiac fahk kuhtwena ma sin Pahpah ke ma se inge nuh selos.

19 Tuhsruhk, pwacyena, Nga fahk nuh suwos lah Pahpah El sapkihnyuc, ac Nga fahk ma inge nuh suwos, lah kowos sriyucklac liki inmahsrlolos ke srihpen ma koluk lalos; ke ma inge ma ke srihpen ma koluk lalos tuh oruh elos tiac etuh keiwos.

20 Ac pwacyena, Nga sifilpac fahk nuh suwos lah sruf sahyac Pahpah El srwelah luhkwelos; ac ma ke srihpen ma koluk lalos tuh oruh elos tiac etuh kaclos.

21 Ac pwacyena Nga fahk nuh suwos, tuh kowos pa elos suc Nga fahk: Oasr sip sahyac nuhtihk ma tiac ma ke u se inge; Nga enenuh pac in usaclosme, ac elos fah lohng puhsrwek; ac fah oasr u sefanna, ac mwet shepherd sefanna.

22 Ac elos tiac kahlwem Sihk, tuh elos nuhnkuh muh sip sahyac uh pa mwet Gentile; tuh elos tiac kahlwem kac lah mwet Gentile ac forlah ke luti lalos.

23 Ac elos tiac kahlwem Sihk ke Nga fahk lah elos enenuh in lohng puhsrwek; ac elos tiacna kahlwem Sihk lah mwet Gentile elos ac tiacna ke kuhtwena pacl lohng puhsrwek—lah Nga tiac enenuh in ahkkahlwemyeyuc sifacna nuh selos sahyacn na ke Nguhn Muhtahl.

24 Tuhsruhk liye, kowos lohng puhsrwek, ac liyeyuc; ac kowos sip nuhtihk; ac kowos oacwaclah inmahsrlolos suc Pahpah El acse nuh Sihk.